1 Áko baa hoolzhiizh Korihor ádingo, Alma éí Zoram dineʼé Diyin Bóhólníihii bohoogááł ndeiyiłchxǫǫhgo bił hóoneʼ, dóó Zoram, binaatʼáanii nilíinii, éí diné tʼóó bedaʼályaii doo dahiináanii yichʼįʼ ntséédadigohgo bijéí yee yóóʼayiizhʼeezh, bijéí yínííł náánásdlį́į́ʼ háálá diné bąąhágiʼ ádaatʼínígíí biniinaa.

2 Háálá Alma bidineʼé bąąhágiʼ ádaatʼínígíí bił bééhoozingo biniinaa tʼáá íiyisíí yikʼédí silį́į́ʼ, Zoram dineʼé éí Nephi dineʼé yił ałtsʼákaiʼígíí biniinaa bijéí tʼáá íisyisíí yínííł silį́į́ʼ.

3 Áko Zoram dineʼé kéyah Antionum deiłníídi ahííkai, éí kéyah Zarahemladóó haʼaʼahjigo, tónteel yinázʼá, éí kéyah Jershon shádiʼááhjigo, éí doo kéédahojitʼíní bee nohoneilʼą́, éí áadi Laman dineʼé ląʼí kéédahatʼį́.

4 Áko Nephi dineʼé éí Zoram dineʼé Laman dineʼé ałkáʼadoojahgo tʼáá íiyisíí yéédaasdzííd, áádóó áko Nephi dineʼé alááh bidiʼdooghąąłgo.

5 Áádóó áko, Diyin bizaad bee naʼnitinígíí diné ayóó átʼáo yáʼátʼéehgo óʼoolʼįįłjí yaayiʼéésh—aooʼ, éí hózhǫ́ diné biniʼ neiyiiłná éí béésh hał bilááhgo bidziil, doodago tʼáá ałtsóní biláahgo, éí łahgo ákódabiilaa—éí bąą Alma Diyin God bizaad beeʼadziil chodeidiilʼįįłgo tʼáá bííghah niizį́į́ʼ.

6 Éí bąą Ammon, dóó Aaron, dóó Omner dahyidiiʼeezh; áádóó Himni éí Zarahemladi sodizin bísiniłdah biʼdooniid; áko tááʼ éí dahyidiiʼeezh, dóó ałdóʼ Amulek dóó Zeezrom, éí Melekdi naaʼaash ńtʼę́ę́ʼ; áádóó biyeʼ naakigo ałdóʼdahyidiiʼeezh.

7 Áko biyeʼ tsʼídá alą́ąhjįʼ naagháʼígíí tʼáadoo yił dahdiiʼáázh da, éí Helaman wolyé, ákondi yił dahdiikaiʼigíí éí Shiblon dóó Corianton wolyé; dóó díí deiyííjiʼígíí éí Zoram dineʼé yitahgo yíkai, éí Diyin bizaad yee ndeidínóotʼįįł biniyé.

8 Áko Zoram dineʼé éí Nephi dineʼé yitsʼákaiʼígíí ádaatʼį́; éí éí Diyin God bizaad bee ndabidiʼneestʼą́ą́ ńtʼę́ę́ʼ.

9 Ákondi ayóó átʼéego niʼiilzííh yiihyikai; háálá Diyin God bibee hazʼáanii, dóó bee ndahwiistʼánéé doo yikʼeh dahoołʼįį da, Moses bibee hazʼáaniiyę́ę bikʼehgo.

10 Dóó ałdóʼ sodizinjí bikʼeh ooldahígíí doo yikʼeh dahółį́į da, tʼáá ákwííjįʼ Diyin God doo yichʼįʼ sodadilzin da dóó doo ádaańdáʼookąąh da, áko doo yáʼátʼééhjí biʼoolkąąh yiih dookah da.

11 Aooʼ, ákodaadzaago, Diyin Bóhólníihii biʼhoogááł ląʼí deiyííłchxǫʼ; áko, éí biniinaa, Alma dóó bikʼiské Diyin bizaad yee ndeidinóotįįł biniyé kéyahdi yíkai.

12 Áko, kéyahdi yíkaigo, shooh, Zoram dineʼé daʼoodlání yiiʼ áłah nídaadleeh ndeiyiznilígíí hadeideesʼį́įgo yikʼee dadeesyiz, dóó tʼáá damóo ooleełgo áłah nídaadleeh lá, éí Diyin Bóhólníihii bijį́ deidííniid; áádóó díí kótʼáó nahaaghah Alma dóó bikʼiské tsʼídá tʼah doo deiyiiłtsééh da ńtʼę́ę́ʼ;

13 Háálá áłah nídaadleeh tsʼídá ałníígiʼ dahʼadiitłʼin, bikááʼ ásdzį́į́doo biniyé, éí tsʼídá ásdzį́ biláahdi; dóó bikáaʼjįʼ tʼááłʼáʼí diné hanádaahgo bá hazʼą́.

