1 Áko shiyeʼ, łaʼ bee nichʼįʼ hanáádeesdzih; háálá bąąh níniʼ nisin éí daneeznánée náádahiidooʼnaałgo.

2 Áko shooh, ándishní, doo náádaʼiináa da—doodago, bee hadeesdzihígíí, kótʼáo ááłdishní, díí atsʼíseekʼeh doo hoolʼáágóó hiináago ádoolnííł da, díí ndahachxǫǫhii éí doo doo ndahachxǫǫhii ádoolnííł da—Christ níyáádóó índa.

3 Áko shooh, bí éí daneeznáanii náádahiináá doogo íídoolííł. Ákondi shooh, shiyeʼ, náádaʼiiná éí tʼahdoo álnééh da. Áko, doo bééhózinii łaʼ ííshją́ą́ áshłééh; ákótʼée ndi, doo béédahózinii ląʼída ííshją́ą́ ádaalyaa da, doo bił bééhóziní da Diyin God tʼéiyá. Ákondi łaʼ nił ííshją́ą́ ádeeshłííł éí shił bééhodoozįįł yéego Diyin God baanéisiskan—éí nááʼiiná bídéétʼiʼ.

4 Áko shooh, tʼáá ałtsoní anoonééłdę́ę́ʼ nááʼiiná baa hodoolzhishgo báhazʼą́. Áko doo łaʼ bił bééhóziní da; ákondi Diyin God díí báhwiidooʼaałígíí bił bééhózin.

5 Áko, tʼáá łáhídi daatsʼí, doodaiiʼ naakidi daatsʼí báhwiidooʼaał, doodaiiʼ táádi, dineʼé anoonééłdę́ę́ʼ náádahwiidooʼnaał, éí doo ílį́į da; háálá Diyin God díí tʼáá átʼé bił bééhózin; áádóó díí éí shił tʼáá ákohgo bee hazʼą́—áko daaneeznáanii náádahiidooʼnaałgo bá hazʼą́ągo ályaa.

6 Áko anoonééł dóó náádahiizhdooʼnaał bitaʼgi hazʼą́ągo ádoolnííł.

7 Áádóó áko naʼídídeeshkił nihokááʼ dineʼé biiʼ sizíinii haashdadoonííł díí anoonééłdę́ę́ dóó náádahidoonaał bándahastʼą́ąjįʼ?

8 Áko nihokááʼ dineʼé tʼáá łáhídi doodago biláahgo náádahiidooʼnaałgo bá nahootʼą́ągo éí doo bóhólnííh da; háálá tʼáá átʼé doo tʼáá łahjįʼ daninée da, díí éí doo bóholnííh da; tʼáá átʼé éí Diyin God bił tʼááłaʼajíní átʼé, dóó nihokááʼ dineʼé tʼéiyá oolkiłígíí yółtaʼ.

9 Éí bąą, nihokááʼ dineʼé anoonééłdę́ę́ʼ nadahiidoonaałgo bee bá nahootʼą́; dóó anoonééł dóó náádahiidoonaał bitaʼgi hazʼą́ągo bá nahootʼą́. Áádóó áko, díí bá nahootʼánígíí, nihookʼáá dineʼé biiʼ sizíinii haadooníłígíí shił bééhodoozįįłgo éí Diyin Bóhólníihii tʼáá íiyisíí nabídeełkid; áádóó díí éí shił bééhoozįįd.

10 Áádóó tʼáá ájítʼé náádaʼhiijiina baa hoolzhiizhgo, áko índa hwił béédahódoozįįł Diyin God éí tʼáá átʼé nihokááʼ dineʼé bándawiistʼánígíí bił bééhózin.

11 Áko, iiʼ sizį́ anoonééł dóó nááhidooʼnaał bitaʼgi haadooníłígíí—Áko shooh, Diyin yá naalʼaʼí shił ííshją́ą́ áyiilaa, tʼáá áłtso nihokááʼ dineʼé biiʼnáázíinii, bitsʼíís tsʼídá yitsʼáníyáadi, aooʼ, tʼáá ałtso nihokááʼ dineʼé biiʼ naazíinii, yáʼádaatʼééh doodago dóó yáʼádaatʼéeh da ndi, éí Diyin God iiná bee niláhę́ę bighangóó ńdooltʼééł.

12 Áádóó índa baahidoolzhizh, iiʼ naazíinii diyinkʼehgo deiyíkahę́ę ił hózhǫ́ hazʼáadi bá lą́ adooleełgo yah ahidookah, éí Diyin bikéyah hózhóní hoolyé, éí ił hózhóonii bił hazʼą́, éí hodeezyééł bił hazʼą́, áadi tʼáá átʼé bee bichʼįʼ ndahwiinánée áádóó tʼáá áłtso bidaʼdiiłáhyę́ę, dóó yínííł yitsą́ą́ʼdóó háádadoolyįh.

13 Áádóó baahodoolzhish, bąąhági ádaatʼínígíí biiʼ sizíinii, aooʼ, éí bedaʼiinízįįd—háálá áko shooh, éí Diyin Bóhólníihii biʼIiʼ Sizį́ Diyinii łahdóó doodago doo daʼatah da; háálá áko shooh, doo yáʼáshóoniijí ndaʼanish nídeidiilá yáʼátʼéehii éí tʼáadoo da; éí bąą chʼį́įdi biʼiiníziinii biiheeswod, dóó bitsʼíís ndeiloʼ daazlį́į́ʼ—díí éí tłʼóójóó chahałheeł biyiʼjoo chʼídínóolkał; daachah, dóó yéego dadilwoshgo daachah, dóó biwooʼ ahideidiłkʼash, díí éí tʼáá bí tsʼiʼndaakaaʼígíí biniinaa, biʼiiníziinii íínízingo dabisnahgo ndabilooz.

