1 Ákó baa hoolzhiizh éí Alma Diyin God bizaad diné yee neidíníitą́ą́ʼ, kéyah Zarahemladóó hahoolzhiizh, áádę́ę́ʼ dóó tʼáá ałtso kédaayahgóó.

2 Áádóó tʼáá bí náʼíízooígííkʼehgo éí, díí saad Zarahemla kintahdi sodizin daʼatahígíí yihidiikaaígíí yee yichʼįʼ hahaasdzííʼ, kóníigo:

3 Shí, Alma, éí shizhéʼé Alma, díí Diyin God bisodizin bihigh priest nílį́į doo shił níigo shíísį́į́ʼ, bí éí Diyin God bibee adziilii dóó bibee óhólníihii bąąh siláhígíí binahjįʼ díí áálnííł, áko shooh, nihił chʼíhonishʼaah Nephi bikéyah nineelʼą́ądi sodizin haidilé; aooʼ, éí kéyahígíí Mormon bikéyah wolyé; aooʼ, dóó Mormon bitoohdi diné tó yee yiyíísį́į́ʼ.

4 Áádóó áko shooh, nihił chʼíhonishʼaah, díí diné éí aláahdi naatʼáanii Noah bidineʼé biyaa haaʼnil, Diyin God bibee ajoobaʼ dóó bibee adziilii bee.

5 Áádóó áko shooh, díí bikʼijįʼ, Laman bidineʼé díí doo kééhojitʼínídi dabiʼdisnaahgo ádayiilaa; aooʼ, nihił chʼíhonishʼaah, éí dabiʼdisnah, áádóó ałdóʼ Bóhólníihii bizaad bibee adziilii yee yisdánáhóóʼeezh; dóó nihí díí kéyah bikáaʼjįʼnihiʼdeetʼeezh, dóó kweʼé kéyahgi ałdóʼ Diyin God bisodizin hadadiilnééh.

6 Áádóó áko shooh, nihił chʼíhonishʼaah, shikʼéí danohłíinii, díí sodizin daʼnoohtahígíí, nihizází dabiʼdisnahą́ą́sh béédaołniih? Aooʼ, dóó Bóhólníihii bibee ajoobaʼ dóó bee bichʼįʼnahwiisnáʼígíísh tʼáá átʼé béédaołniih? Dóó índa nááná, chʼį́įdiitahdę́ę́ʼ biiʼ sizíinii yisdáyííʼeezhígíísh béédaołniih?

7 Áko shooh, éí éí bijéí łahgo áyiilaa; aooʼ, tsʼídá yéego awoshdę́ę́ʼ chʼéénísid, dóó éí Diyin God yichʼįʼ chʼéédaasdzid. Áko shooh, chahałheeł yiiʼ naakai ńtʼę́ę́ʼ; ákótʼée ndi, bitsʼíís dóó biiʼ sizíinii éí hoolʼáágóó saad bee adinídíinii binahjįʼ bitsʼádaʼdeezdíín daazlį́į́ʼ; aooʼ, anoonééł bitłʼóól dabóótąʼ ńtʼę́ę́ʼ, dóó chʼį́įdiitah bibéésh daʼahólzhaʼí nahalingo dabootah ńtʼę́ę́ʼ, dóó hoolʼáágóó tiʼhooʼnííh éí habaʼ ńtʼę́ę́ʼ.

8 Áádóó áko kʼad éí nanihídíshkid, shikʼéí, ndaaztseedísh? Áko shooh, ánihidishní, Ndagaʼ, tʼáá dooda.

9 Áádóó nááná naʼídíshkid, anoonééł bitłʼóól dabootʼą́ yę́ęísh kʼídahaasdláád, dóó daʼ béésh daʼahólzhaʼí nahalingo chʼį́įdiitahdi bee hoʼdótʼahą́ą́ísh ńdaostʼah? Nihił chʼíhonishaah, Aooʼ, éí ńdaostʼah, tʼáá íiyisíí biyiʼdi bił dahóózhǫǫd, dóó ayóó óʼóʼní bee yisdánáʼiildéehii yee dahóótáál. Dóó nihił hashneʼ éí éí yisdábiʼdootʼeezh.

