1 Áko baa hoolzhiizh Laman dineʼé éí Nephi dineʼé yił anaaʼ ádeiłʼį́įgo yaa ákodaniizį́į́ʼ, tʼáá ałtso ndeidooltsʼiłgo chʼééh ádáátʼįįd, dóó Nephi kéyahgóó nákai.

2 Áádóó baa hoolzhiizh Amaleki dineʼé, bikʼeh hodeezdlį́į́go, yéigo bádahoochįįd. Áádóó Nephi dineʼé doo yikʼeh dadidoodleełgóó yaa ákodaniizį́įgo, bidineʼé éí bikʼéí, Anti-Nephi-Lehi bidineʼé yikʼijįʼ dahóółchįįd, éí nináádeidoołtsxiłgo biniinaa yaa tiihnáánáákai.

3 Áko díí dineʼé bee ndaʼatsxeed doo nínáádeidiijááʼ da, beʼanaaʼ ádeinízinígiʼ átʼáo nabiʼdiʼdootsxiłgo yee yánáádahoołʼaʼ.

4 Áko Ammon dóó bikʼiské diné ayóó ádayónii ndabiʼdiltseed deiyiiłtsą́ą́go, dóó ayóó adabóoníinii bitahgo—Diyin yá ndaalʼaʼí danilį́ danízǫǫ nizhónóó yaanitsídaakeesgo Diyin God yitsʼą́ądééʼ adahaazʼaʼ hoolʼáágóó tiʼhooʼníí yitsʼáádééʼ yisdádanihidooʼish danízǫǫ—éí bąą, Ammon dóó bikʼiské ayóó átʼáo tiʼhoonííh deiyiiłtsʼą́ągo, yaa aʼááh danízingo dabidiisnááʼ, dóó aláahdi naatʼáanii ádeidííniid:

5 Diyin Bóhólníihii bidineʼé ahídahidiitʼish, dóó Zarahemla kéyahgóó nihikʼéí Nephi dineʼé baadiikah dóó niheʼanaaʼ bílákʼeedóó adahidínííchééł, áko doo nanihiʼdiʼdoołtsxił da.

6 Ákondi aláahdi naatʼáanii abiłní: Áko shooh, Nephi dineʼé ndanihiʼdoołtsxił, háálá ląʼí ndasiiltseed dóó bąąhági ádaatʼéii bikʼijįʼ kódeilyaa.

7 Áádóó Ammon ání: Diyin Bóhólníihii bichʼįʼ deeshááł dóó nabídídeeshkił, dóó nihikʼéí, bichʼį́ʼ doohkah nihiłníigo, ákǫ́ǫ́sh diikah?

8 Áádóó aláahdi naatʼáanii abíłní: Aooʼ Diyin Bóhólníihii ákǫ́ǫ́dohkááh nihiłníigo, nihikʼis bichʼįʼ diikah, dóó bánaalteʼé dadiidleeł ndasiiltseed dóó bąąhágiʼ ádaatʼéii bikʼijįʼ kódeiyiilaayę́ę hashtʼéí dadiidzaajįʼ.

9 Ákondi Ammon ábíłní: Éí nihikʼéí bibee hazʼáanii bikʼijįʼ ntsáhákees, éí shizheʼé niinílá, naalteʼé doo bitah hólǫ́ǫ da doo; éí bąą tįʼ bichʼįʼ diikah dóó nihikʼéí bibeedaʼjoobaʼ badaʼííníídlíí doo.

10 Ákondi aláahdi naatʼáanii ábíłní: Diyin Bóhólníihii nabidíłkid, dóó ákǫ́ǫ́dohkááh nihiłníigo, ákǫ́ǫ́diikah; éí doo ákótʼéégóó éí kéyah bikááʼ dadínííʼnééł.

