1 Shiyeʼ, shizaad yíísiniłtsʼą́ą́ʼ, háálá ándishní, Helaman bee bił hweeshneʼígíí átʼáo, Diyin God bibee hazʼáanii bikʼeh hóníłʼį́įgo kéyah bikááʼgóó náás díínááł; áádóó Diyin God bibee hazʼáanii doo bikʼeh honíłʼį́į́góó éí bitsʼą́ą́dóó nahjįʼ kóndiʼdoolnííl.

2 Áádóó kʼad, shiyeʼ, ayóó átʼáo naa shił hózhǫ́ǫ dooleełgo naa haʼííníshní, háálá bíníłdzilígíí dóó Diyin God yinídlánígíí biniinaa; háálá ániid nanináádą́ą́ʼ Diyin Bóhólníihii bichʼįʼ díníʼį́į́ʼ sínílį́į́ʼ, áádóó haʼíínílníigo bibee hazʼáanii tʼáá bikʼeh honiłʼį́į́ doo, háálá bikʼihojídlíi dooleeł háiida hoolʼáágóó iiná bidziilgo yółtʼihígíí.

3 Ándishní, shiyeʼ, tʼáá íídą́ą́ʼ ayóó átʼáo naa shił hózhǫ́, háálá neʼoodląʼ dóó yéego ánítʼinígíí biniinaa, áádóó Zoram dineʼé bitahgóó haʼíínilní dóó nízaagóó-tiʼhwiisíníniiʼ.

4 Háálá neʼastłʼǫ́ǫ́n ńtʼę́ę́ʼgo shił beehózin, aooʼ, áádóó ałdóʼ shił bééhózin saadígíí biniinaa tsé bee nándiʼneesneʼ; áádóó díí tʼáá átʼé bee haʼínilní háálá Diyin Bóhólníihii nił hólǫ́ǫʼ ńtʼę́ę́ʼ; áádóó kʼad nił bééhózin Diyin Bóhólníihii yisdáníílóóz.

5 Áádóó áko shiyeʼ, Shiblon, áko díí béénílniih, áko haashį́į́ nízáájįʼ Diyin God baʼíínílíigo tʼáá éí ánízahjįʼ tiʼhooʼnííhdę́ę́ʼ yisdánidoolóós, dóó niʼdiiłʼáá dééʼ, dóó nichʼįʼ nahwiiʼnáádę́ę́ʼ, éí nohóníyáadi yisdánidoolóós.

6 Áko, shiyeʼ, díí tʼáá íídą́ą́ʼ shił bééhózingo tʼáadoo shaa nitsíníkeesí, ákondi Diyin God biʼIiʼ Sizį́ Diyinii átʼé éí shiiʼ hólǫ́ éí díí shił ííshją́ą́ ádeileʼ; háálá Diyin God doo diné ániidí áshiilaagóó díí doo shił bééhózin da doo ńtʼę́ę́ʼ.

7 Ákondi shooh, Diyin Bóhólníihii ayóó átʼáo shaa joozbaʼgo bá naalʼaʼí shichʼįʼ ayííłʼaʼ díí yee shił hodoolnih biniyé bidineʼé bitahgóó naanish atiʼdoolííłii niʼkódeeshlííł; aooʼ, dóó Diyin yá naalʼaʼí bił ahííłtsą́, dóó shichʼįʼ haadzííʼ, dóó nidiʼniʼ diitsʼaʼ nahalingo shichʼįʼ haadzííʼ dóó nahasdzáán tʼáá átʼé neiyiisnááʼ.

8 Áádóó baa hoolzhiizh tágí jį́ dóó tágí tłʼééʼ tʼóó bááhádzidgo shił nahonigaah ńtʼę́ę́ʼ dóó shiiʼ sizíinii yéego tiʼhoozniiʼ; áádóó tsʼídá tʼah doo, Diyin Bóhólníihii Jesus Christ yéego ajoobaʼ bee bichʼįʼ haasdzíiʼgo, shibąąhági ádaatʼéii bee shaaniʼdeitʼą́. Ákondi shooh, yéego bichʼįʼ haasdzííʼ dóó shiiʼ sizíinii biiʼ hodiilzééʼ.

9 Áádóó áko, shiyeʼ, díí bee hóníyá dooleeł biniyé bee nił hweeshneʼ, áko shitsʼą́ą́dóó akʼididíítį́į́ł, doo nááná łahgi átʼáo éí doodago átʼéhígi átʼáo diné yisdádoodlóós, Christ biiʼ dóó biníkááʼ góneʼ tʼéiyá. Áko shooh, éí iiná dóó nihokááʼ dineʼé bibee adinídíín nilį́. Áko shooh, éí saad tʼáá aaníinii dóó tʼáá ákogi átʼéii nilį́.

10 Áádóó kʼad, saad bee naʼnítin sínílį́įʼgo tʼáá bee naʼnítin doo; yéego ánítʼį́į doo dóó tʼáá ałtsojįʼ hazhóʼó íʼíłʼį́.

11 Tʼáadoo ádaa dzíínídlíigo nanináhí; aooʼ, áko tʼáadoo nihódzą́ bee ádaa dzíínídlíhí, éí doodago ayóó neʼadziil bee.

12 Yéego hanidziih, ákondi tʼáadoo bilááhgóó áníłʼíní; áádóó ałdóʼ tʼáá átʼé bídin nílínígíí hazhóʼó naniloʼ, áko ayóóʼóʼóʼní niiʼ hadeezbin doo; tʼáadoo tʼóó sínídáhí.

13 Zoram dineʼégi átʼáo tʼáadoo sodílziní, háálá yiniłtsą́ dineʼé dabidiitsʼaʼgo sodadilzin, éí doodago biʼéédahózin bee baa dahodoonih.

14 Kódóóneʼ lágo: O Diyin God, nihikʼiské bilááhgo yáʼádaniitʼé; ákondi kódíní: O Diyin Bóhólníihii, doo hodíínísinígíí bee shanídiʼníʼaah, dóó shikʼiské ajoobaʼ bee bénáshniih doo—aooʼ, tʼáá áłahjįʼ Diyin God doo hodíínísinígíí bidááhdóó bił ííshją́ą́ íínísin.

15 Áádóó Diyin Bóhólníihii niiʼ sizíinii yikʼijídlíi doo, dóó nihoníyáadi bił hazʼą́ądi yah andoolóós, áhodíínílzéeʼgo sínídáa doo. Áko kʼad yínááł, shiyeʼ, dóó díí dineʼé Diyin bizaad bee nanítin. Shiyeʼ, hágoóneeʼ.