1 Áádóó baa hoolzhiizh Ammon bidineʼé Jershon kéyahdi bighan ádahoolaa, dóó sodizin bá hooghan Jershon kéyahdi hadeiyiyíáłwod, dóó Nephi dineʼé binidaabaahii Jershon kéyah bináágóó ndabiʼdíísnil, aooʼ, tʼáá ałtso Zarahemla kéyah bináágóó nidahaasdzohjí; áko shooh Laman dineʼé bindaabaahí bikʼéí doo kééhojitʼíní góneʼ yikééʼ adahaazná.

2 Áádóó áko tʼóó bááhádzidgo ałkʼiijééʼ; aooʼ, tʼáá ałtso dineʼé bitahgo doo łaʼ ákótʼáo anaaʼ halééh da ńtʼę́ę́ʼ Lehi Jerusalemdę́ę́ʼ dahdiinaa doo kojįʼ ndi; aooʼ, áádóó neeznáá dimííl ałʼąą néélą́ąʼgo Laman dineʼé nidabiʼdistseed dóó daʼníłtsʼą́ąjigo ałtsʼádabidiʼnoolkaad.

3 Aooʼ, áádóó ałdóʼ tʼóó bááhádzidgo Nephi bidineʼé nidabiʼdistseed; ákondi, Laman dineʼé chʼíbidiʼnoolkaad dóó daʼníłtsʼą́ąjigo ałtsʼádabidiʼnoolkaad, dóó Nephi bidineʼé bikéyahdi nákai.

4 Áádóó áko díí ayóó átʼéego yínííł dóó cha adahwiisʼáágóó bee dahodiistsʼą́ą́ʼ, tʼáá ałtso Nephi bidineʼé bitahgóó—

5 Aooʼ, sáanii bąąh ádahásdįįdígíí bahastíín yę́ę yíká daacha, áádóó ałdóʼ azhéʼé biyekʼé yíká daacha, áádóó atsiʼ éí bilah yíká, aooʼ, ayeʼ bizhéʼé yíká; áádóó yínííł yiniinaa daachaaígíí tʼáá ałtsogóó dahodiistsʼą́ą́ʼ, bikʼéí nidabiʼdistseedígíí yíká daacha.

6 Áádóó áko díí tʼáá aaníí yínííł hólǫ́ǫ́góó yiską́; aooʼ, tʼáá íiyisíí hojoobaʼ hwiinzingo ndah hashzhiizh, dóó sodahodizingo chʼiyáán ádąąh deistʼįįd.

7 Dóó ándahwiiʼaahii Nephi bidineʼé ashdlaʼáadah naahai yá dahwéeʼaah yę́ę nikódzaa;

8 Áádóó áko díí éiyá Ammon dóó bikʼéí, Nephi kéyahdi tádíínánée baa haneʼ, kéyahdi tiʼdahoozniiʼ yę́ę, yínííł yiiʼ naaskai yę́ę, dóó bichʼįʼ ndahweesnááʼ yę́ę, dóó tsʼídá aláahdi átʼéego ił hózhǫ́ bee dahólónée, áádóó bikʼéí Jershon kéyahdi bá daházhǫ́ǫgo dóó baa ádahalyą́ągo yił ahíikai yę́ę. Áádóó áko Yisdáʼiiníiłii, nihokááʼ diné tʼáá ałtso yá Nináʼnídláii, hoolʼáágóó biiʼ sizíinii yikʼijídlíi dooleeł.

9 Áádóó díí éí Nephi dineʼé bitahgóó biʼanaaʼ dóó ałchʼįʼ saad dahółónée baa haneʼ, áádóó Nephi dineʼé dóó Laman dineʼé ałchʼįʼ ndaazbaaʼ yę́ę ałdóʼ, áádóó ándahwiiʼaahii dahwéeʼaahgo ashdlaʼáadah nááhai.

10 Áádóó tʼááłáʼí dóó ashdlaʼáadah nááhaijįʼ dineʼé tʼóó ahayóí dimííl nidaaztseed; aooʼ, tʼóó báhádzidgo nidaʼahiltseedgo nahashzhiizh.

11 Áádóó tʼóó ahayóí dimííl biláahgo nidaaztseed dóó lééh dabiʼdiisnil, dóó tʼóó ahayóí dimííl biláahgo atsʼíís dadííłdzidgo nahasdzáán bikááʼgóó yáádaaʼá; dóó dimííl biláahgo éí bikʼéí yaa daacha, náhádzidʼígíí biniinaa, Diyin Bóhólníihii yee nihoníʼánée bikʼehgo, éí ahoolʼáágóó tidahojoonííh doo.

12 Áko łaʼ éí tʼóó ahayóí dimííl bilááhgóó bikʼéí yę́ę ádaadingo yaa daacha, ákondi bił dahózhǫ́ dóó tʼáá íiyisíí hadaʼólní, dóó bił béédahózin, Diyin Bóhólníihii yee nihoníʼánée binahjįʼ, náádahiidooʼnaał áko Diyin God binishʼnáájí yił kéédahatʼį́į doo; íł hózhǫ́ doo ninítʼiʼii bił dahólǫ́ǫ doo.

13 Áádóó áko baa ákodaaniidzį́į́ʼ nihokááʼ diné tʼáá íiyisíí bąąhági ádaatʼį́ dóó ndaʼiisihígíí biniinaa doo ahééłtʼéego dahináa da, dóó biʼiiníziinii binaʼadloʼ beʼadziil, éí naʼagiz binaʼhatʼáhígíí haidiilaago nihokááʼ dineʼé bijéí yił nahadeeł.

14 Áádóó áko baa ákodaaniidzį́į́ʼ Diyin Bóhólníihii nihokááʼ dineʼé yéego yíká ádííniid áko bidáʼákʼehgi wołíbee ndadoolnish; áádóó baa ákodaaniidzį́į́ʼ tʼáá íiyisíí yínííł, dóó ił hózhǫ́ biniinaanʼígíí—éí anóónééł dóó nihokááʼ dineʼé atídaalʼínígíí biniinaa yínííł hólǫ́, dóó Christ bee adinídíín éí íiyisíí iiná baa hózhǫ́ átʼé.