1 Áádóó áko, shiyeʼ Helaman, haneʼ nídaháasdzooígíí baa áháshyą́ągo shąąh niilyáhą́ą naadinishʼaahgo dahdiijááh;

2 Áádóó ałdóʼ díí diné baa haneʼ náhízóóh nidishní, shí íishłaaʼígi átʼáo, Nephi bibéésh tʼą́hí biyiʼ, áádóó díí tʼáá átʼé dínísingo naashjaah ńtʼę́ę́ʼ, baa áháshyánéegi átʼáo shí ntséjaaʼígíí átʼáo, háálá hódzáanii biniyéhígíí baa áháyą́.

3 Áádóó díidí béésh łitsoii tʼą́hí, dabikáʼígíí, éí Diyin bizaad dílzingo bee akʼedaʼashchínígíí bikááʼ nádaháásdzoh, éí nihizází ałkééʼdaʼahílchínígíí dabikááʼ, tʼáá ńléí hodeeyáádą́ą́ʼ dóó kojįʼ—

4 Áko shooh, danihizází yę́ę náás ádahodooníiłgo yaa hadahaasdzííʼ, éí baa áháyą́ągo ałkééʼ daʼachííh náás dayójááh doo, dóó Diyin Bóhólníihii yikʼi déezʼį́į́ʼ dóó yaa áhálą́ą doo tʼáá áłtso ałʼąą kédaayahgóó baa dahaasyáago índa, dabikʼéí, ałʼąą átʼéego dabizaad dóó diné dah deíkááhgóó, áko doo béédahózinii dabiyiʼígíí bił béédahodoozįįł.

5 Áádóó kʼad shooh, baa áháyą́ągo tʼáá bitsʼádaʼdinídíín doo; aooʼ, tʼáá bitsʼáʼdinílííd doo; aooʼ, áádóó ałdóʼ tʼáá áłtso béésh tʼą́hí dadílzingo ńdaháasdzogo dabiyiʼ.

6 Kʼad daatsʼí díí doo baa honisą́ą da dashíínóhní; ákondi shooh ánihidishní, tʼáadoo leʼé áłtsʼíísí dóó doo nanitłʼaaʼígíí bitsʼą́ą́dóó ayóóʼádaatʼéii haleeh; dóó tʼáadoo léʼé kóníshéhí ndi bił éédahózinii tsístłʼah dabiniłchééh.

7 Áádóó Bóhólníihii Diyin God biʼayóó átʼáo dóó hoolʼáágóó biniyéíi yihódoolííłgo yinaalnish; dóó Diyin Bóhólníihii tʼáadoo léʼé kóníshéhí ndi bił éédahózinii tsístłʼahdabiniłchééh dóó ląʼí iiʼ naazíinii yisdayiiʼéésh.

8 Áádóó áko, Diyin God bił ééhózinígíí bikʼehgo díí hashtʼeʼ nidoonił; háála áko shooh, éí binahjįʼ diné yéego bił éédahoozin, aooʼ, dóó ląʼí da doo ákótʼáo deíkááhyę́ę yaa ákódaniizį́į́h, dóó Diyin God yaa bił béédahózingo biiʼ naazíinii yisdáyiizʼeezh.

9 Aooʼ, ánihidishní, díí haneʼ nídaháasdzooígíí doo biiʼ naazlá ádaalyaagóó, éí díí béésh tʼą́hí bikááʼ ndaʼasdzoh, Ammon dóó bikʼiské dimííl yázhí bilááhgóó Laman dineʼé bizází bibee ádaʼoolʼįįł doo ákodaatʼéhę́ę́ʼ doo yaa ákodaniizį́į́ʼ da doo ńtʼééʼ; aooʼ, díí ndaʼazdzooʼígíí dóó saad yee ndeiineeztą́ʼígíí binahjįʼ ádaa ńdaʼooskan; áko, Bóhólníihii Diyin God yéédahoosįįdjįʼ ndabiizhʼeezh, dóó Jesus Christ báNináʼnídláii yaa dahaniih doo.

10 Áádóó háísh yaa ákodínóózįįł binahjįʼ dimííl yázhí bilááhgóó nihidookah, aooʼ, dóó dimííl yázhí bilááhgóó danihikʼis, Nephi dineʼé, bikʼos daniłdzilii bąąhági ádaatʼéii dóó doo yáʼádaashóonii kʼad yee bijéí deiłtłʼis, éí báNináʼnídláii doo yéédahodoosįįł da.

