1 Áko shooh, shikʼiské ayóó ííníshníinii, nihaadeeshááłgo bee shá ląʼ azlį́į́ʼ, éí bąą tʼáá shí shizaadjí bee nihichʼį́ hadeesdziiʼ; aooʼ, tʼáá shí shizę́ę́ bee, díí éí tsʼídá ałtséedi shizaad bee nihichʼį́ haasdziih, díí anahwiitʼaahii-dahsídáádóó tʼóó ahayóíʼ shinaanish, éí biniinaa tʼáadoo nihaanisháá da ńtʼę́ę́ʼ.

2 Áádóó kʼad ndi doo nihaa deeshááł da doo ńtʼę́ę́ʼ anahwiiʼaahii dahsidáádóó doo łaʼ baa naadiitʼáágóó, doo łaʼ shitsaskʼeh naahoodeezʼáágóó; áádóó Bóhólníihii bee ajoobaʼ ntsaago yee sháhoołʼaʼígíí biniinaa nihaaníyá.

3 Áádóó áko shooh, Diyin God bidaahdoo hojoobaʼ adaʼdoołyaago tʼáá íiyisíí bee haʼínishní dóó nihá laanaa nisin, dóó bibee ajoobaʼ tʼahdii biká sodadoołzin, áko bidáádóó bąąhágiʼ átʼéii doo nihąąhgóó hadideeshʼį́į́ł, áko nihikʼis Zarahemladi bee bichʼįʼ nitsohodinídéél yę́ęgiʼ átʼáo doo baa ákodínéesįįł da.

4 Ákondi shiDiyin God, shił ííshjání íʼiilaa, aooʼ, éí diyinkʼehgo oodááł yee hashtʼeʼninákaiʼígíí shił ííshjání alyáágóó tʼáá íiyisíí baa shił hózhǫǫd.

5 Áádóó Diyin God biʼIiʼ Sizį́ Diyinii shił hólónígíí biniinaa, nihaʼíínishłį́, áko ałdóʼ nihaa shił hózhǫ́; ákótʼée ndi nihikʼiské Zarahemladi bichʼįʼ ntsohodinideelígíí doo éí bitsʼą́ą́dóó nihikʼid shił hózhónígíí da, háálá áko shooh, yéego bichʼįʼ ndawiisnáaʼgo yiyiʼndaaskaiʼígíí éí baa shił hózhǫ́.

6 Ákondi shooh, doo nihaa ayihooshłii da nihikʼiské nahalingo tʼáá íysíí doo daʼiinohdlą́ą da; doo nihaa ayohooshłii da nihijéí biyiʼdi ádaadeidzíínódlíí da; doo nihaa ayohooshłii da éí bee daʼatʼíinii dóó nahasdzáán bikááʼgóó tʼáadoo bee chʼodaaʼínígíí nihijéí biih dahołée da; aooʼ, doo nihaa ayihooshłii da tʼóó beidaʼilyáaʼígíí doo bichʼįʼ sodadilzin da, ákondi Diyin God tʼáá ánii híinaanii bichʼįʼ sodadoołzin, dóó nihibąąhági ádaatʼéii bee nihaanídiʼdootʼaałgo bee bichįʼ dadinohʼį́į́ʼ, hoolʼáágóó niheʼoodląʼ bee, éí náásgóó áhodoonííł.

7 Háálá áko shooh, ląʼída bééhodoozįįłígíí hólǫ́ nihidishní; dóó áko shooh, díí tʼáá ałtso bitsʼą́ą́dóó éí tʼááłáʼígo aláahdi ílį́—háálá áko shooh, Nináʼnídláii hiiná dóó bidineʼé yaa doogááłgo doo nízaad hadziih da.

8 Áko shooh, dóó éí tʼah atsʼíís bee hólǫ́ǫgo nihaadoogááł dishníi da; háálá áko shooh, Niłchʼi Diyinii doo éí kóhodoonííł shił níigo shił halneʼ da. Áko díí dóó baa shił bééhózin da; ákondi kónéélááʼ éí shił bééhózin, áko Bóhólníihii Diyin God adziilii dóó bizaad bikʼehgo tʼáá ałtsoní íídoolííł.

9 Ákondi shooh, Iiʼ Sizį́ Diyinii kóniłtsogo shił hoolneʼ, kóníigo: Díí diné bee bił holneʼ, kódíníigo—Ádaańdaʼoohkąąh; dóó Bóhólníihii bá hashtʼeʼadaʼdoołneeh, dóó bedaʼatiingóó wohááł, éí kʼédaházdǫ́ǫ́n, háálá áko shooh, yáʼąąsh bił hazʼą́ą bichʼįʼ hoołzhiizh, dóó Diyin God biYeʼ nahasdzáán yikááʼ dooghaał.

