1 Áko shooh, baa hoolzhiizh Ammon bidineʼé Jershon kéyahdi nidahaazná, aooʼ, áádóó Laman dineʼé dineʼé kéyahdóó chʼíneelkaad, dóó daneeznánígíí éí diné tʼáá ákǫ́ǫ́ kéédahatʼínígíí łeeh deiyiiznil—

2 Áko éí daneeznánígíí bideʼ ádzaaʼgo tʼáadoo yééltaʼ da, Nephi dineʼé daneeznánígíí ałdóʼ tʼáadoo yééltaʼ da—ndi baa hoolzhiizh nidaaztseedígíí łééh deiznilgo, áádóó dahodísingo chʼiyáán ádąąh yitʼį́, dóó yínííł dóó sodizin ádaalyaago deiniłką́, (dóó ándahwiiʼaahíí Nephi dineʼé yikʼi dahwéeʼaahgo hastą́ą́ʼtsʼáadah yihahígíí biyiʼ) áádóó adahwiisʼáágóó hódiiyeelgo hooʼaʼ.

3 Aooʼ, áádóó dineʼé Diyin Bóhólníihii bibee nahazʼáanii yikʼeh dahółʼį́į́ ńtʼę́ę́ʼ; dóó Diyin God bibee óʼoolʼįįł tsʼídá tʼáá íiyisíí yikʼeh dahółʼį́į ńtʼę́ę́ʼ, Moses bibee hazʼáaniigi átʼáo; háálá Moses bibee hazʼáanii ałtso bohodoolníiłgo bee nidabidiʼneestą́ą́ʼ.

4 Áádóó áko Nephi bidineʼé doo bichʼįʼ naʼabaahgo ándahwiiʼaahii dahwéeʼaahgo hastą́ą́tsʼáadah ałtso nááhai.

5 Áádóó baa hoolzhiizh tsostsʼidtsʼáadah haahááhgi ánihwiiʼaahii bikʼidahwéeʼaahgo, ahodéezyéelgo bee hooʼaʼ.

6 Ákondi baa hoolzhiizh tsostsʼidtsʼáadah náhááhgo, Zarahemla kéyahdi hastiin léiʼ níyá, éí Christ yitsʼą́ą́jí nilį́, diyingo ííshją́ą́ ádaalyai Diyin yá yádaałtiʼii yee hadahaasdzííʼyę́ę yikʼijįʼ naʼnitin éí dineʼé yee neiʼnitin, éí Christ doogáałgo baa haneʼ.

7 Áko diné beʼoodląʼ yee naʼnitingo doo bee hazʼáanii kʼíinítiʼ da; háálá díí Diyin God bibee hazʼáanii doo bikʼijįʼ da áko tʼáá aheełtʼéego doo éí ałʼąą átʼéego báhólǫ́ǫ da.

8 Háálá Diyin bizaad bee akʼedaʼashchínígíí ání: Díí jį́ bá nanilʼaʼ dooleełʼígíí, bikééʼ yiizįįh.

9 Áko diné Diyin God bá naashnish nízingo, tʼáá bí bá ahóótʼiʼ; éí doodago, Diyin God yidoodląąłgo éí tʼáá bí bóhólníihgo yá naalnish doo; ákondi doo yoodlą́ą́góó doo laʼ bee hazʼáanii átíbidoolííł da.

10 Ákondi iisxį́įgo atíbidiʼdoolníiłgo iiná baa naadiʼdoolyééł; dóó háiida tʼáadoo leʼé bighajiléehgo ałdóʼ atíhodiʼdoolnííł; áádóó ázhneezʼį́įgo ałdóʼ atíhodiʼdoolnííł; dóó azhʼdííláago éí ałdóʼ atíhodiʼdoolnííłʼ aooʼ, hááłá díí doo ádaalʼíinii ádeiłʼį́įgo atídabidiʼdoolnííł.

