1 Áádóó baa hoolzhiizh ashdlaʼ yihah góneʼ dahwéeʼaahgo dine bitahgóó saad ałchʼįʼ adeiyiiniił daazlį́į́ʼ; háálá hastiin léiʼ, Amlici wolyé, éí diné ayóó binaʼadloʼ, aooʼ nahasdzáán bikáaʼgi ntsáhákeesígi átʼáo bił ééhózin, éí hastiin Gideon béésh hał yee yiyísxínée yikééʼ sizí, éí beehazʼáanii bikʼehgo bidiisxį́.

2 Áko díí Amlici, binaʼadloʼígíí, diné ląʼígo dahyíidiiʼeezh, éí ayóó dabidziil daazlį́į́ʼ; dóó Amlici diné yikʼi aláahdi naatʼáanii dooleełgo yíndadiilnish.

3 Áko diné sodizin daʼatahígíí yikʼee dadeesyiz, dóó tʼáá ałtso tʼáadoo Amlici bindaʼazloʼígíí ałdóʼ, hááłá éí beehazʼáanii bił béédahózin éí diné ádaanínígíí bikʼehgo tʼéiyá hashtʼédaalneʼ.

4 Éí bąą, Amlici diné ádaanínígíí bichʼijígo daazlį́į́ʼ, bí, diné doo yáʼáshóonii, sodizinjígo dóó diné tʼáá áltso yee átʼéhígíí dóó yee sizínígíí bighadoolyééł; háálá Diyin God bisodizin yidoołchxǫǫłgo yinízin.

5 Áádóó baa hoolzhiizh diné adahwiisʼáágóó áłah daazlį́į́ʼ, tʼáá áłtso diné yaa ntsékeesígíí bikʼehgo, Amlici bichʼijí éí doodaiiʼ bitsʼą́ą́jí daatsʼí, ałʼąą dah deíkáahgo, ląʼígo ntsáhákees binahjįʼ ahił saad dahółǫ́.

6 Áádóó áłah daazlį́į́ʼ yaa nídaatʼínígíí yaa hadadoodzih biniyé; éí ándahwiiʼaahii yidááhdóó yee hadahaasdzį́į́ʼ.

7 Áádóó baa hoolzhiizh diné Amlici yikʼijįʼ hadahásdzį́į́ʼ, tʼáadoo diné biʼaláahdi naatʼáanii abiʼdiilyaa da.

8 Ákohgo díí bikʼijįʼ danilínée tʼáá íiyisíí bijéí biyiʼdi bił dahóózhǫǫd; ákondi Amlici diné bichʼijí danilínée éí diné bitsʼą́ą́jí daazlį́ʼígíí deijoołáago yił hahonííłchaad.

9 Áádóó baa hoolzhiizh áłah silį́į́ʼ, dóó Amlici aláahdi naatʼáanii dooleełgo deiyíísį́į́ʼ.

10 Áko Amlici aláahdi naatʼáanii abiʼdilyaago bikʼiské yikʼiidoojahgo bichʼįʼ hashtʼeʼádadoołnééh yidííniid, dóó yikʼi bóhólníih dooleeł biniyé kódzaa.

11 Áko Amlici bidineʼé éí Amlici bizhí bee bééhoʼdílzin, éí Amlici dineʼé daosyeʼ; chʼeedziʼígíí éí Nephi dineʼé daosyeʼ, éí doodago Diyin God bidineʼé.

12 Éí bąą Nephi bidineʼé Amlici dineʼé adadooniłígíí yaa ákodanízin, dóó éí bąą yichʼįʼ hashtʼeʼádaʼdiilyaa; aooʼ, béésh hał, dóó béésh hał nídaazhahí, dóó kʼaaʼ, dóó tsé, dóó bee adiltłʼį́hí, dóó bee daʼahijigą́ ałʼąą átʼéego, ádaalyaaígíí yee hadadiidzaa.

13 Áádóó díigi átʼáo Amlici dineʼé yíkaigo yichʼįʼ hashtʼeʼádaʼdiilyaa. Áádóó ndaabaah ánéelą́ʼígíí bikʼehgo naatʼáanii, hódahdi naatʼáanii, dóó ałkeeʼ dahnáázdáago ádeiyiilaa.

14 Áádóó baa hoolzhiizh Amlici éí bihastóí bee daʼahijigą́ ałʼąą átʼéego ádaalyaaígíí yee haidiilaa; áádóó bidineʼé yikʼi dahóoʼaahígíí dóó naatʼáanii yikʼihidiilnííh, bikʼis yichʼįʼ ndadoobaah biniyé.

