1 Áko baa hoolzhiizh Amulek díí saad ałtso yee haadzííʼgo, áłahílį́ yitsʼą́ą́jįʼ dahdiikai dóó kéyah Jershondi níná.

2 Aooʼ, áádóó bikʼéí ałdóʼ, Zoram dineʼé Diyin God bizaad yee nideineeztʼą́ą́go, éí ałdóʼ kéyah Jershondi yíkai.

3 Áádóó baa hoolzhiizh Zoram diné ndaʼaʼeeshgo béédahódilzinígíí Diyin bizaad bee ndabidiʼneestąʼígíí yaa yádadoołtihgo ahíikai, Diyin God bizaad biniinaa bádahóóchįįd, háálá bindaʼagiz yę́ę daachxǫʼ; éí bąą Diyin God bizaad tʼáadoo deidíiztsʼą́ą́ da.

4 Áádóó kédaayahdééʼ diné tʼáá ałtso ahídeiyizhʼeezh, Diyin God bizaad bee hadaʼiisdzííʼę́ę yił yaa ndaastʼįįd.

5 Áko binaatʼáanii dóó bipriest danilínígíí dóó ndabinitinígíí haitʼáo yindahaʼáhígíí diné tʼáadoo yee yił dahoolneʼ da; áko tʼáá ałtso diné yaa ntsidaakeesígíí tʼáá nahónitingo bił béédahoozin.

6 Áádóó baa hoolzhiizh tʼáá ałtso diné yaa ntsidaakeesígíí bił beedahoozingo, Alma dóó bikʼiské yee ndaʼneeztʼą́ą́ʼ bił danilínéé éí kéyahdóó chʼídeineeskaad; ląʼí yiltʼéego; kéyah Jershonjįʼ níná.

7 Áádóó baa hoolzhiizh Alma dóó bikʼiské éí nidabineeztʼą́ą́ʼ.

8 Áko Zoram bidineʼé éí Ammon bidineʼé yichʼįʼ bádahoochįįd éí Jershondi kéédahatʼí, áádóó Zoram dineʼé aláahdi binaatʼááh bóhólníihii, éí hastiin tsʼídá doo yáʼáshóónii nilį́, éí Ammon bidineʼé haneʼ yichʼįʼ ayíʼą́ éí bikéyahdéé ndahaznánígíí chʼídahinołkaad yidííniid.

9 Áádóó ląʼígo saad bikʼeedaʼayéʼígíí yee yikʼijįʼ hahaasdzííʼ. Áádóó Ammon bidineʼé éí saad doo yeedaalzid da; éí bąą tʼáadoo chʼídeineeskaad da, ákondi Zoram dineʼé baa dahojoobaʼígíí tʼáá átʼé yahadayizheezh, áádóó yadaʼástsood, dóó ééʼ yee hadeidiilaa, áádóó kéyah tʼáá daabí dooleełgo yaa dahodeezʼą́; áádóó yíden danilínígíí yee yikáʼííjééʼ.

10 Áko díí Zoram dineʼé tʼóó yiwohdi Ammon bidineʼé yichʼįʼ bádahóóchįįd, áádóó Laman dineʼé yił ahííkai dóó ałdóʼ yikʼijįʼ yádahóółchįįd.

11 Ákohgo Zoram dineʼé dóó Laman dineʼé éí Ammon bidineʼé yikʼiidoojahgo hashtʼeʼádaʼdiilyaa, áádóó Nephi dineʼé ałdóʼ yichʼįʼ hashtʼeʼádaʼdiilyaa.

12 Áádóó ańdahwiiʼaahii Nephi bidineʼé yikʼi dahweeʼaahgo tsostsʼid tsʼáadah nááhai.

13 Áádóó Ammon bidineʼé éí kéyah Jershondóó dahdiiná, dóó kéyah Melekjįʼ níná, áádóó Nephi dineʼé bindaabaahii kéyah Jershondi yádahoołʼaʼ, áko da Laman dineʼé bindaabaahí dóó Zoram dineʼé bindaabaahí yił daʼahíbááh doo; áádóó áko Laman dineʼé dóó Zoram dineʼé ałkʼijįʼ ndaabaahgo hahoolzhiizh, ándahwiiʼaahii tseebíí tsʼáadah yihah góneʼ dahwééʼaahgo, díí nidaazbaaʼígíí tʼáá ałtso baa hodoonih.

14 Áádóó Alma, dóó Ammon, dóó bikʼiské, dóó Alma biyeʼ naakigo nátʼą́ą́ʼ nákai Zarahemla kéyahjįʼ, Diyin God yándaʼneeztą́ąʼgo ląʼída Zoram dineʼé ádaańdaʼooskan; dóó ádaańdaʼooskanígíí tʼáá bee néílą́ąʼgo bikéyahdóó chʼíbidiʼnoolkaad; ákondi Jershondi kéyah tʼáá daabígo bee dahólǫ́, dóó yee ndaabaahígíí dahdeidiijaaʼ, bizáánii, dóó baʼáłchíní, dóó bikéyah yee yichʼą́ą́h ndadoobah biniyé.

15 Áko Alma, bidineʼé bąąhágiʼ ádaatʼinígíí yaa yiniił niizį́į́ʼ, aooʼ daʼahiganígíí, dóó ndaʼahiltseed, dóó ałchʼįʼ ndaabaah, dóó Diyin bizaad yee naʼneeztʼą́ą́ʼ, doodago Diyin God bizaad yaa hodoolnihgo abiʼdoolʼaʼ, kin dah naazhjaaʼgóó tʼáá áłtso diné bitahgóó; dóó diné bijéí deistłʼisgo yiyiiłtsą́, áádóó áko Diyin God bizaad bikʼeʼashchʼígíí biniinaa yikʼeeńdadiiltáál, áko tʼóó yíwohda bijéí yinííł silį́į́ʼ.

16 Éí bąą, biyeʼké ahiyiʼeezh, áko binaanish ádeidoolíłígíí yeidiyizʼą́, tʼáá łaʼí nízínígo, diyingo iináájí bee ádaʼoolʼįįłígíi. Áko bibee hazʼáanii yee hahaasdzííʼyę́ę ndeitʼá, éí haneʼ tʼáá bí néíyízoh yę́ę yeinínil.