11 Háálá nihokááʼ dineʼé niʼiisiʼígíí bikʼehgo bánahodootʼááł éí bee hazʼáanii bá hólǫ́. Ákótʼée ndi, nihokááʼ dineʼé beʼoodląʼ hólǫ́ǫgo doo bikʼijįʼ bee hazʼáanii hólǫ́ǫ da; ákohgo, nihokááʼ dineʼé asihígíí bikʼehgo atíbidiʼdoolnííł: éí bąą, nihokááʼ dineʼé tʼáá ałtso tʼáá aheełtʼéego bá hazʼą́.

12 Áádóó díí Christ-Yitsʼą́ą́jí Nilíinii, éí Korihor wolyé ńtʼę́ę́ʼ, (dóó bee hazʼáanii doo łaʼ bótąʼ da) Christ doo hólǫ́ǫ da níigo dineʼé neinitin. Áádóó díigi átʼáo neinitin, kóníigo:

13 O tʼáadoo biniyéhígíí dóó tʼáá ádzaii bee hadaʼííłnoołninígíí éí yaa ádanihósin, haʼátʼíísh biniinaa díí tʼáadoo biniyéhígíí nihizéédadéétʼiʼ? Haʼátʼííshąʼ biniyé éí Christ hádadinóhʼį́į́ʼ? Háálá nihokááʼ dineʼé náásgóó adahodoonilígíí doo ła bił beehózin da.

14 Áko shooh, díí diyinkʼehjí bee éédahózinii dabidohnínígíí, éí Diyin yá yádaałtiʼii dadiyinii ałkééʼ yaa dahoolneʼ dadohnínígíí, áko shooh, éí nihizází tʼáadoo biniyéhí bibee ádaʼoolʼįįłyę́ę ádaatʼé.

15 Haash yitʼáó tʼáá aaníigo nihił béédahózin? Áko shooh, tʼáadoo leʼé doo daahʼínígíí doo nihił béédahózin da, áko éí Christ hólǫ́ǫgo doo nihił béédahózin da.

16 Náás bikádasídooʼį́į́ʼ dóó nihibąąhági ádaatʼéii bee nihaa nídeetʼą́ągo nihił béédahózin dadohní. Ákondi shooh, éí ntséhákees digizígíí bitsʼą́ą́dę́ę́ʼ átʼé; dóó díí ntsáhákees yichxǫʼígíí nihizází bitsʼą́ą́dę́ę́ʼ ádaʼoołʼįįłyę́ę biniinaa átʼé, éí biniinaa tʼóó ádaatʼéhígíí deinohdlą́ągo yikééʼ yóó anihiiʼéésh.

17 Áádóó ląʼígo yee yichʼįʼ haháásdzííʼ, nihokááʼ dineʼé bibąąhági ádaatʼéii doo bikʼé nináʼdoolyééł da yiłní, ákondi nihokááʼ dineʼé tʼáá bí ádeinízinígi átʼáo dahiná; ákohgo nihokááʼ dineʼé tʼáá átʼé ayóó nitsékeesígíí bikʼehgo iiná łaʼ deiłʼį́, dóó nihokááʼ dineʼé tʼáá bí bidziilígíí yee akʼehdidlį́; dóó nihokááʼ diné áátʼįįłígíí doo ádąąh dahastʼą́ą da.

18 Áádóó neineeztą́ą́ʼ, ląʼí da bijéí yee yóóʼayiizhʼeezh, bąąhági ádáátʼįįł ndaʼiisihígíí yee ádaa dadzódlíigo yee dahdaneitʼaah, aooʼ, ląʼí da sáanii dóó hastóí, yooʼáyiʼéésh, áko atsʼíís yee tsiʼ deeskai—diné ádin yilééhgo, tʼáá ádíjįʼ nahónítʼįʼ yiłní.

