1 Áko shooh, kʼad baa hoolzhiizh Nephi bidineʼé tʼáá íiyisíí bił dahóózhǫǫd, háálá Diyin Bóhólníihii éí biʼanaaʼ yilákʼeidóó yisdánááyiiʼeezh; éí bąą biBóhólníihii Diyin God yichʼįʼ ahééh daniizį́į́ʼ; aooʼ, áádóó ayóó dahodísingo chʼiyáán adąąhdeestʼįįd dóó yéego sodadoolzin, dóó tʼáá íiyisíí bił dahózhǫ́ǫgo Diyin God deidósin.

2 Áádóó baa hoolzhiizh ańdahwiiʼaahii Nephi bidineʼé yikʼi dahwééʼaahgo náhástʼéítsʼáadah yiihahgo, Alma biyeʼ Helaman yaa níyá dóó kwíídííniid: Haneʼ ndaháásdzoh bee nichʼí haasdzíiʼyę́ęʼísh yínídlą́?

3 Áádóó Helaman ábiłní: Aooʼ, yinishdlą́.

4 Áádóó Alma ánáábiłní: Jesus Christ doogáłígíísh yínídlą́?

5 Áádóó ání: Aooʼ, tʼáá átʼé saad bee háínídzíʼígíí yinishdlą́.

6 Áádóó Alma ánáábiłní: Shibee hazʼáaniiʼísh bikʼeh hóníłʼį́į dooleeł?

7 Áádóó ání: Aooʼ, Shijéí tʼáá átʼé bee nibee hazʼáanii bikʼeh hónishį́į dooleeł.

8 Áádóó Alma ábiłní: Nikʼihojídlíí doo; dóó Diyin Bóhólníihii binahjįʼ kéyah bee ádíítʼįįł.

9 Ákondi shooh, Diyin bikʼeh áhodooíłígíí łaʼ bee nił hódeeshnih, ákondi Diyin bikʼeh áhodoonííłgo bee nił hweeshneʼígíí doo baa hodíílnih da, aooʼ, Diyin bikʼeh áhodoonííłgo bee nił hweeshneʼígíí doo łaʼ bił ííshją́ą́ ádíílííł da, Diyin bikʼehgo áhodooníłígíí bohoolyaago índa; éí bąą saad bee hadeesdzihígíí nááhízooh.

10 Áádóó díí éí saad: Áko shooh, díí Nephi dineʼé baa ákoniizį́į́ʼ, diyingo shił ííshją́ą́ éʼélʼínígíí bikʼehgo, Jesus Christ bichʼį́ ííshjání áʼdiilyaa dóó dį́įdi neeznádiin nááhaigo, beʼoodląʼ yaadáádidookah.

11 Aooʼ, ákohgo daʼanaaʼ dóó naałniih yiiʼ naakai doo, aooʼ, dichin dóó ndaʼatseed, Nephi bidineʼé yíghą́ą́ʼjįʼ—

12 Aooʼ, díí beʼoodląʼ yaadáádiikaiʼígíí biniinaa chahałheełjí óʼoolʼįįł yiihdínoodah, dóó atsʼíís bee tsiʼnaʼadáh, dóó tʼáá ałtso bąąhági ádaatʼéii; aooʼ, ándishní, díí ayóó átʼéii adinídíín dóó ééhózin yitsʼą́ą́jí bąąhági ádaatʼį́į doo, aooʼ, anihidishní, éí bijį́į́dóóʼ, dį́į́di sánaʼooghą́ą́ʼ tʼah doo ałtso ádaadįįhdą́ą́ʼ tʼáá íiyisíí bąąhágiʼ átʼéii baa hodoolzhizh.

13 Áádóó ayóóʼátʼéii beiníłką́ągo, áko shooh, tʼáá hodíínaʼí áajįʼ ahodoolzhizh éí kʼad dahiinánígíí, doodago Nephi bidineʼé kʼad bił daoltaʼígíí dabineestʼąʼ, éí kʼad Nephi bidineʼé doo bił yoltʼa da dooleeł.

14 Ákondi tʼáá haishį́į́ chʼééyáhígíí, dóó ayóó átʼáo dóó bahadzidgo yoołkááł biyiʼ tʼáadoo dabidooghą́ʼígíí, éí Laman dineʼé yihididookah, dóó adaatʼéhígiʼ ádaatʼée doo, tʼáá átʼé, tʼáá hózhǫ́ʼí tʼáá dikwíhígo Diyin Bóhólníihii yikééʼ naazíní daolyée doo; éí Laman dineʼé yíká ndaabaah doo ndabiʼdistseedjįʼ, díí Diyin bikʼehgo áhodooníłígíí bohodoolnííł.