10 Áádóó áko nanihídíshkid haʼátʼíísh bee yisdáiildééh? Áko, haʼátʼíísh éí bee hojoobaʼ áhwiinidzingo bee yisdánáʼiildééh? Anoonééł bitłʼóóldę́ę́ʼ haʼátʼíísh éí biniiłtłóóh, aooʼ, dóó ałdóʼ, chʼį́įdiitahdę́ę́ tʼáá átʼé bee hoʼdootʼaʼ yę́ę naostʼah?

11 Áko shooh, nihił hodeeshnih—daʼ shizhéʼé Alma Abinadi bizaad bizééʼdę́ę́ʼ yee naʼneeztą́ʼą́ąsh yoosdląąd? Dóó Diyin yá yáłtiʼii hodísiníísh nilį́į́ ńtʼę́ę́ʼ? Daʼ Diyin God bizaad yee haadzíiʼ, dóó éí shizhéʼé Alma yoosdląąd?

12 Áádóó beʼoodląʼígíí bikʼehgo bijéí tsʼídá tʼáá íiyisíí łahgo ádzaa. Áko shooh ánihidishní díí éí tʼáá ałtso tʼáá aaníí áhóótʼįįd.

13 Áádóó áko shooh, éí saad nihizhéʼé yee ninááneineeztą́ą́ʼ, áádóó bijéí ałdóʼ yéego łahgo ándáádzaa, dóó Diyin God tʼáá aaníinii dóó hinánígíí yichʼįʼ hojoobaʼ ádaʼdiilyaa dóó yaa dajoozliʼ. Áádóó áko shooh, tʼáá daʼoodlą́ągo iiná ádayiilaa; éí bąą yisdábiʼdootʼeezh.

14 Áádóó áko shooh, nanihídíshkid, shikʼiské díí sodizin daʼnoohtahígíí, diyinkʼehgoósh Diyin God náádanihishchį́? Daʼ nihiniiʼjįʼísh ánoolninígíí bee nihitsʼádaʼdeezdíín? Daʼ díigi átʼáoósh nihijéí tʼáá íiyisíí łahgo ádáádzaa?

15 Daʼ ánihiilaaí nihá nináʼnídláii biiʼ niheʼoodląʼásh chodaołʼį́? Daʼ niheʼoodląʼ bee náásgóó dísídóoʼį́į́ʼ, dóó daʼ nihitsʼíís hoolʼáágóó hiiná dooleełgo nółʼį́, dóó díí dááchxǫʼígíí doo dááchxǫǫhgóó náádidoodááł, Diyin God yidááhdóó yidoozįįł nahasdzáán bikááʼ ídaʼiilaayę́ę bikʼehgo bá ndahodootʼááł?

16 Shí nihił chʼíhonishʼaah, baa ntsóhkeesgo Bóhólníihii biinééʼ dasidootsʼą́ąʼgoshąʼ, áajįʼ ayííłką́ą go, kónihiłníigo: Wóshdę́ę́ʼ shaa hohkááh nihikʼidahojisdliʼii, háálá áko shooh, nahasdzáán bikáaʼgi nihinaanish yáʼátʼéehgo ádaoohłaa?

17 Éí doodago ayííłką́ągo daatsʼí Bóhólníihii áajįʼ bińdaʼdiidloh danohsingo baa ntsídaahkees, dóó kódidoohniił—Bóhólníihii, nihinaanish nihokááʼ bikáaʼgi ndaanishígíí éí yáʼádaatʼééh ńtʼę́ę́ʼ—daʼ áádóóísh yisdánánihidootʼish?

