1 Dooládóʼ Diyin yá naalʼaʼí nishłį́į leʼ, dóó shijéí yinizinígíí bee shá lą́ adooleeł leʼ, áko náásgóó Diyin God bidilnígi átʼáo yáshtiʼ doo, ázhí bee nahasdzáán yididoołnááłgo, áádóó tʼáá ałtso diné yéego ádaa ńdaʼoohkąąh bidideeshniił!

2 Aooʼ, tʼáá ałtso iiʼ sizíinii bee bił hodeeshni, bizhí aʼdiʼní bee didootsʼį́į́ł, ádaa náʼookąąh dóó nináʼílyáago hootʼááł, áko ádaa ńdaʼookąąhgo nihiDiyin God yił yah anáhidoohkah, áko tʼáá ałtso nahasdzáán bikááʼgóó yínííł ádin doo.

3 Ákondi shooh, nihokááʼ dineʼé éí nishłį́, dóó tʼáá íiyisíí nisinígíí biniinaa bąąhági átʼéii ánéishtʼįįh; háálá Diyin Bóhólníihii sheidiníʼánígíí baa ahééh nisin doo ńtʼę́ę́ʼ.

4 Diyin God tʼáá ákogi átʼéii yee nihoníʼánígíí tʼáá shí laanaa nisinígíí bee wooshchxǫǫh lágo, háálá shił bééhózin nihokááʼ dineʼé yinizinígíí bikʼehgo yee yichʼįʼ lą́ naʼiiłeeh; anoonééł éí doodago iiná bichʼįʼjigo; aooʼ, shił bééhózin nihokááʼ dineʼé yichʼįʼ ląʼ naʼiiłeeh, aooʼ, díí bee ndahwiistʼą́ doo łahgo andoolnííłgóó bee bił hashneʼ, ádeinízinígíí bikʼehgo, yisdáʼiildééh éí doodaiiʼ hoʼdoochxǫǫłjįʼ.

5 Aooʼ, dóó shił bééhózin nihokááʼ dineʼé tʼáá ałtso yáʼátʼéehii dóó doo yáʼáshóonii bidááh naaznil; tʼáá háíshii yáʼátʼéehii dóó doo yáʼáshóonii doo bił bééhózinígíí asiihgo doo bikʼijįʼ siláa da, ndi yáʼátʼéehii dóó doo yaʼashóonii bił bééhózinígíí, éí tʼáá bí yinízinígíí bikʼehgo baa halyé, yáʼátʼéehii éí doodago doo yaʼashóonii yinízinígíí bikʼehgo, iiná éí doodago anoonééł, ił hózhǫ́ éí doodago asiihgo yąąh bíniʼígíí.

6 Áko, díí shił bééhózingo, haʼátʼíísh éí biniinaa naanish bee shikʼi hodiiniiʼígíí áshʼį́įgo biláahgo náánisdzin doo?

7 Haʼátʼíísh biniyé Diyin yá naalʼaʼí deeshłeełgo ntséskees, áko adahwiisʼáágóó shizhí diitsʼąʼ doo?

8 Háálá áko shooh, Diyin Bóhólníihii tʼáá ałtso diné dah deíkááhgóó, tʼáá bí kéédahatʼį́įgo dóó tʼáá bí dabizaad, diyin bizaad bee nidabiʼdínóotįįłgo yee yá hasʼą́, aooʼ, ił ééhózin bee, tʼáá ałtso bee bichʼįʼ ańdahaztʼiʼígíí bee dahoolǫ́ǫ doo éí yee yá hasʼą́; éí bąą Diyin Bóhólníihii bił ééhózingo naʼnitinígíí bikʼihdaʼdiitʼą́, éí éiyá tʼáá aaníí dóó tʼáá ákogi ádaatʼéii bikʼehgo.