14 Ákohgo, tʼáá haishį́į́ nahodeeshłaał nízinígíí ákódeh hadoolwoł dóó áadi yidoozįįł, dóó yáʼą́ą́sh gódeh dahdidoolnih, dóó bizhí ayóó íítsʼaʼgo náʼiidookąął, kóníígo:

15 Dilzinii, Diyin God dilzinii, Diyin God nilį́įgo daniniidlą́, dóó báhodilzinii nilį́įgo daniniidlą́, dóó iiʼ sizíinii nílį́į́ ńtʼę́ę́ʼ, dóó iiʼ sizíinii nilį́, dóó ahoolʼáágóó iiʼ sizíinii nílį́į doo.

16 Diyin God Dilzinii, nihikʼéí bitsʼánihíínínilgo nihił béédahózin; dóó nihikʼéí bibeeʼádaʼoolʼįįł doo deiniidlą́ą da, éí bizází áłchíní doo bił ééhózinígíí nahalingo baa deiyiizlá, ákondi áłchíní dadiyínii daniidlį́įgo nihikʼihdinilniiʼgo deiniidlą́, áádóó ałdóʼ Christ doo hólǫ́ǫ́ da doogo nihił ííshją́ą́ íínilaa.

17 Ákondi ní éí adą́ą́dą́ą́ʼ, dííjį́ dóó áhoolʼáágo doo łahgo ánááʼnííł da; dóó yisdánihidíínił biniyé nihikʼihdinilniiʼ, áádóó tʼáá ałtso nihinaagóóʼígíí éí náháchʼįʼ bee chʼį́įdiitah góyáa ádahídooltłʼił; hodilzingo ánihiinlááʼígíí, O Diyin God, naa ahééh daniizin dóó nánihiinilááʼígíí biniinaa ałdóʼ naa ahééh daniizin, áko nihikʼéí tʼáá ádzaagóó ádaʼałʼínígíí doo yee yóóʼadanihidooʼish da, éí Christ deiyoodlą́ągo niʼkódabósin, éí bijéí nitsʼą́ą́jigo kódeileʼgo yóóʼaheeskai, nihiDiyin God.

18 Áádóó nááná ahéheeʼ danidiiʼní, O Diyin God, nihikʼihdinilniiʼ dóó diyin dineʼé daniidlį́įgo ánihiinlaa. Amen.

19 Áko baa hoolzhiizh éí Alma dóó bikʼéí dóó biyeʼké díí sodizin deidééztsʼą́ągo, tsʼídá tʼáadoo bináłtʼehígo yikʼee dadeesyiz.

20 Háálá áko shooh, diné tʼááłʼáʼí nizinígo ákodeʼ hadahaaskai dóó tʼáá éí sodizin yee hanáádahasdzį́į́ʼ.

21 Áko éí ákweʼí hazʼánígíí Rameumptom holyé, éí, áá haʼnínígíí, éí diyingo haʼazʼá.

22 Áko, díí hazʼáádóó diné, tʼááłʼáʼí nizinígo, sodizin tʼáá łaʼígíí Diyin God yichʼįʼ yee hadahadziih, biDiyin God bikʼidadiilniiʼgo yaa ahééh danízin, dóó bikʼéí bibee ádaʼoolʼįįł doo yikééʼ yóóʼabííʼeezh da, dóó ádahodooniłígíí deidoodląąłgo tʼáadoo bijéí bindaʼasdloʼ da, éí doo yaa bił béédahózin da.

23 Áko, díígiʼ átʼéego dineʼé tʼáá ałtso ahéheeʼ dadííniidgo, hooghangóó anídahaaskai, bidiyin God tʼáadoo yaa hanáádaasdzííʼ da bidiyingo yee dahoołʼaʼdi ahínááneikaigo índa, ándeiyilįįhyę́ę bikʼehgo ahéheeʼ náádadidooʼniił,

24 Áko Alma díí yiyííłtsą́ą́go bijéí yínííł silį́į́ʼ; háálá éí dineʼé bąąhágiʼ ádaatʼínii dóó doo yáʼadaashóonii danilį́įgo yiyiiłtsą́; aooʼ, dóó bijéí béésh óola, dóó béésh łigaii, dóó tʼáá ałtso daʼílíinii yíchą́dadeilníh.

25 Aooʼ, dóó ałdóʼ ayóó átʼáo bijéí yee ádaadahanííhgo yiyiiłtsą́, ádaadadzódlíigo.

26 Áádóó yáʼąąsh góde bizhí diistsʼą́ą́ʼ, dóó sodoolzin, kóníigo: O Diyin Bóhólníihii, O, haanízááhgóóshąʼ, nándaalʼaʼí tiʼdahooníhgo kodi bitsʼíís yee dahiináa doo, nihokááʼ dineʼé baʼáłchíní bitahgo tʼóóbaaʼihʼígiʼ ádaatʼį́įgo deidoołtsééł?