10 Áádóó áko shooh, Mary éí bidoołchííł, Jerusalemdi nihizázíyę́ę bikédaayahdi, éí chʼikę́ę́h tʼah doo diné bee haléehii nilį́, ílíinii dóó bikʼihoodiiniiʼii nilį́, éí éí Iiʼ Sizį́ Diyinii bibeʼadziilii bikʼihooleʼgo yiltsąąd, dóó biyáázh hodooleeł, aooʼ, éí tʼáá aaníí Diyin God biYeʼ nilį́.

11 Áádóó éí dahdidoogááł, tídahooʼnííh dóó achʼįʼ nadahwiiʼnah dóó nahoʼdinitaah ałʼąą ádaatʼéii yikʼee tiʼhwiidoonih; dóó díí éí saad bohodoolnííł éí áníigo éí bidineʼé tiʼdahooníhígíí dóó bitahdahoneezgaaʼígíí ákʼiididootʼááł.

12 Áádóó ánoonééł ákʼiidididootʼááł, áko anoonééł bitłʼóól bidineʼé dabótąʼígií kʼíídiyooʼah; doo nihitah dahółdzilii ákʼijįʼ kwíyiilaa, áko biʼaa joobaʼ biiʼ hadidoobį́į́ł atsʼíseekʼehgo, áko atsʼíseekʼehgo háitʼáo bidineʼé yíkáʼadoolwołgo bił bééhodoozįįł éí doo bitah dahoołzilígíí bikʼehgo.

13 Áko Iiʼ Sizį́ Diyinii tʼáá áłtsoní bił bééhózin; ákondi Diyin God biYeʼ atsʼíseekʼehgo tiʼhoozniiʼ bidineʼé bibąąhági ádaatʼéii yá ákʼiididootʼááł biniyé, áko ndaʼiisííyę́ę beʼadziilii yee yisdéídoonił éí bikʼehgo nahjįʼ kwíídoolííł; dóó áko shooh, díí éí tʼáá aaníigo shiiʼ hólǫ́.

14 Áko nihił chʼihonishaah ádaańdaʼoohkąąh, dóó diyingo náánihiʼdiʼdoochííł; háálá Iiʼ Sizį́ Diyinii ání doo náánihiʼdizhchį́į́hgóó doo yáʼąąshdí niháhiidooʼaał da; éí bąą wóshdę́ę́ dóó ádaańdaʼoohkąąhgo tó bee danihiʼdidoolzį́į́ł, áko nihibąąhági ádaatʼéii nahjįʼ nihąąh tʼáádadoogis, áko Diyin God biDibé Yázhí deinohdlą́ą doo, éí nahasdzáán bibąąhági ádaatʼéii nahjįʼ kodeileʼ, éí yisdáʼdooniłgo bidziil dóó doo ákótʼéego oodááł nihąąh teidoogis.

15 Aooʼ, ánihidishní hoshdę́ę́ʼ dóó tʼáadoo nidaałdzidí, dóó bąąhági átʼéii nahjįʼ kodaołééh, éí danihidoołchxǫǫłgo danihootʼą́, aooʼ, háago dóó náás dookááh, dóó nihiDiyin God nihibąąhági ádaatʼéii baa ádaańdaʼoohkąąhígíí bił ííshją́ą́ adaolééh dóó bibéé hazʼáanii bikʼeh dahonołíigo bił ahadaʼdinoohtʼaah, dóó dííjį́ tó bee nihiʼdiilzį́į́hgo bił ííshją́ą́ ádaohłééh.

16 Áádóó tʼáá háíshį́į́h díí yeʼiilaago, dóó Diyin God bibee hazʼáanii kódóó yikʼeh hoołį́įgo, bee bichʼįʼ haasdziʼę́ę́ tʼáá bí yéédoolnih, aooʼ, bee bichʼįʼ haasdziʼę́ę́ tʼáá bí yéédoolnih, hoolʼáágóó iiná yoosbą́ą dooleeł, Iiʼ Sizį́ Diyinii tʼáá aaníigo yaa hoolneʼígíí bikʼehgo, éí tʼáá aaníigo shił hoolneʼ.

17 Áádóó áko shikʼiské ayóó ííníshniinii, díísh deinóhdlą́? Áko shooh, ánihidishní, aooʼ, deinóhdlą́ągo shił bééhózin; dóó deinóhdlánígíí éí kótʼáó shił bééhózin éí Iisizį́ Diyinii shił ííshjáá áyiilaa éi shił hólǫ́ʼ. Áádóó áko éí bitsʼą́ą́dóó niheʼoodląʼ daniłdzil, aooʼ, bééhahadzih yę́ę bąąh, tsʼídá yéego baa shił hózhǫ́.

