1 Áádóó baa hoolzhiizh kéyah aláahdi ánahwiiʼaahii yichʼįʼ ánááʼiidlaa, éí Pahoran wolyé, dóó díí saad neiyíízoh, kóníigo: Áko shooh, Pahoran bichʼįʼ éʼéshłééh, Zarahemla bikin dashiijaaʼdi, éí aláahdi ánahwiiʼaahii dóó kéyah yee bíhólníih, áádóó ałdóʼ tʼáá ałtso diné yá nahaʼáago dóó díí anaaʼ yikʼideezʼį́į́go bikʼihodiiniiʼ.

2 Háálá áko shooh, doo shił yáʼátʼéehii łahgo bee bichʼįʼ hadeesdzih, háálá áko shooh, tʼáá nihí nihił béédahózin ndaabaahí ahídahohééshgo bee nihikʼidahodiiniiʼ, dóó béésh hał baa dahidoohniłgo, dóó béésh hał nídaazhahí bił, dóó tʼáá átʼé ałʼąą átʼéego anaaʼdi yee ndaabaahígíí, dóó Laman dineʼé bichʼįʼ dadiilʼaałgo, kéyah tʼáá haʼígi da nihił yaa ahidookahgi.

3 Áádóó kʼad áko shooh, shidóó ádíshnínígíí, dóó shándaabaahí ałdóʼ, dóó Helaman dóó bá ndaabaahí ałdóʼ, tʼáá íiyisíí yéego tiʼdahoozniiʼ; aooʼ, dichin da yikʼee, dibááʼ da, dóó chééhdadeeskaiʼígíí, dóó tʼáá áłtsóní ałʼąą átʼéego bikʼee tíhoonííhígíí yikʼee tiʼdahoozniiʼ.

4 Ákondi shooh, tʼáá díí tʼéiyá bee tíʼdahosiiʼniiʼgo éiyá doo saad dahoniidlǫ́ǫ da dóó doo akʼijįʼ yádeiiltiʼ da doo ńtʼę́ę́ʼ.

5 Ákondi shooh, nihidineʼé tʼóó ahayóí nidabiʼdistseed; aooʼ, dimííl yázhí bilááhgo béésh hał bee nidabiʼdistseed, łahgo shį́į́ʼ átʼée doo ńtʼę́ę́ʼ ląʼí ndaabaahí bee nihíká oohjééʼgo. Aooʼ, dooládóʼ tʼáá íiyisíí tʼáadoo nihíká oohjééʼ da.

6 Áádóó kʼad áko shooh, nihił béédahodoozįįł daniidzin biniyé tʼáá íiyisíí nihaa deisoonahígíí; aooʼ, nihił béédahodoozįįł daniidzin biniyé doo nihąąh danihíniʼígíí.

7 Naatʼáanii danohłį́įgo dah nahísóotánídóó haash yitʼáo chʼééh tsídadoohkees, áko niheʼanaaʼí tʼáá ałtso nihinaagóó nidaʼałtseedgo yaa naakai? Aooʼ, dimííl yázhí bilááh ánéelą́ąʼgo nihikʼéí ndeiłtseed—

8 Aooʼ, azhą́ éí ndi nihadaʼólí, aooʼ, bíká adíílwołgo bee ná hooʼaʼ doo ńtʼę́ę́ʼ, aooʼ, ndaabaahí da bichʼįʼ ííníłʼaʼ doo ńtʼę́ę́ʼ, éí yee dabidziil doo, dóó dimííl yázhí bilááhgóó da béésh hał bitsʼą́ą́dóó yisdáʼdáohʼeezh.

9 Ákondi shooh, doo díí tʼéiyá da—choideidoołʼįįłígíí tʼáadoo bee bíká oohjéeʼ da; ląʼí da ndaazbaaʼ dóó beʼiinaʼ yee tiʼdahoozniiʼgo háálá diné yáʼátʼéehgo kéédahatʼį́į doo tʼáá íiyisíí deinízin ńtʼę́ę́ʼ; aooʼ, dóó díí kódaadzaa kʼasdą́ą́ dichin dabííghą́ą́ʼyę́ędą́ą́ʼ, háálá tʼáá íiyisíi tʼáadoo bikáʼojéhígíí biniinaa.