14 Áko díí éí bąąhági ádaatʼínígíí biiʼ sizíinii bá hazʼą́, aooʼ, chahałheeł góneʼ, tʼóó bahooʼih góneʼ, Diyin God bibee áteʼelʼíinii báháchʼįʼ dookʼą́ą́ł nahalinígíí yindaaldzidgo yiká dadéezʼį́į́ʼ; dóó tʼáá kotʼáo bił hazʼą́, diyingo dahiináanii éí Diyin bikéyah hózhǫ́ǫdi, náádaʼiiná bá baa hoolzhiizhjįʼ índa.

15 Áko, łaʼ díí ił hózhǫ́ dóó tʼóó baaʼihgo iiʼ sizíinii bá hazʼą́ danízin, tʼahdoo nááʼiiná baa hoolzhíízhgo, éí díí tsʼídá áłtsé nááʼiiná átʼé danízin ńtʼę́ę́ʼ. Aooʼ, tʼáá aaníí nááʼiiná wolyée ndi, yiiʼsizį́ doodaʼgo iiʼ sizíinii íł hózhǫ́ doodaiiʼ tʼóbahooʼih hazʼą́ąjįʼ adoogááł, saad bee hadaʼiisdzííʼ yę́ę bikʼehgo.

16 Áádóó áko shooh, díí baa nááhóóneʼ, tsʼídá áłtsé nááʼiiná éí hólǫ́, daneeznánée, doodaiiʼ daneeznánígíí, doodaiiʼ dadínóonéłígíí náádahidooʼnaał, niléí Christ náádiilyáádę́ę́ʼ dóó nááhiinaʼjįʼ.

17 Áko, doo baa ntsídeikees da díí tsʼídá áłtsé nááʼiiná, kótʼáo baa haʼoodzíʼígíí, éí iiʼ naazíinii ił hózhǫ́ dóó tʼóó bahooʼihjįʼ ndahaaskaaʼígíí náádahiidooʼnaał. Díí kótʼáo áá haʼnínígíí doo kótʼáó baa ntsídadoohkos da,

18 Áko shooh, ánhidishní, ndaghaʼ; ákondi iiʼ sizį́ dóó atsʼíís ahiihnidootʼashgo áá haʼní, Adam hiinánée dóó Christ nááhiiʼnaʼjįʼ.

19 Áko, iiʼ sizíinii dóó atsʼíís baa dahóóneʼę́ę ahiihnídahidookah tʼáá hooschįʼ, bąąhí ádaadzaaʼígíí dóó diyingo dahiinánée, éí doo áłdíshníi da, bíniʼ shį́į́ tʼáá ákótʼé, éí tʼáá átʼé nihidookah dishní; éí doodago kótʼáo ááłdishní, éí Christ náádiidzá dóó bikʼijįʼ naadahiidooʼnaałígíí bilą́ąjįʼ náádahiináa doo.

20 Áko, shiyeʼ, Christ nááhiinaʼdi náádahiináa doo doo áłdishníi da; ákondi shooh, shí éí kwíínisin, éí iiʼ sizíinii dóó atsʼíís ałhiihnídahidookah, yáʼátʼéehgo dahiinánígíí, Christ nááhiinaʼgo, dóó yáʼąąshgóde dahnídiidzáadi.

21 Ákondi nááhiiʼnaʼdi doodago bikéédóó, éí doo ááłdishníi da; ákondi kóníltsogo bee nihił hashneʼ, anoonééł dóó nááʼiiná bitaʼgi hazʼą́, dóó iiʼ sizíinii bił hózhǫ́ doodaiiʼ tʼóó baaʼihgo bił hazʼą́ éí Diyin God yee hoołʼaʼ daneeznánée náádahiináa doo, dóó ałhiihnááhiidookah, iiʼ sizíinii dóó atsʼíís tʼáá áłah, áádóó Diyin God yidááhdóó deidoozįįł, dóó naanish ádayiilaayę́ę bikʼehgo bá ndahodiyootʼááł.

22 Aooʼ, díí tʼáá átʼé ninádahaasyaii háádadilyaa éí Diyin yá yádaałtiʼii yee hadahaasdzííʼ.

23 Iiʼ sizíinii atsʼíís yił ahiihńdootʼash, dóó atsʼíís iiʼ sizíinii yił; aooʼ, atsiiʼ ndi do laʼ yóóʼadoodił da; áko tʼáá ałtso ádaatʼéhée dóó hadadíłtʼéejįʼ háádadidoolnííł.

24 Áádóó áko, shiyeʼ, díí háádadilyaii éí Diyin yá yádaałtiʼii yee hadahaasdzííʼ—

25 Áádóó diyingo dahiináanii Diyin God bił hazʼáadi bitsʼádadeezlííd doo.

26 Ákondi shooh, bąąhági ádaatʼįįd yę́ę tʼóó bąąhʼihgo dadínóónééł; háálá dadiyinígíí bidadéétʼiʼjí yikʼįʼ dadínóónééł; háálá chin daabąąh, áko nahjįʼ kódaalyaa, daʼneestʼą́ nahalingo ídaʼiilaa dóó ndaashnishę́ę deidoolnih, éí eii chʼį́įdiikʼeh ádaʼiilaa; áádóó daadlánígíí bitłʼááh díchʼííʼgo shijaaʼígíí beeʼadlání yiyiʼdóó deidoodlį́į́ł.