1 Áádóó áko baa hoolzhiizh Moroni díí saad beiyítʼą́ągo bijéí bidziilgo yee haʼoolní silį́į́ʼ, dóó tʼáá íiyisíí bił hoozhǫǫd háálá Pahoran akʼeh hółínígíí biniinaa, háálá tʼáá hó jinízingo iiná dóó bikéyah doo yitsʼą́ą́jíʼ nilinígíí ałdóʼ biniyé.

2 Ákondi ałdóʼ tʼáá íiyisii yaa yínííł niizį́į́ʼ háálá Pahoran anahwiiʼaah-dahsidáádóó doo yaʼashǫǫgo adadeineeschą́ą́ʼígíí biniinaa, aooʼ, áko háálá bikéyah dóó ałdóʼ biDiyin God yikʼijįʼ daazliʼígíí biniinaa.

3 Áádóó baa hoolzhiizh Moroni tʼáá dikwíhí ndaabaahí yił dahdiiná, Pahoran yinízinígíí bikʼehgo, dóó ndaabaahí łąʼígíí éí Lehi dóó Teancum yikʼi bóhólníígo áyiilaa, áádóó Gideon kéyahgóó dahdiiná.

4 Áádóó tʼáá bí ádeinízin yikʼehgo kéédahatʼį́ bidahnaatʼaʼí tʼáá tʼádíghááhgo dahneidiiłtsos, dóó kótʼáo Gideon kéyahgóó yiinééłgo ndadoobahígíí ahíyizhʼeezh.

5 Áádóó baa hoolzhiizh ląʼí dimííl yázhí bilááhgóó bidahnaatʼaʼí dasiłtsoozjįʼ ndahaazjééʼ, dóó bibéésh hał yee tʼáá bí ádeinízingo kéédahatʼį́ yichʼą́ą́h dahdadiibaaʼ, áko doo yisnááh adabidiʼdoolnííł da.

6 Áádóó kótʼáó, Moroni ałtso ndaabaahí ahíyizhʼeezhgo, Gideon kéyahdi níyá; dóó Pahoran bindaabaahí yił ahiikaigo tsʼídá yéego bidziil daazlį́į́ʼ, Pachus bindaabaahí bilááhgo ndi dabidziil, éí diné nihitsʼą́ą́jí daazlįʼígíí biʼaláahdi naatʼáanii nilį́ éi diné tʼáá bí adánidahatʼáhígíí Zarahemla kéyahdóóʼ chʼídeineeskaad dóó kéyah yee ádídahoosniiʼ.

7 Áádóó baa hoolzhiizh Moroni dóó Pahoran kéyah Zarahemlagóó bindaabaahí yił níná, dóó kin dashijaaʼ yikʼijįʼ dahdadiibaaʼ, dóó Pachus bindaabaahí yichʼįʼ niikai, éí daʼahidooghąął biniyé.

8 Áádóó áko shooh, Pachus biʼdiisxį́ dóó bindaabaahí dabidisnááh, dóó Pahoran anahwiiʼaahii-dah sidáádóó dah náneezdá.

9 Áádóó Pachus bandaabaahí baa dahwiinístʼįįd, bee hazʼáanii bikʼehgo, dóó ałdóʼ aláahdi naatʼáanii-bidahastóí dabidisnááhgo yah adabiʼdiisnil; dóó éí bee hazʼáanii bikʼehgo ndabiʼdiztseed; aooʼ, Pachus dóó aláahdi naatʼáanii-bidahastóí; tʼáá háíshį́į́ʼ bikéyah doo yichʼą́ą́h dadoobahígíí, ákondi yikʼijįʼ daʼahidooghááłígíí, éí ndabiʼdistseed.

10 Áádóó kótʼáó díí bee hazʼáanii tʼáá íiyisíí yikʼeh dahółʼį́įgo bikéyah yee yaaʼádahalyą́ą doo; aooʼ, tʼáá háíshį́į́ʼ tʼáá hó jinízingo kééhatʼį́ yikʼijįʼ danilínígíí habiʼdoolʼį́ʼígíí éí tʼáá tsxiłgo bee hazʼáanii bikʼehgo bidiʼyoolyééł.