11 Áko doo béédahózinii tʼah doo tʼáá átʼé shił chʼétʼaah da; éí bąą doo baa nídéeshtʼįįł da.

12 Áádóó bee hódzą́ biniyé ádaalyaa dideeshniiłgo tʼáá bíighah, éí biniyéhígíí Diyin God bił bééhózin; háálá binaanishígíí tʼáá ałtso hózą́ yee yikʼihooʼááł, dóó beʼatiin kʼédaazdon, dóó bibee óʼoolʼįįł éí hóólʼáágóó bee honítʼiʼ.

13 O béénílniih, béénílniih, shiyeʼ Helaman, Diyin God bibee hazʼáanii doo łahgo ánáániił da. Áádóó ání: Shibee hazʼáanii bikʼeh hóníłʼį́įgo kéyah bikááʼgóó náás díínááł—ákondi doo bibee hazʼáanii bikʼeh honiłʼį́įgo éí bitsʼą́ą́dóó nahjįʼ kóndiʼdoolnííl.

14 Áádóó kʼad béénílniih, shiyeʼ, Diyin God díí nídaháasdzooígíí yee aʼoozlííʼ, éí dadílzin, éí yidísingo neijaah ńtʼééʼ, áádóó ałdóʼ tʼáá neijaah doo dóó bee hoodzą́ą doo biniyé hashtʼeʼniinínil, áko bibeʼadziil náás ndahidoochíłígíí yił ííshją́ą́ íidoolííł.

15 Áádóó kʼad shooh, diyingo áhodooníłígíí binahjįʼ nił hashneʼ, Diyin God bibee hazʼáanii kʼíínítiʼgo, shooh, díí dadílzinígíí Diyin God bibeʼadziilii bee nighadoonił, dóó Chʼį́įdii bichʼįʼ kóndiʼdoolnííł, dóó naniseʼ bizhóól nahjįʼ bił eeyol nahalingo ándoolííł.

16 Ákondi Diyin God bibee hazʼáanii bikʼeh honíłʼį́įgo, áádóó díí dadilzinígíí Diyin Bóhólníihii áníłnínígíí bikʼehgo ádíílííł, (háálá tʼáá ałtso bee ádíílíłígíí Diyin Bóhólníihii bííníkeedgo bee bichʼįʼ hadíídzih) áko shooh, ádin nihokááʼ adziilii éí doodago chʼį́įdiitahdę́ę́ʼ adziilii doo nighadeidooʼnił da, háálá Diyin God ayóó bidziil bizaad tʼáá áłtso yeʼdoolííł.

17 Háálá tʼáá áłtso yee ádeehadoodzííʼígíí yeʼdoolííł, háálá nihizází yee yichʼįʼ ádeehadoodzííʼ yę́ę yeʼiilaa.

18 Áko yee yichʼįʼ ádeehadoodzííʼ háálá hódzą́ yee aʼdoolííłgo biniyé hashtʼeʼniidoonił, áko náásgóó báʼáłchíní shį́į́ beʼadziil yił ííshjání íidoolííł.

19 Áádóó áko shooh, łaʼ biniyeii bohoolyaa, dimííl yázhí biláahgo Laman dineʼé tʼáá aaníí átʼéii bił béndahoosdzįįdgo yéídiikai, áádóó beʼadziilii yiyiʼdóó ííshjání áyiilaa, dóó tʼahdii tʼáá ákótʼáo bibeʼadziil náásgóó baʼáłchíní biiʼ dahólǫ́ǫ́ yaa ákodadínóozįįł; éí bąą hashtʼeʼnidooʼnił.

20 Éí bąą ándishní, shiyeʼ Helaman, shizaad tʼáá ałtso yéego bikʼeh honíłʼį́įgo bohodíílííł, áádóó Diyin God bibee hazʼáanii nídaháasdzooígíí yéego bikʼeh honíłʼį́į doo.

