1 Áádóó áko shooh, baa hoolzhiizh Manti kin dashijaaʼ bee adídahodiilnihgo bindahosiitʼą́; ákondi shooh, nihindaabaahí tʼáá díkwíhígíí biniinaa kin dashijaaʼdę́ę́ʼ chídadíníítʼahgo doo nihá bíighah da. Háálá áko shooh, ádabiʼdiilyaa yę́ę yéédaalniih; éí bąą da bidziilgo bił nahazʼą́ą́dę́ę́ʼ dabidiʼníítʼahgo doo bíighah da.

2 Áádóó áájíígíí tʼóó ahayóí nihindaabaahí yilááh ánéelą́ą́ʼ áko bidziilgo bił nahazʼą́ądi doo bikʼiidiijah da.

3 Aooʼ, kéyah tʼáá nihí ndaasdlį́ʼígíí bee nihídahoolnihígíí niha hastóí honeʼdii tʼáá íiyisíí tʼáá yaa ádahalyą́ą doo; éí bąą áłtsé tʼah daniidzį́į́ʼ, áko da Zarahemla bikéyahdę́ę́ʼ ndaabaahí łaʼ nihináánéídootʼish dóó ałdóʼ chodeidiiłʼįįłígíí łaʼ nihaa náádoogééł.

4 Áádóó baa hoolzhiizh shí nihikéyah bee bóhólníihii saad neiʼdeiʼáʼhí bichʼįʼ ííłʼaʼ, nihidineʼé yiiʼ yiikahígíí bił bééhodozįįłgo. Áádóó baa hoolzhiizh Zarahemla kéyahdę́ę́ʼ chodeidiilʼįįłígíí dóó ndaabaahí bee danihidziil dooleełígíí bíká dadíníítʼį́į́ʼ.

5 Ákondi shooh, díí tʼóó ałtsʼííʼsígo nihíká aalwod; háálá Laman dineʼé ałdóʼ tʼáá ákwíí jį́ ayóó átʼáo ndaabaahí baa hatʼéésh, dóó ląʼí chodeidoołʼįįłígíí ałdóʼ baa hageeh; áádóó áko díigi átʼáo nihił hazʼą́ągo nihił hoolzhiish.

6 Áádóó Laman dineʼé naahodiʼnaahgo nihikʼijįʼ ndadibah, ndanihidoołtsxił yindahiʼá; ákótʼée ndi bił daʼahidiigą́ą́łgo doo bohonéídzą́ą da, háálá sihgo bił nahazʼą́ dóó bidziilgóó bił nahazʼánígíí biniinaa.

7 Áádóó baa hoolzhiizh ląʼí ndeizid hóyéeʼgo nihił hazʼą́ągo nihíká adoowołígíí bíká dadíníítʼį́į́ʼ, azhą́ dichin kʼasdą́ą́ʼ nihííghą́ą́ʼ ndi.

8 Ákondi baa hoolzhiizh chʼiyáán niheeyígį́, éí naaki dimííł ndaabaahí yaa ádahaalyą́ągo yee nihíká ííjééʼ; tʼáá ákótʼéhígo nihaa haasginígíí bee nihíká aʼoowod, ádíchʼą́ą́h ndadiibah dóó nihíkéyah doo anaaʼí yee ádídahodoolnih da, aooʼ, anaaʼí bił daʼahidiigą́ą́ł éí doo beenéelaʼí da.

9 Áádóó áko díí nanitłʼahgo nihił hazʼą́ąnígíí biniinaa, éí doodago haʼátʼíí biniinaa tʼáadoo ndaabaahí łaʼ nihichʼįʼ ánáádeiyidlaaʼígíí, doo nihił béédahózin da; éí bąą yínííł dasiidlį́į́ʼ dóó béédasiildzííd, háálá Diyin God nihánahadooʼááł kéyah bikáaʼgi, nihikʼeh dahodidoodleeł dóó danihidooghą́ą́ł.

10 Éí bąą tʼáá átʼé bee ádaniitʼéhígíí bee Diyin God bichʼįʼ sodadiilzin, áko niheʼanaaʼí bichʼįʼ nihidziil anihidoolííł dóó yisdánihidooʼish, aooʼ, dóó ałdóʼ nihidziil anihidoolííłgo nihikin dah naazhjaaʼ tʼáá deiyíníítʼaʼ doo, dóó nihikéyah, dóó nihinaadeełii, háálá éí nihidineʼé yíká adoolwoł.

