1 Áádóó baa hoolzhiizh ańdahwiiʼaahii Nephi bidineʼé yikʼi dahwééʼaahgo łaʼtsʼáádah yíhai, dóó naaki ndiizid dóó ashdlą́go yoołkaałgo, Zarahemla kéyahgi kʼéhwiindzingo hoolzhiizh, anaaʼ adingo hoolzhiizh doodago dóó ałkʼihjįʼ ntsáhákeesgóó dikwííshį́į́h nááhai, tʼáá níléi łatsʼáádah nááhai naaki yiiził ashdlą́ yoołkaałjįʼ, kéédaayahgo anaaʼ baa dahwiidiitsʼą́ą́ʼ.

2 Háálá áko shooh, Laman dineʼé bindaabaahí doo diné kééhatʼínídééʼ yahiinah, éí éiyá kéyah nineilʼádi, Ammonihah kintah yiiʼ yíkai dóó diné ndeiʼniiłtseed dóó kintah ádeisdįįd.

3 Áádóó áko baa hoolzhiizh, tʼah doo Nephi dineʼé nidaabaahii ałhídeiyiʼééshgóó éí kéyahdóó chʼihdeidinołkałgo, éí Ammonihah kintahdi diné ádeisdįįd, áádóó Noah bikéyah nineilʼá bináago ałdóʼ łaʼ, dóó nááná łaʼ éí diné doo kééhatʼinígo adeesnáh.

4 Áko baa hoolzhiizh éí Nephi diné doo kééhatʼínígóó dabiʼdeesnah yę́ę nídootʼish danízin.

5 Éí bąą, Nephi dineʼé bindaabaahí aláahdi bindaatʼáanii bikʼihodiiniiʼígíí, (dóó Zoram wolyée ńtʼę́ę́ʼ, dóó biyeʼ naaki, Lehi dóó Aha)—áko Zoram dóó biyé naakigo, Alma sodizin yikʼi high priest nilinígíí bił béédahózingo, dóó diyingo áhodooníłígíí yaa hodiiztsʼą́ą́go, éí bąą yee yíkai dóó ndeiyídééłkid éí Bóhólníihii diné doo kééhatʼíní góneʼ dookahgo biʼkéí haidínóotaał biniyé, éí Laman dineʼé dabiiłtsóód.

6 Áádóó baa hoolzhiizh Alma éí Bóhólníihii banahátʼínígíí yíneidééłkid. Áádóó Alma baa nádzáh dóó abiłní: Áko shooh, Laman dineʼé tooh Sidon diné doo kééhatʼíní shadiʼáahdééʼgo tsíʼnaandookah, Manti kéyah nineilʼánígíí bilaahgóó. Áádóó áko shooh áadi bidááh doohkah, tooh Sidon haʼaʼaahjigo, dóó áadi Bóhólníihii nihahastóí Laman dineʼé dabisnah yę́ę nihidááh yidooʼish.

7 Áádóó baa hoolzhiizh Zoram dóó biyeʼké tooh Sidon tsíʼnaaniikai, binidaabaahii yił, dóó Manti kéyah nineilʼá biláahdi yíkai diné doo kééhatʼíní shadiʼáahdééʼgo, éí tooh Sidon haʼaʼaahjigo bił hazʼą́.

8 Áádóó Laman dineʼé bindaabaahí yikʼikai, áádóó Laman dineʼé daʼníłtsʼą́ąjigo ałtsʼádabidiʼneeskaad dóó diné doo kééhatʼíní góneʼ adeineeskaad; dóó bikʼéí Laman dineʼé dabisnah yę́ę yił dahdiikai, dóó dabidisnáhígíí doo łaʼ tʼáágééd nákai da. Áádóó bikʼiské nídabizhʼeezh tʼáá bí bikéyah yikááʼ kéédahatʼíi doo biniyé.

9 Áádóó áko ańdahwiiʼaahii dahwééʼaahgo łaʼtsʼáádah nááhai, Laman dineʼé éí kéyahdóó chʼíhbidinoolkaad, dóó Ammonihah bidineʼé abiʼdisdįįd; aooʼ, dóó tsʼídá tʼáá ałtso Ammonihah dinéʼhę́ę ádabiʼdisdįįd, dóó bikintah baa haʼniih yę́ę, éí Diyin God doo yidoołchxǫǫł da haʼnínééʼ, ayóó baa haʼniih yę́ę biniinaa.

10 Ákondi shooh, tʼááłʼáʼí yiskąągo ałtso ábiʼdisdįįd; dóó diné doo kééhatʼínídi łééchąąʼí dóó naaldlooshii daʼałchinígíí bitsʼíís yę́ę ndeiyizhnizhgo daboolghal.

11 Ákótʼée ndi, ląʼí yiskáago daneeznanígíí nahasdzáán bikááʼ bitsʼíís yę́ę dahdaaskidgo ályaa, dóó ałchʼíídígo łeezh bikʼih daaskaad. Áádóó áko ayóó hółchxonígíí biniinaa diné Ammonihah kéyahdi doo keedahatʼį́įgo laʼída nááhai. Áádóó Nehor Ádahasdįįd hoosyeʼ; háálá Nehor deiyoodlą́ągo yikééʼ deiyíkááh ńtʼę́ę́ʼ, éí ndaaztseed; dóó bikéyah tʼahdii doo bikááʼ siláhí da.

