1 Shiyeʼ, shizaad diitsʼį́į́h; tʼáá aaníí ándíshní, Diyin God bibee hazʼáanii bikʼeh honíłʼį́įgo kéyah bikááʼ yáʼátʼéehgo náás yínááł doo.

2 Nihizází dabiʼdishnah yę́ę béénílniihgo, díí íísdzaahígíí beʼdííłííł; háála naalteʼ danilį́į́ ńtʼę́ę́ʼ, doo łaʼ yisdábidooʼishí da tʼáá hazhóʼó Abraham biDiyin God, dóó Isaac biDiyin God, dóó Jacob biDiyin God tʼéiyá; dóó tʼáá íiyisíí bichʼįʼ nidahwiiʼnáádę́ę́ʼ yisdábííʼeezh.

3 Áádóó áko, O shiyeʼ Helaman, áko shooh, tʼah tsíłkéí nilį́, dóó áko, díí baa nánooshkąąh shizaad didíítsʼį́į́ł dóó shitsʼą́ą́dóó óhoołʼaah, háálá shił bééhózin háiida Diyin God yaʼólíigo naʼbidiʼnitaahígíí, dóó biʼdiiłʼáhígíí, dóó bee bichʼįʼ nahwiiʼnanígíí yee bikáʼadoolwoł, éí nihóníyáadi yisdádoogááł.

4 Díí tʼáá shí bikʼiʼdiitą́ tʼáadoo níníziní—atsʼíískʼehjí éí dooda iiʼ sizíiniikʼehjí áłdishní, atsʼíískʼeh ntsáhákees éí dooda ákondi Diyin God éí bitsʼą́ą́dę́ę́ʼ.

5 Áko, shooh, ándishní, tʼáadoo Diyin God beʼaweeʼ síłį́įgo díí doo bikʼiʼdiitą́ą da doo ńtʼę́ę́ʼ, ákondi Diyin God, Diyin bá naalʼaʼí diyinii shił hoolneʼ, doo éí tʼáá shí ánishtʼéhígíí binahjįʼ shił ííshją́ą́ áyiilaa da.

6 Háálá Mosiah biyeʼké bił naashdeeh ńtʼę́ę́ʼ, Diyin God bisodizin dadiilchxǫǫł daniidzingo; ákondi shooh, Diyin bá naalʼaʼí diyinii nihichʼįʼ ayííłʼaʼgo nanihiníłtłʼah.

7 Áádóó áko shooh, nihichʼįʼ haadzííʼ, ayóó íítsʼaʼgo adiʼní nahalingo, nihiyaadóó niʼ tʼáá átʼé nahasnááʼ; dóó tʼáá ániitʼé niʼjįʼ naaʼaníídeeʼ, háálá Diyin Bóhólníihii nihideesnááʼ.

8 Ákondi shooh, haʼoodzíiʼgo kóshiʼdooʼniid: Yiizįįh. Áádóó nídiishnaʼ dóó yiizįʼ; dóó Diyin yá naalʼaʼí yiiłtsą́.

9 Áádóó kóshidííniid: Shidiʼyoołyééł nínízin ndi, Diyin God bisodizin éí doo dííłchxǫǫł da.

10 Áádóó baa hoolzhiizh niʼjįʼ naaʼíítłizh; áádóó tágíjį́ dóó tágí tłʼééʼ azlį́į́ʼ chʼééh shizééʼ ąą áshłééh, áádóó shigaan dóó shijáád ałdóʼ doo nidaalnish da daazlį́į́ʼ.

11 Áádóó Diyin yá naalʼaʼí ląʼígo yee shichʼį́ hanáánáádzííʼ, éí shikʼiské deidiiztsʼą́ą́ʼ, ákondi shí éí tʼáadoo sidétsʼą́ą da; áko díí saad disétsʼą́ągo—Shidiʼyoolyééł nínízin ndi, Diyin God bisodizin éí doo dííłchxǫǫł da—Éí shidiʼyoolyéełgo da tʼóó bááhádzidgo béésésdzííd dóó bikʼee shił hooyééʼ, éí bąą niʼjįʼ naaʼíítłizh dóó jééhkał sélį́į́ʼ.

