1 Áádóó áko baa hoolzhiizh Moroni anaaʼ yichʼįʼ hashtʼeʼádolzin, éí doodago bidineʼé éí Laman dineʼé doo atíbidoolííłgóó áyiilaa; yił nidaabaahii tʼáá deinółníísh yidííniid ándahwiiʼaahii dahwééhaahgo naadiin nááhááh góneʼ, kin dah naazhjaaʼ binaagóó łeezh yáádaalkʼidgo ádeiyiilaa, Nephi dineʼé bikédaayah shódayoostʼéʼgóó.

2 Áádóó díí łeezh yáádaalkʼidgo tsin yílkaalgo ádeiyiilaa, aooʼ, diné sizį́ bíighahgo tsin deiyílkaal, kin dah naazhjaaʼ binaagóó.

3 Áádóó tsin deiyílkaal yę́ę bílátahdi háádahashchiiʼ danítʼiʼgo ádeiyiilaa; dóó ayóó niłdzil dóó bąąh danízaad.

4 Áádóó tsin háádahashchiiʼgo danítʼiʼ yę́ę yiláahdi yadaʼdiitłʼingo deiyiisįʼ, áádóó yadaʼdiitłʼin bikááʼdóó hadaʼasíídgo ádeiyiilaa, áko Laman dineʼé bitsé dóó dabiʼakʼaaʼ doo atídabidoolííł da.

5 Áádóó éí bikááʼdóó tsé yee daʼdiłnííh doogo ádeiyiilyaa, bíniikʼeh dóó tʼáá dabidziilígíí bikʼehgo, dóó tʼáá háí shį́į́ kin bindaʼaztłʼinjįʼ adahaabahígíí nideidoołtsxił.

6 Áko Moroni anaaʼí bikʼijįʼ bee hółdzilgo ádahoolaa, tʼáá átʼé kin dah naazhjaaʼ bił nahazʼą́ągo.

7 Áádóó baa hoolzhiizh Moroni bá ndaabaahí haʼaʼaahjigo doo kééhajitʼinígóó dohnééh yidííniid; aooʼ, áádóó dahdiiná dóó Laman dineʼé tʼáá átʼé haʼaʼaahjigo doo kééhojitʼínígóó tʼáá bí bikéyahjigo adeineeskaad, éí Zarahemla bikéyahdóó shádiʼáahjigo.

8 Áádóó Nephi bikéyah éí haʼaʼaah tónteel dóó eʼeʼaah tónteel tʼáá kʼéházdonígo ahoolʼá.

9 Áádóó baa hoolzhiizh Moroni tʼáá átʼé Laman dineʼé haʼaʼaah doo kééhojitʼíní biyiʼdę́ę́ʼ chʼídeineeskaad, éí tʼáá bí dabikéédaayah dóó náhookǫsjigo, Zarahemladi kéédahatʼínée haʼaʼaahjigo doo kééhojitʼíníjigo dahdidoohnééł yidííniid, éí tsʼídá ńléí tónteel bibąąhjįʼ, éí ákweʼé kéyah danihí doo yidííniid.

10 Áádóó shádiʼáahjigo ałdóʼ ndaabaahí dah yinéełgo áyiilaa, tʼáá bí dabikéyah ndaneelʼą́ąjįʼ, dóó bidziil nahazʼą́ągo ádahołééh yidííniid áko bá ndaabaahí dóó bidineʼé baa aháyą́ą doo beʼanaaʼí bitsʼą́ąjįʼ.

11 Áádóó Laman dineʼé tʼáá átʼé bidziilgo dah deínééhę́ę haʼaʼaahjigo doo kééhojitʼíníjígo yichʼą́ą́h niníná, aooʼ, eʼeʼaahjigo ałdóʼ, Nephi dineʼé dóó Laman dineʼé bitaʼ bidziil hazʼą́ągo ádeilyiilaa, Zarahemla bikéyah dóó Nephi bikéyah bitaʼgi, eʼeʼaah tónteel dahsiyį́į́ʼdę́ę́ʼ éí tooh Sidon hideezlį́į́dę́ę́ʼ—Nephi dineʼé kéyah nahokǫsjigo tʼáá hazʼą́ą́ ńtʼę́ę́ʼ daa bí, aooʼ, kéyah Bountifuldi tʼáá átʼé nahokǫsjigo ndi, bíniikʼehgo.