11 Áádóó baa hoolzhiizh Ammon Diyin Bóhólníihii yichʼįʼ níyá dóó neiyídééłkid, dóó Diyin Bóhólníihii ábiłní:

12 Díí kéyahdóó díí diné chʼíníʼéésh, áko doo dínóónééł da; háálá Chʼį́įdii Amaleki dineʼé bijéí íiyisíí yótąʼ, éí Laman dineʼé bikʼéí ndeidoołtsxił danízingo yikʼijįʼ yádahóółchįįd; éí bąą kéyahdóó chʼínóhnééh; dóó díí daʼíchííh biyiʼ díí diné bikʼihojidoodliił, háálá yisdádeeshish.

13 Áádóó áko baa hoolzhiizh Ammon aláahdi naatʼáanii saad Diyin Bóhólníihii yee bił hoolneʼ yę́ę yił chʼííníʼą́.

14 Áádóó bidineʼé tʼáá átʼé ahideyiʼeezh, aooʼ, tʼáá átʼé Diyin Bóhólníihii bidineʼé, áádóó bidibé dóó dabilį́į́ʼ tʼáá átʼé dadeidínííłkaad, dóó kéyahdóó dahdiiná, dóó doo kééhojitʼiní góneʼ éí Nephi kéyah dóó Zarahemla kéyah bee ałtsáádzoh, dóó kéyah bee hoozoójįʼ ndahaazná.

15 Áádóó baa hoolzhiizh Ammon ábidíiniid: Shooh, shí dóó shikʼéí Zarahemla kéyahgóó bichʼįʼ diikah, dóó nihí éí tʼáá kǫ́ǫ́ dahonóhłǫ́ǫ doo nániináo índa; dóó nihikʼéí bijéí yee ádeinízinígíí baa ákódadíníídzįįł, bikéyah biih dadohnéłʼígíí daatsʼí bił tʼáá daʼáko.

16 Áádóó baa hoolzhiizh Ammon kéyah yikááʼ yighááłgo, áko bikʼiské Alma yił ałkʼíkai, kéyah hazʼą́ baahaʼoodziiʼ yę́ęgi; áko, díí tʼáá íiyisíí baa hózhǫ́ǫgo ahíʼiildeiʼ.

17 Áko Ammon doo sohodoobéézhgóó ił hózhǫ́ biiʼ hadéébįįd; aooʼ, biDiyin God bee iłhózhǫ́ bikʼihooleʼ; beʼadziil yę́ę ndi bąąh náákaad; dóó náá ánáánáátłizh.

18 Áko díísh éí doo íiyisíí iłhózhǫ́ atʼée da? Áko shooh, díí íł hózhǫ́ doo tʼóó aahiditʼaah da tʼáá hazhóʼó tʼáá aaníigo adaandaʼooskan dóó dahodísingo ił hózhǫ́ yiiká ádaatʼínígíí tʼéiyá.

19 Áko Alma bikʼiské yił áłah silį́ʼígíí éí tsʼídá tʼáá aaníigo yaa bił hózhǫ́, dóó Aaron, Omner, dóó Himni bił dahózhǫǫd ałdóʼ; ákondi shooh bił dahózhónígíí doo biláah bideʼádaadzaa da.

20 Áádóó baa hoolzhiizh Alma bikʼiské Zarahemla bikéyahgóó yił nákai; tʼáá bí bighanjįʼ. Áádóó aláahdi andahwiiʼaah yaayíkai dóó Nephi kéyahdi, Laman dineʼé bikʼéí bitahgo ádahoodzaaʼígíí yee yił dahoolneʼ.

21 Áádóó baa hoolzhiizh aláahdi ánahwiiʼaahii haneʼ ílíinii adahwiisʼáágóó yichʼįʼ áyiilaa; Anti-Nephi-Lehi bidineʼé yah adoonééłígíí, diné yaa hadahaasdzihígíí daatsʼi bił tʼáá daʼáko.

22 Áádóó baa hoolzhiizh bidiné ádeinízinígíí bééhoozin, kódaaní: Áko shooh, Jershon kéyah baa dadidiitʼááł, éí haʼaʼaahjigo tónteel biihiníyį́, éí kéyah Bountiful bił ahidadiiʼá, dóó shádiaahjigo kéyah Bountiful bíighahgi siʼą́, áádóó díí Jershon kéyah nihikʼéí baa hodidootʼááł.

