1 Áádóó áko, díí saad Ammon bikʼéí yił chíiníʼą́ągo, kódíínííd: shikʼiské dóó shikʼéí, shooh ánihidishní, ayóó átʼáo baa nihił hóózhǫǫd; daʼ Zarahemla kéyahdóó dahdiináó Diyin God tʼáá íiyisíí akʼihojídlí yee nihaajoosbaʼ doo ńtʼę́ę́ʼ.

2 Áádóó áko, nanihídishkid, haʼátʼíí éí ayóó átʼáo yee nihikʼijisdliʼ? Baa ákodanoozį́į́ʼísh?

3 Áko shooh, nihił náhashneʼ; nihikʼéí bá, Laman dineʼé, bąąhági átʼéii bee chahałheeł yiiʼ yíkai ńtʼę́ę́ʼ, aooʼ, tsʼídá yéego tłʼééʼ yiiʼchéékai, ákondi shooh, haanéelą́ą́ʼ Diyin God bibee adinídíín baa hózhóonii deiyiiłtsą́! Áádóó díí bee nihikʼihojísdliʼ, áko Diyin God bílákʼeedóó bibee naʼanishí dasiidlį́įʼgo díí naanish ayóó átʼéii łaʼ deilyaa.

4 Áko shooh, dimííl yázhí biláahgo tʼáá íiyisíí bił dahóózhǫǫd, dóó Diyin God deiyoodlánígíí yidiikai.

5 Áko shooh, dáʼákʼehgi daʼiitsoigo, dóó nihikʼihojisdliʼ, háálá bee iigéshí bee daʼiilzhééh, dóó yéego daʼoołzhééʼ, aooʼ, tʼáá ndaałʼnishgo nihee iʼííʼą́, dóó shooh dooládóʼ ląʼígo ałhą́ʼ ádaalyaa da! Áádóó niitʼahdi ndahashjool, áko doo tʼáadoo biniyéhí da dooleeł.

6 Aooʼ, éí nihoníyáadi yéego nahałtin doo atíbidoolíił da, aooʼ, éí doodago níyol tsoh doo tábiidooghas da; ákondi bikʼijįʼ yéego ahoʼniiłtą́ągo tʼáá bił nahazʼą́ą́góó ahíídookah, áko doo bikʼi nahadoołtį́įł da; aooʼ, éí doodago níyol báhádzidígíí beʼanaaʼ ádeinízinígóó doo bił adahidooyołgo adabidiyoojih da bichʼįʼ bił adaheeyóołgo doo yóóʼ adabidiʼyoojih da.

7 Ákondi shooh, Diyin Bóhólníihii dahootsooi yaa áhályą́ą, dóó éí daabí; dóó nahoníyáadi neidiyoosįįł.

8 NihiDiyin God bikʼihojidlį́į doo; baa dahwiiʼniihgo bá dawiitaał doo, aooʼ, bízhiʼ dílzinii baa ahééh daniidzin doo, háálá hoolʼáágóó diyingo naʼanish ííłʼį́.

9 Háálá tʼáadoo Zarahemla kéyahdę́ę́ʼ haikaigóó, díí nihikʼéí ayóó ádeíníiʼníínii, tsʼídá ayóó ádanihóʼníinii, tʼahdii nihichʼįʼ bádahachįʼ doo ńtʼę́ę́ʼ, aooʼ, dóó Diyin God yichʼįʼ tʼáá ádzaagóó nidaakai doo ńtʼę́ę́ʼ.

10 Áádóó baa hoolzhiizh Ammon díí saad yee haadzį́įʼgo, bikʼis Aaron bikʼijįʼ haadzííʼ, kóníigo: Ammon, binásdzid yéego nił hózhonígíí bee ádaa dzíínídlíigo ániilaa.

11 Ákondi Ammon ábíłní: doo sheʼadziilii, éí doodago shił ééhózinii bee ádaajííníshdlíi da, ákondi shooh, íł hózhǫ́ shiiʼ hadeezbin, aooʼ, shijéí íiyisíí baa shił hózhǫ́, dóó shiDiyin God baa hashniih doo.

