1 Áádóó baa hoolzhiizh Alma dóó Amulek kintahdóó dahdidoohʼash biʼdooniid, áádóó dahdiiʼáázh, dóó Sidom kéyahdi níʼáázh; áádóó áko shooh, dóó áadi Ammonihah kéyahadóó diné dahdiikai yę́ę yikʼíníʼáázh, éí tsé bee ndabiʼdiʼnéesneʼ dóó chʼínoolkaad, háálá Álma bizaad deiyoosdląądígíí biniinaa.

2 Áádóó tʼáá ałtso biʼzáanii dóó báʼáłchíní adaazaa yę́ę yaa dahoolneʼ, dóó tʼáá bí áldoʼadaadahoolneʼ, dóó haitʼáo adziilii yee chʼéékaiʼígíí.

3 Áádóó Zeezrom ałdóʼ Sidomdi sitį́, bitahoneezgaigo, tʼáá íiyisíí bineʼ biʼdiiʼáhígíí dóó bąąhági ádzaaígíí biniinaa, háálá Alma dóó Amulek ájídin nizin; dóó shí bąąhági áátʼįįdígíí biniinaa biʼdiisyį́ nizingo. Áádóó díí ayóó átʼáo bąąhági átʼéii, dóó ląʼígo bąąhági áátʼįįdígíí, binítsekees biʼdiiʼá honáásdóó tʼáá íiyisíí yéego bichʼįʼnahwiisnááʼ, doo nahjįʼ kónééhgóó; éí bąą tʼóó yiwohdí bitah honiigai.

4 Áko, Alma dóó Amulek Sidom kéyahdi naaʼashgo yihódiiztsʼą́ą́go, bijéí haʼoolnih silį́į́ʼ; áádóó tsxiłgo haneʼ yichʼįʼ áyiilaa, shaa dooʼash yóʼníigo.

5 Áádóó baa hoolzhiizh tsxįįłgo akǫ́ǫ́ ííʼáázh, bił honeʼígíí yidiiztsʼą́ą́go; áádóó Zeezrom kin yiiʼsitʼį́įdi níʼáázh; dóó doo bitah hatsʼíídgóó, séskʼeh yikááʼ sitį́, doo bitah hółdzilgo bitahoneezagai; dóó binítsekees tʼáá íiyisíí yéego bichʼįʼnahwiisnááʼ háálá bąąhági átinígíí biniinaa; dóó yíyiiłtsʼą́ą́góó yichʼįʼ dahdidiilnih, dóó náhshidoołzih yiłníigo yiyíkąąd.

6 Áádóó baa hoolzhiizh Alma ání, bilá yiiłtsóód: Daʼ Christ bibeʼadziilii bee yisdáʼdoodááłgo yiinídlą́?

7 Áádóó binaʼidikid yaa náhoolneʼ dóó ání: Aooʼ, tʼáá ałtso nihizaad bee naʼsinootʼą́ʼígíí yinishdlą́.

8 Áádóó Alma ání: Christ nináʼnídláhígíí yiinídláago náánididoołááł.

9 Áádóó ání: Aooʼ, nizaadígíí bikʼehgo iinishdlą́.

10 Áádóó Alma Bóhólníihii yichʼįʼ sodoolzin, kóníigo, O nihiBóhólníihii Diyin God, díí hastiin baa jiiníbaah, dóó Christ yoodlánígíí bikʼehgo náníłdziih.

11 Áádóó Alma kódííniidgo, Zeezrom tʼáá hoshchʼįʼ yiizįʼ, áádóó dah diiyá; áádóó díí éí diné tʼáá ałtso ayóó átʼáo yikʼee tsídadeesyiz; áádóó díí Sidomdóó adahwiisáago tʼáá ałtsogo bił béédahozin.

12 Áádóó Alma éí Zeezrom Diyin Bóhólníihii yééhodoosįįłgo tó yee yiyíísį́į́ʼ, áádóó diné neinitingo bił hahoolzhiizh.

13 Áádóó Alma Sidom kéyahdi sodizin báhooghan niiníʼą́, áádóó priest dóó ndaʼnitiní danilínígíí yiyíísį́į́ʼ, tʼáá háishį́į́ʼ tó bee shididoolzįįł nizinígíí Diyin Bóhólníihii yééhodoosįįłgo tó yee deiyíísį́į́ʼ.

14 Áádóó baa hoolzhiizh tʼóó ahayóí; háálá Sidom tʼáá ałtso adahwiisáádééʼ naháskai, dóó tó bee dabiʼdoolzį́į́ʼ.

15 Ákondi diné Ammonihah kéédahatʼínígíí, éí diné tʼahdii bijéí daastłʼis dóó bikʼos daniłdził; áádóó bąąhági ádaadzaayę́ę tʼáadoo yaa ádaańdaʼooskan da, Alma dóó Amulek bibeʼadziil tʼáá átʼé biʼiiníziinii bitsʼą́ą́déé átʼé daaní; háálá éí Nehor deiyoodlą́ągo yikééʼ deiyíkááh ńtʼę́ę́ʼ, dóó bibąąhági ádaatʼéii yaa ńdaʼdookąąłgo doo deiyoodlą́ą da.

16 Áádóó baa hoolzhiizh Alma dóó Amulek, Amulek éí tʼáá átʼé bibéésh óola, dóó bibéésh łigaii, dóó táá ałtso beʼdaʼílíinii yooʼíidiiʼą́, éí Ammonihah kéyahdi shijaaʼ ńtʼę́ę́ʼ, háálá éí Diyin God bizaad biniyé, bikʼis danilíinéé dóó bizhéʼé, dóó bikʼéí ałdóʼ doo dabiniizį́į́ʼ da;

17 Éí bąą, Alma sodizin bahooghan Sidomdi niiníʼą́, áádóó yéígo haiyísid, aooʼ, diné bijéí doo yee adaadadzoodlíígóó haiyísid, dóó Diyin God yidááhdóó hojoobaʼ ádaʼdiilyaa, dóó dahodisindi Diyin God yichʼįʼ nááʼdaʼííłniihgo áłah nádlééhgo hahoolzhiizh, hadaʼásííd dóó tʼáá ahąąh sodadiłzin, áko Chʼį́įdii, dóó anoonééł, dóó dahóóchxǫʼ, yitsʼą́ą́dóó yisdáʼdookahgo hadaʼoolní—

18 Áko ádishní, Alma díí tʼáá átʼé yiyiiltsʼą́ą́go, éí bąą Amulek yił dahdiiʼaazh dóó Zarahemla kéyahdiʼ níʼaazh, dóó tʼáá bí bighangi yił níʼaazh, dóó bee bichʼįʼ nahwiinanígíí yee yikáʼalwod, dóó Bóhólníihii yoodlánígíí hózhǫ́ yee bidziilgo áyiilaa.

19 Áko ańdahwiiʼaahii Nephi bidineʼé yikʼi dahwééʼaahgo neeznaa nááhai.