19 Áko díí hastiin ałdóʼ Jershon kéyahgóó ííyá, Ammon bidineʼé díí yee neidínóotįįłgo, éí Laman dineʼé danilį́į́ ńtʼę́ę́ʼ.

20 Ákondi shooh éí Nephi dineʼé łaʼ yiláahgo dahóyą́; háálá deisił, dóó yedaʼaztłʼǫ́, dóó Ammon yidáahjįʼ nideistį́, éi dineʼé bihigh priest nilį́į́ ńtʼę́ę́ʼ.

21 Áádóó baa hoolzhiizh éí kéyahdóó chʼídeidoołtééłgo yee hoołʼaʼ. Áádóó Gideon kéyahgóó ííyá, dóó ałdóʼ naʼnitin, dóó áadi chʼééh naʼneeztą́ą́ʼ, háálá dabiiłtsood dóó bedaʼaztłʼǫ́ dóó high priest bidááh niiltį́, dóó kéyah yikʼi naatʼáanii ánahwiiʼaahii nilínígíí ałdóʼ bidáahgi.

22 Áádóó baa hoolzhiizh high priest nilíinii ábíłní: Haʼátʼíí biniyé Diyin Bóhólníihii bohootʼááł nihíłchxǫǫh? Haʼátʼíí biniyé díí diné Christ doo hólǫ́ǫ da diníigo nanítin, yaa bił dahozhónée nihiłchxǫǫ? Haʼátʼíí biniinaa Diyin yá yádaałtiʼii dadiyinii diyinkʼehgo bee ééhóziniiyę́ę bikʼijįʼ yáníłtiʼ?

23 Áko high priest nilíinii éí Giddonah wolyé. Áádóó Korihor ábíłní: Háálá nihizází tʼáadoo biniyéhí bibee ádaʼoolʼįįł doo bee naʼnishtin da, dóó háálá ałkʼidą́ą́ʼ priest danilínée tʼáadoo biniyéhí bibee ádaʼoolʼįįłii dóó bibee hazʼáanii bee ádaʼalʼíinii bee yaa kwíínísingo doo bee nanishtin da, doo adziilii dóó óhólniih bee bikʼi kwíínísingo, doo yee bił éédahózin da, áko doo yee ndanitʼáá da, ákondi saad bee yaa kódabidiʼdoolnííł.

24 Díí diné tʼáá bí ádeinízingo nidaakai dadóohní. Áko shooh, shí éí dabiʼdisnah dishní. Ałkʼidą́ą́ʼ diyingo ííshją́ą́ ádaalyaa yę́ę tʼáá aaníí ádaatʼé dadohní. Áko shooh, doo tʼáá aaníí átʼéego nihił béédahózin da dishní.

25 Díí diné ádídahodiiltʼiʼ dóó yóóʼadahaaskai dadoohní, háálá bishchíinii asihyę́ę biniinaa. Áko shooh, awééʼ bimá dóó bizhéʼé biniinaa doo ádíhwidiiltʼiʼ da.

26 Áádóó Christ doogááł dadohní. Ákondi shooh, ánihídishní Christ doogáałgo doo nihił bééhózin da. Áádóó nihokááʼ dineʼé bibąąhági ádaatʼéii yá náábidiʼdooltééł ałdóʼ dadohní—

27 Áádóó áko díí diné nihizází tʼáadoo biniyéhígo bibee ádaʼoolʼįįł bee yóóʼadahohéésh, dóó tʼáá nihí ádeinohsinígíí bikʼehgo, dóó niʼkódeinohsin, bidisnah nahalingo, áko bílaʼ yee nidaalnishígíí tʼóó bee daʼohtʼį́, áko doo ádaa hodzódlí yee dah danéetʼááh da, dóó yikʼehgo hináa dooleełígíí dóó yee báʼahootʼįʼígíí doo yaa bił dahózhǫ́ǫ́go yaa tsídadikees da.

