1 Áádóó áko baa hoolzhiizh Ammoron saad sheiníʼą́, éí aláahdi naatʼáanii nilį́, dabiʼdisnahígíí shaa níʼéésh ní éí nihí yah adasiiʼnil áko Antiparah kin dashijaaʼ nihaadeididooʼááł.

2 Ákondi aláahdi naatʼáanii saad bichʼįʼ íishłaa, bééhózingo nihindaabaahí Antiparah kin dashijaaʼ beeádidahodiilnihgo bídeiníigah bidííniid; dóó yah adasiiʼnilígíí kin dashijaaʼ bił aháá dahsiiʼnilgo nihí doo dahoniiʼ yą́ą da dadíníizįįł, áádóó yisnááh ádeilyáaʼígíí tʼéí ałháádadiinił.

3 Áádóó Ammoron saad bichʼįʼ íishłaaʼígíí doo yinízin da, háálá yah adabiʼdiisnilígíí doo ałháídooʼnił da; éí bąą Antiparah kin dashijaaʼgóó dadiiʼnééhgo bichʼįʼ hashtʼeʼádaʼdiilyaa.

4 Ákondi Antiparah bidineʼé kin dashijaaʼ dóó chʼíheezná, dóó nááná łahjigo kin dah naazhjaaʼgóó adahineezchą́ą́ʼ, éí daabí, bidziilgo ádeidoolíiłgo; áko Antiparah kin dah shijaaʼ danihí silį́į́ʼ.

5 Áádóó kótʼáo ándahwiiʼaahii dahwéeʼaahgo naadiin tseebíí nááhaigo ahoolzhiizh.

6 Áádóó baa hoolzhiizh naadiin náhástʼéí yihah bił háhoolzhiizhgo, anaaʼgo chodadooʼįįłígíí nihaaheesgį́, áádóó ndaabaahí ałdóʼ łaʼ nihindaabaahí bíítʼeezh, Zarahemla bikéyahdóó, dóó kéyah binaadę́ę́ʼ, hastą́ą́ dimííl yázhí diné ndaabaahí áneeltʼeʼgo, éí hastą́diin Ammon dineʼé biyeʼké bikʼis yił ahíikai, éí shinaaki dimííl yázhí shił naaldeehí. Áádóó áko shooh, danihidziil, aooʼ, dóó tʼáá ląʼí chodeidiilʼįįłígíí ałdóʼ nihaaheesgį́.

7 Áádóó baa hoolzhiizh Cumeni kin dashijaaʼdi bá ndaabaahí aa ádahalyánée bikʼiidiijah daniidzį́į́ʼ.

8 Áádóó áko shooh, díí nihił ííshją́ą́ ádeeshłííł tʼáadoo hodíínaʼí daniidzinyę́ę bidahwiilyaa; aooʼ, nihindaabaahí dabidziilígíí bee, bindasiitʼiʼ, tłʼéeʼgo, Cumeni kin haalʼáagi, éí tʼah doo chodaaʼįįhígíí baa yígeehgóó.

9 Áádóó baa hoolzhiizh kin dashijaaʼ binaagóó dahyiiʼnéełgo ląʼí da yiską́, ákondi nihibéésh-hał nihinaagóó naaznilgo naniijah ńtʼę́ę́ʼ, tʼáá hadaʼiilzíídgo, áko Laman dineʼé doo tłʼéeʼgo nihikʼiidoojahgo nanihidoołtsxił da, éí ląʼí da kóndanihiidlaa; ákondi ląʼí da ákódanihiilaago ninádeitsxiʼ ńtʼę́ę́ʼ.

10 Shoobaʼígo índa chodeidoołʼįįłígíí beiyígį́, áádóó tłʼéeʼgo kʼadę́ę kin daashijaaʼ yiih yinééhgo. Áádóó nihí, Laman dineʼé doo danidlį́įgóó, Nephi dineʼé danidlį́įgo, áko, yisnááh ádeilyaa dóó chodeidoołʼįįł yę́ę bitsʼą́ą́ʼ nídadiijaaʼ.

11 Áádóó azhą́ Laman dineʼé kótʼáo bikʼaʼaʼayeedígíí bitsʼą́ą́ʼ niʼkólyaa ndi, azhą́ díigi átʼée ndi kin haalʼá tʼáadii deiyótʼą́; éí bąą bee ákááʼaʼadoowołígíí Judeajigo tʼáá íiyisíí choidooʼįįłgo bichʼįʼ ádeilyaa, áádóó yah adasiiʼnilígíí éí Zarahemla kéyahgóó daniitʼeezh.

12 Áádóó baa hoolzhiizh tʼah doo ląʼí yiłkááhgo Laman dineʼé bee bíká adoowoł yę́ę bitsʼą́ą́ʼ niʼkólyaago baa ndahóókaad; éí bąą kin haalʼáyę́ę tʼóó nihaa deideezʼą́; áádóó kótʼáo daniidzin yę́ę bidahwilyaa éí Cumeni kin haalʼá nihaadeitʼą́.

