1 Áádóó áko baa hoolzhiizh Alma biyeʼké diné yitah yíkai, Diyin bizaad yee nidaʼdínóotįįł biniyé. Áádóó Alma, ałdóʼ, tʼáá bí, doo tʼóó sidáa da, dóó bí ałdóʼ atáh dah diiyá.

2 Áko haitʼáó nidaʼnitinígíí doo ninááhideesoh da, tʼáá hazhóʼó Diyin bizaad yee nidaʼneeztą́ʼígíí, dóó tʼáá aaníinii tʼéiyá, diyingo ádahoonííł dóó diyingo ííshją́ą́ ályaaígíí bikʼehgo, áádóó Diyin God bibee óʼoolʼįįł bee bikʼidahodiiniiʼígíí bikʼehgo nidaʼneeztą́ą́ʼ.

3 Áádóó kʼad éí Nephi dineʼé dóó Laman dineʼé daʼahigánígíí baa nááháshneʼ dooleeł, ándahwiiʼaahii dahwéeʼaahgo tseebíítsʼáadah náhááhgo.

4 Háálá áko shooh, baa hoolzhiizh Zoram dineʼé éí Laman dineʼé daazlį́į́ʼ; áko, tseebíítsʼáadah yihah bił háhoolzhiizhgo Nephi dineʼé éí Laman dineʼé bichʼįʼ deiyíbáahgo hadeideesʼį́į́ʼ; éí bąą anaaʼ yíká hashtʼeʼ ádaʼdiilyaa; aooʼ, bá nidaabaahí ałhanideiyiizhʼeezh Jershon kéyahdi.

5 Áádóó baa hoolzhiizh Laman dineʼé bá nidaabaahii tʼóó ahayóí dimííl yázhí yił níná; dóó Antionum kéyahjįʼ yíkai, éí Zoram dineʼé bikéyah; áádóó hastiin Zerahemnah wolyéego binaatʼáanii nilį́.

6 Áádóó áko, Amaleki dineʼé aláahdi bąąhági ádaatʼį́ dóó nidaʼałtseedii danilį́ éí Laman dineʼé yiláahdi ádaatʼé, tʼáá ákodajítʼéi shį́į́ ńtʼę́ę́ʼ, áko, Zerahemnah anaaʼ binanitʼaʼí yikʼi diilniiʼ éí Laman dineʼé yikʼijįʼ, dóó tʼáá ałtso Amaleki dineʼé dóó Zoram dineʼé danilį́.

7 Áko díí áyiilaaʼígíí éí Nephi dineʼé tʼáá deijoołáa doogo biniyé, ahíyiiʼéeshgo yikʼi bóhólníih dooleeł binahatʼaʼ yee.

8 Háálá áko shooh, binahatʼaʼ éí Laman dineʼé yee yá háłchįʼ doo Nephi dineʼé yikʼijįʼ; ahíyiyiiʼéeshgo tʼáá ałtso doo yíhółnííhgóó neiniłkadgo yikʼi hooʼáał doo, áádóó ałdóʼ Nephi dineʼé yisnááh íidoolííł dóó bidziilgo yikʼi hooʼááł doo.

9 Áádóó áko Nephi dineʼé binahatʼaʼ éí bikéyah baa ádahwiilyą́ą doo danízin, dóó dabighan, dóó bedaʼasdzáán, dóó badaʼáłchíní, áko beʼanaaʼí yilákʼeedóó yisdádeidooʼish; dóó ałdóʼ tʼáá bí ádeinízingo dah hináa doo dóó yee báʼahootʼįʼ dooʼígíí, aooʼ, dóó tʼáá bí adánidahatʼáá doo, áko tʼáá bí adeinizinígi átʼáo, Diyin God deidoosin doo.

10 Háálá bił béédahózin Laman dineʼé yisná ádabidoolííłgo, tʼáá háí shį́į́ Diyin God diyingo dóó tʼáá aaníinii yee deidósingo, Diyin God tʼáá aaníinii dóó hinánígíí yádahodísingo, éí Laman dineʼé dabidooghą́ą́ł.

11 Aooʼ, áádóó ałdóʼ bił béédahózin Laman dineʼé tʼáá íiyisíí bikʼéí deijoołah, éí Anti-Nephi-Lehi bidineʼé danilį́, éí Ammon bidineʼé daolyé—dóó bee ndaʼaltseedígíí doo nídeididoojih da, aooʼ, dóó bee ahaʼdeetʼą́ ádeiyiilaa dóó doo kʼídeidootih da—éí bąą, Laman dineʼé dabisnahgo ndabidoołʼtsxił.