28 Aooʼ, tʼáá bí ádaʼoołʼįįłígíí doo chodeidoołʼįįł da háálá bipriest danilínígíí yádahodoołchxįįł, bizééʼ dádaʼdidootį́į́ł tʼáá bí ádeinízinígíí bikʼehgo, dóó deiyoodlą́ągo ádeiyiilaa, tʼáá bí bibee ádaʼoolʼįįł dóó yaa ndaayééłígíí dóó tʼáá hooshchʼįʼ baa ntsóhodeeskeezígíí dóó bił ádahoodzaaʼígíí dóó tʼóó bił ádahatʼínígíí, ádaʼdoolííł, yikʼeh ádeidoolííł, doo bizaadkʼeh ádahósin da, haʼátʼíí shį́į́ doo bééhoʼdílzinígíí yee dahoodoołchxįįł, éí Diyin God nilį́ daaní—éí tsʼídá tʼah doo yiiltséeh da dóó doo bééhoʼdílzin da, éí tsʼídá doo hólǫ́ǫ da éí doodago tsʼídá doo hodooleeł da.

29 Áko high priest danilíinii dóó naatʼáanii ándahwiiʼaahii bijéí yistłʼisígíí deiyiiłtsą́, aooʼ, dóó Diyin God yikʼijįʼ hahadziih deiyiiłtsą́ągo, áko doo yichʼįʼ háádaasdzííʼ da; ákondi yedaʼaztłʼǫ́; dóó ánaazíinii yílákʼe deistį́, dóó Zarahemlagóó yił yíkai, Alma bidááhdóó ndeidoolóósgo, dóó naatʼáanii ánahwiiʼaahii yidááhdóó éí kéyah tʼáá átʼé yá nahaʼá.

30 Áádóó baa hoolzhiizh Alma dóó naatʼáanii ánahwiiʼaahii bidááh niidlóózhgo, tʼáá Gideon kéyahdi yáłtiʼ yę́ęgi átʼáo; aooʼ, dadiyinígíí tʼóó yódziih.

31 Áádóó ayóó átʼáo Alma yidááhdóó saad hayiłtʼééh, dóó priest danilínígíí dóó ndaʼnitiní yikʼijįʼ hahaasdzííʼ, bizází bibee ádaʼoolʼįįł tʼáá ádzaaʼígíí bee yóóʼadahishooʼeezh yił níigo yee yikʼihodiiʼą́, diné nidaalnish yę́ę tʼóó yee daʼatʼį́.

32 Áko Alma ííłníh: Nihił bééhózin doo tʼóó diné nihikʼi deílníísh da; háálá áko shooh ándahwiiʼaahii dahodeezʼą́ą́dę́ę́ʼ dóó kojįʼ yishnish, tʼáá shí shílaʼ bee nishishnish, azhą́ kédaayahgóó Diyin God bizaad shidineʼé bee nanishtingo tádííyáa ndi.

33 Áádóó azhą́ ląʼígo sodizin biiʼ nishishnish ndi, senine ndi tʼáadoo nishishnishígíí bikʼé sheítʼą́ą da, shikiské ndi tʼáadoo da, tʼáá hazhóʼó ánahwiiʼaahii nishłį́įgo dah sidáhę́ędą́ą́ʼ tʼéiyá; áádóó bee hazʼáanii bikʼeh daʼílkeed yę́ę tʼéiyá bikʼehgo nihichʼįʼ nidaʼiisyá.

34 Áádóó áko, sodizin baa nidashiilnishígíí doo bee nihichʼįʼ azláa da, doo nihichʼįʼ azlą́ą́góó éí haʼátʼíísh biniyé sodizin bá ndeilnish doo tʼáá hazhóʼó tʼáá aaníinii baa dahodiilnihgo tʼéi biniyé, áko nihikʼiské bił dahózhónígíí biniinaa nihí ałdóʼ nihił dahózhǫ́ǫ doo?