11 Aooʼ, áádóó baa hoolzhiizh Bóhólníihii nihíDiyin God yisdánihidooʼishgo nihił ííshjání áyiilaa; aooʼ, nihiiʼ sizíinii kʼé bił naaztʼiʼígíí yee yichʼįʼ haadzííʼ, dóó niheʼoodląʼ ayóó átʼáo bidziilgo niheenílá, dóó yisdánihidooʼishígíí bee bichʼįʼ hadaʼííníílníigo ánihidoolííł.

12 Áádóó tʼáá díkwíhí bee nihíkaʼaʼoowod ndi doo ndahiniilyées da dasiidlį́į́ʼ, dóó niheʼanaaʼí bikʼeh dadiidleełgo nihíʼniʼ biiʼ ndaniitʼą́, dóó nihikéyah baa adahwiilyą́ą doogo, dóó nihinaadeełii, dóó nihizáanii, dóó nihaʼáłchíní, dóó tʼáá nihí ádaniidzingo dah hiniiʼnánígíí biniyé.

13 Áádóó kótʼáo Laman dineʼé niheʼadziilí bee bikʼijįʼ dadiibaaʼ, éí Manti kin dashijaaʼdi kéédahatʼį́; dóó nihiníbaal ndasiiʼnil doo kééhojitʼíníjigo, éí kin dashijaaʼ bíighahgi.

14 Áádóó baa hoolzhiizh biiskání, Laman dineʼé doo kééhojitʼíní kin dashijaaʼ bíighahdi danihiiłtsą́, áko bindaalchiʼí nihindaabaahí aneiląʼígíí dóó haitʼáo dabidziilígíí bił béédahodoozįįłgo nihichʼįʼ adeisʼaʼ.

15 Áádóó baa hoolzhiizh doo danihidziilgo bił béédahoozin, díkwíí niiltʼehígíí binahjįʼ, dóó nídaasdzííd chodeidoołʼįįłígíí bitsʼą́ą́ʼ nahjįʼ kódadiilnííł danízin áko nihichʼįʼ dahdadidoobahgo ndanihidoołtsxił, dóó tʼóó ahayóíʼígíí biniinaa doo nanitłʼago ndanihidoołtsxił danízin, éí bąą nihichʼįʼ ndadoobahgo hashtʼeʼádadiilnééh.

16 Áádóó nihichʼįʼ hashtʼeʼádadiilnééhgo deiltsʼą́ągo, áko shooh, Gid, dóó ndaabaahí tʼáá díkwíhígo, doo kééhojitʼíní góneʼ ndadidoohtʼį́į́ł bidííniid, áádóó Teomner dóó ndaabaahí tʼáá díkwíhí yiltʼéego ałdóʼ doo kééhojitʼínídi nidadidoohtʼį́į́ł bidííniid.

17 Áko Gid dóó bá ndaabaahí éí nishʼnáájí łaʼígíí éí nishtłʼají; áádóó ndadeestʼį́į́go, áko shooh, shí éí tʼáá ákǫ́ǫ́, shindaabaahí chʼéédziʼígíí bił, áłtséédą́ą́ʼ nihiníbaal ndasiinilyę́ędi Laman dineʼé nihichʼįʼ dadoobahgo bíká hashtʼeʼádaʼdiilnééh.

18 Áádóó baa hoolzhiizh Laman dineʼé bá ndaabaahí tʼóó ahayóí nihikʼijįʼ chʼíníná. Áádóó chʼéníná dóó kʼadę́ę béésh hał yee ndanihidoołtsxiłgo, shándaabaahí, shiłnaaldeehígíí, doo kééhojitʼíní góneʼ nátʼą́ą́ʼ ndiiʼnééł bidííniid.

19 Áádóó baa hoolzhiizh Laman dineʼé tʼáá íiyisíí tsxį́įłgo nihikééʼ dahdiijééʼ, háálá tʼáá íiyisíí nihídoojahgo ndanihidoołtsxił danízin; éí bąą doo kééhojitʼíní góneʼ nihikééʼ dahdiijééʼ; Gid dóó Teomner bitaʼ góneʼ chʼíniijééʼ, áko Laman dineʼé tʼáadoo hadabideesʼį́į́ʼ da.