12 Aooʼ, shił bééhózin doo nishłíní da; sheʼadziil beego éí doo shitsxeʼ da; éí bąą doo ádaahojíínishdlíi da doo, ákondi shiDiyin God baa hashniih dooleeł, háálá bibeʼadziilii bee éí tʼáá ałtsoní adeeshłííł; aooʼ, áko shooh, tʼóó ahayóí álilee ayóó átʼéii díí kéyahjįʼ ndahaalyá, éí bee hoolʼáágóóo bízhiʼ bee baa dahwiiʼniih dooleeł.

13 Áko shooh, díkwíísh dimííl yázhí bilááhgóó nihikʼéí chʼį́įdiitah bikʼeʼayééʼ nahjįʼ kóyiilaa; dóó ayóó óʼóʼní bee nináʼilyá biyiin yee dahataal, dóó díí éí bizaad bidziil nihiyiʼ dahólónígíí biniinaa, áko ayóó átʼáo bąąh nihił hodoozhǫ́ǫ́łígíísh nihee ádin?

14 Aooʼ, biniyé hoolʼáágóó baa dahwiiniih dooleełígíí nihił bééhózin, háálá Aláahdi Diyin God Nilíinii nilį́, dóó nihikʼéí chʼį́įdiitah bikʼeʼayeeʼdi bee bedaʼastłʼóo yę́ę néiyoozʼah.

15 Aooʼ, hoolʼáágóó bąąhági ádaatʼéii chahałheeł dóó yee atídabidoołíłígíí bináztʼįʼ ńtʼę́ę́ʼ; ákondi shooh, bihoolʼáágóó adinídíínjįʼ neiyiizhʼeezh, aooʼ, ahoolʼáágóó yisdáʼiildééhjįʼ, dóó beʼayóóʼóʼóʼní doo beełtʼéhígíí tʼáá átʼé ádíyóltąʼ; aooʼ, Diyin God bibee naʼanishí danilį́įgo binaanish ayóó átʼé dóó ayóó ánoolnin bindashiilnish.

16 Éí bąą, ayóó átʼáo nihił dahózhǫ́ dooleeł, aooʼ, Diyin Bóhólníihii baa dahwiiʼniih doo; aooʼ, tʼáá íiysisíí nihił dahózhǫ́ǫ dooleeł; háálá ił hózhǫ́ éí nihiyiʼ hadadéébįįd; aooʼ, nihiDiyin God ahoolʼáágóó baa dahwiiʼniih doo. Áko shooh, háísh éí doo ninítʼįʼgóó Diyin Bóhólníihii ayóó átʼáo yaa haniih dooleeł? Aooʼ, háísh éí ayóó átʼáo beʼadziilii doo ałtso yaa hadoodzih da, áádóó beʼajoobaʼ, dóó nihokááʼ dineʼé baʼáłchíní yichʼįʼ nízaadgóó haʼólní? Áko shooh, nihił chʼíhonishʼaah, shiyiʼdi átʼéhígíí áłtsʼíísí ndi chʼééh baa haasdziih.

17 Háísh íinízin doo ńtʼę́ę́ʼ nihiDiyin God bee ajoobaʼ bee tʼóó bahooʼih, bąąhági átʼéii baa nidaʼaldeehdę́ę́ʼ dóó dahóóchxǫʼdę́ę́ʼ hanihidoonił?

18 Áko shooh, áháchįʼ, ayóó átʼáo akʼijįʼ haʼiidziih bee bisodizin ndahiilchxǫǫhgo baanisiikai.

19 Ákótʼée ndi, haʼátʼíí biniyé doo tʼóó yéego hodoochxǫǫł bichʼįʼ kónihólééh da, aooʼ; haʼátʼíí biniyé doo tʼóó nahwiitʼaah bibéésh hał nihikʼinaakęęs da, dóó hoolʼáágóó doo hatsʼiid hazʼą́ąjįʼ kónihólééh da?

20 Oh, shiiʼ sizíinii, éí nahlingo, yaa nitsékees. Áko shooh, biʼánahwiitʼah tʼáadoo nihikʼijįʼ kóyiilaa da, ákondi ayóó átʼáo bee ajoobaʼ hoolʼáágóó anoonééł dóó tiʼhooʼnííh báhátxis nihinínil, nihiiʼ sizíinii yisdáyiniljįʼ ndi.

21 Áádóó áko shooh, shikʼéí, haʼátʼíí nihokááʼ dineʼé atsʼíískʼeh hinánígíí shį́į́ díí bił bééhózin? Ánihidishní, díí doo łaʼ bił bééhóziní da, ádaa náʼooskanígíí tʼéiyá.

