1 Áko díí éí saad Amulek Ammonihah kéyahdi diné yee neineeztą́ą́ʼ, kóníigo:

2 Shí Amulek áshtʼį́; Giddonah biyeʼ nishłį́, éí Ishmael biyeʼ nilį́į́ ńtʼę́ę́ʼ, éí Aminadi bizází nilį́į́ ńtʼę́ę́ʼ, dóó éí Aminadi diyin bighan tsé daníʼáagi ndaháasdzo yaa náhoolneʼ yę́ę átʼį́, éí Diyin God bílázhoozh yee naʼiizoh.

3 Áádóó Aminadi éí Nephi bizází nilį́į́ ńtʼę́ę́ʼ, éí Lehi biye; nilį́į́ ńtʼę́ę́ʼ, éí Jerusalem kéyahdóó chʼiníná, éí Manasseh bizází nilį́į́ ńtʼę́ę́ʼ, éí Joseph biyeʼ nilį́į́ʼ ńtʼę́ę́ʼ éí bikʼiské bilákʼeedóó Egyptgóó nidabiisniiʼ yę́ę átʼį́.

4 Áádóó áko shooh, áko tʼáá ałtso diné sheedahósinígíí bitahgóó diné doo ałtsʼíísígo bééhoʼdilziníí nishłį́į da; aooʼ, dóó áko shooh, ląʼígo shikʼéí dóó shikʼis shee hólǫ́, dóó ałdóʼ shílaʼ bee naanishígíí bee áshtʼį́ sélį́į́ʼ.

5 Ákótʼée ndi, díí tʼáá ałtso íishłaa ndi, Bóhólníihii bohoogááł, dóó binaʼnitin doo bééhózinígíí dóó beʼadziil ayóó átʼéii doo shił bééhózin da ńtʼę́ę́ʼ. Díí ádin doo shił bééhózin da ńtʼę́ę́ʼ dishní; ákondi shooh, doo áko íishłaa da, háálá tʼóó ahayóí binaʼnitin doo bééhózinígíí dóó beʼadziil ayóó átʼéii yiiłtsą́; aooʼ, díí diné beʼiinaʼ yisdádáátʼeezh ndi.

6 Ákótʼée ndi, shijéí shéłtłʼis, háálá ląʼí da shíkáʼ áʼdooniid ndi doo beʼiishłaa da; éí báá tʼáá íídą́ą́ʼ díí shił bééhózin, ákótʼée ndi doo bikʼehgo íʼdééshłííł da niizį́į́ʼ; éí bąą Diyin God bitsʼą́ą́jí nishłį́į́ ńtʼę́ę́ʼ, shijéí biyiʼdi doo yáʼátʼéehii ánishtʼé, tsostsʼid yiził biyiʼ dį́į́ʼgóó yoołkááł biyiʼ góneʼ, éí ándahwiiʼaah dahwéeʼaahgo neeznáá yihahígíí.

7 Shíkʼéí bichʼįʼ yisháałgo, áko shooh Diyin Bóhólníihii bá naalʼaʼí shichʼįʼ ííshjání iʼdiilyaa dóó ání: Amulek, nighangóó nídídááh, háálá Diyin Bóhólníihii yá yáłtiʼii báʼdííłtsoł; aooʼ, hastiin hodísinii nilį́, éí Diyin God diné bikʼihodiiniiʼii nilį́, háálá díí diné bibąąhági ádaatʼínígíí biniinaa chʼiyáán ádąąh yitʼį́įgo ląʼí yiską́, éí dichin nízin, dóó nighan góneʼ yah adoogááł dóó baʼdííłtsoł, áádóó bí éí ni dóó bił danighanígíí yikʼihojidoodliił; dóó Bóhólníihii bibee akʼihojidoodliił ni dóó bił danighanígíí bikʼi hólǫ́ǫ doo.

8 Áádóó baa hoolzhiizh Diyin yá naalʼaʼí bizhí bikʼeh hóółʼįįd, dóó shighanjigo nikinánísdzá. Áádóó ákǫ́ǫ́ nááshdááłgo Diyin yá naalʼaʼí hastiin yee shił hoolneʼyę́ę bikʼiníyá: Bíniʼdii nighan góneʼ nił yah adoogááł—áko shooh tʼáá éí hastiin Diyin God baa haneʼ yaa hoolneʼ yę́ę átʼį́į́ lá.

9 Áádóó Diyin yá naalʼaʼí áshíłní hastiin hodísinii nilį́; ákohgo hastiin hodísinii nilį́įgo shił bééhózin háálá Diyin God yá naalʼaʼí yee haadzííʼ.

10 Áádóó nááná, tʼáá aaníí átʼéego yaa hoolneʼyę́ę tʼáá aaníí ádaatʼéego shił bééhózin; háálá áko shooh ánihidishní, Bóhólníihii hináago, Diyin yá naalʼaʼí díí shił ííshją́ą́ íidoolííłgo shichʼįʼ ayííłʼaʼ; dóó díí kotʼáó ííshją́ą́ áyiilaa díí Alma shighangi naagháago.

