1 Áádóó áko shooh, kʼad baa hoolzhiizh Laman dineʼé tʼóó yiwohdí bádahóóchįįd háálá bikʼéí ndeisteedígíí biniinaa; éí bąą Nephi dineʼé atídadiilnííł daaníigo yee dahoodeezʼą́; áádóó Anti-Nephi-Lehi bidineʼé tʼáadoo nináádeistseed da ákweʼé hoolzhishgo.

2 Ákondi bindaabaahí yił níná dóó Zarahemla bikéyah yiih yíkai, áádóó Ammonihah kéyahdi diné kéédahatʼínée yikʼiijééʼ dóó nideistseed.

3 Áádóó éí bikʼijįʼ, tʼóó ahayóidi Nephi dineʼé yił ałkʼiijééʼ, áko tʼóó ahayóí nidanichéego nidabiʼdistseed.

4 Áádóó Laman dineʼé nidabiʼdistseed yę́ę kasdą́ą́ʼ tʼáá ałtso Amulon baʼáłchíní dóó bikʼéí ádaatʼį́, éí Noah bipriest danilį́į́ ńtʼę́ę́ʼ, áádóó éí Nephi dineʼé nidabistseed;

5 Áádóó chʼéékaiʼígíí, haʼaʼahjigo diné doo kééhatʼíníjigo adaneezchą́ą́ʼ, dóó Laman dineʼé tʼáá naʼnileʼdii yigha dahodeestʼą́ dóó yikʼi adídahoosʼnííʼ, tʼóó ahayóí Laman dineʼé kǫʼ yee nideistseed bidaʼoodląʼ biniinaa—

6 Háálá ląʼí da éiyá, ląʼí da éí nidabiʼdistseed dóó ląʼí tiʼdahoozniiʼ, bikéyahdi Aaron dóó bikʼiské yee nidabineeztą́ą́ʼ yę́ę dabidiisnááʼgo yéédaalniiʼ; éí bąą bizází bibee ádaʼoolʼįįłyę́ę doo deiyoosdląąd da, áádóó Diyin Bóhólníihii deiyoosdląąd, dóó Nephi dineʼé ayóó átʼáo adziilii yeinílá; ákótʼáo diné doo kééhatʼínídi ląʼí da daʼoosdląąd.

7 Áádóó baa hoolzhiizh akʼi bídahólníihii Amulon baʼáłchíní chʼéédziʼígíí éí daʼoosdląądígíí nideidoołtsxiłgo yá nidahazʼą́, aooʼ, tʼáá ałtso díí tʼáá aaníinii deiyoosdląądígíí.

8 Áko díí tʼáá aaníinii yiniinaa daneeznánée éí ląʼí da bikʼéí bádahóółchįįd; dóó doo kééhojitʼínídi saad ałchʼįʼ adeiyiinííł daazlį́į́ʼ; áádóó Laman dineʼé éí Amulon dóó bikʼéí yíká dadeezbaaʼ nideidoołtsxił biniyé; dóó haʼaʼaahjigo doo kééhojitʼínígóó dah dadíníichą́ą́ʼ.

9 Áádóó áko shooh éí díí jį́įdi Laman dineʼé bíká ndaabaah. Ákohgo Abinadi bizaad yę́ę bohoolyaa, éí priest danilínígíí baʼáłchíní kǫʼ bee tiʼdahodoonih nínée.

10 Háálá áyidííniid: Atídahshidoolíłígi átʼáo ádahodooníłígíí bohodoolnííł.

11 Áádóó áko Abinadi éí Diyin God yoodlánígíí biniinaa bí áłtsé kǫʼ yee tiʼhoozniiʼgo daaztsą́; áko díí éí díigi átʼáo ááh yíłníí ńtʼę́ę́ʼ, ląʼí da kǫʼ yee tiʼdahooníihgo nidadootsxił, bí tiʼhoozniiʼ yę́ęgi átʼáo.

12 Áádóó Noah bipriest danilínígíí áyidííniid nihílástsiiʼ ląʼí diné nidabidoołtsxił, tʼáá bí tiʼhoozniiʼ yę́ęgi átʼáo dóó adahwiisʼáágóó daʼníłtsʼą́ąjigo ałtsʼáhídínóolkał dóó ndabiʼdidooltsxił, dibé yaa áhályáanii tʼáágééd ayóó ííjééʼ dóó naaldlooshii daʼałchinígíí dabííghą́ą́ʼ; dóó áko shooh, díí saad bee haʼoodzííʼ yę́ę bohoolyaa, háálá Laman dineʼé binoołkał ńtʼę́ę́ʼ, dóó bíká nidaazbaaʼ, dóó atídabiʼdiilyaa.

13 Áádóó baa hoolzhiizh Laman dineʼé éí Nephi dineʼé chʼééh yikʼehdadidleehgo tʼáá bí bikéyahgo anáákai; dóó ląʼí Ishmael bikéyah dóó Nephi bikéyahjigo yidahidiiná, dóó Diyin God bidineʼé yídiikai, éí Anti-Nephi-Lehi bidineʼé ádaatʼį́.

14 Áádóó ałdóʼ yee nidaabaah yę́ę łeeyiʼ góneʼ yikʼi dahoogeed, bikʼéí ádaʼiilaa yę́ę yedaʼiilaa, áádóó diné diyinkʼehgo dahinaʼ; dóó Diyin Bóhólníihii yikééʼ deíkááh daazlį́į́ʼ, dóó bibee hazʼáanii dóó bee ndahwiistʼáanée yikʼeh dahółʼį́į́ ńtʼę́ę́ʼ.

15 Aooʼ, Moses bibee hazʼáanii yikʼeh dahółʼį́į́ ńtʼę́ę́ʼ; háálá kʼad ndi Moses bibee hazʼáanii yikʼeh dahółʼį́į dooleeł, hááłá doo tʼáá ałtso bohoolyaa da. Azhą́ ákótʼée ndi Moses bibee hazʼáanii yikʼeh dahółʼį́, Christ doogááłígíí yichʼįʼ dadéezʼį́į́ʼ, Moses bibee hazʼáanii éí Christ doogááł nahalingo deiníłʼį́, dóó ádeiłʼíinii tʼáá yikʼeh dahółʼį́įgo deiyoodlą́ éí Diyin nádzáajįʼ índa.

16 Áko éí Moses bibee hazʼáanii doo bee yisdáʼdoodááł da danízin; ákondi Moses bibee hazʼáanii éí Christ hózhǫ́ beʼoodląʼ dabidziilgo ádabósin; dóó éí bąą biʼoodląʼ tʼah yee hadaʼólní, hoolʼáágóó yisdáʼiildééh bichʼįʼ, diyingo áhodooníłígíí yadaʼólíigo, éí náásgo ádahodooníłígíí yaa halneʼ.

17 Áádóó áko shooh, Ammon, dóó Aaron, dóó Omner, dóó Himni, dóó bikʼéí tʼáá íiyisíí bił dahóózhǫǫd, háálá Laman dineʼé bitahgóó nizhónígo łaʼ dahoolaaʼígíí biniinaa, Diyin Bóhólníihii bisodizin bikʼehgo beidiníʼánígíí deiyiiłtsą́ągo, dóó ałdóʼ bizaad tʼáá ałtso yee haadzííʼ yę́ę yá yihoolaa.