1 Áádóó baa hoolzhiizh Alma diné sodizin atah danilíinígíí ałtso yichʼįʼ haadzíiʼgo, éí Zarahemla kintahdí hadilyaa, priest dóó elder danilínígíí yikʼi dadiilniiʼ, éí Diyingo eʼelʼíinii atsiitʼááh dah adilnííhii bikʼehgo, sodizin yikʼibídahólnííh dóó yikʼidadeezʼį́įʼgo áyiilaa.

2 Áádóó baa hoolzhiizh háiida sodizin doo daʼatahígíí bibąąhági ádaatʼéii yaa ńdaʼooskango éí tó bee dabiʼdoolzį́į́ʼ, dóó sodizinjįʼ atah yíkai.

3 Áádóó ałdóʼ baa hoolzhiizh tʼáá háiida sodizin atah nilínígíí tʼáadoo bąąhági átʼéii ya náʼooskango dóó Diyin God yidááhdóó hojoobaʼ aʼdiilyaago—bijéí yee ádaa dajoozdliʼígíí ááhdishní—tʼáá éí nahjįʼ ádabiʼdiilyaa, dóó bízhįʼ nahjįʼ hadahasdzoh, áko dabizhįʼ tʼáá ákogi ádaatʼéii tʼáadoo bił dawóltaʼ da.

4 Áádóó áko Zarahemla kintahdi sodizin bikʼehgo ádaʼalʼíinii hadeidiilaa.

5 Áko baa ákodadínóosįįł nisin éí Diyin God bizaad tʼáá ałtso diné bá, doo éí łaʼ dooda biʼdooʼniid da Diyin God bizaad deididootsʼį́įłgo áłah dooleełígíí.

6 Ákótʼée ndi Diyin God báʼáłchíní tʼáá ałhą́ą́ ahínáohkah doo bidooʼniid, dóó chʼiyáán ádąąh daohtʼį́ dóó yéego sodadołzin éí Diyin God doo yéédahósinígíí biiʼ sizíinii baa áháyą́ągo bá.

7 Áádóó baa hoolzhiizh éí Alma díí bee hazʼáanii hashtʼeyiilaago dah diiyá, aooʼ, éí Zarahemla kintahdi sodizin bitsʼą́ą́dóó, dóó tooh Sidon haʼaʼaahjigo níyá, Gideon hootso góneʼ, éí áadi kintah hadilyaa, éí Gideon kintah wolyé, éí hootso Gideon hoolyéedi ályaa, éí ázhiʼ hastiin Nehor béésh hał yee yiyiisxínée bitsʼą́ą́dóó hoʼdóójiʼ.

8 Áádóó Alma ákǫ́ǫ́ níyá dóó Diyin God bizaad yaa halneʼgo yaa ndiidzá éí sodizin hootso Gideondi hadilyaa, éí dabizází tʼáá aaníí bił ííshją́ą́ ádaalyaa yę́ę bikʼehgo saad yee haadzííʼ, diyingo áhodooníłígíí bikʼehgo, éí Jesus Christ, Diyin God biYeʼ, bitʼáá aaníinii bikʼehgo, éí bidineʼé yaa doogáałgo bibąąhági ádaatʼéii yá nináʼdoodlééł, dóó diyingo óʼoolʼįįł bee bikʼi hodiiniiʼ. Áádóó díí éí ákótʼáo náhaasdzoh. Amen.