35 Áko haʼátʼíí biniyé díí diné ndaniitingo bee daʼiitʼį́ diní, tʼáá íídą́ą́ʼ, nił bééhózin doo nihichʼįʼ azláhígíí? Áádóó áko, daʼ dííʼísh dineʼé bindaʼiidlo nínízin, daʼ eiísh bijéí tʼáá íiyisíí bee bił da hózhǫ́?

36 Áádóó Korihor bichʼįʼ hanáádzííʼ, Aooʼ.

37 Áádóó ńtʼę́ę́ʼ Alma ábíłní: Diyin God hólǫ́ǫgooísh yiinídlą́?

38 Áádóó ádíínííd, Ndagaʼ.

39 Áko Alma áhałní: Daʼ Diyin Godísh doo hólǫ́ǫ da náádidííʼniił, dóó Christ ałdóʼ doo hólǫ́ǫ da náádidííʼniił? Háálá áko shooh, ánidishní, Diyin God hólǫ́ǫgo shił bééhózin, áádóó Christ ałdóʼ doogááł.

40 Áádóó áko Diyin God doo hólǫ́ǫ da dinínígíí, éí doodago Christ doo doogááł da dinínígíí haash yitʼáo nił bééhózin? Ándishní bee nił bééhózinígíí nee ádin, nizaadígíí tʼéí átʼé.

41 Ákondi, shooh, díí tʼáá aaníí ádaatʼé éí tʼáá áłtsoní dahólóonii tʼáá aaníí yaa dahalneʼ; áádóó ní ałdóʼ díí tʼáá aaníí ádaatʼéii nił bééhózin éí tʼáá ałtsoní dahólóonii tʼáá aaníigo yaa dahalne; dóó díí tʼáá átʼé doo ákótʼée daʼísh didííniił? Daʼ díísh tʼáá aaníí ádaatʼéego yinídlą́?

42 Áko shooh, éí yinídlą́ągo shił bééhózin, ákondi iiʼ sizį́ biyoochʼídígíí naniloʼ, dóó Diyin God biʼIiʼ Sizį́ Diyinii nahjįʼ kwíinlaa áko niyiʼdi doo báhosiniłʼą́ą́ da; ákondi biʼiiníziinii nikʼi bóhólnííh, dóó ná hooʼáałgo nanilóóz, áko Diyin God baʼáłchíní yóóʼíidoolíiłgo yinahaʼá.

43 Áádóó áko Korihor éí Alma ííłní: bee ééhódoozįįłígíí łaʼ shił ííshją́ą́ ánílééh, áko Diyin God hólǫ́ǫgo shił bééhodoozįįł, aooʼ, beʼadziilii hólǫ́ǫgo shił ííshją́ą́ ánílééh, áko índa nizaad yideeshdląął.

44 Ákondi Alma ábíłní: bee éédahódoozįįłígíí tʼáá íídą́ą́ʼ nił ííshją́ą́ʼ ádaalyaa; daʼ niDiyin Godísh bínítaah doo? Kódidíínííłísh, Bee ééhódoozįįłígíí shił ííshją́ą́ ánílééh, ni éí tʼáá íídą́ą́ʼ nikʼéí tʼáá aaníinii nił ííshją́ą́ ádeiyiilaa, áádóó tʼáá átʼé Diyin yá yádaałtiʼii dadiyinii ałdóʼ? Diyin bizaad bee akʼedaʼashchínígíí nidááhgo naaznil, aooʼ, dóó tʼáá ałtsoní Diyin God hólǫ́ǫgo yaa dahalneʼ, aooʼ, nahasdzáán ndi, dóó tʼáá átʼé bikááʼ siláhígíí, aooʼ, dóó nahaʼnánígíí, aooʼ, dóó tʼáá ałtso yá biyiʼdi deíkáhígíí nahasdzáán éí Tsʼídá Aláahdi Tʼáá Ałtsoní Áyiilaii yaa dahalneʼ.