10 Áádóó áko, shikʼiské ayóó ánihííníshníinii—háálá nihí shį́į́ʼ ałdóʼ ayóó ánihiʼdooʼní; aooʼ, tʼáá nihíshį́į́ hózhǫ́ baa ntsédaohkeesgo áłká anídaahjah dóó díí diné tʼáá bí ádeinízingo dahiná; ákondi shooh, baa deisiyoonah beʼiinaʼ ląʼí da bee anídahaztʼiʼ yę́ę ląʼí da nihikʼijįʼ nídadoodleeł; aooʼ, háálá Diyin God éí dabidiiztsʼą́ą́ʼ, dóó tʼáá átʼé yikʼee tiʼdahoozniiʼígíí—

11 Áko shooh, daʼ naatʼáanii danohłínídóó dah nahísóotą́ą doo, dóó Diyin God biyáʼátʼéehii binahjįʼ doo baa naaháhígóó yisdánihidooʼish? Áko shoosh, díí kótʼée doo danohsingo naʼníleʼdii kódanohsin doo.

12 Daʼ kódeinohsinísh, ląʼí nihikʼéí nidaaztseed bąąhági ádaatʼínígíí biniinaa? Ánihidishní, díí kódanozį́įgo, díí éí tʼáadoo biniyehígóó ntsísohkeez doo; ánihidishní, tʼóó ahayóí béésh hał bee nidabiʼdistseed, áádóó áko shooh díí éí bee tʼáá nihí ádídahidoołtʼiʼ;

13 Háálá Diyin Bóhólníihii diyinkʼehgo deíkáhígíí ndabiʼdidooltsxiłgo yee yá hołʼaʼ bitʼáá áko eʼelʼíinii dóó binahwiitʼaah bąąhági ádaatʼínígíí bikʼindoolyééł; éí bąą tʼáadoo kódanohsiní diyinkʼehgo deíkáhígíí nidaaztseedígíí biniinaa doo ayóóʼádabiʼdiilyaa da; ákondi shooh, éí Bóhólníihii biDiyin God yił yah anáhidookah.

14 Áádóó kʼad áko shooh, ánihidishní, tʼáá íiyisíí binásdzid Diyin God biʼánahwiitʼaahii díí diné bikʼijįʼ dooleeł, tʼáá íiyisíí bił dahóyééʼígíí biniinaa, aooʼ, nahatʼá bee bídahólníihii ndi bił dahooyeeʼ, dóó bikʼéí tʼáá íiyisíí ayóó átʼáo yaa deiyooznah, aooʼ, nidabiʼdiztseedígíí bichʼįʼjigo.

15 Háálá nahatʼá bee bídahólníihii bąąhági ádaatʼį́įgo doo bee hahoolzhiizhgóó, niheʼanaaʼí bichʼįʼ danihidziil doo ńtʼę́ę́ʼ áko doo nihikʼi bídahólníih da doo ńtʼę́ę́ʼ.

16 Aooʼ, doo nihitah anaaʼ hazlį́į́ʼgóó, aooʼ, díí naatʼáanii-bidahastóí doo ádaahdzaago, éí bąą tʼóó ahayóí ndaʼahisiiltseed, aooʼ, ahináádííjahyę́ędą́ą́ʼ, niheʼadziil bee łahʼí niidlį́į doo ńtʼę́ę́ʼ; aooʼ, naatʼáanii-bidahastóí bee adziil dóó nihikʼi bídaholnííh doo ádeinízingóó; tʼáá nihí ádeiniidzingo dahiniiʼná nihá deidósin doo ńtʼę́ę́ʼ, dóó tʼááłáʼí niidlį́įgo, niheʼanaaʼ yikʼijįʼ dahdadiinée doo ńtʼę́ę́ʼ, jó nihída nihikʼiʼjįʼ béésh hał yił hadaazdéél, éí bitsʼą́ą́dóó tʼóó ahayóí ndaʼahisiiltseed; aooʼ, Diyin Bóhólníihii bibeʼadziil bee bikʼijįʼ dadiibaaʼgo, niheʼanaaʼí nihitsʼádahineezchą́ą́ʼ doo ńtʼę́ę́ʼ, háálá ákódzaago, Diyin God bizaad bohoolyaa doo ńtʼę́ę́ʼ.

17 Ákondi shooh, áko kʼad Laman dineʼé nihikʼijįʼ dadeezná, nihikéyah yee adídahosnííʼ, dóó nihidineʼé béésh hał yee ndeiłtseed, aooʼ, nihizáanii dóó nihaʼáłchíní, dóó ałdóʼ nihitsʼą́ą́ʼ deisnááh, ałʼąą átʼéego yichʼįʼ ndahwiiłnáagoo yikʼee tíʼdahoonííh, dóó díí adziil yíká ádaatʼínígíí dóó shóhólnííh doo danízinígíí tʼáá íiyisíí bąąhági ádaatʼį́įgo biniinaa, aooʼ, tʼáá éí naatʼáanii-bidahastóí.

