Alma Binaaltsoos
éí Alma biYeʼ

1 Ákohgo baa hoolzhiizh tʼááłáʼí náhááhgo ándahwiiʼaahii Nephi bidineʼé yikʼi dahwéeʼaahgo, bee háhoolzhiizh, aláahdi naatʼáanii Mosiah niʼ bikááʼdóó dah nídiidzá, bidziilgo naazbaaʼ, Diyin God yáʼátʼéehgo yikééʼ sizį́į́ ńtʼę́ę́ʼ, doo éí łaʼ bikééʼdóó nááhodeezʼą́ą da; ákótʼée ndi bibee hazʼáanii łaʼ haidiilaa, dóó éí diné nídeidiilá; éí bąą bee hazʼáanii áyiilaaígíí yikʼeh dahółʼį́įgo dahináá ńtʼę́ę́ʼ.

2 Áádóó baa hoolzhiizh áłtsé náháahgo Alma ánihwiitʼaah-hazʼádę́ę́ʼ hooʼáałgo, diné léiʼ baa náhódóotʼįįłgo bidááh niidlóóz, éí diné bitah hótsxaaz, dóó bidziilgo bééhoʼdílzin.

3 Áádóó diné yitaayá, Diyin God bizaad bí yaa ntsézkézígíí diné yee neinitin, sodizin yikʼijįʼ nilį́įgo; tʼáá átʼé priest dóó ndaʼnitinígíí baa dahaniih doo níigo diné yił halneʼ, dóó doo bílaʼ yee nidaalnish da dooleeł, ákondi diné baa ádahalyą́ doo.

4 Áádóó nihoníyáadi tʼáá átʼé nihokááʼ diné yisdádookah níigo diné neineeztą́ą́ʼ, tʼáadoo nídaałdzidí dóó dadohtsxizí, ákondi deiʼádaohnééh dóó nihił dahózhǫ́; háálá Bóhólníihii diné tʼáá ałtso áyiilaa, dóó tʼáá átʼé diné yá nináʼnídlá, dóó, nihoníyáadi; tʼáá ałtso diné hoolʼáágóó iiná baa dahidoolyééł.

5 Áádóó baa hoolzhiizh ląʼí da neineeztą́ʼígíí bizaad deiyoosdląąd, ląʼí silį́įʼgo baa ádahalyą́ dóó béeso baa deiyiiznil.

6 Áádóó bijéí yee ádaadzódlí silį́į́ʼ, dóó ééʼ daʼílíinii yee hadítʼé, aooʼ, dóó sodizin haidiilaa binaʼnitinígíí bikʼehgo.

7 Áádóó baa hoolzhiizh dah diiyá, bizaad deiyoosdląądígíí neidínóotįįłgóó, diné Diyin God bisodizin atahígíí łaʼ baa níyá, aooʼ, naʼnitiní nilį́į léiʼ; áádóó yéego saad bikʼeʼaschínígíí ałchʼįʼ ayiiznil, diné sodizin yitah danilínígíí dahyididooʼish nízingo; ákondi diné tʼáadoo tʼą́ą́ʼ kodzáa da, Diyin bizaad yee háchʼahóóshkeed.

8 Áko éí diné éí Gideon wolyé; dóó éí Diyin God bibee naʼanishí nilį́įgo Limhi bidineʼé biʼdisnahdę́ę́ʼ yisdáyííʼeezh.

9 Áko, Gideon Diyin God bizaad yee hachʼah hóóshkeedígíí biniinaa Gideon yichʼįʼ báhóóchįįd, dóó bibéésh hał yił háádéél dóó yee náhoneeshxaal. Áko Gideon hastihgo, biniinaa hakʼí ííłhaalgo doo bichʼįʼ hadziil da, éí bąą béésh hał bee hoʼdiisxį́.

10 Áádóó diné hwiisxínígíí sodizinjí daʼatahígíí dahasił, dóó Alma bidááhdóó nahoʼdeedlóóz, áko niʼjiisííh yę́ę bee haa náhódóotʼįįł.

11 Áádóó baa hoolzhiizh Alma bidááhdóó jizį́ dóó tsʼídá doo náldzidgo ádáhahaasdzííʼ.

12 Ákondi Alma ábíłní: Shooh, díí tsʼídá kʼad índa doo yáʼádaashóonii ádeiłʼínígíí éí díí diné bichʼįʼ ííshjání ádaadlyaa. Áádóó áko shooh, doo éí doo yáʼádaashóonii tʼéiyá bee haniʼdoolʼį́į da, ákondi béésh hał bichʼą́ą́h síníłtą́ągo íinilaa; dóó doo yáʼádaashóonii ádeiłʼínígíí éí díí diné bitah bee hooʼaʼgo éí tsʼídá ałtso dabidoołchxǫǫł.