18 Éí doodago, daʼ Diyin God biʼaadahwiinítʼį́į bidááhdę́ę́ʼ nihiʼdoolzį́įʼgo nihiiʼ sizíinii niʼdiiłʼáhígíí dóó baa yínííł ninizínígíí niiʼ hadeezbingoósh baa ntsídiikos, bąąhági átʼéii niʼdiiłʼáhígíí tsʼídá ałtso béédiilnih, aooʼ, tsʼídá tʼaa ákótʼéego tʼáá átʼé bąąhági átʼéiiyę́ę béédiilnih, aooʼ, Diyin God bibee hazʼáanii doo ni nilínéé béédiilnih?

19 Ánihidishní, daʼ áajįʼ ayííłką́ągo daatsʼí Diyin God bichʼįʼ dego dídóohʼįįł nihijéí niłtólí dóó nihílaʼ chin bąąh ádingo? Ánihidishní, Diyin God ánoolninii nihiniiʼjįʼ bee bitsʼádaʼdeezdíingoósh bee dego dídóotsʼįįł?

20 Ánihidishní, daʼ yisdásdʼ dooltééł nohsin biʼiiníziinii bikééʼ ninooyáago?

21 Nihił chʼíhonishʼaah, éí bijį́ nihił bééhodoozįįł doo yisdánihidiʼdooltéłígíí; háálá diné doo yisdádooltéeł da tʼáá hazhóʼó biʼééʼ łigaigo yisgisgo tʼéiyá; aooʼ, biʼééʼ tsʼídá doo bąąh chin da silį́įgo índa, nihizhéʼé yaa da halneʼę́ bidił bee, éí doogááł dóó bidineʼé bibąąhági ádaatʼéii yá nináʼdoodlééł.

22 Áádóó áko nihííníshkeed, shikʼiské danohłíinii, Diyin God bibee ánihwiitʼaahdi dasitánígíí bidááhdę́ę́ʼ, nihiʼééʼ dił dóó tʼóó ahayóí tʼáadoo leʼé tʼóó baaʼihígíí bąąhgo, tsʼídá shąʼ haʼátʼíí nohsin dooleeł? Jó, díí éí haʼátʼíí yee nihaa halneʼ dooleeł?

23 Áko shooh ndaʼałtseedii danohłį́įgoósh yaahodoolnih, aooʼ, dóó bąąhági átʼéii ląʼída baa nisoohkaiígíí ałdóʼ yaa hodoolnih?

24 Áko shooh, shikʼiské nohłíinii, háidaísh Diyin God bił hazʼą́ądi, Abraham, dóó Isaac, dóó Jacob, dóó ałdóʼ Diyin yá yádaałtiʼii dadiyinii tʼáá ałtso, biʼééʼ daasgis dóó doo daachinii, dóó doo daabąąchinii dóó daalgaiígíí, yił dah dínóóhbįįł danohsin?

25 Ánihidishní, Ndagaʼ; tʼáá hazhóʼó hodeeyáádą́ą́ʼ Tʼáá Ałtsoní Ánihiilaií biyoochʼííd ádaahłéehgo tʼéiyá, éí doodago tʼáá hodeeyáádą́ą́ʼ biyoochʼííd danoozį́įʼgo, éí ákódaatʼéii yáʼąąsh bił hazʼą́ądi yah adookahgo baa ntsídadoohkosgo doo bíighah da; ndi ákódaatʼéii éí chʼídínóołkał háálá éí biʼiiníziinii bił hazʼáanii baʼáłchíní danilį́.

26 Áádóó áko shooh, ánihidishní, shikʼiské, nihijéí łahgo ádzaaígíí biiʼ nisoohyáádą́ą́ʼ, dóó kʼadę́ę́ sin ayóó óʼóʼní bee yisdánáʼiildéehii bee dahohtaałgo noozį́įʼgo, nanihídíshkid, daʼ kʼadísh tʼahdii tʼáá ákodanohsin?

27 Daʼ Diyin God binááł doo bíighahí baa naaháago, wohááł ńtʼę́ę́ʼ? Kódidííniiłísh, kʼad náánidiʼdoolyééł niʼdooʼniidgo, daʼ niyiʼdi, hojoobaʼ hwiinidzin bíighahgo biiʼ niséyá didiiniił? Daʼ Christ bidił biníkááʼ góneʼ nihiʼééʼ yisgis dóó łigaigo ályaa, éí éiyá bidineʼé bibąąhági ádaatʼéii yá nináʼdoodlééł?