12 Ákondi hoolʼáágóó tiʼhooʼnííh shikʼi hooleʼ; háálá shiiʼ sizíinii aláahdi ayóó átʼéego bichʼįʼ nahwiisʼnááʼ dóó shibąąhági ádaatʼéii tʼáá átʼé bikʼee tiʼhwiiséniiʼ.

13 Aooʼ, tʼáá átʼé shibąąhági ádaatʼéii dóó doo yáʼátʼéehii baa niséyahę́ę́ bénááshniiʼ, éí bąą chʼį́įdiitahdi tiʼhooʼníhígíí tʼáá íiyisíí bikʼee tiʼhwiiséniiʼ; aooʼ, shiDiyin God bikʼijįʼ sélį́į́ʼgo baa ákoniizį́į́ʼ, dóó diyingo bibee hazʼáanii doo bikʼeh honishʼį́į da ńtʼę́ę́ʼ.

14 Aooʼ, ląʼí da baʼáłchíní niséłtseed, éí doodago doo yáʼáhooshǫ́ǫ́jigo yóóʼáhéʼeezh; aooʼ, áádóó dooládóʼ bąąhági íísdzaa da lá, shiDiyin God bił yah adeesháałgo baa tsídikeezgo tsʼídá doo bee hajódziih átʼéego shiiʼ sizíinii tiʼhoozʼniiʼ.

15 Atíhíláaneʼ, niizį́į́ʼ, yóó áshidiʼdoolnííł dóó shitsʼíís dóó shiiʼ sizíinii náádidoolyééł, áko shiDiyin God doo bidááhdóó nashidiʼdoodlóosgo, baa niséyáhą́ąʼ bee shá nahidootʼááł da.

16 Áádóó áko, tágí jį́ dóó tágí tłʼééʼ tiʼhwiiséniiʼ, azhą́ chʼį́į́dii shiiʼ sizíinii neiloʼgo shichʼįʼ nahwiisnááʼ.

17 Áádóó baa hoolzhiizh tʼáá íiyisíí bikʼee tiʼhooshníihgo, bąąhági áátʼįįdyę́ę bénááshniiʼ dóó tʼóó báhádzidgo yínííł biih yítłizh, áko shooh, shizhéʼé Diyin bikʼeh áhodooníiłgo éí Jesus Christ doogáałgo diné yee yichʼįʼ haadzííʼ yę́ę ałdóʼ bénááshniiʼ, Diyin God biYeʼ, éí nihokááʼgóó bąąhági ádaatʼéii yá nináʼdoodlééł.

18 Áko, éí baa tsédíkeezgo, shijéí biyiʼdóó sodeeszin, O Jesus, Diyin God biYeʼ nílíinii, neʼayóóʼoʼóníinii bee shaa jiiníbaah, bikʼeʼashchʼííʼgo bikʼeʼíyééʼdę́ę́ʼ dóó bąąhági átʼéii shótąʼgo shił hazʼą́, anoonééł bibéésh daʼahólzhaʼí shináztʼiʼ éí doo ninítʼiʼ da.

19 Áádóó áko, shooh, díí baa tsídíkéez, bikʼee tiʼhooshnííhyę́ę shikʼeeldoh, aooʼ, bąąhági áshtʼį́įgo yínííł yiih shííłtį́ yę́ę kʼad doo bénáshniih da.

20 Áádóó dooládóʼ, baa hózhǫ́ǫ da, dóó díí tsʼídá tʼáá aaníinii nizhónígíí yiiłtsą́; aooʼ, shiiʼ sizíinii ił hózhǫ́ biiʼ hadéébįįd shichʼįʼ nahwiiʼnánée tsʼídá biláahdi!

21 Aooʼ, ándishní, shiyeʼ, ádin tsʼídá doo kotʼáó naʼiiłnání da dóó bikʼeʼíyééʼgo tiʼhooshnííh da ńtʼę́ę́ʼ. Aooʼ, áádóó ałdóʼ ánndishní, shiyeʼ, nááná łahgo ałdóʼ, ádin tsʼídá doo kotʼáó naʼiiłnání da dóó tʼáá íiyisíí baa shił hózhǫ́.

22 Aooʼ, díí yiiłtsą́ niizį́į́ʼ, Nihizhéʼé Lehi iiłtsánéegi átʼáo; Diyin God yikááʼdóó nahaʼáii yikááʼ dasidah niizį́į́ʼ, tʼáadoo bee néelą́ʼí Diyin yá nidaalʼaʼí bináztʼiʼgo, biDiyin God yá dahataał dóó yaa dahaniih; aooʼ, áádóó shiiʼ sizíinii áadi hónishłǫ́ǫ doo nízin.