21 Áádóó áko, naadiin dį́į́ʼ béésh tʼą́hí bidadéítʼiʼígíí bee nichʼįʼ hadeesdzih, tʼáá nanijaah dooleeł, áko doo yáʼádaashóonii dóó bąąhági átʼéii ádaʼałʼíinii, dóó tʼáá nahonitʼingo ádaʼiłʼinígíí, éí doodago diné nidabiʼdistseedyę́ę bibee ádaʼoolʼįįł ndeiniłinééʼ, éí shį́į́ díí diné bił ííshją́ą́ ádadoolnííł, aooʼ, dóó tʼáá ałtso ndaʼastseed, dóó daʼniʼįįh, dóó ádaʼiizyínéé, dóó tʼáá ałtso bibąąhági ádaatʼéii dóó doo yáʼáshóonii, éí shį́į́ tʼáá ałtso díí diné bił ííshją́ą́ ádadoolnííł; aooʼ, áádóó díí bee éédahózinii hashtʼeʼnidíínił.

22 Háálá áko shooh, Diyin Bóhólníihii bidineʼé bąąhági átʼéii yaa nídiikai, aooʼ, nahonitʼingo naʼatseed dóó doo yáʼáshóonii; éí bąą Diyin Bóhólníihii ádííniid, tʼáadoo ádaa ńdaʼooskangóó niʼ bikááʼdóó ábidiʼdooldįįł.

23 Áádóó Diyin Bóhólníihii ádííniid: Shá naalʼaʼí Gazelem, tsé, bá hashtʼedeeshłííł, éí chahałheeł yidiʼdoołdlałgo adinídíín doo, áko shidineʼé shá nidaalʼaʼígíí bił ííshją́ą́ ádeeshłííł, áko bikʼéí nidaalnishígíí bił ííshją́ą́ ádeeshłííł, aooʼ, dóó tʼáá nahonitʼingo ádaʼiłʼinígíí, bąąhági átʼéii ádaʼałíinii, dóó bibąąhági ádaatʼéii dóó bibee doo yáʼádaashóonii.

24 Áádóó kʼad, shiyeʼ, díí bee éédahózinii Diyin God bizaad bohodoolnííł biniyé hashtʼeelyaa, éí yaa haadzííʼ, kóníigo:

25 Bąąhági átʼéii dóó tʼáá nahonitʼingo ádeiłʼíinii adinídíínjįʼ chʼídeeshʼááł; áádóó ádaa ńdaʼooskango tʼéiyá doo niʼ bikááʼdóó áhodeeshdįįł da; dóó bąąhági átʼéii dóó ndeiniłʼingo ádaʼałʼínígíí chahałheełdóó adinídíínjįʼ yitʼį́įʼgo ádeeshłííł, éí náásgóó kédaayahígíí bił béédahodoozįįł.

26 Áádóó kʼad, shiyeʼ, tʼáadoo ádaa ńdaʼooskanígíí nihił bééhózin; éí bąą ábiʼdisdįįd, áádóó áko Diyin God bizaad bohoolyaa; aooʼ, Bąąhági átʼéii ndeiniłʼinée chahałheełdę́ę́ʼ nihichʼįʼ yitʼį́įgo ádaalyaa.

27 Áádóó kʼad, shiyeʼ, bąąhági átʼéii ndeiniłʼinée bibee dahńdaʼdiilnih, dóó bibee ahadaʼdeestʼánée, dóó yee ádee hadahaasdzííʼ yę́ę tʼáá átʼé tʼáá nanijaah nidishní; Áádóó tʼáá átʼé bibeedaatʼíní dóó biʼkʼédaʼáyóígíí díí diné doo bił ííshją́ą́ ádoolníił da, áko doo bił béédahózin da doo, éí bąą da chahałheeł yiih dinóodah dóó ádadooldįįł.

28 Háálá áko shooh, díí kédaayah bikááʼgóó hóyéeʼgo bá haʼoodzííʼ, nahonitʼingo ádaʼałʼínígíí tʼáá átʼé, ałtso neestʼą́ągo, ádooldįįł, Diyin God bibeʼadziilii bikʼehgo; éí bąą díí dineʼé ádoodįįłgo doo nisin da.