11 Áádóó kótʼáó ańdahwiiʼaahii Nephi bidineʼé yikʼi dahwééʼaahgo táádiin nááhaigo ahoolzhiizh, Moroni dóó Pahoran kéyah Zarahemladi kʼé bił nahaztʼiʼgo ánáyiidlaa, tʼáá bí bidineʼé bitahgóó, tʼáá háíshį́į́ʼ tʼáá hó jinízinígíí kééhatʼį́įgo yikʼijįʼ danilínígíí ndeistseed.

12 Áádóó baa hoolzhiizh éí ańdahwiiʼaahii Nephi bidineʼé yikʼi dahwééʼaahgo tʼáadiin dóó biʼaan tʼááłaʼí náhááh, Moroni éí tʼáá tsxįįłgo chodeidoołʼįįłígíí yichʼįʼ kóyiilaa, dóó ałdóʼ hastą́ą́ʼ dimííl yázhí bándaabaahí Helaman bichʼįʼ ádoolnííł, áko éí kéyahígíí yichʼą́ą́h ndadoobahgo yee yikáʼaalwod.

13 Áádóó hastʼą́ą́ʼ dimííl yázhí ndaabaahí ałdóʼ, chʼiyáán tʼáá bííghahgoʼ, Lehi dóó Teancum bichʼį́ʼ kódoolnííł. Áádóó baa hoolzhiizh díígiʼ átʼáo Laman dineʼé kéyah bikʼijįʼ bidziilgo ályaa.

14 Áádóó baa hoolzhiizh Moroni dóó Pahoran, ląʼída hastóí ndaabaahí Zarahemla kéyahdi tʼáá áadi naaldeehgo áyiilaa, áádóó ląʼída ndaabaahí Nephihah kéyahgóó yił níná, éí Laman dineʼé tsʼídá bikʼeh dadidiidleeł danízingo éí kin dashijaaʼdi.

15 Áádóó baa hoolzhiizh éí kéyah yichʼįʼ yinééłgo, Laman dineʼé bindaabaahí ląʼída deesnááh, dóó tʼóó ahayóí ndeestseed, dóó chodeidoołʼįįł yę́ę dóó yee ndaabah yę́ę yighadeiyisnil.

16 Áádóó baa hoolzhiizh yighadeiyisnilgo, yił ahadaʼdeestʼą́ éí Nephi dineʼé yee ndaabaahí doo yikʼijįʼ yee yił hanáádadoodiłgóó ádeiyiilaa.

17 Áádóó díí yee yił ahadaʼdeestʼą́ągo Ammon bidineʼé yił keedahatʼį́į́ dooleełgóó yidaʼasniiʼ, dóó dį́į́ʼ dimííl yázhí áneilą́ągo tʼáadoo ndabiʼdistseed da lá.

18 Áádóó baa hoolzhiizh yidaʼasniiʼgo Nephihah kéyahgóó yichʼįʼ dahdadiiná. Áádóó baa hoolzhiizh Nephihah kin dashijaaʼdi nínáago, biníbaal ndeiznil Nephihah halgaigi, éí Nephihah kin dashijaaʼígíí bíighahdi.

19 Áko Moroni Laman dineʼé bichʼįʼ chʼídoonééłgo bikʼiidoojah nízin, halgaigi; ákondi Laman dineʼé, tʼáá íiyisíí doo nátʼą́ą́ ninádahinilyéésgo bił béédahózin, áádóó tʼóó ahayóíʼígíí yaa ákodaniizį́į́ʼ, éí bąą doo yichʼįʼ dadibááh da; éí bąą éí bijį́ tʼáadoo yił daʼahooghą́ą́ʼ da.

20 Áádóó tłʼéé hazlį́įʼgo, Moroni chahałhééł biyiʼgóó dahdiilwod, dóó tsé níʼą́ągo yikʼááʼ haaswod áko Laman dineʼé kin dashijaaʼ biiʼ haaʼígíí bindaabaahí yił dahyiinééłgo haiyíísid.

21 Áádóó baa hoolzhiizh haʼaʼaahjigo dahyiinééł, yah eʼeʼtiingi; dóó tʼáá átʼé daʼałwosh. Áádóó áko Moroni bindaabaahí yichʼįʼ nádzá, dóó tsxįįłgo tłʼóół dóó haazʼéí bidziilgo ádaohłééh yidííniid, éí tsé níʼá bikááʼdóó biyiʼjigo adahidooʼnił.