18 Háálá tʼáá niléídę́ę́ʼ bee nihił hashneʼ, áko nihikʼiské bichʼįʼ ntsohodinídéél yę́ęgiʼ átʼáo tʼáá íyisí doo nihá nisin da, ákótʼée ndi baa ákoniizį́į́ʼ nisinígíí éí bohoolyaa.

19 Háálá diyinkʼehgo oodááł biiʼ deinóhkááhgo baa ákoniizį́į́ʼ; Diyin God bił hazʼą́ągo deinóhkááhgo baa ákoniizį́į́ʼ; aooʼ, kʼeházdongo bichʼįʼ deinóhkááhígíí baa ákoniizį́į́ʼ.

20 Nihił ííshjáá ályáágóó baa ákoniizį́į́ʼ, bizaad tʼáá aanínígíí bee, áko tʼáá kehóózdoongo naaghá; dóó yee haadzihígíí doo łahgo áyooliił da; nishʼnáájí dóó nishtłʼají doo chahaʼoh náhoodleełígi átʼée da, doodago yáʼátʼééhjí dóó doo yáʼátʼéehjįʼ doo áłnánádááh da, éí bąą, bihooghááł éí tsʼídá tʼááłáʼí ahoolʼáá góneʼ bee áhóótʼiʼ.

21 Áádóó atsʼíís doo biiʼ hodilzinígíí doo yiiʼ hólǫ́ǫ da; áádóó tʼóó baaʼiihígíí doodago bąąh chinígíí doo Diyin God bił hazʼáadi doo yah adoogááł da; éí bąą ánihidishní baa hodoolzhiizh, aooʼ, dóó éí nihóníyáadi, tʼáá háíshį́į́h tʼóó baaʼíhígíí éí áadi tʼahdii tʼoo baaʼih doo.

22 Áádóó áko shikʼéí ayóó ííníshniinii, díí ánihidishnínígíí éí Diyin God bá naałnishígíí baa ákodinóhsííł bichʼįʼ chʼeedóhdziłgo nihá nisin, ákó doo nihąąh chingóó deiyinóhkááh doo, áko Diyin God hodilzingo óʼoolʼįįł bikééʼ wohááł doo, díí bikʼehgo yah ooyáádóó.

23 Ákohgo hojoobaʼ ádanohsin doo, dóó akʼeh dahonołʼį́ dóó aaʼákodanohsin; doo nanitłʼahgo lą́ danosin; tʼah hwiindzin nihee dahólǫ́ǫ doo dóó nízaadgóó tiʼdahoohnííh, dóó tʼáá áłtsojįʼ tʼah danóhsin; tʼáá áłahjįʼ Diyin God bibee hazʼáanii bikʼeh dahonołʼį́ʼ; tʼáá áłtso ííiyisíí danohsinígíí biká sodadołzin, iiʼ sizíinii dóó atsʼíískʼehjí; áłahjįʼ Diyin God nihaa yiléhígíí baa nátʼą́ą́ bichʼįʼ ahééh danohsin.

24 Áádóó oodląʼ, haʼólní, dóó diyingo ayóóʼóʼóní nihee dahólǫ́ dóó áłahjįʼ yáʼátʼéehgo dahiinohná.

25 Áádóó Bóhólníihii nikʼihojídlíi doo, nihiʼééʼ tʼáadoo daachiní, áko índa Abraham, Isaac, dóó Jacob, dóó Diyin yá yádaałtiʼii dadiyinii hodeeyáádą́ą́ʼ yę́ę bił nahisóótą́ą doo, nihiʼééʼ doo daachingóó azhą́ nihiʼééʼ chin bąąh ádaadingo, yá ąąsh bił hazʼą́ądi doo chʼídoohááł nohsingóó.

26 Áádóó áko shikʼéí ayóó ííníshníinii, díí saad Iiʼ Sizį́ Diyinii bikʼehgo nihichʼįʼ haasdzííʼ éí tʼáá aníigo shił hoolneʼ, dóó shiiʼ sizíinii tʼáá íiyisíí bił hóózhǫǫd, háálá shizaad tsʼídá yéego bíká ádaohtʼįįd dóó bikʼeh dahonoołʼįįdígíí biniinaa.

27 Áádóó áko, Diyin God biʼahoʼdilzééh nihikʼih hólǫ́ǫ doo, dóó danihghan dóó nihikédaayah bikʼi ałdóʼ, dóó nihilį́į́ʼ dóó nihinaaldloosh, dóó tʼáá ałtso niheeh dahólóonii bikʼih, nihizáanii dóó nihaʼáłchíní, niheʼoodląʼ dóó nihinaanish yáʼátʼéehii bikʼehgo, kodóó dóó ahoohoolʼáágóó. Dóó áko haasdzííʼ Amen.