28 Áko shooh, daʼ ádaa hodzódlí atsʼádinoohtʼą́? Ánihidishní, doo atsʼádóhtʼaahgóó díí tʼah doo óhłéehgo Diyin God baa dooháałgo doo bichʼįʼ hashtʼeʼ ádoołyaa da. Jó áko tsxį́įłgo hashtʼeʼádółnééh; háálá yáʼąąsh bił hazʼą́ądi kʼadę́ę́ baa hoolzhíísh, dóó háiida doo kótʼéhígíí hoolʼáágóó iiná doo baa doolyéeł da.

29 Áko shooh ádíshní, háísh ił hatsoh tʼah doo nahjįʼ bá kólnéeh da? Ánihidishní kótʼéhígíí éí doo hashtʼeʼ ádiilyaa da; dóó tsxį́įłgo hashtʼeʼ ádidoolnííł nisin; háálá áajįʼ aʼdoolkiłígíí kʼadę́ę́ baa hoolzhíísh, dóó hahgo baa hodoolzhishígíí doo bił bééhózin da; éí éí chin bąąhgo baa ákohodínóozįįł.

30 Áádóó ánáánihidishní, daʼ nihitahgoósh łaʼ bikʼis yá nahałtʼiʼ, éí doodago tʼáá íiyisíí yichʼįʼ nahwiiłná?

31 Yííyá bił hólǫ́ǫ dooleeł, háálá doo hashtʼeʼ ádiilyaa da, dóó ádaańʼdookąąłgo kʼad baa hoolzhiizh éí doodago éí doo yisdádoogááł da!

32 Aooʼ, tʼáá ánółtso bąąhági átʼéii bindaałnishígíí ndi yííyá nihikʼi silá; ádaandaʼoohkąąh, ádaandaʼoohkąąh, háálá Bóhólníihii Diyin God éí yee haadzííʼ!

33 Áko shooh, diné tʼáá ałtso hágo yiłní, háálá bibee ajoobaʼ éí yee yichʼįʼ dah dilnííh, dóó ání: Ádaańdaʼoohkąąh, dóó shił dahonohłǫ́.

34 Aooʼ, éí kóní: Shaa hohkááh dóó tsin bee iináanii bineestʼąʼ daohsį́į́ł; aooʼ, bááh dóó tó bee iináanii doo baa hochʼįʼígo wohsą́ dóó woohdlą́ą dooleeł.

35 Aooʼ, shaa hohkááh dóó naanish yáʼátʼéehii ádaahłééh, áko doo niʼjįʼ kʼínihidiʼdoolkał da dóó doo kǫʼ biih nihidiʼdooltłʼił da—

36 Háálá áko shooh, kʼadę́ę baa hoolzhíísh tʼáá háiida tʼáadoo neestʼą́ yáʼátʼéehii áyiilaaígíí, éí doodago naanish yáʼátʼéehii doo ííłʼínígíí, éí jicha dóó yínííł jílínígíí biniyéii hólǫ́.

37 O bąąhági átʼéii bindaałnishii; índa nihí nahasdzáán bikááʼ naadeełii bee nihił dahatsohgo, índa nihí yáʼátʼéehgo iiná nihił béédahózin dadohní ákótʼée ndi bitsʼádanoohkai, dibé baa áhályáanii ádin nahalingo, azhą́ dibé yaa áhályáanii łaʼ nihikééʼdóó tʼahdii nihikééʼ ání, ndi doo biinééʼ bikʼeh dahonołʼįį da!

38 Áko shooh, ánihidishní, dibé yaa áhályáanii yáʼátʼéehii níkáʼání; aooʼ, tʼáá bí bízhiʼ yee níkáʼání, éí Christ bízhiʼ; dóó dibé yaa áhályáanii yáʼátʼéehii biinééʼ doo bikʼeh honołʼį́įgo, ázhiʼ yee nihíízhiígíí bee, áko shooh, doo dibé yaa áhályáanii yáʼátʼéehii bidibé danohłį́į da.