11 Háálá áko shooh, shighan yikʼi hojisdliʼ, shí, dóó shiʼzáanii, dóó shaʼáłchíní, dóó shizhéʼé, dóó shikʼéí yikʼi hojisdliʼ; aooʼ, tʼáá ałtso shikʼéí ndi yikʼi hojisdliʼ, dóó Bóhólníihii bibee akʼihojidlí nihikʼi hooleʼ saad yee haadzííʼ yę́ę bikʼehgo.

12 Áádóó áko, Amulek díí saad yee haadzį́įʼgo diné yikʼee dadeesyiz, yaa ákodaniizį́į́ʼ ooʼíinii doo tʼááłáʼí tʼéiyá díí tʼáá aaníigo bee bikʼijįʼ haʼoodzííʼ da, dóó náásjįʼ adahodoniłígíí ałdóʼ, éí diyingo áhodooníłígíí biiʼ naazláhígíí bikʼehgo.

13 Ákótʼée ndi, łaʼ bitahgóó nidabidídóołkiłgo yaa nitsídaakees, binaʼadloʼ binahjįʼ tʼáá bí bizaad yee tsístłʼah yidinóółchééł, áko saad bikʼijįʼ dadooleełígíí chʼídeidooʼááł, áko ándahwiiʼaahii yichʼįʼ deidooʼish áko beehazʼáanii yee yá nidahwiidooʼááł, dóó nabiʼdootsxił éí doodago awáalyah góneʼ yah abidiʼdooʼnił, asihígíí tʼáá ádzáago yikʼi dahodiʼaah éí doodago tʼóó bikʼijįʼ haʼoodzííʼ.

14 Áko éí diné ndabidoołtsxiłgo yíkʼá ádaatʼį́, éí aghaʼdiitʼaahii danilį́, éí naanish yaa deiyiizlá éí doodago yikʼi dadiilniiʼ áko éí andahwiitʼaahdi beehazʼáanii choideidoołʼįįł éí doodago andahwiitʼaahdi diné ndaʼiisíhígíí ándahwiiʼaahii yidááhdóó ndeiyiiʼéésh.

15 Díí aghaʼdiitʼaahii danilíinii diné binaʼadloʼ dóó bindaʼagiz yídahoołʼą́ą́ʼ; dóó éí binahjįʼ binaanish ayóó deiyoochįįh daazlį́į́ʼ.

16 Áádóó baa hoolzhiizh Amulek nideidiʼniiłkid, áko bizaad tʼóó néídiyoonił biniyé, éí doodago saad łahgo átʼéego yee hadoodzih.

17 Áko Amulek bindaʼadloʼ bił bééhózinígíí doo yaa ákodanízin da. Ákondi baa hoolzhiizh ndabidiłkidgo yaa nidiikai, bintsédaakees yaa ákónízin, dóó íidííniid: O bąąhági ádaohtʼíinii dóó oochííł biiʼ doo yáʼadanohshóonii, aghaʼdiitʼaahii dóó tʼóó ádahoʼdilʼíinii danohłíinii; háálá biʼiiníziinii bá hashtʼedahółééh; háálá beeʼódleehí nidahohnííł dóó Diyin God biʼayóó ádaatʼéii beeʼódleehí bá ndaahnil.

18 Bóhólníihii diyingo bikééʼ oodááł ndahoołchxǫǫhgo bindahohʼá, dóó Diyin God atínihidoolíiłgo bá dahoołʼaʼ, díí diné ałtso ádooldįįłgo ałdóʼ.

19 Aooʼ, Mosiah éí tʼáá ákótʼéego yee haadzííʼ, éí akéeʼdi niheʼaláahdi naatʼáanii nilį́į́ ńtʼę́ę́ʼ, óhólníihgo hazʼą́ą́ʼdę́ę́ʼ kʼadę́ę adaagháahgo, éí doo háiida baa dootʼááłgóó, diné tʼáá bí bizhí yee nidahaʼáago yíkʼeh dahóola—aooʼ, tʼáá ákótʼéego ádííniid áko áajįʼ áhoolzhiizhgo díí diné bizhí yee bąąhági ádaatʼéii ndeidiiláago, áko éí, áajįʼ ahoolzhiizhgo díí diné bee hazʼáanii kʼihdeiyiitį́į́h yiih yíkaigo éí dabidiʼdooghą́ąłgo yichʼįʼ hashtʼeʼáʼdiilyaa doo.

20 Áádóó áko ánihidishní nihibąąhági ádaatʼéii Bóhólníihii tʼáá ákótʼéego yá nahwiidooʼááł; éí díí diné yéego yichʼįʼ yáłtiʼgo tʼáá ákótʼé, Diyin yá nidaalʼaʼí bizhí bee: Ádaa ńdaʼoohkąąh, ádaa ńdaʼoohkąąh, háálá yáʼąąshdi hazʼą́ koshídę́ę́ʼ hoolzhiish.