20 Áádóó baa hoolzhiizh Laman dineʼé bíighahgo chʼíníjééʼgo, éí doodago bindaabaahí bíighah chʼíníjééʼgo, Gid dóó Teomner nidanitʼindę́ę́ʼ chʼékai, dóó Laman dineʼé bindaalchiʼí yichʼą́ą́h niníjééʼ áko bikin dashijaaʼgóó doo ndoojah da.

21 Áádóó baa hoolzhiizh yichʼą́ą́h niníjééʼgo, bí éí kin dashijaaʼgóó níjééʼ dóó kin dashijaaʼ yikʼi hadaʼasid yę́ę yikʼiijééʼ, áko nideistseed dóó kin dashijaaʼ yee ádídahoosnííʼ.

22 Áko díí éí kóhoodzaa biniinaaʼígíí éí Laman dineʼé bindaabaahí tʼáá átʼé abidiʼnóotʼaaʼ doo kééhojitʼíníjígo, tʼáá díkwíhí éí tʼáá ákǫ́ǫ́.

23 Áádóó baa hoolzhiizh Gid dóó Teomner díigi átʼáo bidziilgóó bił nahazʼánée yee adihoosnííʼ. Áádóó baa hoolzhiizh tʼáá náás niikai, doo kééhojitʼínídę́ę́ʼ nízaadgóó niiʼná Zarahemla kéyah bichʼijígo.

24 Áádóó Laman dineʼé éí Zarahemla bikéyahjígo yinéełgo dabiiłtsą́, tʼáá íiyisíí nídaasdzííd, aooʼ, éí shį́į́ ndabiʼdiʼdooltsxiłgo bindahastʼą́; éí bąą doo kééhojitʼíníjígo dahnáádadíníichą́ą́ʼ, aooʼ, tʼáá nínáánééʼ dę́ę́ʼjígo.

25 Áádóó áko shooh, tłʼééʼ hazlį́į́ʼ dóó biníbaal nideiznil, háálá Laman dineʼé ndaabaahí binanitʼaʼí Nephi dineʼé deínéehgo chʼééh deeskaiʼ dayóʼní; dóó tʼáá átʼé bindaabaahí deiníłkaad danízingo éí biniinaa Manti kin dashijaaʼ tʼáadoo yaa tsédadeezkééz da.

26 Áko baa hoolzhiizh tłʼééʼ hazlį́įʼgo, shindaabaahí daʼoołháásh lágo bidííniid, ákondi náás dah didoohnééł Manti kéyah nááná łahdę́ęʼgo bichʼįʼ dahdidiiʼnééł.

27 Áádóó díí tłʼéeʼgo náás yiiʼnéłígíí biniinaa, áko shooh, biiskání Laman dineʼé bilááh niikai, áko Manti kin dashijaaʼdi áłtsé niiʼná.

28 Áádóó kótʼáo baa hoolzhiizh, díí nahatʼá Manti kin dashiijaaʼ bee adídahosiilnííʼ tʼáadoo dił dadinéhí.

29 Áádóó baa hoolzhiizh Laman dineʼé bindaabaahí kin dashijaaʼ yííghah nínáago, dóó bichʼįʼ ndadiibahgo bichʼįʼ hashtʼeʼádaʼdiilyáaʼígíí deiyiiłtsą́ągo, tʼáá íiyisíí bił adahóóyóí dóó ayóó átʼáo nídaasdzííd, áko doo kééhojitʼínígóó dah dadíníichą́ą́ʼ.

30 Aooʼ, áádóó baa hoolzhiizh Laman dineʼé bindaabaahí díí kéyah tʼáá ałtso bikááʼdóó dah dadíníichą́ą́ʼ. Ákondi shooh, díí kéyahdóó ląʼí sáanii dóó áłchíní adeiyiizheezh.

31 Áádóó kin dashijaaʼ Laman dineʼé yee ádídahoosniʼígíí, éí tʼáá átʼé kʼad hoolzhishdi bee nihídahoolnííh; dóó nihizhéʼé dóó nihizáanii dóó nihaʼáłchíní bighangóó andahaskai, tʼáá átʼé tʼáá hazhóʼó Laman dineʼé deisnááh dóó adeyizhʼjaaʼígíí tʼéiyá.

