1 Áko shooh, baa hoolzhiizh Laman dineʼé aláahdi binaatʼáanii tʼáá átʼé bidineʼé haneʼ ílíinii yił ííshją́ą́ áyiilaa, éí éíí Ammon éí doodago Aaron, éí doodago Omner, éí doodago Himni, éí doodago bikʼiské Diyin God bizaad yee nidaʼdínóotįįłígíí doo atídeidoolíił da, adahwiisʼáágóó, dabikédaayahgóó.

2 Aooʼ, haneʼ ílíinii łaʼ yichʼįʼ kóyiilaa, áko doo atídeiłʼį́įgo yedaʼdootłʼóół da, éí doodago awáalyah góneʼ doo yah adeidoonił da; éí doodago doo yikʼídahdoozhah da, éí doodago doo ndeididoołtsʼį́į́ł da, éí doodago Diyin deiyoodlánígíí áłah ndaadleehígi doo chʼídeidínóołkał da, doo atídeiłʼį́į da, dóó doo tsé yee ndeiniłneʼ da doo, ákondi dabighan, dóó diyin bighan naaznilígíí ałdóʼ, dóó dahodílzingóó tʼáá bí ádeinízinígi átʼáo yah anídaakah doo.

3 Áádóó nidaakai doo dóó Diyin God bizaad deinízinígíí bikʼehgo ndaʼnitin doo, háálá aláahdi naatʼáanii Diyin Bóhólníihii yoosdląąd, dóó tʼáá ałtso hooghan hazʼą́ągi; éí bąą haneʼ ílíinii kéyahgóó diné yił ííshją́ą́ ádaalyaa, áko Diyin God bizaad doo bichʼąąh siláhígo bee naʼnitin doo, ákondi kéyah adahwiisʼáágóó baa haneʼ doo, áko bidineʼé bizází bibee óʼoolʼįįł doo tʼáá ákó daatʼéhígíí bił béédahodoozįįł, éí tʼáá ałtso ałkʼis danílį́įgo yaa ákodadinóozįįł, dóó doo nidaʼałtseed da doo, éí doodago doo aghadaʼiiʼníił da doo, éí doodago daʼniʼįįh, éí doodago doo aadaʼdilée da doo, éí doodago doo bąąhági ádaʼdoolííł da.

4 Áádóó áko baa hoolzhiizh aláahdi naatʼáanii díí haneʼ ílíinii ííshją́ą áyiilaago, Aaron dóó bikʼiské kindaatahgóó tádookai, dóó kin biiʼ sodahodizin ndaaznilgóó, sodizin bá hooghan ndeinil, dóó kédaayah Laman dineʼé bitahgóó priest danilínígíí dóó ndaʼnitiní deiyíísį́į́ʼ, Diyin God bizaad yaa dahalneʼ dóó bitahgóó ndaʼnitin doo biniyé, áko yéego yee náás deeskai.

5 Áádóó damííl yázhí bilááhgóó Bóhólníihii bił béédahoozin, aooʼ, damiil yázhí bilááhgóó Nephi dineʼé yáʼátʼééhjí beʼóʼoolʼįįł dayoosdląąd; dóó nídaháasdzogo deiníjaaʼígíí bee nidabidiʼneestą́ą́ʼ dóó ííshją́ą́ ádaalyaaígíí náás deiníjaaʼ díí jį́įjįʼ.

6 Áádóó Bóhólníihii tʼáá aaníí hináago, tʼáá aaníí daʼoosdlaad, éí doodago tʼáá aaníinii bił béédahoozįįd, Ammon dóó bikʼiské ndaʼneeztą́ʼígíí binahjįʼ, dóó diyingo ił ííshją́ą́ ályaaígíí dóó diyingo áhodooníłígíí baa hóóneʼę́ęʼ bikʼehgo, dóó Diyin God bibeʼadziil álíleekʼehjí biiʼ ndaashnish—aooʼ, Diyin Bóhólníihii hinánígíí bee, ánihidishní, Laman dineʼé ląʼí da Diyin binaʼnitin dayoosdląądígíí, dóó Diyin Bóhólníihii dayoodlánígíí, tʼáadoo yitsʼáhaaskai da.