29 Éí bąą díí nahonitʼingo ndahatʼá bibee dahńdaʼdiilnih, dóó díí diné yee ahadaʼdeestʼą́, doo bił ííshją́ą́ ádíílííł da, áádóó bąąhági ádáátʼįįd dóó ndaʼastseed dóó bidoo yáʼashóónii tʼéiyá bił ííshją́ą́ ádadíílííł; áádóó bąąhági ádaʼatʼį́ dóó ndaʼaltseed dóó doo yáʼashóónii ádaʼałʼį́ tsʼídá doo ádaalʼíngíí bee nadíníítįįł; áádóó ałdóʼ díí dineʼé bibąąhági átʼéii ádaatʼínée dóó nidaʼałtseed yę́ę dóó doo yáʼáshóonii ádeiłʼínée biniinaa nidabiʼdistseed diníigo nidíníítįįł.

30 Háálá áko shooh, Diyin Bóhólníihii yá yádaałtiʼii ałtso nideistseed éí bitah yíkai bibąąhági átʼéii yaa dahoolneʼgo; áádóó nideistseed yę́ę bidił dadeesnaʼgo biDiyin Bóhólníihii yichʼįʼ daacha nidaʼałtseedii nátʼą́ą́ʼ atíidoolííł biniyé; áádóó áko Diyin God binahwiitʼaah tłʼééʼjí nidaalnish yę́ę dóó ndanitʼingo ádaʼałʼínée bikʼi silá silį́į́ʼ.

31 Aooʼ, tłʼééʼjí nidaalnish yę́ę dóó ndanitʼingo ádaʼałʼínée bikéyah hóyéeʼgo hoolʼáágóó dóó áhoyoolʼáago bá haʼoodzííʼ, nidabiʼdistseedjįʼ ndi, tʼáá hazhóʼó bąąhági átʼéii tʼah doo ałtso yee ńdaʼałdį́į́hgóó ádaa ńdaʼooskango tʼéiyá.

32 Áádóó áko, shiyeʼ, shizaad bee nichʼįʼ haasdzííʼ yę́ę béénílniih; nidanilʼingo ndahastʼánée tʼááká díí diné baa nínííł lágo, ákondi bąąhági átʼéii dóó doo yáʼáshónígíí hoolʼáágóó deijinóhłah bidiníigo nanítin.

33 Ádaa náʼookąąh, dóó Diyin Bóhólníihii Jesus Christ deinohdlą́ bidiníigo bee nanítin; hojoobaʼ ádaʼdólzin dóó ádaa dajoobaʼgo dóó bijéí yínííł ádaʼdólzingo bee nidiníítį́į́ł; tʼáá áłtso biʼiiníziinii yee nabinítaahígíí yichʼįʼ dabidziilgo nadíníítį́į́ł, Diyin Bóhólníihii Jesus Christ deiyoodlą́ągo.

34 Naanish yáʼátʼéehii tʼáadoo bichʼįʼ niʼ danohłíní; ákondi ádaa dajoobaʼgo dóó bijéí yínííł ádaʼdólzingo bee nidíníítį́į́ł, háálá éí biiʼ naazíinii ił hózhóonii yaa hidoohkah.

35 O, béénílniih, shiyeʼ, tʼah ániid nánínáago bee hódzáanii bóhoołʼaah; aooʼ, tʼah ániid nánínáago Diyin God bibee hazʼáanii bikʼeh hóniłʼį́ bóhoołaah.

36 Aooʼ, Diyin God tʼáá ałtsojįʼ yee níká adoolwołígíí baa néíníkąąh; aooʼ, tʼáá ałtso ániłínígíí éí Diyin Bóhólníihii bił naháʼáago ádiiłííł, dóó tʼáá ałtso nánínáágóó Diyin Bóhólníihii bił nahóʼáago nanináa doo, tʼáá ałtso baa ntséníkeesígíí Diyin Bóhólníihii bee bił hólneʼ, aooʼ, nijéí neiyiłnánígíí Diyin Bóhólníihii ahoolʼáágóó bił bééhózingo ádíílííł.

37 Tʼáá ałtso baa naninánígíí Diyin Bóhólníihii bił nahóʼáago ádííłííł, dóó tʼáá ałtso yáʼátʼééhjigo noolóós doo; aooʼ, níteehgo Diyin Bóhólníihii nił hólǫ́ǫ doo, áko háánílyį́įhgo nikʼi déezʼį́į́ʼ doo; áádóó abínígo chʼéénídziʼgo nijéí Diyin God bichʼįʼ ahééh hwiindzin biiʼ hadeezbin doo; áádóó díí ánéinilʼįįhgo, éí nihoníyáadi yisdádíínááł.