13 Ákondi baa hoolzhiizh yaa adahísiiʼnilígíí tʼóó ahayóí, áádóó azhą́ niidlą́ʼí ndi, tʼáá áníiltso bikʼidadinítʼį́į́go ánihiilaa, éí doodaiiʼ ndadiiltsxił.

14 Háálá áko shooh, tʼóó ahayóígo tʼóó nihił chéédaajah, dóó tsé yee danihółneʼ, dóó tsihał bee, éí doodago tʼáá haʼátʼííshį́į́ ndeididoolełígíí bee, áko naaki dimííl yázhí bilááhgóó ndasiiltseed éí nihaa ádadeestʼą́ą́ dóó bikʼijįʼ ákódzaa.

15 Éí bąą ndadiiltsxiłgo tʼéiyá badaʼsiidlį́į́ʼ, éí doodago bikʼidadíníítʼį́į́ʼ, béésh hał dahdeiyínííjaahgo, Zarahemla kéyahgóó deiyíníítʼééshgo; áádóó chodeilʼínígíí éí nihidineʼé tʼéiyá bíighahgo nihee dahólǫ́, azhą́ Laman dineʼé łaʼ bitsʼą́ą́ʼ nidadiijaaʼ ndi.

16 Áádóó áko, tʼáá íiyisíí nahoonitłʼahgo nihił hazʼą́ągo, díí dasilnááhígíí éí lá haa dadiilníiłgo nihidaʼdiiłʼá; ákótʼée ndi, éí bąą Zarahemla bikéyahgóó dadiitʼishgo bidahosidiitʼą́; éí biniinaa nihándaabaahí łaʼ bitsʼádasiiʼnil, dóó dasiilnáhígíí yikʼi bídahólníihgo ádeilyaa Zarahemla kéyahgóó yaa adeidooʼish.

17 Ákondi baa hoolzhiizh biiskání náʼná. Áádóó áko shooh, dabidisnáá yę́ę tʼáadoo bindaʼádeelkid da; háálá áko shooh, Laman dineʼé nihikʼiijééʼ, éí tsʼídá nákaigo yisdádanihííʼeezh. Háálá áko shooh, Ammoron bindaabaahí chodeidoołʼįįłígíí łaʼ yaa náánéínígį́ dóó diné ndaabaahígíí tʼóó ahayóígo ałdóʼ.

18 Áádóó baa hoolzhiizh ndaabaahí dabiʼdisnááh yę́ę adeezheezh yę́ę tsʼídá ákohgo náʼná éí hadaʼdeesʼį́į́ʼ, nihikʼiijéhígíí kʼadę́ę nihikʼeh dadidleehgo.

19 Ákondi shooh; naaki dimííl yázhí dóó biʼaan hastą́diin tʼáá díkwíhígo naashʼeeshígíí doo nídaaldzidgo daʼahoogą́ą́ʼ; aooʼ, doo ndahinilyéésgóó Laman dineʼé yił ałkʼiijééʼ, áádóó bikʼijįʼ danilínígíí tʼáá ałso nideistseed.

20 Áádóó łaʼ nihindaabaahí kʼadę́ę Laman dineʼé ndabiłtseedgo, áko shooh, naaki dimííl yázhí dóó biʼaan hastą́diin doo tʼą́ą́ʼ ndahiniyéés da dóó nídaaldzid da.

21 Aooʼ, dóó tʼáá ałtso ádíílííł bidaʼdiʼnínígíí doo daʼiisihgóó yedaʼiilaa; aooʼ, beʼoodląʼ ndi yee yedaʼiilaa; dóó saad yee shił dahoolneʼ yę́ę bénáshniih éí bimá yee ndahoneeztą́ą́ʼ.

22 Áádóó kʼad áko shooh, díí shiyeʼké, dóó diné ndabiʼdiisdlááʼgo dabiʼdisnááh adeizhʼeezh yę́ę, díí ayóó átʼéego akʼeh hodeesdlį́į́ʼ bee baa ahééh daniidzin; háálá éí Laman dineʼé yikʼeh dadeesdlį́į́ʼ; éí bąą Manti kin dashijaaʼgóó anídaneeskaad.

23 Áádóó Cumeni kin dashijaaʼ tʼah deiníitąʼ, dóó doo tʼáá átʼé béésh hał bee ndabiʼdziztseed da; ákótʼée ndi, ląʼí nihitsʼą́ą́ʼ nidaaztseed.

24 Áádóó baa hoolzhiizh Laman dineʼé adahineezhchą́ąʼgo, tsxį́įłgo shándaabaahí atídaalyaaígíí daneezná bitahdóó hadahołteeh dííniid, dóó atídaadzaagi bąąh ádaʼalneʼgo íishłaa.