15 Áádóó áko baa hoolzhiizh Alma Helaman yichʼįʼ haadzííʼgo, yá sodoolzin, áádóó łaʼ biyeʼké ałdóʼ; áádóó nahasdzáan ałdóʼ yá sodoolzin éí diyingo oodááł biniyé.

16 Áádóó kódííniid: Bóhólníihii Diyin God ání—Kéyah doochxǫǫł, aooʼ, díí kéyah, tʼáá áłtso ałʼąą dineʼé dah deiyíkahii, ałkʼéí danilíinii, bizaad ałʼąą ádaatʼéii, dóó tʼáá áłtso diné, ndadooltsxił, éí bąąhági ádaatʼí, yéego yiih yikaigo, áko ádííniid yę́ę bikʼehgo áhodoonííł; háálá díí kéyah doo yáʼátʼééhgóó bá haʼoodzííʼ dóó Diyin God yikʼihojisdliʼ, Diyin Bóhólníihii éí bąąhági átʼéii tʼóó tʼįįhdígo ndi doo yee hasʼą́ą da.

17 Áádóó áko, Alma díí saad yee haadzííʼgo sodizin daʼatahígíí yá sodoolzin, aooʼ, niheʼoodląʼ bee danihidziilgo kodóó náás wohkah doo.

18 Áádóó Alma díí ałtso áyiilaago Zarahemla kéyahdóó dahdiiyá, kéyah Melek yichʼiʼjigo. Áádóó baa hoolzhiizh tʼáadoo baa náádahosidiitsʼą́ą́ da; náábiʼdiilyá daatsʼí doodago łeeh biʼdooltį́ éí tʼáadoo deiʼniiʼ da.

19 Áko shooh, díí éí nihił béédahózin, diné yáʼátʼéehii nilį́į́ ńtʼę́ę́ʼ; dóó sodizin atah danilinígíí ádaaní éí Iiʼ Sizį́ Diyinii yáʼąąshgóó bił dah diiʼáázh, doodago Diyin Bóhólníihii yooʼábiilaa, Mosesgiʼ átʼáo dahnídiidzá. Ákondi shooh, Diyin bizaad bee akʼedaʼashchínígíí aní Diyin Bóhólníihii éí Moses yił dahdiiʼáázh; dóó tʼáá ákotʼáó Alma ałdóʼ yił dahdiiʼáázh daniidzin, tʼáá bí yiłdahdiiʼáázh; éí bąą, háálá díí naahoʼdiilyá dóó yóóʼáhoʼdiilyáhígíí doo nihił béédahózin da.

20 Áádóó áko baa hoolzhiizh éí ańdahwiiʼaahii Nephi bidineʼé yikʼi dahwééʼaahgo náhástʼéítsʼáadah náhááh, áko Helaman diné yitahgóó Diyin bizaad yee naʼnitingo dahdiiyá.

21 Háálá áko shooh, Laman dineʼé yił daʼahiganígíí dóó atsʼą́ą́jí daazlį́ʼígíí dóó bitahgóó biniʼdeiʼaʼígíí, éí biniinaa Diyin God bizaad bee ndabidiʼnitin, aooʼ, áádóó sodizin dahólǫ́ǫ́góó bee hazʼáanii ádaalyaa.

22 Éí bąą, Helaman dóó bikʼiské kéédaayahgóó sodizin hadeiyíłwod, aooʼ, tʼáá ałtso kin dah naazhjaaʼgóó éí kéyah tʼáá átʼé Nephi bidineʼé yee bidaholnííh. Áádóó baa hoolzhiizh priest dóó ndaʼnitiní danilínígíí tʼáá ałtso kéyah bikááʼgóó yikʼidadiilniiʼ, éí tʼáá átʼé sodizin yaa ádahalyą́.

23 Áádóó áko baa hoolzhiizh Helaman dóó bikʼiské éí priest dóó ndaʼnitiní danilínígíí yikʼidadiilniiʼ éí sodizin yikʼidadéezʼį́į́ doo biniyé éí bitahgóó saad hólǫ́ dahazlį́į́ʼ, dóó Helaman dóó bikʼiské yizaad doo yikʼeh dahółʼį́į da;

24 Ákondi adaadazoodlí daazlį́į́ʼ, bijéí yee adaadajosdliʼ, háálá tʼáá íiyisíí daʼatʼínígíí biniinaa, éí bąą bił dahatsoh daazlį́į́ʼ, dóó doo bizaad yikʼedahołʼį́į da, Diyin God yidááhdóó doo yáʼátʼééhgóó deiyíkááh da daazlį́į́ʼ.