12 Áko Moroni, bindaabaahí yił, tʼáá akwííshjį́ ląʼí yileeł háálá yindaashnish yę́ę ayóó binahjįʼ baa áhayą́, éí Laman dineʼé dabidziil dóó ayóóʼánééląʼígíí yichʼą́ą́h dah yinééł dabikéyahdóó, áko bikéyah bikááʼdóó doo bikʼeh dadidoodlííł da.

13 Áádóó baa hoolzhiizh Nephi dineʼé kin dashijaaʼ yáádahałbįʼ, dóó éí kin dashijaaʼ Moroni yee deiyíízhiʼ; dóó haʼaʼaahjigo tónteel nihiníyį́; dóó éí éí Laman dineʼé bikéyah shádiʼáahjigo bee hoodzó bee bídahoolnííh.

14 Áádóó ałdóʼ Moroni bikin dashijaaʼ dóó Aaron bikin dashiijaaʼ bitaʼgi kin dashijaaʼ náádahałbį́, éí Aaron dóó Moroni kéyah ahidiiʼáago ádeiyiilaa; dóó éí kin dashijaaʼ bízhiʼ ádeiyiilaa, éí doodago kéyah, Nephihah yee deiyíízhiʼ.

15 Áádóó ałdóʼ tʼáá éí yihahígíí biyiʼ náhookǫsjigo kin dashiijaaʼ tʼóó ahayóí ádeiyiilaa, łahgi éí Lehi yee deiyíízhiʼ, éí náhookǫsjigo tónteel bihiníyį́.

16 Áádóó naadiin nááhai.

17 Áádóó Nephi bidineʼé ayóó daʼatʼį́įgo bił hooʼaʼ naadiin łaʼ yihah bił hahoolzhiizh ándahwiiʼaahii Nephi bidineʼé yikʼi dahwéeʼaahgo.

18 Áádóó tʼáá íiyisíí náás deeskai, dóó tʼáá íiyisíí daʼatʼį́ daazlį́į́ʼ; aooʼ, áádóó ałʼąą dínéestʼą́ dóó tʼáá ałtsoní yee daʼatʼį́į́go bił hooʼaʼ.

19 Áádóó áko díigi átʼáo Diyin Bóhólníihii joobaʼ dóó tʼáá ałtsojįʼ tʼáá ákogi átʼáo éʼéłʼį́, nihokááʼ dineʼé baʼáłchíní tʼáá ałtsoní yee haadzííʼ yę́ę yá yeʼiilaa; aooʼ, bizaad yee haadzííʼ yę́ę yeʼiilaago nihił ííshjání alyaa, díí kweʼé hoolzhishgi ndi, éí Lehi yee yichʼįʼ haadzííʼ, kóníigo:

20 Ní dóó naʼáłchíní nihikʼihojisdliʼ; dóó bikʼihojidoodliił, shibee hazʼáanii yikʼeh dahółʼį́įgo kéyah yikááʼgóó daʼatʼį́į doo. Ákondi béénílniih, shibee hazʼáanii doo yikʼeh dahółʼį́į́góó éí Diyin Bóhólníihii doo bił hólǫ́ǫ da doo.

21 Áádóó nihił béédahózin díí bee hadaʼiisdzííʼ tʼáá aaníigo Nephi bidineʼé bił ííshją́ą́ ádaalyaa, háálá saad dahólǫ́ǫ dóó ałkʼéídeijah, aooʼ, ndaʼastseed, dóó ádaʼiizyínée, bedaʼalyaaígíí yichʼįʼ sodadilzin, atsʼíís yee tsiʼnidaaskai, dóó bąąhági ádáátʼįįd, éí tʼáá bí adíkʼídeidiitʼą́, éí biniinaa anaaʼ yiih yíkai dóó ádabiʼdisdįįd.

22 Áádóó Diyin Bóhólníihii bibee hazʼáanii yikʼeh dahóołʼínée tʼáá áłahjįʼ yisdáʼdabiʼdiitʼéésh, áko łaʼígíí éí ałdóʼ bikʼéí doo yaʼádaatʼééhii dimííl yázhí yiltʼéégóó dabiʼdisnáh, éí doodago béésh hał bee nidabiʼdistseed, éí doodago doo daʼoosdląąd da, dóó Laman dineʼé yił naaldeeh.