7 Háálá diné diyinkʼehgo dahináanii daazlį́į́ʼ; yee ndaʼahiłtseed yę́ę dóó yee ałkʼijįʼ danilínée niʼ nideiznil, áko Diyin God doo yikʼijįʼ danilį́į da daazlį́į́ʼ, índa bikʼéí doo yikʼijįʼ danilį́į da.

8 Áko, díí éí Diyin Bóhólníihii yikééʼ deíkááh daazlį́į́ʼ:

9 Laman dineʼé Ishmael bikéyahdi kéédahatʼínígíí;

10 Áádóó ałdóʼ Laman dineʼé Middoni kéyahdi kéédahatʼínígíí;

11 Áádóó ałdóʼ Laman dineʼé Nephi bikintahdi kéédahtʼínígíí;

12 Áádóó ałdóʼ Laman dineʼé Shilom kéyahdi kéédahatʼínígíí, dóó Shemlon kéyahdi kéédahatʼínígíí, dóó kintah Lemueldi kéédahatʼínígíí, dóó Shimnilomdi kintahdi kéédahatʼínígíí.

13 Áádóó díí éí Laman dineʼé bikintah dabízhiʼ éí Diyin Bóhólníihii yikééʼ deíkááh daazlį́į́ʼ; dóó díí éí yee ndaʼahiłtseed yę́ę doo yee ałkʼijįʼ danilínée niʼ nideiznil, aooʼ, tʼáá átʼé anaaʼdi yee nidaʼahiltseed yę́ę; dóó éí tʼáá átʼé Laman dineʼé danilį́į́ ńtʼę́ę́ʼ.

14 Áádóó Amaleki dineʼé éí doo akééʼ dah diikai da, tʼáá hazhóʼó tʼááłáʼí tʼéiyá; Amulon dineʼé ałdóʼ doo ła akééʼ dah diiyáa da; ákondi bijéí deistłʼis, dóó Laman dineʼé ałdóʼ bijéí dáátłʼis tʼáá kéédahatʼínídi, aooʼ, dóó tʼáá átʼé bitahgóó dóó bikin hadaasʼáádi.

15 Ákohgo, Laman dineʼé tʼáá átʼé bikintah bízhiʼ chʼídaastʼą́ áadi ádaa ńdaʼooskan dóó tʼáá aaníinii bił béédahoozin, dóó idahidiikai.

16 Áádóó baa hoolzhiizh aláahdi naatʼáanii dóó tʼáá átʼé daʼoosdląądgo akééʼ deizįʼígíí bízhiʼ bee nihéédahoʼdólzin dooleeł danízin, áko bikʼéí bitsʼą́ą́dóó tʼáá sahdii átʼáo dabízhiʼ doo; ákohgo aláahdi naatʼáanii Aaron dóó ląʼí da priest danilínígíí yił nidahazʼą́, ázhiʼ bee yídóojiiłígíí biniyé, éí bízhiʼ bee béédahoʼdílzin doo.

17 Áádóó baa hoolzhiizh bízhiʼ Anti-Nephi-Lehi dineʼé yee ádaʼdóójiʼ; áádóó díí ázhiʼ bee dabiʼdóójí dóó doo éí Laman dineʼé daolyée da daazlį́į́ʼ.

18 Áádóó diné ayóó nidaalnishii daazlį́į́ʼ; aooʼ, dóó Nephi dineʼé yiłkʼé daʼahidiʼní; ákohgo, yił daʼahidiitsʼaʼ, dóó Diyin God hóyéeʼgo bá haadzííʼ yę́ę nahjįʼ kólyaa.