1 Áko shooh, kʼad baa hoolzhiizh Moroni nahatʼá yikʼi bóhólníhígíí haneʼ yichʼįʼ áyiilaa dóó tʼáadoo hodíínaʼí, Pahoran, nahatʼá bee bóhólníhígíí saad beiníʼą́. Dóó díidí saad bichʼįʼ kólyaa.

2 Shí, Pahoran, aooʼ, díí kéyah bee shóhólnííh, díí saad Moroni bichʼįʼ áshłééh, ndaabaahí binaatʼááh. Áko shooh, kóndishní, Moroni, tiʼhooníhígíí doo baa shił hózhǫ́ǫ da, aooʼ, shiiʼ sizíinii yaa yínííł nízin.

3 Ákondi shooh, tiʼhoonííhígíí éí łaʼ yaa bił dahózhǫ́, aooʼ, tʼáá bílááhjįʼ bádahóóchįįdgo shitsʼą́ą́jí daazlį́į́ʼ, dóó shidineʼé tʼáá bídeinízingo kéédahatʼínígíí ałdóʼ, aooʼ, dóó atsʼą́ą́jí daazlį́ʼígíí éí tʼóó ahayóí.

4 Áádóó ánahwiiʼaah nishłínígíí shighadahoditʼaahgo biniinaa ayóó átʼáo doo yáʼátʼéehgo dahʼooldah; háálá tʼóó báhádzidgo ádaa dahaʼniihgo łidadilchí, dóó łaʼ diné tʼáá áníí átʼéego yóóʼadeineizʼaaʼ, éí tʼáá íiyisíí bikʼee tiʼdahodiiʼnih; chodeidiilʼį́į́ł yę́ę nihitsʼą́ą́ʼ deiyiiłtsood, dóó nihidineʼé tʼáá bí ádeinízingo kéédahatʼíinii níká adoojah yę́ę yąąh ndeiyiiłhaał.

5 Áádóó áko shooh, chʼídashineeshchą́ą́ʼ, dóó Gideon kéyahgóó anííchą́ą́ʼ, tʼáá háí shį́į́ diné ahííʼeezhígíí bił.

6 Áádóó áko shooh, saad ílíinii díí kéyah bitahgóó íishłaa; áádóó áko shooh, tʼáá ákwíí jį́ nihaa hanééh, yee ndaabaahígíí bee, bikéyah dóó tʼáá bí ádeinízingo dahináa doogo yichʼą́ą́h ndaabaah, atídanihiilaaʼígíí yikʼé ninádaʼdoodlééł.

7 Áádóó nihíhidiikai, áko nihikʼijįʼ daazlíʼígíí doo akʼeh dahółʼį́į da, aooʼ, nihéédaaldzidgo dóó doo nihikʼijįʼ dahdadiibááh da.

8 Kéyah yee adídahoosniiʼ, éí doodago kin dashijaaʼ, Zarahemladi, aláahdi naatʼáanii yikʼi hooʼáałgo ádeiyiilaa, dóó Laman dineʼé beʼaláahdi naatʼáanii yichʼįʼ saad áyiilaa, áko yił ałchʼihjí daazlį́į́ʼ; Zarahemla kin dashijaaʼígíí yaa ádahalyą́ą doogo yił ahadaʼdeestʼą́, łahjigo kéyah chʼéédziʼígíí Laman dineʼé yee bídaholnííh doogo ádoolnííł nízin, áádóó díí diné yinaatʼáanii nilį́įgo abidiʼdoolnííł Laman dineʼé bikʼeh dadeesdlííʼgo.

9 Áádóó áko, saad íinilaaígíí biyiʼdóó shaanísinítʼįįd, ákondi tʼáadoo biniyéhí da; doo bikʼee sháháchįʼ da, ákondi ayóó ánítʼéhígíí baa dahwiiʼniih. Shí, Pahoran, ádíhwííníshníihgo doo bíká áshtʼį́į da, tʼáá hazhóʼí ándahwiiʼaahii dah sidáádóó tʼáá hweeshʼááł doo áko shidineʼé yee báʼahootʼįʼígíí tʼáá bí ádeinízingo yikʼehgo dahináa doo. Shiiʼ sizíinii éí diné tʼáá bí ádeinízingo yikʼehgo dahiniiʼnánígíí tʼáá íiyisíí niłdzilgo bee bá sízį́ Diyin God tʼáá nihí nihídahólníihgo ánihiilaa.