22 Áádóó baa hoolzhiizh Moroni bindaabaahí náás wohkah dóó tsé názʼá bikáaʼjįʼ hadoohkah yidííniid, dóó kin dashijaaʼ biyiʼ adadadoohnah yidííniid, aooʼ, eʼeʼaahjigo ndi, áajigo Laman dineʼé bindaabaahí tʼáadoo biníbaal nideeznil da.

23 Áádóó baa hoolzhiizh tłʼéé hazʼlį́įgo tʼáá ałtso kin dashijaaʼ biyiʼjįʼ adadahasnaʼ, bitłóół daditsidígíí dóó hazéí bee; áko abíní azlį́į́ʼgo tʼáá átʼée ńtʼę́ę́ʼ kin dashijaaʼígíí yahííná.

24 Áádóó áko, Laman dineʼé chʼéédaasdzíídgo Moroni bindaabaahí bił yahʼíínáago deiyiiłtsą́, tʼáá íiyisíí ndaasdzííd, chʼeʼétiin jigo chʼéheezjééʼ.

25 Áádóó áko Moroni bitsʼą́ą́jįʼ chʼéhájeehgo yiyiiłtsą́ągo, bindaabaahí yikʼijįʼ deiyíbááhgo áyiilaa, dóó ląʼí ndeistseed, dóó tʼóó áhayóí yináztʼįʼ, dóó deisnááh; tʼáá yiidziihígíí kéyah Moroni yiih dahineezchą́ą́ʼ, éí tónteel bíighahdi.

26 Áko kótʼáo Moroni dóó Pahoran Nephihah kin dashijaaʼ yee ádíhoosʼniiʼ tʼáadoo ndi tʼáá łaʼí biʼdiisyį́į da; áádóó Laman dineʼé tʼóó ahayóí ndaaztseed.

27 Áádóó áko baa hoolzhiizh Laman dineʼé tóo ahayói dabiʼdisnááhígíí Ammon bidineʼé bididiikah dóó tʼáá nihí ádeiniidzingo kéédahwiitʼį́į doo danízin.

28 Áádóó baa hoolzhiizh tʼáá łąʼída ádeinízingo, éí ádeinizinígíí bikʼehgo bá lą́ ndaʼiisdlį́į́ʼ.

29 Éí bąą, tʼáá átʼé Laman dineʼé yisnááh adabiʼdiilyaaʼígíí Ammon bidineʼé yihidiikai; dóó yéego dadeeshnish, nidahageedgo, álástsiiʼ tʼáá ałʼąą ádaatʼéii kʼideideezlá; dóó dibé dóó łį́į́ tʼáá ałtso ałʼąą ádaatʼéhíhígíí, áko Nephi dineʼé ayóó átʼáo bikʼidahooldoh; aooʼ, áko tʼáá ałtso Laman dineʼé daasnááh yę́ę yee biiʼháádahaasdoh.

30 Áádóó áko baa hoolzhiizh Moroni, Nephihah kin dashijaaʼ yee ádíhoosniiʼ bikééʼdóó, tʼóó ahayóí beʼanaaʼí yisnááhgo, éí Laman dineʼé bindaabaahí tʼáá íiyisíí ałchʼíídígo áyiilaa, éí Nephi dineʼé laʼída dabidisnááhyę́ę baa ńdaashtʼeezh, éí Laman dineʼé Moroni bindaabaahí tʼáá íiyisíí yee dabidziil silį́į́ʼ, éí bąą Moroni Nephihahdóó dahdiiyá Lehi bikéyah bichʼįʼ.

31 Áádóó baa hoolzhiizh Laman dineʼé éí Moroni bichʼįʼ deiyíbááhgo deiyiiłtsą́, ndaasdzííd dóó Moroni yándabaahí yitsʼą́ą́jįʼ dahdadínííchą́ą́ʼ.

32 Áádóó baa hoolzhiizh Moroni dóó bandaabaahí kindaatahgóó yikéé deiyíbaah, Lehi dóó Teancum bidááh níʼaazhgo índa; áádóó Laman dineʼé Lehi dóó Teancum yitsʼą́ą́jįʼ dahdadínííchą́ą́ʼ, niléí tónteel bííghahjįʼ, Moroni kéyahjįʼ níkaigo índa.