18 Ákondi haʼátʼíí éí biniyé díí łą́ągo baa yánáánáshtʼiʼ doo? Háálá díí doo nihił béédahózin da ndi shóhólnííh doo danohsin. Doo nihił béédahózin da ndi ałdóʼ tʼáá nihí nihikéyah bitsʼą́ą́jí dasoolį́į́ʼ.

19 Éí doodago doo nihíká anídaahjah da háálá nihikéyah biiʼ kéédáhónóhtʼį́ dóó bee hashtʼeʼdadíínóhtʼé; éíʼísh biniinaa chʼíyáán doo nihichʼįʼ dadoheeh da, dóó ałdóʼ diné nihindaabaahí bee dabidziil dooleełígíí?

20 Diyin God Bóhólníihii bibee hazʼáaniiʼísh baa deisoonah? Aooʼ, daʼ nihizází dabiʼdisnááh yę́ę baa deisoonah? Daʼ tʼóó ahayóidi niheʼanaaʼí bitsʼą́ą́dóó yisdánánihiʼdootʼeezh yę́ę baa deisoonah?

21 Éí doodago tʼahdiiʼísh Diyin Bóhólníihii yisdánihidooʼish danohsin, naatʼáanii daniidłį́įdóó dah nahisíitą́ągo dóó Diyin Bóhólníihii yee nihaa joozbaʼígíí doo chodeinołʼį́į́góó?

22 Aooʼ, daʼ tʼóósh nahísóotą́ą dooleeł dimííl yázhí bilááhgóó nihinásʼáago, aooʼ, neeznáá dimííl yázhí ánéelą́ą́ʼ, éí ałdóʼ doo ádeiłʼínígóó tʼóó naháaztą́, dimííł yázhí biláahgo kéyah bináágóó béésh hał bee ndabiʼdiltseedgo, aooʼ, atídaalyaa dóó dił bąąh ádáádįįłgo.

23 Daʼ Diyin Godísh doo ohtʼínígóó yee nihiniłį́į doo tʼóó nahísotʼą́ą́góó dóó tʼóó danihinááłgo? Áko shooh ánihidishní, Dooda. Kʼad díí béédaałniih Diyin God ánihiłnínée biyiʼdi áłtsé hashtʼeʼdoolnííł, áádóó áko índa tłʼóódę́ę́ʼígíí ałdóʼ hashtʼeʼdoolnííł.

24 Áádóó áko, ádaahdzaaʼígíí baa ádaa nídaʼsookango tʼéiyá, dóó nídadohnééh dóó dadoołníísh, dóó ndaabaahí dóó chʼiyáán łaʼ nihichʼįʼ kódaohłééh, dóó Helaman ałdóʼ bichʼįʼ, áko kéyah yee ádínáhoosníʼígíí yee yíká adoojah, áádóó tʼáá nihí ałdóʼ łahdóó bee ádídahosiilnííʼ yę́ę tʼáá nihí nídadoodleeł, áko shooh, Laman dineʼé doo bikʼináánéidiijah da áłtsé nihiyiʼdi hashtʼedeilyaago índa, aooʼ, azhą́ ayóó átʼáo nihinahatʼá bee bídahólnííhdi ndi.

25 Áádóó nichʼįʼ iʼiishłaaʼígíí shá lą́ asíníłį́įʼgo tʼéiyá, dóó tʼáá aaníigo tʼáá hó ájinízingo naʼadahígíí shił ííshjání ánilééh, dóó nihindaabaahí yéego bidziil ánílééhgo bee nihíkáʼanilyeed, dóó chiʼyáán bee bíkáʼanilyeed, áko shooh diné tʼáá bí ádá nidahatʼá łaʼ tʼáá kǫ́ǫ́ kéyah yaa ádahalyą́ągo ádeeshłííł, áádóó Diyin God beʼadziil dóó bee ákihojídlí bił hólǫ́ǫgo ádeeshłííł, doo nááná łaʼ adziilii bikʼijįʼ nidaalnish da dooleeł—

26 Áádóó díí éí beʼoodląʼ dabidziilígíí biniinaa, dóó bichʼįʼ nidahwiiʼnáago haʼahóní yee deíkááh doo—

27 Áádóó nihaa deeshááł, dóó tʼáá háí shį́į́ nihitah tʼáá hóʼájinízingo hijiináago yinízinígíí, aooʼ, azhą́ tsʼídá ałtʼsíísígo tʼáá hó jinízingo hólǫ́ǫ ndi, áko shooh nihitahdóó nihichʼįʼ dah didiiʼnééł, adziilii dóó nihíhólnííh doo danízinígíí nahjįʼ kódabiʼdiilyaago índa.