23 Ákondi shooh, shigaan dóó shijáád bidziil nídaasdlį́į́ʼ, dóó yiizįʼ, áádóó Diyin God ániidí ánáshiidlaaʼígíí diné bił ííshją́ą́ íishłaa.

24 Aooʼ, áádę́ę́ʼ dóó kojįʼ, doo niʼkoshnééhgo yishnish, áko diné ádaa ńdaʼdookąąłgo bíká adeeshwoł nisin, áko aláahdi ił hózhóonii bikʼiníyáhééʼ bí ałdóʼ yikʼídadookah, áko bí ałdóʼ Diyin God ániidí ándabidoodlííł, áádóó Iiʼ Sizį́ Diyinii bił dahólǫ́ǫ doo.

25 Aooʼ, dóó áko shooh, O shiyeʼ, nishishnishgo bitsʼą́ą́dóó idahidiikaiʼígíí binahjįʼ Diyin Bóhólníihii ayóó átʼáo ił hózhǫ́ sheinílá;

26 Saad shił ííshjání ályaaígíí, shooh, eí bee Diyin God ląʼí da ániidí ándabiidlaa, shí shíł bééhózinígi átʼéego, dóó shí iiłtsánígi átʼáo binááʼ yee daʼiiłtsą́; éí bąą díí bee haasdzíʼígíí yikʼidaʼdiitą́, shí bikʼiʼdiitánígi átʼáo; dóó díí shił bééhózinígíí éí Diyin God bitsʼą́ą́dę́ę́ʼ nídiilá.

27 Áádóó azhą́ nashidiʼneestą́ą́ʼ dóó ałʼąą átʼéego shichʼįʼ nahwiisʼnááʼ ndi shíkáʼoʼoowod, aooʼ, tsʼídá ałʼąą átʼéego tiʼhooʼnííh biiʼ niséyáhígíí; aooʼ, Diyin God awáalyahdę́ę́ʼ shééʼníłniiʼ, dóó sheʼastłʼǫ́ǫ́dę́ę́ʼ, dóó anoonééłdę́ę́ʼ; aooʼ, áádóó baʼííníshłí, dóó tʼáá yisdáshiilóós doo.

28 Áádóó shił bééhózin nihóníyáadi nááshiidoołnaał, ayóó áhootʼéedi bił honishłǫ́ǫ doo; aooʼ, áádóó hoolʼáágóó baa hashniih doo, háálá nihizází Egyptdę́ę́ʼ yisdáyííʼeezh, áádóó Egypt dineʼé Tónteel Łichííʼ yee yiyííghą́ą́ʼ; dóó kéyah baa deitʼą́ąjįʼ beʼadziil yee yiníʼeezh; aooʼ, biʼdisnááhgo ąąh shijééʼdę́ę́ʼ tʼáá ahą́ą́ʼ yisdánéíʼish ńtʼę́ę́ʼ.

29 Aooʼ, áádóó ałdóʼ nihizází Jerusalem kéyahdę́ę́ʼ chʼííníʼeezh, áádóó ałdóʼ, hoolʼáágóó beʼadziilii yee yisdáyííʼeezh, biʼdisnahgo ąąh shijééʼdę́ę́ʼ; tʼáá áhą́ą́h dóó díí jį́įjįʼ; áádóó dabiʼdisnahą́ą tʼáá áłahjįʼ bénáshniih; aooʼ, éí bidisnah yę́ę nihídoʼ béédaałniih, shí íísdzaaígi átʼáo.

30 Ákondi shooh, shiyeʼ, doo díí tʼéiyá da; shí shił bééhózinígi átʼáo ni ałdóʼ nił bééhózin doo, Diyin God bibee hazʼáanii bikʼeh honiłʼį́įgo kéyah bikááʼgóó bee náás díínááł; áádóó ałdóʼ nił bééhózin doo, Diyin God bibee hazʼáanii doo bikʼeh honíłʼį́įgo éí bił hazʼą́ą́dóó chʼíndiʼnóólchxééł. Áko díí éí yee haaʼdzíʼígíí bikʼehgo.