12 Áádóó Nephi dineʼé éí doo dabidiʼdoogą́ą́łgóó yee nidahazʼą́; éí bąą kéyah yaa deideezʼą́ tʼáá daabí doo biniyé.

13 Áádóó Ammon bidineʼé éí Nephi dineʼé bindaabaahí ląʼígo choideidoołʼįįłígíí yee yíká anájah, éí biniinaa Nephi dineʼé doo tʼáá áko danízin da, tʼáá sáhí, Laman dineʼé yikʼijįʼ nidadoobah, éí Laman dóó Lemuel łaʼ daazlį́į́ʼ yę́ę, dóó Ishmael biyeʼké, dóó Nephi dineʼé atsʼákaiʼígíí, éí Amaleki dineʼé dóó Zoram dineʼé danilį́, áádóó Noah bipriest danilínée dabikʼéí ádaatʼį́.

14 Áko éí yitsʼą́ą́dóó deiyíchíhígíí tʼóó ahayóí, kʼasdą́ą́ʼ, Nephi dineʼégi ánéélą́ą́ʼ; dóó áko Nephi dineʼé doo ádeinízin da ndi bikʼéí yił daʼahigą́, ndeiłtseed ndi.

15 Áádóó baa hoolzhiizh Laman dineʼé bindaabaahí kéyah Antionumdi ahíikai, áko shooh, Nephi dineʼé bindaabaahígíí kéyah Jershondi yił daʼahidoogą́ąłgo hashtʼeʼádaʼdiilyaa.

16 Áko, Nephi dineʼé binaatʼáanii, éí doodago Nephi dineʼé hastiin anaaʼ binanitʼaʼí ábiʼdiilyaa yę́ę—áko éí tʼáá ałtso Nephi dineʼé bindaabaahí yikʼi anaaʼ binanitʼaʼí áʼdiilyaa—dóó bízhiʼ éí Moroni;

17 Áádóó Moroni éí tʼáá ałtsoní yikʼi bóhólnííh silį́į́ʼ, dóó anaaʼ binaatʼáaniishchíín ałdóʼ. Áádóó naadiin ashdlaʼ binááhaigo Nephi dineʼé bindaabaahí binanitʼaʼí nilį́įgo ábiʼdiilyaa.

18 Áádóó baa hoolzhiizh Laman dineʼé Jershon bee hoodzohdí yił ałkʼiijééʼ, dóó bidineʼé éí béésh hał ndeijaah, dóó béésh hał nídaazhahí, dóó tʼáá átʼé anaaʼdi yee nidaʼahiltseedígíí.

19 Áádóó Laman dineʼé bindaabaahí éí Nephi bidineʼé deiyiiłtsą́ą́go, éí doodago Moroni, béésh ééʼ dóó achʼą́ą́h-naatʼáhí yee haidiilaa, aooʼ, dóó ałdóʼ béésh chʼah bitsiitsʼiin bąąh ndaaznil, áádóó ałdóʼ ééʼ ditʼą́ą́go yee hadadiidzaa—

20 Áko Zerahemnah bá ndaabaahí díigi ádaaʼtéhígíí tʼáadoo yee hashtʼeʼádaʼdiilyaa da; bibéésh hał dóó bibéésh hał nídaazhahígíí tʼéiyá ndeijaah, aooʼ, bedaʼaltʼį́į́h dóó bedaʼakʼaaʼ, biʼtsé dóó bibeedaʼdiltłʼį́hí; dóó tʼáá daalchííʼ, tʼáá hazhóʼó boozhnííʼ gónaa tʼéiyá akágí bikʼídaastiʼ, aooʼ, tʼáá átʼé tʼáá daalchííʼ, tʼáá hazhóʼó Zoram dineʼé dóó Amaleki dineʼé éí doo ákódaatʼéii da;

21 Ákondi béésh ééʼ doo yee hadadítʼée da, achʼą́ą́h nidaatʼáhí ndi—éí bąą, Nephi dineʼé bindaabaahí tʼáá íiyiisíí yinídaaldzid bibéésh ééʼ biniinaa, azhą́ Nephi dineʼé yiláah ánéelą́ą́ʼ ndi.