23 Ákondi shooh, Nephi bidineʼé tsʼídá doo díigi átʼéego ił hózhǫ́ bee dahólǫ́ǫ́ da ńtʼę́ę́ʼ, Nephi hinánéédą́ą́ʼ dóó hóshdę́ę́ʼ, áádóó Moroni bił hoolzhishyę́ędą́ą́ʼ ndi, aooʼ, dóó kʼad hoolzhish biyiʼ ndi, naadiin łaʼ yihah ándahwiiʼaahii dahwéeʼaahgo.

24 Áádóó baa hoolzhiizh ándahwiiʼaahii dahwéeʼaahgo; naadiin-naaki nááhai dóó naadin-tááʼ nááhááh góneʼ ałdóʼ, hodéezyéelgo ahoolzhiizh.

25 Áádóó baa hoolzhiizh naadiin dį́į́ʼ yihah bił hahoolzhiizh ándahwiiʼaahii dahwéeʼaahgo, Nephi bidineʼé tʼáá kʼé bił naaztʼiʼgo bił hazʼą́ą doo ńtʼę́ę́ʼ doo Lehi bikéyah baa saa hazlį́į́ʼgóó, Morianton bikéyah ałdóʼ, éí Lehi bikéyah bił ahidiiʼá; éí tʼáá áłah tónteel biihiníyį́.

26 Háálá áko shooh, Moriantondi diné kéyah shodeiyoostʼéʼyę́ę éí Lehi łahdóó bikéyah ńtʼę́ę́ʼ; éí bąą tʼóó báhádzidgo ałchʼįʼ bádahóóchįįd, Morianton bidineʼé bikʼéí yee ndaabaahí yichʼįʼ yił hadaazdéél, doo daastiʼgo bibéésh hał yee deidooghą́ąłgo yikʼiijééʼ.

27 Ákondi shooh, diné Lehi bikéyahgi kééhatʼínée Moroni dah yinééłgóó dah dadíníichą́ą́ʼ, dóó ákaʼaʼayeed yídeiyííkeed; háálá áko shooh díí doo yee ádídahoodiiltʼiʼ da.

28 Áádóó baa hoolzhiizh Morianton bidineʼé, hastiin Morianton wolyéego biníʼeezh, éí Lehi bidineʼé Moroni dah yiinéél yichʼįʼ adahineezchą́ą́ʼgo bił bééhoozin, tʼáá íiyisíí nídaasdzííd háálá Moroni bá ndaabaahí bikʼiidoojah dóó ndabidoołtsxiłgo.

29 Éí bąą, Morianton éí náhookǫsjigo kéyah siʼą́ą́jigo adahidoonéełgo dadínóozįįłgo yichʼįʼ haadzííʼ, áadi ayóó tó dah naazyį́, dóó éí náhookǫsjigo kéyah siʼánígíí yíkáʼ ádaatʼį́.

30 Áádóó áko shooh, díí bee hodeestʼánígíí yikʼeh ádahodoolííłgo, (éí yitsʼą́ą́dóó tʼáá íiyisíí yínííl danilíí doo ńtʼę́ę́ʼ) ákondi shooh, Morianton éí ayóó doo yitsʼííd da, éí bąą łaʼ ásdzání bá naalʼaʼí yichʼįʼ báhóóchįįd, dóó yichʼįʼ dahdiilwod dóó neineestsʼin.

31 Áádóó baa hoolzhiizh éí yikʼee dahdínííchą́ą́ʼ, dóó Moroni dah yinééłjįʼ yilwod, áádóó tʼáá átʼé áhoodzaaʼígíí Moroni yee yił hoolneʼ, áádóó náhookǫsjígo dahdadiinéhígíí ałdóʼ yee yił hoolneʼ.

32 Áko shooh, diné kéyah Bountifuldi kééhatʼínígíí, éí doodago Moroni, Morianton binahatʼaʼ yikééʼ nídookah dóó bidineʼé yił ahididoonéełgo tʼóó bééhóódzííd, áádóó éí áájí kéyah yee ádídahodoolnih, éí bitsʼą́ą́dóó Nephi bidineʼé tʼáá íiyisíí tiʼdahooníihgo bił hwiidooʼaał, aooʼ, éí éí tʼáá bí ádeinízingo kéédahatʼínée yidoołchxǫǫł.