25 Áádóó baa hoolzhiizh naakidi neeznádiin, éí bił chʼaa dahazlį́į́ʼ bidił dadeeznaʼígíí biniinaa, éí naaki dimííl yázhí bił naashdeeh yę́ę bitahdóó, ákótʼée ndi, éí Diyin God biyáʼátʼéehii bikʼehgo, dóó nihiyaadahodeesyis, dóó tʼáá átʼé shindaabaahí bił dahóózhǫǫd, doo łaʼ biʼdiisxį́į da; aooʼ, dóó doo łaʼ yéego atílyaa da.

26 Áádóó áko, yisdábiʼdootʼeezhígíí nihindaabaahí yaa bił dahóóyééʼ, aooʼ, tʼááłáʼí dimííl yázhí nihidineʼé ndabiʼdeztseed áko bí éí yisdábiʼdootʼeezh. Éí Diyin God ayóó átʼáo bibeʼadziil atʼį́įgo baadahwiilneʼ, háálá bee nidabidiʼneestą́ʼígíí dayoosdląʼígíí biniinaa—áko Diyin God hazhóʼó nahwiiʼaahii hólǫ́ǫ́ lá, dóó tʼáá háí shį́į́ doo bił naaki nilínígíí, éí beʼadziil baa haʼniihígíí yisdábidoolóós.

27 Áko díí éí baa haasdzíʼígíí kótʼéego daʼoodlą́; ániid nidaakaiʼí danilį́, dóó bíniʼ doo tʼáá niná dahinilyéés da, dóó Diyin God áłahjįʼ yadaʼólí.

28 Áádóó áko baa hoolzhiizh nihindaabaahí atídaadzaaʼígíí bíká ííjéeʼgo, dóó nihitsʼą́ą́ʼ daneeznánígí yóó ádeilyaago dóó Laman dineʼé ałdóʼ, éí tʼóó ahayóí, áko shooh, Gid dasiilnááhígíí bindeedííłkid éí Zarahemla kéyahgóó eetʼeezhyę́ę.

29 Áko Gid ndaabaahí bikʼidahodiiniiʼgo kéyahgóó adaʼazhʼeezh yę́ę yinaatʼááh nilį́į́ ńtʼę́ę́ʼ.

30 Áádóó áko, Gid éí díí saad yee shichʼįʼ haadzííʼ: Áko shooh, Zarahemla kéyahgóó dahdiiʼná dasiilnááhígíí bił. Áádóó baa hoolzhiizh nihíndaabaahí bindaalchiʼí bił ahíikai, éí Laman dineʼé dahdeinéehígíí bikʼi dadínóhʼį́į́ʼ biʼdooʼniidgo dabiʼdiisʼaʼ.

31 Áádóó nihichʼįʼ hadadeeshghaazh, kódaaníigo—Áko shooh, Laman dineʼé bindaabaahí Cumeni kin dashijaaʼ yichʼįʼ deibááh; áádóó áko shooh, yikʼiidoojah, aooʼ, dóó nihidineʼé nideidoołtsxił.

32 Áádóó baa hoolzhiizh dahsiilnááhígíí dadiilwosh yę́ę deidiiztsʼą́ą́ʼ, éí yee hadaasdziil; dóó nihikʼijįʼ bádahachįʼgo nihikʼijįʼ ńiijééʼ.

33 Áádóó baa hoolzhiizh nihikʼijįʼ ndííjéʼígíí biniinaa nihibéésh hał bee ndasiiltseed. Áádóó baa hoolzhiizh tʼáá átʼé nihibéésh hał yichʼįʼ dahdiijééʼ, éí ákódzaago, łaʼígo nidaaztseed; dóó łaʼígíí éí nihił chʼíníjééʼ dóó nihitsʼą́ąjigo dadínéezhchą́ą́ʼ.

34 Áádóó áko shooh, dahdínéezhchą́ąʼgo bíniijeehgo chʼééhádeitʼįįd, Cumeni kin dashijaaʼjigo tsxį́įłgo dahdiiʼná; áádóó áko shooh, nihidineʼé bíká adiijahgo tsʼídá bikin dashijaaʼ yisdádadiiʼnił bíighahgo áadi niikai.

35 Áádóó áko shooh, niheʼanaaʼí bikákʼeedóó yisdánáánihidoonil. NihiDiyin God bízhiʼ baadawiiʼniih doo; háálá áko shooh, bí éí yisdánihíínil; aooʼ, áko díí éí ayóó átʼáo yee nihíkaʼeelwod.

36 Áko kʼad baa hoolzhiizh shí, Helaman, Gid bizaad yee shił hoolneʼgo tʼáá íiyisíí shił hóózhǫǫd Diyin God biyáʼátʼéehii yee yisdánihííniłʼígíí biniinaa; áko doo ałtso dínííʼnééł da; aooʼ, dóó ndabiʼdiztseedígíí biiʼ naazíinii yinishdlą́ągo Diyin God yił dahólǫ́ǫ́góó anáhaaskai.