23 Áádóó áko shooh, nihándaabaahígíí Jershon kéyah dóó Nephi kéyah bitaʼ nidoonił, áko nihikʼéí Jershon kéyahgi yichʼą́ą́ ndaabaah doo; dóó díí nihikʼéí bá ádeitʼį́, háálá yee ndaʼałtseedígíí bikʼéí yichʼįʼ yił hadadoodiłgo bąąhági ádadoonííł danízingo yéídaaldzid, dóó díí ayóó átʼáo yee daasdzííd hááłá tʼáá íiyisíí tiʼdahoozniiʼgo ádaańdaʼooskąąd, ląʼídi ndaʼásteed dóó doo yáʼádaatʼéhígíí yaa naaskai.

24 Áádóó áko shooh, díí nihikʼéí kótʼáó bá ádaʼdiilnííł, áko Jershon kéyah baa didootʼááł; dóó nihinaabahii beʼanaaʼí yichʼą́ą́h naazį́į doo, áko łáʼ yinahjįʼ yee daʼhiináá dooleełígíí nihichʼįʼ kódeidoolííł áko nihichʼąąh ndaabaahí yee ádaatʼée doo.

25 Áko, baa hoolzhiizh Ammon díí yídeeztsʼą́ą́góó Anti-Nephi-Lehi bidineʼé yaa náádzá, áádóó ałdóʼ Alma yił, diné doo kééhojitʼíníjįʼ biníbaal ndeiznil yę́ęgiʼ; dóó tʼáá átʼé yił ííshjání áyiilaa. Áádóó Alma Diyin yoosdląądígíí ałdóʼ yee yił hoolneʼ, Ammon dóó Aaron yił, dóó bikʼéí.

26 Áádóó baa hoolzhiizh díí íiyisíí yaa bił dahóózhǫǫd. Áádóó Jershon kéyah yah eekai, dóó Jershon kéyah tʼáá bí daazlį́į́ʼ; dóó Ammon bidineʼé daolyéego Nephi dineʼé dabíízhiʼ; ákotʼáó éí ázhiʼ holáágóó bee bééhoʼdolzin silį́į́ʼ.

27 Áádóó Nephi dineʼé yitah kéédahtʼį́, dóó Diyin God bisodizin ałdóʼ atah dabízhiʼ daasdzoh. Áádóó Diyin God ayóó yaadahaniihgo ałdóʼ bee béédahoʼdílzin ńtʼę́ę́ʼ; dóó tʼáá ałtso dineʼé yichʼįʼ ałdóʼ; háálá doo bindaʼadloʼ da dóó tʼáá ałtsóníjįʼ yáʼátʼéhígíí yee naazį́; Christ tʼáá íiyisíí yikééʼ naazį́, áhwíyilʼáágóó.

28 Áádóó bikʼéí ndeidoołtsxiłgo tsʼídá doo deinízin da; dóó tsʼídá doo bikʼéí yikʼijįʼ bee ndaʼatseedii ndeididootʼį́į́łgo yee ndahasʼą́ą da; áádóó anoonééł éí doo yéédaaldzidgóó deiyooʼį́, háálá Christ yichʼįʼ hadaʼólnínígíí dóó yee átʼéhígíí dóó nááʼiiná, áko, Christ éí anoonééł yikʼeh deesdlį́į́ʼ.

29 Éí bąą, anoonééł tsʼídá bikʼeh áyééʼgiʼ átʼáo dóó tsʼídá tiʼdahooznííʼgo bikʼéí átídabiilaa, tʼah doo béésh hał názháhí dóó bee adahijiganígíí choideiyoołʼįįhgóó.

30 Áádóó dineʼé Diyin yídaneidlį́ dóó ayóó ádabiʼdóóníinii danilį́, Diyin Bóhólníihii bidineʼé ayóó bił nilį́įgo yikʼihojisdliʼ.