15 Áádóó baa hoolzhiizh Amlici dineʼé dah yiskid Amnihudi haaskai, éí Sidon tooh nílínígíí haʼaʼaahjigo, Zarahemla kéyah bitsį́įgi chʼínílį́, dóó áadi Nephi dineʼé yił ałkʼiijééʼ.

16 Áko Alma, tsʼídá aláahdi ánahwiiʼaahii dóó Nephi bidineʼé binantʼaʼí, éí bąą bidineʼé yił deezbaaʼ, aooʼ, nidaabaahii bindaatʼáanii, dóó nidaabaahii aláahdi bindaatʼáanii yił, aooʼ, binidaabaahii yitsijįʼ, Amlici dineʼé yikʼijįʼ dadeezbaaʼ.

17 Áádóó dah yiskʼid Sidon haʼaʼaahjigo Amlici dineʼé nideiʼniiłtseed. Áádóó Amlici dineʼé yéigo adziilii yee Nephi dineʼé yikʼiijééʼ, áko Amlici dineʼé éí Nephi dineʼé ląʼí da nideistseed.

18 Ákótʼée ndi Bóhólníihii Nephi dineʼé dabidziilgo áyiilaa, áko Amlici dineʼé ląʼí nideistseed, dóó bitsʼą́ą́jigo dah dadíníichą́ą́ʼ.

19 Áádóó baa hoolzhiizh Nephi dineʼé éí Amlici dineʼé yíká nidaabaahgo iʼííʼą́, dóó ląʼí da nideistseed, áko naakitsʼáadah dimíil yázhí dóó baʼaan ashdladi neeznádiin doo baʼaan tʼadiin naaki Amlici dineʼé naaztseed; áádóó hastą́ą́ dimííł yázhí dóó baʼaan ashdladi neeznádiin dóó baʼaan hastą́diin naaki Nephi dineʼé naaztseed.

20 Áádóó baa hoolzhiizh Alma Amlici dineʼé yikééʼ nidaazbaaʼ dóó bikʼijįʼ Gideon chʼíhootsodi biníbaal nideiznil, chʼíhootsooígíí Gideon bee wóójiʼ éí Nehor bibéésh hał yee yiyiisxínée átʼį́; díí hootsoohgi Nephi dineʼé tłʼééʼ hazʼlį́įgo biníbaal nideiznil.

21 Áádóó Alma hadaʼasíidii Amlici dineʼé chʼéédzíʼígíí yichʼįʼ ayiisʼą́, áko bindahatʼą́ dóó yindahazʼánée bił béédahodoozįįł biniyé, áko yee achʼąąh ádaa áhályą́ą doo biniyé, áko bidineʼé yaa áhályą́ągo doo nidootsił da.

22 Áko Amlici dineʼé dah yinéełgi hadeisííd doo biniyé ayiisʼaʼ yę́ę éí Zeram, dóó Amnor, dóó Manti, dóó Limher daolyé; díí éí bahastóí yił Amlici dineʼé dah yinéełdi yikʼi dadéezʼį́į́ʼ ńtʼę́ę́ʼ.

23 Áádóó baa hoolzhiizh biiskání Nephi dineʼé dah yinéełgi tsxį́įłgo naníjééʼ, yéego dadeesxíz, dóó nídaaldzidgo, ádaaní:

24 Áko shooh, Amlici dineʼé yinéełgo bikééʼ niikai, dóó ayóó bikʼee dadeelyiz, Minon kéyahdi, Zarahemla kéyah bitsʼíjįʼ, Nephi bikéyah bichʼįʼ atiingi, Laman dineʼé tʼóó ahayóí dah yinéełgo deiltsą́, dóó áko shooh, Amlici dineʼé yił ahíikai lá.

25 Áádóó áadi kéyah nihikʼiské yikʼííjééʼ; dóó bilį́į́ʼ, dóó bedaʼasdzáán, dóó baʼáłchíní, nihikin haalʼáajįʼ yitsʼą́ą́ deiyíjeeh, dóó doo tsxį́į́ł ádeitʼį́į́góó nihikintah bí dadooleeł dóó danihizhéʼé, dóó niheʼdaʼasdzááń, dóó nihaʼáłchíní nideidoołtsxił.

26 Áádóó baa hoolzhiizh Nephi bidineʼé biníbaal nídeidiinil dóó chʼíhootso Gideondóó dah diiná bikintah bichʼijigo, éí Zarahemla kintah.