22 Áko shooh, áko baa hoolzhiizh Nephi dineʼé Jershon bee hoodzohdí yił daʼahidoogą́ąłgo yéédaaldzid; éí bąą kéyah Antionumdóó doo kééhojitʼínígóó dahdiiná, dóó doo kééhojitʼíní nahósʼaʼdóó dahdiiná, tooh nílį́ Sidon bideedóó, áko kéyah Mantigi dookah dóó kéyah naaznilígíí yee ádídahoosnííʼ; háálá Moroni bá ndaabaahí háajigo daniiʼnánígíí doo bił béédahózin da danízin.

23 Ákondi baa hoolzhiizh, doo kééhatʼínígóó dahdiináago Moroni hadaʼíséédii doo kééhatʼínígóó ayiisʼaʼ ndahaznanígíí hadabisííd doo biniyé, áádóó Moroni, ałdóʼ, Alma ádaahodoonííł bił ííshją́ą́ ályaa bił béédahózingo, háálá hastóí łaʼ áyiiłʼaʼ, Diyin Bóhólníihii neiyidiłkid deididooniiłgo éí Nephi dineʼé bindaabaahí Laman dineʼé yił daʼahidoogą́ąłgo achʼą́ą́h nidadoobah.

24 Áádóó baa hoolzhiizh Diyin Bóhólníihii bizaad Alma bił ííshjání ályaa, dóó Alma Moroni bánidaalʼaʼii yee yił hoolneʼ, éí Laman dineʼé bindaabaahí doo kééhojitʼíníjigo deínééh, kéyah Manti da yiih doonééł, áko diné doo dabidziilígíí da yikʼiidoojah. Áko éí nidaalʼaʼii dahdiijééʼ dóó Moroni haneʼ yaa deizʼą́.

25 Áko Moroni, kéyah Jershondi łahdóó bá ndaabaahí tʼáá ákǫ́ǫ́go áyiilaa, Laman dineʼé haitʼáo da kéyah yiih doonééł dóó kin haalʼá yee ádídahodoolnííł, łaʼ bindaabaahí yił dahdiiná dóó kéyah Mantigóó níná.

26 Áádóó éí diné tʼáá átʼé áádóó nidaakaaʼígíí aghąʼíyiilaa Laman dineʼé yił daʼahidoogą́ą́ł biniyé, bikédaayah dóó bihazʼą́ doo haada dadoonííł da biniyé, yee naazíinii dóó yee dah deíkáhígíí dóʼ; éí bąą Laman dineʼé dookahgo yichʼįʼ hashtʼeʼ ádaʼdiilyaa.

27 Áádóó baa hoolzhiizh Moroni tooh nílį Sidongi hootsodi binidaabaahii nídadeestʼį́įʼgo áyiilaa, éí doo kééhojitʼíní biiʼ éí tooh nílį́ Sidon eʼeʼaahjígo, éí bitábąąhgi doo kééhojitʼįnídi.

28 Áádóó Moroni hadaʼasíidii binaházʼaʼ hadaʼasíídgo áyiilaa, áko Laman dineʼé háágóó doonééłígíí bił béédahodoozįįł biniyé.

29 Áádóó áko, Moroni Laman dineʼé ádadadooníłʼígíí bił bééhózin, áko bikʼéí nideidoołtsxiłgo bił bééhózin, éí doodago ąąh shijéeʼgo ádeidoolííł áko kéyah tʼáá átʼé bikʼi bídahólnííh bił hazʼą́ągo ádeidoolííł biniyé.

30 Áádóó ałdóʼ bił bééhózingo Nephi dineʼé bikéyah, dóó tʼáá bí ádeinízingo dahináago dah yikah, dóó bisodizin yaa ádahalyą́ą doogo deinízin, éí bąąh, anaaʼ binahatʼá chooʼį́įgo doo bąąhági átʼéii éʼélʼį́ átʼée da nízin; éí bąą, bihadaʼasíidii háajigo Laman dineʼé dahdidoonéłʼígíí bił béédahózin.

31 Éí bąą, bá nidaabahí ałtsʼá yiizhʼeezh dóó łaʼ hootsojįʼ niiníʼeezh, dóó haʼaʼaahjigo néideesʼį́į́ʼ, dóó dah yiskʼid Riplah shádiʼáahjigo ałdóʼ;

32 Áádóó yidziihígíí éí eʼeʼaahjígo hootsogi, tooh nílį́ Sidon eʼeʼaahjígo, dóó kéyah Manti nineelʼą́ąjįʼ néídeesʼį́į́,

33 Áádóó áko bá nidaabaahí yinízinígi niyiizhʼeezhgo, yił daʼahidoogą́ąłgo yichʼįʼ hashtʼeʼ áʼdiilyaa.

