1 Áko Alma díí saad ałtso yee haadzíiʼgo, nihił béédahodoozįįł tʼáá daatsʼí tʼááłáʼí Diyin God deiniidláa doo daaníigo yíká adaʼasʼaʼ, áko díí neestʼą́ yaa haadzííʼ yę́ę haitʼáó shódeidoołtʼeeł, éí doodago saad yee haadzííʼ yę́ę kʼideididoolééł, éí doodago saad yee haadzííʼ yę́ę, éí saad yee ádííniid yę́ę bijéí biyiʼdi kʼideididoolééł; éí doodago haitʼáó beʼoodląʼ chodeidoołʼįįł.

2 Áádóó Alma ábíłní: Áko shooh, doo Diyin God bichʼįʼ dahodiníílzin da dadohní háálá sonáhodizįįh yę́ę biyiʼdóó chʼínihiʼdineelkaad dadohní. Ákondi shooh, ánihidishní, Diyin God doo bichʼįʼ dahodiníílzin da danohsin, ákweʼé yéego daʼsoohsih, dóó Diyin bizaad bee akʼedaʼashchínígíí nidaałkaah doo; éi díí yee nidanihineeztą́ą́ʼ danohsin, éí doo bikʼidaʼdoohtą́ą́ da.

3 Zenos, ałkʼidą́ą́ʼ Diyin yá yáłtiʼii, sohodizin dóó hodílzin yee haadzííʼ yę́ęísh béédaałniih?

4 Háálá ádííniid: O Diyin God, neihojoobaʼ, háálá shisodizin sidínítsʼą́ą́ʼ, azhą́ doo kéédahojitʼínídi naasháa ndi, aooʼ, dóó neihojoobaʼ sheʼanaaʼí bá sodeeszingo, dóó shichʼįʼ bándahóózhǫǫd.

5 Aooʼ, O Diyin God, dóó shaajííníbaʼ ńtʼę́ę́ʼ shidáʼákʼehdi nichʼįʼ sodeeszingo; shisodizin bee nichʼįʼ náʼooshkąąhgo, shidisinítsʼą́ą́ʼ.

6 Áádóó ałdóʼ, O Diyin God, shighanjigo nááshdáałgo shisodizin sidínítsʼą́ą́ʼ.

7 Áádóó áłtsʼísí hazʼání góneʼé yah anáshdáahgo, O Diyin Bóhólníihii, nichʼįʼ sónídíszįįhgo, shidintsʼaʼ.

8 Aooʼ, naʼáłchíní baa jííníbaʼ nichʼįʼ sodadilzingo, dandidootsʼį́į́ł doo éí nihokááʼ dineʼé da, dóó ni éí dadidíítsʼį́į́ł.

9 Aooʼ, O Diyin God shaa jiiníbaʼ ńtʼę́ę́ʼ; dóó áłah ílį́į́dę́ę́ʼ shisodizin sidinítsʼą́ą́ʼ.

10 Aooʼ, sheʼanaaʼí dashijoołáa dóó chʼídashiishango ałdóʼ shidínítsʼą́ą́ʼ; aooʼ, shisodizin shidínítsʼą́ą́ʼ, dóó sheʼanaʼí bichʼįʼ náháchįʼ ńtʼę́ę́ʼ, dóó náháchįʼgo tsxį́įłgo atíinlaa.

11 Áádóó shichʼįʼ nahwiiʼná dóó tʼáá aaníí ádíshníigo shidínítsʼą́ą́ʼ, dóó niYeʼ binahjįʼ shaa jííníbaʼ, éí bąą tʼáá ałtso shichʼįʼ nahwiiʼnánígíí biniyé nichʼįʼ hojoobaʼ ádíshníi doo, háálá shił honíshǫ́; áko bee shá nahodootʼááł yę́ę nahjįʼ shá kwíinilaa, niYeʼ binahjįʼ.

12 Áádóó áko Alma ábíłní: Diyin bizaad bee akʼedaʼashchínígíí ałkʼidą́ą́ ndeiyíízoh yę́ęísh deinohdlą́?