38 Áádóó áko, shiyeʼ, nihizází tʼáadoo leʼé nimazgo ályaa deiłnínígíí éí doodago dah astsihí—éí doodago nihizází Liahona yee ndeiyíízhiʼígíí, éí éí, baa haneʼgo, dah atsihí; dóó Diyin Bóhólníihii hashtʼeyiilaa.

39 Áádóó áko shooh, doo łaʼ nihokááʼ dineʼé díigi átʼáo nizhónígo ádaʼiilaago yindaashnish da. Áádóó áko shooh, éí nihizází doo kééhatʼíní góneʼ dookahgo bił ííshją́ą́ ádoolníiłgo bá hashtʼeilyaa.

40 Áádóó Diyin God deiyoodlánígíí binahjįʼ bá naashnish; éí bąą, Diyin God deiyoodlą́ągo dah didookahjigo há dah atsihgo dajoodlą́, áko shooh, há ályaa, éí bąą díí álílee há silį́į́ʼ, áádóó ałdóʼ Diyin God bibeʼadziil bee ląʼí álílee dahazlį́į́ʼ, tʼáá ákwíí jį́.

41 Ákótʼée ndi, álílee áłtsʼíísígo bee binaʼazhnishígíí biniinaa ayóó átʼáo bił ííshją́ą́ ályaa. Tʼóó bił dahóyééʼ, dóó beʼoodląʼ dóó yéego áhátʼį́ yaa deiyooznahgo ayóó átʼáo naʼanish yę́ę niʼkódzaa, áádóó yinééłyę́ę niʼ kódzaa;

42 Éí bąą, doo kééhatʼínídi dah yinééł, éí doodago tʼáadoo kʼéházdon nínáá da, áádóó dichin dóó dibááʼ yikʼee tiʼdahoozniiʼ, háálá bee hazʼáanii kʼídeiztiʼígíí biniinaa.

43 Áádóó áko, shiyeʼ, díí bikʼidiʼdíítį́į́ł díí áhoodzaaʼígíí nahalinígíí bee hólǫ́; háálá nihizází bił dahooyééʼgo dah atsihí doo yikʼeh dahałʼį́įgo (áko díí éí átsʼíseejí ádaatʼé) tʼáadoo náás deeskai da; iiʼ sizíiniikʼehjí ałdóʼ tʼáá ákótʼé.

44 Háálá áko shooh, Christ bizaad bikʼeh hojíłʼį́įgo doo nanitłʼa da, éí tʼáá íiyisíí ił hózhǫ́ yichʼįʼ kʼéházdongo dah atsih, nihizází díí dahatsih yikʼeh dahółʼínígi átʼáo, éí kéyah aa deetʼánée kʼéházdongo bá yichʼįʼ dahatsih ńtʼę́ę́ʼ.

45 Áádóó kʼad ádíshní, daʼ dííʼísh beełtʼéhígíí hólǫ́? Háálá danihizází díí dah astsihí tʼáá aaníí dabiníʼeezh, kéyah aa deetʼą́ąjįʼ, yikʼeh yikahgo, Christ bizaad, bikʼehgo yikahgo, díí yínííł biyiʼ oodááł bilááhgóó anihidooʼish kéyah aa deetʼą́ hózhǫ́ yáʼátʼééh leʼ biyiʼjįʼ.

46 O shiyeʼ, doo nanitłʼagóó oodáłígíí biniinaa tʼáadoo nihił hóyéʼí; háálá nihizází ákodaadzaa; háálá ákótʼáo bá hashtʼeilyaa, yichʼįʼ dadídóóʼį́į́łgo dahináá dooleeł; nihí ndi tʼáá ákótʼé. Oodááłjigo hashtʼeilyaa, áádóó bichʼįʼ dadíníitʼį́įʼgo ahoolʼáágóó dahiníínáá doo.

47 Áádóó áko, shiyeʼ, díí dadilzinígíí hazhóʼó baa ahólyą́, aooʼ, áádóó Diyin God bichʼįʼ díníʼį́į́ʼ dóó hiníná. Díí diné bichʼįʼ dínááh dóó Diyin bizaad baa hodíílnih, dóó hazhóʼó nitsíníkees doo. Shiyeʼ, hágoóneeʼ.