33 Áádóó Laman dineʼé bindaabaahí tʼáá átʼé ahíikai, Moroni kéyahdi tʼáá ałtso tʼáá łáhíjįʼ ahíikai. Áko Ammoron, Laman dineʼé biʼaláahdi naatʼáanii nilíinii, ałdóʼ áadi atah.

34 Áádóó baa hoolzhiizh Moroni dóó Lehi dóó Teancum bindaabaahí yił ndahazná Moroni kéyah binaagi, Laman dineʼé yináztʼiʼ doo kééhojitʼíní shádiʼááhjigo, doo kééhojitʼíní kin dashijaaʼ bíighahdi eʼeʼaahjigo.

35 Áádóó kótʼáó hiłiijį́į́ʼgo níbaal ndeeznil. Háálá áko shooh, Nephi dineʼé dóó Laman dineʼé ałdóʼ nizaadgóó nínángíí biniinaa chʼééhdeeskai; éí bąą chahóółheelgo tʼáadoo ndahazʼą́ą da, tʼáá hazhoʼó Teancum tʼéiyá; háálá áko shooh, aooʼ, háálá Ammoron tʼáá íiyisíí yichʼįʼ báháchįʼ, áko Ammoron, dóó Amalickiah bikʼis, biniinaa ayóó átʼáo dóó nízaadgóó anaaʼ bí dóó Laman dineʼé bił hoolzhiizh, éí biniinaa yéego anaaʼ dóó ndaʼahijistseed, aooʼ, dóó ląʼí da dichin dabííghą́ą́ʼ.

36 Áádóó baa hoolzhiizh Teancum báháchʼįʼgo Laman dineʼé biníbaal sinilgóó níyá, dóó kin dashijaaʼjįʼ tsé binázʼáádééʼ adaaʼnaʼ. Áádóó tłʼóół yee, ndahazʼą́ą́góó tʼádoonaʼ, áko aláahdi naatʼáanii yikʼí níyá; dóó tsiiʼdétááh yichʼįʼ ayishan dóo bijéí bíghah góneʼ eelnóód. Ákondi shooh aláahdi naatʼáanii tʼahdoo daatsaahgóó bándaalʼaʼí chʼéínízid, áko Teancum yikééʼńjééʼ, dóó dayisxį́.

37 Áko baa hoolzhiizh Lehi dóó Moroni Teancum daaztsą́ bił bééhoozingo tʼáá íiyisíí yaa yínííł silį́į́ʼ; háálá áko shooh, éí hastiin bikéyah tsʼídá yéego yichʼąąh naazbaaʼ, aooʼ, tʼáá hójinízingo iiná tʼáá aníigo bił nilį́į́ ńtʼę́ę́ʼ; áádóó ląʼí yéego achʼį nahwiiná yikʼee tiʼhoozniiʼ. Ákondi shooh, éí ájídin, dóó niʼ bikááʼdóó dah ńdiizáh.

38 Áko baa hoolzhiizh Moroni biiskání dahdiiná, dóó Laman dineʼé yichʼįʼ dadeezbaaʼ, áko ląʼí ndeistseed; dóó kéyahdóó chʼídeineeskaad; dóó dahdadínííchą́ą́ʼ, éí áádóó tʼáadoo Nephi dineʼé yikʼijįʼ náádadeezbaaʼ da.

39 Áádóó kótʼáó ańdahwiiʼaahii Nephi bidineʼé yikʼi dahwééʼaahgo táádiin dóó biʼaan tʼááłʼáʼí nááhaigo ahoolzhiizh; áádóó kótʼáó anaaʼ, dóó daʼahijighą́, dóó dichin, dóó tiʼhooʼnííh biiʼnjikaigo łaʼí nááhai.

40 Áádóó naʼatseed, dóó ałchʼįʼ ndaʼabaah, dóó ałtsʼą́ą́jí daazlį́į́ʼ, dóó ląʼí ałʼąą átʼéego doo yáʼátʼéehii Nephi bidineʼé bitah hólǫ́ǫ ńtʼę́ę́ʼ; ákotʼée ndi yáʼátʼéehii bá, aooʼ, háálá diyinkʼehgo deiyíkáhígíí bisodizin biniinaa, tʼáadoo ndabidistseed da.