33 Éí bąą Moroni bá ndaabaahí ayííłʼaʼ, biyéél yił dahdiiná, Morianton bidineʼé yichʼą́ą́h ndoojah, náhookǫsjigo kéyah yichʼįʼ yinéełgo niʼ kódeidoolííł.

34 Áádóó baa hoolzhiizh kéyah Ádahasdįįd binaadi yíkai índa yichʼą́ą́h niníjééʼ; dóó ákweʼé yikʼiníjééʼ, ahóółtsʼóózigo tónteel bíighah hónítʼiʼgi náhookǫs kéyah bichʼįʼjigo, aooʼ, eʼeʼaahdę́ę́ʼ dóó haʼaʼaahdę́ę́ʼ, tónteel nihiníyį́į́di.

35 Áádóó baa hoolzhiizh Moroni bá ndaabaahí ayííłʼaʼyę́ę, éí hastiin Teancum wólyéego naʼaʼeesh, éí Morianton bidineʼé yichʼą́ą́h niníná; Morianton bidineʼé ayóó bízhą́ daʼílį́, (éí bąąhági átʼínígíí dóó bizaad yiłkanígíí yee yinóʼááh) áko ałkʼiijééʼ, áadi Teancum Morianton yiyiisxį́ dóó bá ndaabaahí yikʼehdeesdlį́į́ʼ, dóó deisnááh, dóó Moroni dah yinéełdi náʼnáʼ. Áádóó ándahwiiʼaahii Nephi bidineʼé yikʼi dahwéeʼaahgo naadiin dį́į́ʼ nááhaigo ahoolzhiizh.

36 Áádóó áko Morianton bidineʼé nátʼą́ą́ʼ anábidiʼnoolkaad. Dóó tʼáá hodéezyéelgo nááhástʼą́ą dooleełgo yee ahadaʼdeestʼą́ Morianton kéyahdi, dóó Lehi bidineʼé yił ahíikai, dóó tʼáá bí bikéyahgóó béédaʼiisnííʼ.

37 Áádóó baa hoolzhiizh tʼáá éí yihahígíí biyiʼ Nephi bidineʼé hodéezyéelgo bił ná hooʼaʼ, áko Nephihah, naaki góneʼ ánihwiiʼaahii binaatʼááh nilį́į́ ńtʼę́ę́ʼ, éí ájídin, éí Diyin God bił yáʼátʼéehgo nahaʼáá ńtʼę́ę́ʼ.

38 Ákótʼée ndi, Alma nídaháasdzooígíí dahídídoojihgo dooda yidííniid dóó éí Alma dóó bizhéʼé tʼáá íiyisíí baa hastiʼgo yaa ntsíkees; ákondi Alma biyeʼ, Helaman, yaa ahalyáa doogo yeidiníʼą́.

39 Áko shooh, baa hoolzhiizh Nephihah biyeʼ ánahwiiʼaahii náádoodleełgo bikʼihodiiniiʼ, bizhéʼéyę́ę bitséskʼeh góneʼ; aooʼ, aláahdi ánihwiiʼaahii dóó diné yá nahaʼáago bikʼihodiiniiʼ, óʼoolʼįįł baahastiʼgo yee yadiilniiʼ áko yáʼátʼéehgo ánahwiiʼaah dooleeł, diné tʼáá bí ádeinízingo kéédahatʼį́ dóó hodéezyéelgo hazʼą́ągo áhósin dooleeł, dóó Bóhólníihii biDiyin God baa hastiʼgo deiyoodlą́ągo yá hasʼą́ą́ doo, aooʼ, dóó Diyin God bibee óʼoolʼįįł yee yíká análwoʼ doogo bíyoołkááł doo, áádóó bąąhági ádaatʼínígíí bee hazʼáanii bikʼehgo bánahojiiʼaah doo.

40 Áko shooh, éí Pahoran joolyé. Pahoran bizhéʼéyę́ę bitsékʼeh góneʼ dashneezdáh, áádóó naadiin dį́į́ʼ náhááh góneʼ, éí Nephi bidineʼé bá hojooʼááłgo hahoolzhiizh.