21 Aooʼ, yéego yáłtiʼgo tʼáá ákótʼé, bá nidaalʼaʼí bizhí bee: shidineʼé bitah deeshááł, tʼáá ahehoołtʼé dóó tʼáá ákogi átʼéego nahwiitʼaah shilákʼee siláago.

22 Aooʼ, dóó ánihidishní diyingo deíkáahii doo sodadilzingo, éí kʼad kéyahgóó nidaakai, éí kʼad ndi ałtso ndanihiʼdooltsxił ńtʼę́ę́ʼ. Ákondi doo tó yíląąd bee da, Noah dóó bidiné dahináyę́ędą́ą́ʼ, ákondi dichin aghą́, dóó naałniih, dóó béésh hał bee dooleeł.

23 Ákondi diyingo dahinánígíí bisodizin bee yisdáókai or yisdádoohkah; áko kʼad éí, diyingo dahinánígíí nihitahdóó chʼídanoołkaadgo Diyin Bóhólníihiiʼísh bílaʼ doo tʼą́ą́ʼ kwiidoolííł da; ákondi tʼáá íiyisíí báháchįʼgo nihichʼįʼ chʼídoogááł; áadi índa dichin, dóó naałniih, dóó béésh hał bee ánihidiʼdooldįįł, dóó tʼáá tsxį́įłgo bichʼįʼ hoolzhish tʼáá hazhóʼó ádaa ńdaʼsookango tʼéiyá.

24 Áádóó áko baa hoolzhiizh diné tʼóó yíwohdí Amulek yichʼįʼ bádahóóchįįd, áádóó hadadeeshghaazh, kódaaníigo: Díí hastiin nihibee hazʼáanii tʼáá ákogi ádaatʼéii yikʼijįʼ haadzííʼ, dóó nihiʼaghadaʼdiitʼáahii ayóó bił éédahózingo ndahiidlááʼ.

25 Ákondi Amulek yichʼįʼ dah doolnihgo, dóó yiláahgo hadoolghaazh, kóníigo: O bąąhági ádaohtʼíinii dóó oochííł biiʼ doo yáʼadanohshóonii, haʼátʼíí biniinaa Chʼį́įdii tʼóó baahadzidgo nihijéí deiyootʼą́ʼ? Haʼátʼíí biniinaa aa adasidootʼą́ áko nihikʼi bidziilgo, doo daʼoohʼį́į da, saad bee nihichʼįʼ haʼoodzííʼ yę́ę doo bikʼi daʼdoohtʼįįh da, tʼáá aaníinii bikʼehgo?

26 Háálá áko shooh, daʼ nihibee hazʼáaniiʼísh tʼáá aaníigo bikʼijįʼ haasdzííʼ? Doo bikʼi daʼdoohtįįh da, nihibee hazʼáanii bikʼijįʼ haasdzííʼ dadohní; ákondi ndagaʼ, nihibee hazʼáanii bichʼihjígo haasdzííʼ, éí bikʼei tiʼdahwiidoohnih.

27 Áádóó áko shooh, ánihidishní, diné dabiʼdooghááł bee hadadilyaaígíí éí nihiʼaghahdiitʼaahii dóó nihá ndahwiiʼáahii doo yáʼádaatʼéehii nihá ndeiyiiʼaahgo bee haʼhoolzhiizh.

28 Áádóó áko baa hoolzhiizh Amulek díí saad ałtso yee haadzíiʼgo diné hadadoolghaazh, kódaaníigo: Kʼad nihił béédahózin díí hastiin biʼiiníziinii beʼawééʼ nilį́, háálá biyoochʼíídgo nihichʼįʼ haadzííʼ, hááłá nihibee hazʼáanii yikʼijįʼ haadzííʼ. Ákohgo ání éí tʼáadoo bikʼijįʼ haasdzííʼ da.

29 Áádóó nááná, díí hastiin nihiʼaghaʼdiitʼáahii, dóó nihá ndahwiiʼaahii yikʼijįʼ haadzííʼ.

30 Áádóó baa hoolzhiizh aghadaʼdiitʼaahii díí yikʼijįʼ yee daalniih doogoʼ bijéí yiih deiyiizlá.

31 Áádóó łaʼ bitahdóó Zeezrom joolyé. Éí tʼáá íiyisíí Amulek dóó Alma yikʼíháʼááh, éí bitahdóó tʼáá íiyisíí iichįįh, diné bitahgóó ląʼígo binaanish.

32 Áko díí aghadaʼdiitʼaahii atʼį́ tʼéiyá yíká ádaatʼį́; dóó binaanish bitsʼą́ą́dóó daʼatʼį́ ndahaleeh.