12 Áádóó Laman dineʼé doo Nephi dineʼé yikʼijįʼ anaaʼ ádeiłʼį́į́góó ándahwiiʼaahii Nephi bidineʼé yikʼi dahwééʼaahgo dį́į́ʼtsʼáádah yíhai. Áádóó tʼáá nááhai Nephi bidineʼé adahwiisʼáágóó ahodiizyéélgo bił nahashzhiish.

13 Áádóó Alma dóó Amulek diné diyin bighan naaznil góneʼ ádaańdaʼoohkąąh yiłníigo neineeztʼą́ą́ʼ, dóó bidahodílzindi, dóó bidaʼoodlání áłah nídaadleehdi ałdóʼ, éí Jew dineʼé kin ádeiłínígíí bikʼehgo ádeiyiilaa.

14 Áádóó tʼáá háíshį́į́ bizaad deidiiztsʼą́ʼígíí, Diyin God bizaad yichʼįʼ kóyiilaa, tʼáá ałtso diné aheełtʼéego doo niʼ kwíílééhgóó, yaa nitsékees.

15 Ákótʼáo Alma dóó Amulek tádííʼáázh, dóó nááná ląʼígo naanish bee bikʼih dahoodiiniiʼígíí ałdóʼ, adahwíísʼáago Diyin bizaad nideidinótʼį́į́ł biniyé. Áádóó sodizin adahwíísʼáago hadadilneʼgo hódeeshzhiizh, tʼáá ałtso nahósʼaʼ binaaʼdééʼ, Nephi bidineʼé tʼáá ałtso bitahgóó.

16 Áádóó doo ahihoołtʼéii doo bitahgóó hólǫ́ǫ da, Bóhóníihii biʼIiʼ Sizį́ Diyinii adahwiisʼáágóó yeʼníłʼniiʼ nihokááʼ dineʼé baʼáłchíní binitsékees hashtʼe deidoolííł biniye, doodago bijéí Diyin bizaad ndeididoolééł biniyé hashtʼeʼdeidoolííł éí yígááłdi bee ndabiʼdinóotįįł—

17 Áko doo Diyin bizaad yikʼijįʼ danilį́į da dooleeł, áko doo beʼoodląʼ adaadin da doo, dóó bąąhágiʼ ádaatʼį́įgo ádaʼdidooldį́į́ł, ákondi Diyin bizaad baa hózhǫ́ǫgo ndeididooleeł, dóó tsin bitsʼáózʼaʼ chʼil ootłʼóół tʼáá aaníinii bighą́ą́h nidadidootsih, áko biBóhólníihii Diyin God bee ił hózhóonii yiihídookah danízin.

18 Áko priest danilínígíí diné yitahgóó yíkaigo tʼáá ałtso yoochʼííd, dóó naʼadloʼ, dóó oolchʼį́į́d, dóó áhachįʼ, dóó ajoodlá, dóó akʼihjįʼ yáʼátiʼ, dóó antʼįįh, aghaʼiiʼnííł, anaaʼ hólǫ́ǫgo antʼįįh, naʼatseed, aaʼdilyé, dóó ałtso aʼłąą átʼéego atsʼíís bee tsiʼnaʼadáh yikʼijįʼ ndaʼneeztʼą́ą́ʼ, díí tʼáá átʼé doo álʼį́į da daaníigo yee yikʼijįʼ hadahaasdzį́į́ʼ—

19 Hodíínaʼgo ádahoodooniłígíí yaa dahoolneʼ; aooʼ, Diyin God biYeʼ doogááłígíí yaa dahoolneʼ, dóó biʼdiisʼyį́ dóó tiʼhoozniiʼ yę́ę, dóó daneeznánée ałdóʼ náádahiidooʼnaał.

20 Áádóó ląʼída diné haaʼígíí Diyin God biYeʼ doogáłígíí yí ndaʼídíłkid; dóó anoonééł dę́ę́ʼ nááhiinaʼgo bichʼįʼ ííshjání íʼdiʼdoolnííłgo bee ndabidiʼneestʼą́ą́ʼ; dóó diné díí deidiiztsʼą́ą́ʼgo tʼáá íiyisíí bił dahózhǫ́ǫ́d dóó bił yáʼádaatʼééh.

21 Áádóó áko sodizin adawiisʼáago hadadiilyaago—biʼiiníziinii yikʼeh dadeesdlį́į́go, dóó Diyin God bizaad haałtéego adah wiisʼáago yee ndaʼneeztʼą́ą́, áádóó Bóhólníihii diné yikʼi akʼihoojídlí yichʼįʼ kóyiilaa—kótʼáó ańdahwiiʼaahii Nephi bidineʼé yikʼidahwééʼaahgo dį́į́ʼ tsʼáádah nááhaijįʼ nihoolzhiizh.