9 Diyin Bóhólníihii yichʼįʼ áshiiłʼaadʼígíí shił bééhózin, dóó bee baa hashniih. Doo éí bee ádaa hashniih da ndi Diyin Bóhólníihii yichʼįʼ ashííłʼaʼígíí baa hashniih; aooʼ, díí eí bee ádaa hashniih, Diyin God bilákʼeedóó bibee naʼanishí deeshlééł nisin áko diné łaʼ ádaa ńdaʼdookąął; dóó díí éí baa shił hózhǫ́.

10 Áádóó áko shooh, ląʼí da shikʼéí tʼáá aaníí ádaa nídaʼookąąhgo yiiłtsą́ągo, dóó biBóhólníihii Diyin God yichʼįʼ nináhákááhgo, áko índa shiiʼ sizʼíinii ił hózhǫ́ biiʼ hadéébįįd; áko índa Bóhólníihii yee shíkáʼalwodígíí bénááshniiʼ, aooʼ, shisodizin ndi yidiiztsʼą́ą́ʼ; aooʼ, áko índa bigaan yee ajoobaʼ shichʼįʼ kóyiilaago bénááshniiʼ.

11 Aooʼ, dóó shizází dabiʼdisnah yę́ę ałdóʼ bénááshniiʼ; háálá tʼáá aaníigo shił bééhózin Bóhólníihii Diyin God dabiʼdootʼąʼdę́ę́ʼ yisdábiiʼeezh, dóó bisodizin haidiilaa; aooʼ, éí Bóhólníihii Diyin God, Abraham biDiyin God, Isaac biDiyin God, dóó Jacob biDiyin God, éí dabiʼdisnááhdę́ę́ʼ yisdáʼyííʼeezh.

12 Aooʼ, shizází dabiʼdisnááʼ yę́ę tʼáá áłahjįʼ bénááshniiʼ; dóó éí Diyin God Egypt dineʼé bílákʼeedóó yisdáyííʼeezh, dabiʼdeesnáádę́ę́ʼ.

13 Aooʼ, dóó Diyin God tʼáá bí bisodizin bá hooghan bił nahazʼą́ą́góó haidiilaa; aooʼ, dóó Diyin God tʼáá bí diyingo naanish yee shikʼidiilniiʼ, díí dineʼé diyin bizaad bee nadínéeshtįįłgo, dóó ląʼí nizhónígo iʼiishłaaʼígíí sheinílá, éí binahjįʼ shiʼsizʼíínii ił hózhǫ́ biiʼ hadéébįįd.

14 Ákondi doo nizhónígo iʼiishłaaʼígíí tʼéiyá baa shił hózhǫ́ǫ da, ákondi shikʼéí nizhónígo ádaʼiilaaígíí biniinaa yiwohgo ił hózhǫ́ shiiʼ hadéébįįd, éí Nephi bikéyah gódeh yíkai ńtʼę́ę́ʼ.

15 Áko shooh, tʼáá íiyisíí yéego ndaashnish, áádóó ląʼígo daʼneestʼą́; dóó dooládóʼ ayóó átʼáo badaʼdoolyééł!

16 Áko, díí shikʼéí nizhónígo ádaʼiilaaígíí baa nitséskeesgo shiiʼ sizʼíinii ayóó átʼáo bił ahoodzaa, shitsʼíís yitsʼáníyá, nahalingo, dooládóʼ tsʼídá baa shił hózhǫ́.

17 Áádóó áko Diyin God yee nihá hwiidoołʼaał, shikʼéí, áko Diyin God bił hazʼą́ądi yił dahdínóobįįł; aooʼ, dóó tʼáá ałtso náánish yitsʼą́ą́dóó neestʼánígíí dahólǫ́ǫ doo idahídiikaiʼígíí ałdóʼ áko doo yiitsʼą́ą́jigo nídahídookah da, áádóó hoolʼáágóó baa dahaniih doo. Áádóó Diyin God yee shá hwiidoołʼaał áko shizaadígíí bikʼehgo áhodoonííł, bee haasdzíʼígi átʼáo. Amen.