27 Áádóó áko shooh, tooh Sidon yiiʼ yikahgo, Laman dineʼé dóó Amlici dineʼé, tónteel bibąąhgóó séí yiláhígi ánéélą́ą́ʼ, nahalingo, bikʼiihkai ndabidoołtsił biniyé.

28 Ákótʼée ndi, Nephi dineʼé Bóhólníihii bidziil ádabiilaa, yéego yichʼįʼ sodadoolzin áko biʼanááʼ yitsʼą́ą́dóó yisdábidooʼish, éí bąą Bóhólníihii nídeiyookąąh yę́ę bidiiztsʼą́ą́ʼ, dóó dabidziil áyiilaa, áko Laman dineʼé dóó Amlici dineʼé bidááh nidaaztseed.

29 Áádóó baa hoolzhiizh Alma éí Amlici béésh hał yee yił ahoogą́ą́ʼ, tʼáá áyidíjįʼ; dóó yéego ahoogą́ą́ʼ, tʼáá áłah.

30 Áádóó baa hoolzhiizh Alma, Diyin God yá sizį́įgo, beʼoodląʼ bidziilgo yee, sodoolzin, kóní: O, Bóhólníihii, shaajiiníbaah dóó sheʼiinaʼ tʼáá náásyiitʼih doo, áko nibeenaʼanishí nishłį́įgo díí diné yisdádeeshʼish dóó baa áhodeeshyąął.

31 Ákohgo Alma kódííniidgo Amlici yił nááʼahoogą́ą́ʼ, áko bidziil ábiʼdiilyaa, áádóó Amlici béésh hał yee yiyiisxį́.

32 Áádóó Laman dineʼé aláahdi binaatʼáanii ałdóʼ yił ahoogą́ą́ʼ; ákondi Laman dineʼé aláahdi binaatʼáanii Alma yitsʼą́ą́jigo dahyiteʼ dóó baa ádahalyáanii Alma yił daʼahidoogą́ąłgo yichʼįʼ ayiisʼaʼ.

33 Ákondi Alma, baa ádahalyáanii yił, Laman dineʼé biʼaláahdi naatʼáanii yił daʼahoogą́ą́ʼ lá nideistseed dóó nátʼą́ą́ʼ adeineeskaad.

34 Áádóó ałtso nahjįʼ kódayiilaa, éí doodago táh bąąhgi, éí tooh Sidon eʼeʼaahjígo, Laman dineʼé daneeznánígíí taah ádeiyiistłʼííd, áko bidineʼé báʼhwiidooʼaałgo tó tsíʼnaa ndoonééł biniyé dóó Laman dineʼé dóó Amlici dineʼé tooh Sidon eʼeʼaahjí yił daʼahidoogą́ą́ł.

35 Áádóó baa hoolzhiizh tooh Sidon tʼáá átʼé báhátxis yíkaigo Laman dineʼé dóó Amlici dineʼé bitsʼą́ąjigo dahdiijééʼ, azhą́ ayóó anéelą́ą́ʼ dóó doo wóltaʼ átʼée da ndi.

36 Áádóó Nephi dineʼé yitsʼą́ąjįʼ dahdiijééʼ diné doo kééhatʼíní góneʼ éí eʼeʼaah dóó náhookǫsjigo, kéyah nineelʼánígíí bilááhgóó; dóó Nephi dineʼé éí beʼadziil yee yikééʼ yijah, dóó nideistseed.

37 Aooʼ, tʼáá ałtsojigo bidááh nidaʼiisdeeʼ, dóó ndabiʼdinilkaadgo nidabiʼdistseed, eʼeʼaahjigo daʼníłtsʼą́ąjigo ałtsʼádabidiʼneeskaad, dóó náhookǫsjigo ałdóʼ, diné doo kééhatʼínídí jikaigo índa, éí Hermounts hoolyé; éí diné doo kééhatʼínídí naaldlooshii daʼałchiní dóó dichin dabiʼniighą́ą́ʼígíí áadi naaldeeh.

38 Áádóó baa hoolzhiizh ląʼí da diné doo kééhatʼínídi atídabiʼdiilyaaígíí yitsʼą́ą́dóó naaztseed, dóó éí naaldlooshii daʼałchinígíí dóó ałdóʼ yájeeshóóʼ daboolghal; dóó bitsʼin bikʼídaʼneestą́ą́ʼ, dóó nahasdzáán bikááʼ dah daaskʼidgo ályaa.