34 Áádóó baa hoolzhiizh Laman dineʼé dahyiskʼid náhookǫsjí haazná, ákweʼé Moroni bá ndaabaahí ndadeestʼį́į́ʼ.

35 Áádóó Laman dineʼé dah yiskʼid Riplah yííghah chʼékaigo, dóó hootsojįʼ chʼékaigo, dóó tooh nílį́ Sidon tséʼnaa dahdiikááhgo, nidaabaahii dah yiskʼid shádiʼáahjigo ndadeestʼį́į́ʼyę́ę, éí hastiin Lehi wolyéego booʼish, áádóó bá nidaabaahii dah yidiiʼeezh dóó Laman dineʼé yináztʼiʼ yineʼdę́ę́ʼ haʼaʼaahdę́ęʼgo.

36 Áádóó baa hoolzhiizh Laman dineʼé, Nephi dineʼé bikéédę́ę́ʼ yinééł yiyiiltsą́ągo, naanáskai dóó Lehi binidaabaahii yikʼiijééʼ.

37 Áádóó nidaʼahiltseed, ákondi Laman dineʼé íiyisííʼ doo bá yáʼátʼééh da, háálá Nephi dineʼé bibéésh hał dóó bibéésh hał nídaazhahígíí tʼáá daalchiʼígíí yéego baaʼadaasgeed, éí kʼasdą́ą́ʼ tʼáá bee anídadzilghał bikʼeh ndabiʼdiltseed.

38 Łahjígo éí, Nephi dineʼé łahda naaʼahindééh, béésh hał dóó dił bąąh hadaazgoʼígíí biniinaa, éí íiyisíí atíbidiʼdoolníiłgi bichʼą́ą́h naaznilí bíká eelwod, éí doodago íiyisíí bitsʼíís atídoolníiłgi Laman dineʼé adadziiłhaałgo bichʼą́ą́h naʼazʼą́, béésh ééʼ, dóó bigaan bichʼą́ą́h naʼazʼą́, bitsiitsʼiingi dabichʼah; áko Nephi dineʼé kótʼáo Laman dineʼé nideistseed.

39 Áádóó baa hoolzhiizh Laman dineʼé nídaasdzííd, háálá ląʼí nidabiʼdistseed, áajįʼ índa tooh nílį́ Sidonjigo dah dadíníichą́ą́ʼ.

40 Áádóó Lehi dóó báhastóí bikééʼ yijah ńtʼę́ę́ʼ; dóó Lehi tooh Sidon nílį́į́góó iinííłkaad, áádóó tooh Sidon tséʼnaa niikai. Áádóó Lehi bá ndaabaahí tooh Sidon nílį́ bibąąh yaa ádahaalyą́ áko ákweʼé doo tséʼnaa nidookah da.

41 Áádóó baa hoolzhiizh Moroni dóó bá ndaabaahí Laman dineʼé hootsodi ałchʼįʼ dadeezbaaʼ, tooh Sidon nilínígíí tséʼnaadi, yikʼiijééʼ nideidoołtsxił biniyé.

42 Áádóó Laman bidineʼé dah náádadíníichą́ą́ʼ, kéyah Mantijigo; dóó Moroni bá ndaabaahí bichʼįʼ náádadeezbaaʼ.

43 Áko; Laman dineʼé tʼáá íiyiisíí daʼahoogą́ą́ʼ; aooʼ, Laman dineʼé tʼahdoo díigi átʼáo tʼáá íiyisíí daʼahigą́ą da ńtʼę́ę́ʼ, dooda, azhą́ hoodeeyáadą́ą́ʼ ndi.

44 Áádóó Zoram dineʼé dóó Amaleki dineʼé ndabiiłná, éí anaaʼ binanitʼaʼí dóó binaatʼáánii danilį́, aooʼ Zerahemnah ałdóʼ, éí binanitʼaʼí nilį́, éí doodago aláahjį binaatʼáanii dóó aláahdi naatʼáanii; aooʼ, tłʼiishtsoh nahalingo daʼahoogą́ą́ʼ, dóó Nephi dineʼé ląʼígo bílaʼ yee nideistseed, háálá bibéésh chʼah ałtsʼádeiyiisneʼ, dóó ląʼí da bibéésh ééʼ yiníkádaʼiisgeed, dóó ląʼí da bigaan kʼídeiyiizkal, dóó áko Laman dineʼé yéego bádahachįʼgo daʼahoogą́ą́ʼ.