41 Ákondi shooh, háálá ńzaadgóó anaaʼ Nephi dineʼé dóó Laman dineʼé bitahgóó hólónígíí biniinaa ląʼí tʼóó tʼą́ą́ʼ naazhjééʼ. Ńzaadóó anaaʼ bee dahólónígíí biniinaa, áko Diyin God yidááhdóó aʼohgo ádaantsídaakees daazlį́į́ʼ, azhąʼ yéego yinííł daazlį́įjįʼ ndi.

42 Áádóó baa hoolzhiizh Moroni kéyah Laman dineʼé íiyisíí deiyííłchxǫʼígíí anaaʼí yikʼijįʼ hashtʼeyiilaa, éí bidziil daazlį́į́, Zarahemla kin dashijaaʼgóó nádzá: áádóó Helaman ałdóʼ baahodeetʼánéedi nádzá; áádóó Nephi dineʼé bitahgóó kʼé hólǫ́ násdlį́į́ʼ.

43 Áádóó Moroni ndaabaahí binaatʼááhdééʼ adááyá dóó biyeʼ yeidiníʼą́, éí Moronihah wolyé; dóó bighandi nádzá áko kʼé bił hólǫ́ǫgo ałtso abiidoołkááł.

44 Áádóó Pahoran éí ándahwiiaahii nilį́į́jįʼ dahnáneezdá; dóó Helaman dineʼé Diyin God bizaad yee neinitingo yaa nínádiidzáʼ; háálá ląʼí anaaʼ dóó naʼabaah ntʼę́ʼígíí biniinaa sodizin biiʼ bee hazʼáanii ályaa.

45 Éí bąą, Helaman dóó bikʼiské dahdiiná, dóó Diyin God bizaad yéego adziil yinahjįʼ ndaʼneeztʼą́ą́ʼ ląʼí diné bąąhági ádaʼałʼínée yił ííshjání ádeiyiilaa, éí yinahjįʼ bibąąhági ádaatʼéii yee ádaańdaʼooskan dóó Bóhólníihii biDiyin God yichʼįʼ tó bee dabiʼdoolzį́į́ʼ.

46 Áádóó baa hoolzhiizh Diyin God bisodizin hadeidiilaa, kédaayahgóó.

47 Aooʼ, dóó bee hazʼáanii bikʼehgo dooleełígíí ádaalyaa. Áádóó biʼ ánahwiiʼaahii dóó biʼaláahdi ánahwiiʼaahii yikʼidadiilniiʼ.

48 Áádóó Nephi bidineʼé kéyah bikááʼʼ daʼatʼį́ daazlį́į́ʼ, dóó ąą dínééstʼą́ dóó bikéyah biyiʼ yéego dabidziil daazlį́į́ʼ. Dóó tʼáá íiyisíí daʼatʼį́įgo dadínéésą́.

49 Azhą́ daʼatʼį́įʼ ndi, doodago dabidziil ndi, doodago náás deeskaigo, doo éí yee ádaadahaʼniihgo dahiináa da; doodago doo hazhóoʼígo Bóhólníihii biDiyin God yéédaalniih da; ákondi yéego yidááhdóó aʼoh danilį́į́ ńtʼę́ę́ʼ.

50 Aooʼ haitʼáo Diyin Bóhólníihii ayóó ádaatʼéii yee bikaʼaalwodígíí yéédaalniih, áko anoonééł dabiʼdisnáádééʼ, dóó yahadabiʼdiisnildéé, dóó ląʼí tiʼhooʼnííhdéé yisdábííʼeezhdééʼ; dóó beʼanaaʼí yitsʼą́ą́dóó yisdábííʼeezh.

51 Áádóó áłahjįʼ Bóhólníihii biDiyin God yichʼįʼ sodadilzin, Diyin Bóhólníihii bikʼihojisdliʼjįʼ, bizaadígíí bikʼehgo, áko bidziil daazlį́į́ʼ dóó kéyah bikááʼ daʼatʼį́ daazlį́į́ʼ.

52 Áádóó baa hoolzhiizh díí tʼáá átʼé bidahoolyaa. Áádóó Helaman dahndiidzá, tádiin dóó biʼaan ashdlaʼ ándahwiiʼaahii Nephi bidineʼé yikʼi dahweeʼaah yiihah góneʼ.