13 Áádóó diné yáʼátʼéehii éí siyíníłxį́, aooʼ, éí diné díí diné bitahgo ląʼígo yíká eelwod; dóó biʼdiisyínígíí tʼáadoo baa nídasíitʼįįdgóó tʼóó nihikʼijįʼ nídoodleeł.

14 Éí bąą nidiʼyoolyéełgo bee ná nahootʼą́, Mosiah, akéeʼdi nihiʼaláahdi naatʼáanii yę́ę, bibee hazʼáanii neiníláhą́ą bikʼehgo, dóó díí diné yee lą́ daʼasłį́į́ʼ; éí bąą díí diné bee hazʼáanii yadaʼólį́į doo.

15 Áádóó baa hoolzhiizh dahdeidiilóóz; dóó éí Nehor wolyé; áádóó Manti dah yiskʼid bílátahjįʼ hadeistį́, dóó áadi kodíínííł biʼdooʼniid, éí doodago kódííniid, yáʼąąsh dóó nahasdzáán bitahgi, diné yee neineeztą́ʼígíí éí Diyin God bizaad bitsʼą́ą́jí átʼé, dóó áadi tʼóó baa yáhosingo bichʼįʼ nahaʼnáago biʼdiisyį́.

16 Ákondi, díí doo yáʼádaashóonii adahwiisʼáágóó doo niʼ kódaadzaa da; háálá ląʼí da nahasdzáán bikááʼgóó tʼáadoo bee choidooʼįįłígíí ayóó ádeiyóʼní, dóó naʼnitin tʼóó ádaatʼéhígíí yee nidaʼnitin; díí éí átʼį́ dóó ádaahodzódlí biniyé ádajíítʼįįd.

17 Ákondi, yoochʼííd éí niʼ kódeiyósin, béédahodoozįįł da, háálá beehazʼáanii yéédaaldzidígíí biniinaa; háálá dabiyoochʼidígíí éí atídabidiʼdoolnííł; éí bąą tʼóó ádaʼdilʼį́įgo bibeʼoodląʼ yee ndaʼnitin; áádóó áko bee hazʼáanii diné beʼoodląʼ doo bikʼi bidziil da.

18 Áádóó doo daʼdinóoʼį́įł da, háálá bee hazʼáanii yéédaaldzid, háálá éí atídabididoolnííł; dóó doo éí háiida yaa daʼdinóoʼį́į́ł da, éí doodago niʼdoołtsił da, háálá háiida íísxį́įgo éí anoonééł bee atídoolníił.

19 Ákondi baa hoolzhiizh háiida Diyin God bisodizin doo yitah danilínígíí éí Diyin God bisodizin daʼatahígíí dóó Christ bízhiʼ ákʼideidiitʼaahígíí atídeiłʼį́ daazlį́į́ʼ.

20 Aooʼ, atídeiyiilaa, dóó saad hachįʼ adeiyiiznil, joobaʼ dajílinígíí biniinaa; doo ádaa dahaʼniihgo dadeezʼįʼígíí biniinaa, doo Diyin God bizaad yaa dahalneʼígíí biniinaa, ahił dahalne go, béeso doo haʼníígóó.

21 Áko sodizin daʼatahígíí bitahgo bee hazʼáanii hózhǫ́ bidziilígíí silá, háídá, sodizin daʼatahígíí, doo sodizin daʼatahígíí atídeiłʼį́į da dooleeł, dóó tʼáá bitah doo atídaʼahilʼį́į da dooleeł.

22 Ákótʼée ndi ląʼí da bitahgo ádaa dahaʼniih daazlį́į́ʼ, dóó bikʼijįʼ danilínígíí saad yéego yee ałchʼįʼ adeiyiiznil, hónáásiiʼ ałkʼiijééʼ, aooʼ, bílaʼ yee atídaʼahilʼį́.

23 Áko díí naaki góneʼ yihah Alma akʼinahaʼá, dóó sodizin yéego bichʼįʼ nahwiiʼná; aooʼ, sodizin yee ląʼígo tiʼhoonííh.

24 Háálá ląʼí da bijéí daastłʼis, dóó bízhiʼ nahjįʼ hahaasdzoh, áko Diyin God bidineʼé bitahgóó doo bééhániih da. Áádóó ląʼí da ałdóʼ nahjįʼ atsʼáhaaskai.

25 Áko daʼoodláago dabidziilígíí díí yéego bichʼįʼ ndahwiiłná, ákondi, Diyin God bibee hazʼáanii doo nahjįʼ kódaanééhgóó yikʼeh dahółʼį́ dóó yá naazį́, dóó atídabiʼdilínígíí bichʼįʼ kódaalʼį́į ndi yídaníłdzilgo yidadiilkaal.

