1 Áádóó baa hoolzhiizh Alma diné sodizin atah danilíinígíí ałtso yichʼįʼ haadzííʼgo, éí Zarahemla kintahdí hadilyaa, priest dóó elder danilínígíí yikʼidadiilniiʼ, éí Diyingo eʼelʼíinii atsiitʼááh dah adilnííhii bikʼehgo, sodizin yikʼibídahólnííh dóó yikʼidadeezʼį́įʼgo áyiilaa.

2 Áádóó baa hoolzhiizh háida sodizin doo daʼatahígíí bibąąhági ádaatʼéii yaa ńdaʼooskango éí tó bee dabiʼdoolzį́į́ʼ, dóó sodizinjįʼ atah yíkai.

3 Áádóó ałdóʼ baa hoolzhiizh tʼáá háida sodizin atah nilínígíí tʼáadoo bąąhági átʼéii ya náʼooskango dóó Diyin God yidaahdoo hojoobaʼ aʼdiilyaaʼgo—bijéí yee adaadajoozdliʼígíí ááłdishní—tʼáá éí nahjįʼ adabiʼdiilyaa, dóó bízhįʼ nahjįʼ hadahasdzoh, áko dabizhįʼ tʼáá ákogi ádaatʼéii tʼáadoo bił dawoltaʼ da.

4 Áádóó áko Zarahemla kintahdi sodizin bikʼehgo adaʼalʼíinii haidilyaa.

5 Áko baa ákodadinóosį́į́ł nisin éí Diyin God bizaad tʼáá ałtso diné bá, doo éí łąʼ dooda biʼdooniid da Diyin God bizaad deididootsʼį́į́łgo ałah dooleełígíí.

6 Ákótʼée ndi Diyin God báʼáłchíní tʼáá ałhą́ą́ ahínaokah doo biʼdooniid, dóó chʼiyáán adąąh daotʼį́ dóó yéego sodadołzin éí Diyin God doo yeedahosinígíí biiʼ sizíinii baa ahayáago bá.

7 Áádóó baa hoolzhiizh éí Alma díí bee hazʼáanii hashtʼeʼyiilaago dahdiiyá, aooʼ, éí Zarahemla kintahdi sodizin bitsʼą́ą́dóó, dóó tooh Sidon haʼaʼaahjigo níyá, Gideon hootsoh góneʼ, éí áadi kintah hadilyaa, éí Gideon kintah wolyé, éí hootsoh Gideon hoolyéedi ályaa, éí ázhiʼ hastiin Nehor béésh hał yee yiyisxínéé bitsʼą́ą́dóó hoʼdóójiʼ.

8 Áádóó Alma ákǫ́ǫ́ níyá dóó Diyin God bizaad yaa halneʼgo yaa ndiidzá éí sodizin hootsoh Gideondi hadilyaa, éí dabizází tʼáá aaníí bił ííshją́ą́ ádaalyaayę́ę bikʼehgo saad yee haadzííʼ, diyingo áhodooníłígíí bikʼehgo, éí Jesus Christ, Diyin God biYeʼ, bitʼááʼ aaníinii bikʼehgo, éí bidineʼé yaa doogááłgo bibąąhági ádaatʼéii yá ninaʼdoodlééł, dóó diyingo óʼoolʼįįł bee bikʼih hodiiniiʼ. Áádóó díí éí ákótʼáo náhaasdzoh. Amen.