10 Áádóó áko, shooh, bąąhági átʼéii bitsʼą́ąjįʼ kódaniitʼé azhą́ ndanihiʼdistseedjįʼ ndi. Laman dineʼé doo ndadiiltsxił da tʼáá bí bikéyahdi kéédahatʼį́įgo.

11 Nihikʼiské doo ndadiiltsxił da doo bádahachįʼgóó nihikʼijįʼ náádiijahgo dóó béésh hał doo yee nihikʼijįʼ ndaabaahgóó.

12 Naalteʼ anihiʼdiilyaago baa ádaʼdidiitʼááł Diyin God ákótʼéego yee nahwiníʼą́ągo, éí doodago ákódadohnííł nihidííniidgo.

13 Ákondi shooh niheʼanaaʼí bichʼįʼ naaltʼe dadiidleełgo doo nihíídóókił da, ákondi badaʼííníidlíi doo, áko yisdánihidooʼish.

14 Éí bąą, shikʼis ayóó ánííníshníinii, Moroni, doo yáʼáshóonii adeitʼį́į da doo, dóó tʼáá ałtso doo yáʼáshóonii tʼáá haʼátʼíí shį́į́ saad nichxǫ́ʼígíí doo bee yádeiiltiʼ da doo, aooʼ, akʼijįʼ ídlį́ dóó bitsʼą́ąjįʼ dahjidiikahígíí átʼáo, nihibéésh hał bee bichʼįʼ ndadiibah, áko tʼáá nihí ádeinízingo dahiniiʼnánígíí tʼáá deiyíníitąʼ doo, áko nihisodizin nihee hólónígíí baa nihił dahózhǫ́ǫ doo, dóó niháNináʼnídláii dóó nihiDiyin God bá ádeitʼį́.

15 Éí bąą, tʼáá tsxį́įłgo nitsíłkéí ndaabaahí bił nihichʼįʼ dínééh, dóó chʼééhdziʼígíí éí Lehi dóó Teancum yikʼideezʼį́įgo ádíílííł; kéyah hazʼą́ągi ndaabaahgo yee bídaholnííh doo, Diyin God biʼIiʼ Sizį́ Diyinii bikʼehgo, éí ałdóʼ tʼáá bí ádeinízingo dahinánígíí bikʼehgo.

16 Áko shooh tʼóó bikiinígo chodeidoołʼįįłígíí bichʼįʼ kwíishłaa, áko doo dadínóóneeł da nihaanohną́ą́jįʼ índa.

17 Kojįʼ wohnéełgo tʼáá háí shį́į́ nihił ndadoohbahígíí ahíhooʼéésh doo, dóó nihitsʼą́ą́jí daazlį́ʼígíí tʼáá tsxį́įłgo bikʼiidiijah, Diyin God bee danihidziilgo niheʼoodląʼígíí binahjįʼ.

18 Áádóó Zarahemla kin dashiijaaʼ bee adídahodiilnih, áko chʼiyáán ła shonáádeidiiltʼeeł éí Lehi dóó Teancum bichʼįʼ kódoolnííł; aooʼ, dóó Diyin Bóhólníihii bee danihidziilgo bichʼįʼ ndadiibah, áko díí tʼáá íiyisíí bąąhági átʼéii ninítʼiʼgo ádadiilnííł.

19 Áádóó áko, Moroni, ayóó baa shił hózhǫ́ saad shichʼįʼ íinilaaígíí, háálá tʼóóyóó baa shíniʼ ńtʼę́ę́ʼ haʼátʼéegoshąʼ ádaʼdiilníłígíí, tʼáá daatsʼí bee nihá hazʼą́ nihikʼéí bikʼijįʼ ndadiibahgo.

20 Ákondi ádíníniid, ádaa ńdaʼooskango tʼéiyá Diyin Bóhólníihii ánihiłníigo bikʼijįʼ dadidohbah.

21 Lehi dóó Teancum Diyin Bóhólníihii yee bidziilgo ádaołééh, tʼáadoo náłdzidí dabidohní, háálá Diyin God yisdábidooʼish, aooʼ, dóó ałdóʼ tʼáá ałtso háí shį́į́ tʼáá bí ádeinízingo daniłdzilgo yee dahinánígíí Diyin God tʼáá bí ádeinízingo iiná doo yikʼidadikááhgóó deiyótąʼgo ábiilaa. Áádóó kʼad díí saad shikʼis ayóó ííníshʼníinii, Moroni, bichʼįʼ íʼiishłaaígíí ałchʼįʼ ánáshdlééh.