27 Áko shooh, O Diyin God, nichʼįʼ ńdaʼookąąh, ákondi adahozódlį́ bijéí yikʼeh dadeisdlį́į́ʼ. Áko shooh, O Diyin God, bizééʼ yee nichʼįʼ ńdaʼookąąh, yá daniiłʼą́ągo, tsʼídá alááhjįʼ, nahasdzáán bikááʼ tʼáadoo bee chooʼínígíí bee.

28 Áko shooh, O shiDiyin God, biʼééʼdaʼílíinii, dóó biyóóstsah, dóó dabilátsíní, dóó bibéésh óola bibeeyooʼniłchíní, dóó tʼáá átʼé bidaʼílíinii yee hadadítʼéhígíí; áádóó áko shooh, díí bijéí tʼáá íiyisíí yídeʼdanilį́; ákondi nichʼįʼ ndaʼookąąh dóó ádaaní—O Diyin God, ahéheeʼ dandiiʼní, nihokááʼ dineʼé bikʼidahodiiniiʼii daniidlį́, dóó łaʼígíí éí yóóʼádoolnííł.

29 Aooʼ, áádóó Christ éí doo hódoolééł da daníigo bił hwíínilneʼ daaní.

30 O Bóhólníihii Diyin God, hanízáádgóshą́ʼ díí diné bąąhágiʼ ádaatʼį́įgo dóó doo danoodlą́ą́góó bá hosíníłʼą́ą doo? O Diyin Bóhólníihii, shidziilgo áshílééh, áko ká naasháhígíí bichʼįʼ shidziil dooleeł. Háálá ká naashá, dóó diné bitahgóó bąąhági ádaatʼínígíí shiiʼ sizíinii yee tʼihoonííh.

31 O Diyin Bóhólníihii, shijéí tʼáá íiyisíí yínííł nilį́; shiiʼ sizíinii Christ yee haʼoolníigo ánílééh. O Diyin Bóhólníihii, shidziilgo áshílééh, díí áchʼįʼ ndahwiiʼná bichʼįʼ shidziilgo éí bee tiʼhooʼnííh shikʼinéíldohgo bínísdzil doo, díí diné ndaʼiisihígíí biniinaa.

32 O Diyin Bóhólníihii, shiiʼ sizíinii haʼólníigo ánílééh, dóó yáʼátʼéehgo łaʼ deeshłííł, dóó bił ndaashnishígíí ałdóʼ—aooʼ, Ammon, dóó Aaron, dóó Omner, áádóó Amulek dóó Zeezrom ałdóʼ, dóó shiyeʼ tʼáá áłah—aooʼ, díí tʼáá átʼé bił dahoníshǫǫh, O Diyin Bóhólníihii. Aooʼ, Christ binahjįʼ biiʼ sizíinii bił dahoníshǫǫh.

33 Adziilii bee bikʼihojídlį́ áko dabidziil doo, áko bee bichʼįʼ ndahwiiʼnánígíí yídaníłdzil doo háálá éí baandootʼį́į́ł díí diné bąąhági ádaatʼinígíí biniinaa.

34 O Diyin Bóhólníihii, bee nihikʼihoojídlííh Christ binahjįʼ nichʼįʼ ninádahidiitʼishgo yáʼátʼéehgo áʼdaʼdiilnííł.

35 Áko shooh, O Diyin Bóhólníihii, biiʼ sizíinii tʼáá íiyisíí daʼílį́, dóó ląʼída éí danihikʼéí; éí bąą, O Diyin Bóhólníihii, adziilii dóó ééhózinii bee nihikʼihojídlííh, áko díí, nihidineʼé, naanínáádahidiitʼish.

36 Áko baa hoolzhiizh Alma díí saad yee haadzííʼgo, tʼáá átʼé yił hólónígíí yikʼidiilniiʼ. Dóó áko shooh, yikááʼjįʼ ahézkadgo yikʼidiilniiʼ, Iiʼ Sizį́ Diyinii biiʼ hadadéébįįd.

37 Áádóó éí ałtsogo daʼníłtsʼą́ą́ʼjįʼ dahdadiikai, chʼiyáán deidooyį́łígíí, doodaiiʼ deidoodlį́łígíí, doodaiiʼ ééʼ yiihdookahígíí doo yee ádaantsídaakees da.

38 Áádóó Diyin Bóhólníihii doo dichin danilį́į́góó, doodaiiʼ doo dibááʼ danilį́į́góó áyiilaa; aooʼ, dóó adziil yaayiizlá, áko achʼįʼnahwiiʼná doo yee tihoonííh da doo, háálá éí Christ bee iłhózhǫ́ yee yikʼehdeesdlį́į́ʼ. Áko díí éí Alma sodoolzinígíí bikʼehgo áhóótʼįįd; áko díí oodlą́ągo sodoolzinígíí biniinaa.