45 Áádóó ákótʼée ndi nanináágóóʼísh, Diyin God doo hólǫ́ǫ da diníigo, díí dineʼé bijéí bee yóóʼahílóós? Áádóó ákótʼée ndiʼ díí diné daʼiiłtsánígíí doo tʼáá aaníí ádaaníi da didííniił? Áádóó ání: Aooʼ, doo tʼáá aaníí átʼée da dideeshniił, tʼáá hózhóʼó bee shił bééhodoozįįłígíí shił ííshją́ą́ íinlaago tʼéiyá.

46 Áádóó áko baa hoolzhiizh Alma ábíłní: Áko shooh, nijéí yistłʼisígíí biniinaa baa yínííł nisin, aooʼ, tʼáá aaníinii baa haneʼígíí tʼahdii bikʼijįʼ nilį́įgo, niiʼ sizíinii yidoołchxǫǫł.

47 Ákondi shooh, niiʼ sizíinii yóó adííníʼą́ągo tʼáá áko doo áko niniinaa łą́ągo diné biiʼ sizíinii doo yóó ahidííʼish da, niyoochʼííd dóó nizaad niłkanígíí bee; ákohgo doo iinishdlą́ą da náádíniigo, áko shooh Diyin God atíndoolííł, áko doo haadziihii dííleeł, áko tsʼídá doo hanáádíídzih da, áko díí diné doo bininááʼíloʼ da doo.

48 Áko Korihor ábíłní: Diyin God éí doo hináa da doo dishníi da, ákondi Diyin God hólǫ́ǫgo doo yinishdlą́, áádóó ałdóʼ ádíshní, Diyin God hólónígíí doo nił bééhózin da, dóó tʼáá hazhʼoʼí bee ééhódoozįįłígíí shił ííshją́ą́ íinilaago tʼéiyá, doo yideeshdląął da.

49 Áko Alma ábíłní: Díí bee ééhódoozįįłígíí nił ííshją́ą́ ádeeshłííł, doo haadziihii bee atíndiʼdoolnííł, shizaad bikʼehgo, dóó ádíshní, Diyin God bízhiʼ binahjįʼ, doo haadziihii bee atíndiʼdoolnííł, áko doo niyiʼdę́ę́ʼ hanááhozdooltsʼį́į́ł da.

50 Áko Alma díí saad yee haadzíiʼgo, Korihor doo yááłtiʼ da silį́į́ʼ, áko tʼáadoo hanáánáádzííʼ da, Alma ádííniid yę́ę bikʼehgo.

51 Áádóó áko ánihwiiʼaahii binaatʼáanii díí yiyiiłtsą́ągo, Korihor yichʼįʼ íʼiilaa, kóníigo: Diyin God beʼadziiliiʼísh kʼad yisinídląąd? Alma háishąʼ bee ééhodoozįįłígíí yinahjįʼ ííshją́ą́ íidoolííł nínínzin ńtʼę́ę́ʼ? Daʼ nááná háidaaísh átíidoolííł, éí bee nił bééhodoozįįłígíí nił ííshją́ą́ íidoolíiłgo? Áko shooh, bee nił bééhodoozįįłígíí tʼáá ni nił ííshją́ą́ áyiilaa; áádóó kʼadísh łaʼ baa saad nááhoodííłeeł?

52 Áádóó Korihor dahdiilniiʼ dóó naʼíízoh, kóníigo: Doo haadziihii nishłį́įgo shił bééhózin, háálá chʼééh haasdziih; áádóó shił bééhózin doo nááná łaʼ díí kóshidoolíił da Diyin God bibeʼadziilii tʼéiyá; aooʼ, áádóó Diyin God hólónígíí éí tʼáá iidą́ą́ʼ shił bééhózin ńtʼę́ę́ʼ.