13 Áko shooh, ákónóhtʼéedą́ą́ʼ, Zenos ádííniidígíí deinohdlą́ą doo; háálá, áko shooh kódííniid: Ninahwiitʼaah nahjįʼ kwíinilaa niYeʼ binahjįʼ.

14 Áko shooh, shikʼéí, nanihídíshkid daʼ Diyin bizaad bee akʼedaʼashchínígíísh deinóółtaʼ? Ákodaahzaago, haitʼáó shąʼ Diyin God biYeʼ doo deinohdlą́ą da?

15 Háálá doo Zenos tʼéiyá díí yee haadzíiʼgo naháásdzoh da, ndi Zenock ałdóʼ díí yee hahaasdzííʼ—

16 Háálá áko shooh, kódííniid: O Diyin Bóhólníihii, díí diné bichʼįʼ naháchįʼ, háálá neʼajoobaʼ doo yikʼidaʼdiitįįh da éí bee bikʼi hosínídlį́į́ʼ niYeʼ binahjįʼ.

17 Áádóó áko, shikʼéí, Diyin yá yááłtiʼii akééʼdóó náánáá łaʼ Diyin God biYeʼ tʼáá áníigo yaa haadzííʼ, dóó saad yee naʼnitinígíí doo bił aadaaníigo biniinaa tsé yee nídeiniłneʼgo deiyiisxį́.

18 Ákondi shooh, doo tʼááʼ ákódí da; doo tʼáá díí tʼéiyá Diyin God biYeʼ yaa hadahaasdzííʼ da.

19 Áko shooh, Moses yaa yááłtį; aooʼ, áádóó shooh tʼóó beʼalyaaígíí doo kééhojitʼínídi yitʼį́įgóó áyiilaa, tʼáá háí shį́į́ yinééłʼį́įʼgo yisdádoogááł. Áko ląʼí deineełʼį́į́ʼ dóó yisdáákai.

20 Ákondi bijéí daastłʼisígíí biniinaa, tʼáá díkwíhí díí yikʼidaʼdiitą́. Ákondi ląʼí da yéego doo ndabíʼdídzilígíí biniinaa tʼáadoo dadééʼį́į́ʼ da, éí bąą daneezná. Áko yisdádookahígíí doo deiyoodlą́ągo biniinaa tʼáadoo dadééʼį́įʼ da.

21 O shikʼéí, tʼóó dadínóołʼįįłgo bee yisdádoohkah, tʼóó bikʼídasooghal ndi, éí doodago doo daʼiinohdlą́ą́góó tʼóó nihijéí dadoołtłʼis, dóó tʼóó nihił dahóyééʼ doo, doo hadaʼíínóhsíídgóó, tʼóó dadínóohnééł.

22 Ákótʼéédą́ą́ʼ, yíí nihikʼi hodooleeł, ndi doo ákótʼéédą́ą́ʼ, de dadidóohʼįįł dóó Diyin God biYeʼ deidoohdląął, éí doogáałgo bidineʼé yá nináʼdoodlééł, éí tiʼhodoonihgo beʼiinaʼ yee bibąąhági ádaatʼéii yikʼeh nináʼdoodlééł; éí anoonééłdę́ę́ʼ nááʼiiʼná yikʼeh áhodoolííł, áko nihokááʼ dineʼé tʼáá ałtso yidááhdóó deidooʼzįįł, éí bá nidahodootʼááł nihoníyá bijį́įdi, naanish ádayiilaayę́ę bikʼehgo.

23 Áádóó áko, shikʼéí, nihijéí biyiʼdi bizaad kʼidadidoołéełgo nihá laanaa nisin, áádóó dahdíníisą́ągo éí niheʼoodląʼ bee baa ádahoołyą́ą doo. Áádóó áko shooh, tsin dooleeł, nihiyiʼ ííʼáago hoolʼáágóó hinohnáa dooleeł. Áádóó Diyin God nihiyéél nidaazígíí ászólígo íidoolííł, biYeʼ biʼił hózhóonii bee. Áádóó ádeinohsingo díí tʼáá áłtso ádadoohłííł. Amen.