22 Aooʼ, háí da ádaa náʼooskango dóó oodląʼ choyoołʼį́įgo, dóó naanish yáʼátʼéehii ííłʼį́įgo, dóó doo niʼkónééhgóó sodilzingo—éí tʼéiyá Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii bił béédahózin dooleeł; aooʼ, éí doo ííshją́ą́ ádaalʼinée ííshją́ą́ ííłʼį́į doo; aooʼ, dóó nihokááʼ dineʼé dimííl yázhí bilááhgóó ńdeidooʼishgo ádaa ńdaʼdookąął, nihí nihá hooʼaʼígi átʼáo nihikʼéí ádaa ńdaʼdookąąłjįʼ ndahidiitʼish.

23 Áko béédaałniihish, shikʼéí, nihikʼéí Zarahemla kéyahdi bee bił dahwiilneʼ, Nephi kéyahgóó diikah, nihikʼéí, Laman dineʼé, ndadíníítʼį́į́ł, dóó nihá nidahałtʼiʼgo nihaa daadloh ńtʼę́ę́ʼ.

24 Háálá kódanihidiiniid: Daʼ Laman dineʼéésh tʼáá aaníinii bił béédahodoozįįłgo bił ííshją́ą́ ádadiilnííł? Daʼ Laman dineʼéésh dabizází bibee ádaʼoolʼįįł doo ákódaatʼéhígíí yaa ákodadínóózįįłgo ádadiilnííł, diné bikʼos danitłʼizígi ádaatʼáo; bijéí nidaʼałtseedgo yaa bił dahózhǫ́; íyíisíí bąąhági átʼéii yaa naakaigo bideiníłką́; éí ndaʼiisííhii nahalingo ádaʼałʼį́įgo hahoolzhiizh? Áko shikʼéí, shą́ą́ʼ kótʼáo hadahaasdzííʼ.

25 Áádóó ałdóʼ ádaaní: Anaaʼ bee nidaaltseedii bikʼijįʼ bił hadadiidił, áko ndadiiltsxił dóó bibąąhági ádaatʼį́įgo kéyahdóó chʼídadíníílkał, áko da nihikʼiidoojah dóó ndanihidootsxił.

26 Ákondi shooh, shikʼéí ayóó ánihííníshníinii, doo kééhojitʼíní góneʼ niikai doo nihikʼéí ndadiiltsxił biniyé da, ákondi biiʼ sizíinii łaʼ yisdádadiiʼnił daniidzingo.

27 Áko nihijéí baa nidahóókaadgo, dóó kʼadę́ę nátʼą́ą́ʼ nikééʼ niikáahgo, shooh, Diyin Bóhólníihii nihił hóóshǫǫd, dóó ání: Nihikʼéí, Laman dineʼé, bitahgóó dohkááh, dóó nihichʼįʼ ndahwiiʼna bee ádanohtʼé dóó bee łaʼ doołííłii nihaadeeshlééł.

28 Áádóó áko shooh, áadi niikai, dóó bitaa nisiikai; dóó nihitiʼhooʼnííh bee ádaníitʼé, dóó achʼįʼ nahwiiʼná tʼáá átʼé bee tiʼdahwiisiiʼniiʼ; aooʼ, dahooghan bitaa siikai, nihokááʼ bibee ajoobaʼ badaʼííniidlí—doo nihokááʼ bibee ajoobaʼ tʼéiyá da ákondi Diyin God bibee ajooba bee.

29 Áádóó bighan góneʼ yah adasiikai dóó ndaniitą́ą́ʼ, dóó biʼdanítiingóó nidasiniitą́ą́ʼ; dóó bidah daaskʼidgóó nidasiniitą́ą́ʼ; dóó diyin bighan naaznilgóó dóó dahodílzingóó ałdóʼ nidasiniitą́ą́ʼ; dóó chʼídanihiʼdineeskaad, dóó nihaa daʼoodloh ńtʼę́ę́ʼ, dóó nihikʼídahidiizhééh, dóó nihiniitsįʼ nídadoołtsʼin, dóó tsé bee nídanihineesneʼ, dóó danihisił dóó tłʼóół daditsʼidígíí bee nihedaʼastłʼǫ́, dóó awáalyah góneʼ anihiʼdeestłʼííd; áádóó Diyin God bibeʼadziil díí biʼééhózin bee yisdánánihiʼdoonil.