53 Ákondi shooh, biʼiiníziinii shinaʼazloʼ; háálá Diyin yá naalʼaʼí nahalingo shichʼįʼ ííshjání íʼdiilyaa dóó áshidííniid: Díí diné bichʼįʼ dínáahgo hashtʼeʼnináníʼéésh, háálá tʼáá ałtso Diyin God doo bééhoʼdilzinígíí yikééʼ yóóʼaheeskai. Áádóó kóshidííniid: Diyin God doo hólǫ́ǫ da; aooʼ, dóó bee hadeesdzihígíí yee nashineeztą́ą́ʼ. Áádóó bizaad bee naʼnítą́ą́ʼ; dóó doo yaʼáshóonii yaa ntsídaakeesgo bił yáʼádaatʼéhígíí biniinaa nanétą́ą́ʼ; áko bee nanétą́ą́ʼ, áko ayóó átʼéego íisdzaa, ákogaʼ tʼáá íiyisí tʼáá aaníí átʼéego biʼniishdląąd, díí biniinaa tʼáá aaníinii tʼáá íiyisíí bitsʼą́ąjįʼ sélį́į́ʼ, hónáásiiʼ díí hoyééʼ ayóó átʼéii tʼáá shí ákʼidiishtʼą́.

54 Áádóó díí kódííniidgo, Alma Diyin God yichʼįʼ bá sodidoolzįįłgo néíyooskan, áko hóyéeʼgo bá haʼoodzíʼígíí nahjįʼ kódoolnííł.

55 Ákondi Alma ábíłní: Díí hóyéeʼgo ná haʼoodzííʼ yę́ę nahjįʼ kólyaago díí diné bijéí yóóʼánáádííʼish; éí bąą, Diyin Bóhólníihii yinízinígíí bikʼehgo ándiʼdoolnííł.

56 Áádóó baa hoolzhiizh Korihor hóyéeʼgo bichʼįʼ haʼoodzííʼ yę́ę tʼáadoo bá nahjįʼ kólyaa da; áko tʼóó chʼídeineeschą́ą́ʼ, dóó dahooghangóó bichʼiyąʼ yóókeedgo tádíghááh.

57 Ákohgo Korihor ábiʼdiilyaaígíí tʼáadoo hodíínaʼí adahwiisʼáágóó baa dahóoneʼ; aooʼ, ílíinii saad náháásdzooʼígíí ánihwiiʼaahii binaatʼáanii dineʼé kéédahatʼį́įgo tʼáá ałtso bichʼįʼ ádaalyaa, Korihor bizaad deiyoodlánééʼ tsxį́įłgo ádaa ńdaʼoohkąąh biʼdooʼniid, éí doodago éí tʼáá ákótʼáo bá ndahwidootʼaał.

58 Áádóó baa hoolzhiizh Korihor bibąąhági ádzaa yę́ę tʼáá átʼé yaa ákodaniizį́į́ʼ; éí bąą tʼáá átʼé Diyin Bóhólníihii yikééʼ ninákai; áádóó díí Korihor bąąhági átʼínée niʼ kólyaa. Áádóó Korihor hootahgóó, chʼiyáán yókeedgo akʼindidah.

59 Áádóó baa hoolzhiizh diné yitah naagháaʼgo, aooʼ, éí diné yitah naaghá éí Nephi dineʼé yitsʼą́kaiʼígíí Zoram dineʼé daolyé, éí hastiin Zoram wolyéíigo booʼish—áádóó yitah naagháago, áko shooh, bikʼí níjééʼ dóó bikʼi naaskai, deiyiisxį́įjįʼ.

60 Áádóó áko bikʼidaʼdiitą́ Diyin Bóhólníihii bohoogááł yiyííłchxǫ́ yę́ę nahjįʼ kóbiʼdiilyaa; áádóó áko bikʼidaʼdiitą́ biʼiiníziinii baʼáłchíní niʼhóníyáadi doo yíká adoolwoł da, ákondi tsxį́įłgo chʼį́įdiitah góyaaʼí ayiidzį́į́s.