32 Ákondi shooh, nihindaabaahí tʼáá díkwíhí yiltʼée ndi kin dah naazhjaaʼ ayóó ánéelą́ąʼgo yaa ádahaalyą́ dóó ayóó átʼáo yikʼi bídahoolnííh.

33 Ákondi shooh, Diyin God badaʼííníídlí éí kéyah tʼáá átʼé bikʼeh dasidiidlį́į́ʼgo nihá áyiilaa, éí binahjįʼ kin dashiijaaʼ dóó kéyah shodeisiiltʼeʼ, éí tʼáá danihíhę́ę ádaatʼé.

34 Áko haʼátʼíí shį́į́ biniinaa kéyah binaatʼáanii doo ląʼí ndaabaahí nihicʼhʼįʼ kónáádeidlééh da; áádóó ałdóʼ ndaabaahí nihidahídiikaiʼígíí ndi doo bił béédahózin da haʼátʼíí biniinaa doo ląʼí nihaa náádeitʼeiísh da.

35 Áko shooh, doo nihił béédahózin da haʼátʼíí shį́į́ʼ biniinaa doo nihíká aʼayeed da, dóó ndaabaahí éí kéyahjígo adahishooʼeezh; ákótʼéego éi, nihí éí doo saad dahodiidleeł da daniidzin.

36 Áádóó díí doo ákótʼéégóó, shooh, háálá kéyah bídahólníhígíí łaʼ ałtsʼą́ą́jí danilį́, áko ndaabaahí nihíká adoojahę́ę doo łaʼ nihichʼįʼ kónáádeidlééh da; háálá nihił béédahózin nihaa deiyizheezhʼígíí bilááh ánéelą́ąʼgo bee dahólǫ́.

37 Ákondi, shooh, tʼáá shį́į́ áko—nihí éí Diyin God yisdánihidooʼishgo deiyiniidlą́, azhą́ nihindaabaahí doo ląʼí da ndi, aooʼ, dóó niheʼanaaʼí yitsʼą́ą́dóó yisdánihidooʼish.

38 Áko shooh, díí naadiin nahastʼéí yihah, náhááhdi, áádóó nihikéyah éí bee nihídahólnííh, dóó Laman dineʼé éí Nephi bikéyahjigo adahineezchą́ą́ʼ.

39 Áádóó Ammon dineʼé biyeʼké, éí tʼáá íiyisíí aláahdi shił nilį́įgo baa haasdzííʼ, Manti kin dashijaaʼdi bił naashkai; dóó Diyin Bóhólníihii bikáʼalwod, aooʼ, dóó béésh hał bee nidabidiʼdootsxiłgo yitsʼą́ąjįʼ kóyósin, dóó tʼáá ląʼí ndi tʼáadoo biʼdiisxį́į da.

40 Ákondi shooh, tʼáá yéego atíʼdaadzaa; ákótʼée ndi; Diyin God tʼáá bí ádeinízingo iiná doo yikʼidadikááhgóó deiyótąʼgo ádabiilaa; tʼáá ákwíí jį́ Diyin God biBóhólníihii doo nahjįʼ kódaanééhgóó yéédaalniih, dóó bibee hazʼáanii dóó yee ndahwiizʼánígíí, dóó bibee hazʼáanii yikʼeh dahółʼį́; dóó diyingo ádahodooníłígíí yéego dayoodląʼ.

41 Áádóó kʼad, ayóó áníínishníínii shikʼis, Moroni, Bóhólníihii nihiDiyin God, nihánináʼnídláhígíí dóó tʼáá nihí nihídahólníihgo ánihiilaa, tʼáá áłahjįʼ bił honílǫ́ǫgo ánósin doo; aooʼ, dóó bidineʼé yaa joobaʼ doo, tʼáá ałtso Laman dineʼé nihighadeiyiisnilígíí tʼáá níhí ndadoodleeł, éí yee nihíkááʼadoolwoł biniyé. Áádóó kʼad, shooh, saad naháásdzohígíí ałtso íishłaa. Helaman áshtʼį́, Alma biyeʼ nishłį́.