28 Aooʼ, áko shooh niheʼadziil dóó bee nihídahólníhígíí doo binásdzid da, ákondi shiDiyin God tʼéiyá binásdzid; dóó bibee hazʼáanii bikʼehgo shibéésh hał bee shikéyah bichʼą́ą́h naashbaah, dóó bąąhági ádaatʼínígíí biniinaa ląʼí da ndanihiʼdiztseed.

29 Áko shooh kʼad baa hoolzhiizh, kʼad áajįʼ ayííłką́, nihikéyah bichʼą́ą́h ndadoobahgo tʼéiyá, béésh hał bee nahwiitʼaahii nikʼi sitʼą́ą doo; dóó nihikʼi ndookǫs dóó ałtso nanihidoołtsxił.

30 Áko shooh, nihíká adoojahgo nihibaʼsédá; dóó, nihíkáʼoojééʼgo índa, áko shooh, nihichʼįʼ deeshááł, Zarahemla bikéyahjįʼ ndi, dóó béésh hał bee nanihideestsxił, díí dineʼé tʼáá bí ádeinízingo dahinánígíí doo neʼadziil bee bichʼą́ą́h ndiinááł da.

31 Háálá áko shooh, Diyin Bóhólníihii nihibąąhági ádaatʼéii bee dahinohnáago doo yee nihá hasʼą́ą da dóó bąąhági átʼéii bee nihidziilgo díí diné diyinkʼehgo deíkáhígíí doo ndahidoołchxǫǫł da.

32 Áko shooh, Diyin Bóhólníihiiʼísh yisdánihidooʼish dóó Laman dineʼé yikʼijįʼ nahwiidiyooʼááł, aooʼ, dabizází bibee óʼoolʼįįł biniinaa bádahachį́, aooʼ, dóó nihitsʼádahaaskaiʼígíí kʼad tʼóó yíwoh da danihijoołá, áko nibąąhági átʼéii éí ádaa haʼniih dóó nihokááʼ bikááʼ tʼáadoo biniyéhí nínízinígíí biniinaa?

33 Nihił béédahózin Diyin God bibee hazʼáanii doo bikʼehdahonołʼínígíí, dóó nihił béédahózin doo tʼáá íiyisíí nihił danilį́į da. Áko shooh, Diyin Bóhólníihii áshíłní: Nahatʼá yee bídahólníihii ndahisooláʼígíí bibąąhági ádaatʼéii dóó doo yáʼáshóonii yaa naakaiʼígíí doo yaa ńdaʼookąąhgo, bikʼijįʼ dah dadidohbah.

34 Áádóó kʼad áko shooh, shí, Moroni, doo bee shá ahóótʼiʼ da, Diyin God bił ahaʼdinishtʼánígíí bikʼehgo éí Diyin God bibee hazʼáanii bikʼeh honishʼį́į doo; éí bąą Diyin God bizaad bikʼeh dahonołʼį́į doo, dóó tsxį́įłgo chodeidooʼįįłígíí dóó ndaabaahí shichʼį́ ádadohlííł, dóó Helaman ałdóʼ bichʼįʼ.

35 Áádóó áko shooh, doo kódaołaaʼgóó tsxį́įłgo nihaa deeshááł; háálá áko shooh, Diyin God éí doo dichin nihidooghááłgo ánihidoolííł da; éí bąą nihichʼiyąʼígíí nihichʼįʼ kwíidoolííł, azhą́ béésh hał bee ndi. Áko kʼad Diyin God bizaad beʼílééh.

36 Áko shooh, shí Moroni, nihiʼaláahdi naatʼááh nishłį́. Doo éí adziilii bíká áshtʼį́į da, ákondi nahjįʼ kóshʼį́, doo éí nihokááʼ biʼaa haʼniih yíníshkeed da, ákondi shiDiyin God biʼayóó átʼéii, dóó tʼáá hó ájinízingo iiná dóó shikéyah bi yáʼátʼéehii bíká áshtʼį́. Áádóó áko díí náhézohígíí ałtso íishłaa.