45 Ákótʼée ndi, Nephi dineʼé éí hózhǫ́ yáʼátʼéehii ndabiiłná, háálá doo aláahdi nahaʼai éí doodago akʼi adziil biniyé daʼahigą́ą da, ákondi dabighan dóó tʼáá bí ádeinízingo deíkááh, bedaʼasdzáán dóó badaʼáłchíní, dóó tʼáá átʼé daabíhígíí, aooʼ, yee dahódísingo ádaʼoołʼįįł dóó bisodizin.

46 Áádóó Diyin God bikʼidahoniilʼį́ danizinígíí biniinaa díí ádeiłʼį́; háálá Diyin Bóhólníihii ábidííniid, dóó ałdóʼ dabizází, áko: Doo éí áłtsé atídoonííł danohsingo, éí doodago naakidi, doo éí niheʼanaaʼí nidanihidoołtsxiłgo bá nidahosoołʼání.

47 Áádóó nááná ałdóʼ, Diyin Bóhólníihii ání: Bił haojééh bichʼą́ą́h ndadoohbah ndaʼdoołtsiłjįʼ ndi. Éí bąą Nephi dineʼé Laman dineʼé díí yiniinaa yił daʼahigą́, dóó yił haajééʼ, dóó dabikéyah, dah deíkááhgóó, dóó bee bá adahóótʼiʼ, dóó bedaʼoodlą yichąąh ndaabaah doo.

48 Áádóó baa hoolzhiizh Moroni hastóí yił nidaabaahii éí Laman dineʼé tʼáá íiyisíí dahashké dóó bádahachįʼgo deiyiiłtsą́, yéédaasdzííd dóó yitsʼą́ąjįʼ dahdiijééʼ ńtʼę́ę́ʼ. Áádóó Moroni, ádadooniłígíí yaa ákoniizį́į́ʼ, saad yee hadaʼólį́į dooleełʼígíí yijéí yee yideelchid—aooʼ, bikédaayah yéédadoolnih, tʼáá bí ádeinízinígi átʼáo kéédahatʼį́, aooʼ, doo yisná ádabidiʼdoolníił da.

49 Áádóó baa hoolzhiizh Laman dineʼé yichʼįʼ náheeskai, biDiyin God Bóhólníihii tʼáá łahjįʼ yichʼįʼ sodadoolzin, tʼáá bí ádeinízinígi átʼáo kéédahatʼį́ dóó doo yisná dadooleełígíí yíká.

50 Áádóó Laman dineʼé dabidziilgo yichʼįʼ dahdadiibaaʼ, áádóó tʼáá ákogo ałdóʼ Diyin Bóhólníihii yichʼįʼ sodadoolzin tʼáá bí ádeinízinígi átʼáo kéédahatʼígíí yíká, Laman dineʼé bitsʼą́ąjiʼ dahdiijééʼ; Sidon tó nílį́į́góó dahdadínéézhchą́ą́ʼ.

51 Áko, Laman dineʼé alááh ánéélą́ą́ʼ, aooʼ, Nephi dineʼé naakidi yilááh ánéélą́ą́ʼ; ákótʼée ndi, bidiʼnoolkałgo ahíniilkaad halgaijįʼ, tooh Sidon bidááʼjįʼ.

52 Éí bąą Moroni bá nidaabaahí yináztʼiʼ, aooʼ, tooh nílį́ wónanídę́ę́ʼ, háálá áko shooh, haʼaʼaahdę́ę́ʼ éí Lehi bindaabaahí.

53 Éí bąą Zerahemnah Lehi bindaabaahí yiyiiłtsą́ tooh Sidondóó haʼaʼaahjigo, áádóó Moroni yił nidaabaahii éí Sidon tooh nílínídóó eʼeʼaahjigo dah yinééł, áádóó Nephi dineʼé bináztʼiʼgo, tʼóó yikʼee bił dahóóyééʼ.

54 Áko Moroni, díí bił dahóóyéʼígíí bił bééhoozingo, bá ndaabaahígíí kʼadí tʼáadoo ndaałtseedí yidííniid.