26 Áádóó priest danilínígíí éí Diyin God bizaad diné yił dahodoolnih biniyé binaanish niʼ kódeiyiilaa dóó dah diikai, diné ałdóʼ Diyin God bizaad deididootsʼį́į́ł biniyé binaanish niʼ kódeiyiilaa. Áádóó nááʼiiłniihii Diyin God bizaad ndeineeztą́ąʼgo tʼáá átʼé bindaanish yindadeeshnish; dóó nááʼiiłniihii, dabíístsʼąʼígíí doo yilááhgóó ádaa dadzódlíii da, háálá naʼnitiní ídahooʼaahii doo yilááh átʼée da, áko tʼáá átʼé tʼáá ahedaałtʼéego, ahíłká ańdaajah, diné tʼáá ląʼí nízínígo bedaʼadziilígíí bikʼehgo.

27 Áádóó binaadeełii ałtaadeiniih, tʼáá ałtso diné bee dahólónígíí bikʼehgo, baa dahojoobáʼígíí, dóó bee dahólónígíí, dóó bitah dahoneezgaaʼígíí, dóó bichʼįʼ andahazʼtiʼígíí; áádóó ééʼ daʼílíinii doo dabiʼéʼígíí, ákondi biʼééʼ yáʼádaatʼééh dóó danizhóní.

28 Áádóó sodizin bídadéétʼiʼígíí hashtʼedeiyiilaa; áko áhodiilzééh áłahjįʼ bee dahólǫ́ silį́į́ʼ, atídabiʼdilʼį́į ndi.

29 Áádóó áko, sodizin niłdzil silį́įʼgo yéego daʼatʼį́ daazlį́į́ʼ, tʼáá ałtso íiyisíí daniidzinyę́ę doo bídin hóyééʼ da silį́į́ʼ—ląʼígo łį́į́ʼ dóó nanilkaadígíí, dóó daneeskʼahígíí tʼáá átʼé, dóó ląʼígo tłʼoh naadą́ą́ʼ dóó béésh óola, dóó béésh łigaii, dóó daʼílíinii, naatʼą́hí daʼílíinii, doo naʼatʼą́hí daʼílíinii dóó tʼáá ałtso naʼatʼą́hí ałʼąą ádaatʼéii, dóó tʼáá átʼé naʼatʼą́hí danizhóní.

30 Áko, daʼátʼį́įgo bił hooʼaʼ, biʼééʼ ádaadinígíí doo tʼóó yedaʼasniiʼ da, éí doodago dichin danilínígíí, éí doodago dibááʼ danízinígíí, éí doodago bitah dahoneezgaiʼígíí, éí doodago háiida doo bidaʼiilzánígíí, áádóó bee daʼatʼíinii tʼáadoo bijéí yiih deizláa da; éí bąą diné tʼáá ałtsojįʼ yíká anídaalwoʼ, tʼáá áłah hadaastihígíí dóó nooséłí, tʼáá áłah ąąh shijééʼ dóó tʼáá bineʼ naakaiiʼígíí, tʼáá áłah hastóí dóó sáanii, daʼoodlánígíí dóó doo daʼoodlánígíí, diné aʼoh ádaatʼée ndi tʼáá ałtso aheełtʼéego baa nitsáhákees.

31 Áádóó daʼatʼį́ daazlį́į́ʼ dóó sodizin doo daʼatahígíí tsʼídá yiláahgo daʼatʼį́ daazlį́į́ʼ.

32 Háálá doo bisodizin daʼatahígíí biniinaa daʼdiłgąsh, dóó bidaʼalyai dilzin éí doodago íłhóyééʼ, dóó tʼáá ádzáago yáʼátiʼ, dóó ádaa hwiindzin dóó áhinídiijah; ééʼdaʼílíinii yee haditʼé; ákótʼée ndi, ádaa dadzódlí yee ádadootʼį́, atiʼalʼį́, naʼadloʼ, antʼįįh, aghaʼiiʼnííł, ałhaaʼdilyé yaa naakai, dóó nidaʼałtseed, dóó tʼóó ahayóí ałʼąą bąąhági ádaatʼínígíí; ákótʼée ndi, beehazʼáanii tʼáá ałtso ndaʼiisihígíí bikʼijįʼ niilyá, tʼáá bohónéedzánígi átʼáo.

33 Áádóó baa hoolzhiizh beehazʼáanii yikʼijįʼ kódeiłʼį́, tʼáá ałtso diné ádáátʼįįdígíí bikʼehgo tiʼdahoozniiʼ, éí doo ádaadzaaʼí da, dóó béédahodoozį́į́łígíí biniinaa doo bąąhági ádaanééh da; éí bąą, Nephi bidineʼé bitahgo áhodiilzéeʼgo ándahwiiʼaahii nidahaʼáago ashdlaʼ nááhai.