30 Áádóó tiʼhoonííh tʼóó ahayóí ałʼąą átʼéego bee tiʼdahosiiʼniiʼ, áádóó díí tʼáá átʼé, áko nihí daatsʼí nihinahjįʼ łaʼ iiʼ sizíinii yisdádadiitʼish; áko hózhǫ́ nihiiʼ hadadidoobį́į́ł nihinahjįʼ da łaʼ yisdádadiitʼish daniidzį́į́ʼ.

31 Áko shooh náásee bindashiilnish bineestʼąʼ deidiiltsééł; daʼ tʼáásh díkwíhí? Ánihidishní, ndagaʼ, éí ląʼí da; aooʼ, tʼáá aaníí ádaanínígíí deidiiltsééł, háálá bikʼéí ayóó ádeiyóní dóó nihí ałdóʼ.

32 Háálá áko shooh, tʼáá bí beʼiinaʼ náádeidiyoołnih ákondi biʼanaaʼí beʼiinaʼ éí doo ndeidoołtʼih da; yee nidaʼałtseed yę́ę nahasdzáán yiiʼ nízaadgóó yaa nídeideesʼį́į́ʼ, háálá bikʼéí ayóó ádeiyónínígíí biniinaa.

33 Áádóó áko shooh nihił chʼinishʼaah, daʼ ayóó átʼéii ayóóʼóʼóʼníísh doo łaʼ kótʼáo adahwiisʼáágóó kótʼée da? Áko shooh, ánihidishní, ndagaʼ, ádin doo łaʼ da azhą́ Nephi dineʼé bitah ndi.

34 Háálá áko shooh, bikʼéí bee nidaʼasteedí yichʼįʼ nídeididoojih; éí nidabidiʼdootsiłíígí doo yee nidahasʼą́ą da. Ákondi shooh haanéélą́ą́ʼ beʼiinaʼ niʼ nideizlá; dóó nihił béédahózin éí biDiyin God yichʼįʼ anádahaaskai, háálá beʼayóó ádaʼooní dóó bąąhági átʼéii deijoołáhígíí biniinaa.

35 Áko biniyé nihił dahózhónígíísh baa ákódaniidzin? Aooʼ, ánihidishní, doo łaʼ nihokááʼ dineʼé biniyé ayóó átʼáo bił dahodoozhǫǫł ninígi átʼáo; aooʼ, dóó shił hózhǫ́ǫgo shíyoołkááł, azhą́ shiDiyin God baa hashniihjigo ndi; háálá tʼáá ałtsojįʼ bidziil tʼáá ałtsojįʼ bił ééhózin, dóó tʼáá ałtsojįʼ akʼeʼdiitą́; tʼáá ałtsoní bił bééhózin, dóó baa hojoobaʼii nilį́, yisdáʼiildééhjįʼ ndi, ádaa ńdaʼooskan dóó bízhiʼ deiyoodlánígíí yichʼįʼ.

36 Áko díí ádaa haʼniih átʼéego, áko ádaahashniih doo; háálá díí sheʼiinaʼ átʼé dóó sheʼadinídíín átʼé, shehózhǫ́ dóó shiyisdaʼiiniiłii, dóó shá nináʼnídlá hoolʼáágóó tiʼhooʼnííhdę́ę́ʼ. Aooʼ, shiDiyin God bízhiʼ bikʼihojídlí, éí díí diné yénálniih, éí Israel bitsin bitsʼáozʼá átʼé, dóó bitsʼíís bitsʼą́ą́dóó kéyah doo bééhózindi yóóʼeekah ńtʼę́ę́ʼ; aooʼ, ádíshní, shiDiyin God bízhiʼ bikʼihojídlí, éí nihénálniih; kéyah doo bééhózindi naanááʼnéełii.

37 Áko shikʼéí, Diyin God tʼáá átʼé dineʼé yénálniihgo baa ákodaniidzin, tʼáá háí shį́į́ kéyah yikááʼ dahólónígíí; aooʼ, ánéélą́ʼígíí bił bééhózin, dóó beʼajoobaʼ tsʼídá biyiʼdiígíí nahasdzáán tʼáá átʼé bikááʼgóó hólǫ́. Áko díí baa shił hózhǫ́, dóó yéego baa áhééh nisin; aooʼ, dóó shiDiyin God ahéheeʼ bidishníigo ahoolʼáa doo. Amen.