39 Áádóó áko doo dibé yaa áhályą́ yáʼátʼéehii bidibé nohłį́įgo, háíshąʼ bidibé dahikahii bitah dahonohłǫ́? Áko shooh, ánihidishní, biʼiiníziinii éí nanihiniłkaad, dóó áajigo dibé dah yikahígíí daʼnoohtah; dóó áko háísh éí díí doo ákótʼée da didooniił? Áko shooh, ánihidishní, tʼáá háiida díí doo ákótʼée da nínígíí éí biyoochʼííd dóó biʼiiníziinii beʼawééʼ nilį́.

40 Háálá ánihidishní haʼátʼííshį́į́ yáʼátʼéhígíí éí Diyin God bitsʼą́ą́dę́ę́ʼ, dóó haʼátʼííshį́į́ doo yáʼáshóonii éí biʼiiníziinii bitsʼą́ą́dę́ę́ʼ.

41 Éí bąą, diné naanish yáʼátʼéhígíí ííłʼį́įgo éí naʼniłkaadii yáʼátʼéehii biinééʼ yidiitsʼaʼ, dóó yikééʼ yigááł; áko háíshį́į́ doo yáʼáshóonii binaanish ííłʼínígíí, éí biʼiiníziinii beʼawééʼ silį́į́ʼ dooleeł, háálá éí biinééʼ yiyíistsʼą́ą́ʼ, dóó yikééʼ yigááł.

42 Áádóó háíshį́į́ kódzaaígíí éí hachʼįʼ nʼdoolyééł; éí bąą, anoonééł éí hachʼįʼ bee nʼdoolyééł, yáʼátʼéehii bitsʼą́ą́jí jílį́įgo, tʼáá ałtso naanish yáʼátʼéehii bichʼįʼ ájídin dooleeł.

43 Áádóó áko, shikʼiské danohłíinii, dashíídóołtsʼįįł, háálá shiiʼ sizíinii beʼadziil bee nihichʼįʼ yáshtiʼ; háálá áko shooh, tsʼídá tʼáá bééhózínígo nihichʼįʼ haasdzííʼ áko doo adoohsiihgóó, éí doodago Diyin God bibee hazʼáanii bikʼehgo haasdzííʼ.

44 Háálá kótʼéego hadeesdzih biniyé shíkáʼádooʼniid, Diyin God bibee óʼoolʼįįł bikʼehgo, éí Christ Jesus biyiʼ; aooʼ, diné bidááhdę́ę́ʼ ndíínaał dóó danihizhéʼé yę́ę náasdi baa dahodoolzhish daanínée baa hodíílnih shiʼ dooʼniid.

45 Áádóó doo éí díí tʼéiyá da. Tʼáá shí shił bééhózinísh danohsin? Áko shooh, díí bee nihichʼįʼ haasdzíʼígíí éí tʼáá aaníí ádaatʼéego shił bééhózin. Dóó haitʼáo éí díí tʼáá aaníí ádaatʼéhígíí shił bééhózin danohsin?

46 Áko shooh, ánihidishní, Diyin God biʼIiʼ Sizį́ Diyinii shił ííshją́ą́ áyiilaa. Áko shooh tʼáá shí shił bééhodoozįįł nisingo tʼáadoo ashání dóó tʼóó sodiszingo tʼóó ahayóí yiską́. Dóó kʼad éí díí tʼáá aaníí ádaatʼéego tʼáá shí shił bééhózin selį́į́ʼ; háálá Bóhólníihii Diyin God biʼIiʼ Sizį́ Diyinii yee shił ííshjání áyiilaa; dóó díí diyingo ił ííshją́ą́ ályaaígíí shiiʼ hólǫ́ǫgo átʼé.

47 Áádóó ałdóʼ nááná, ánihidishní díí éí shił ííshjání ályaa, nihizhéʼé saad yee hadahaasdzíʼę́ę éí tʼáá aaníí ádaatʼé, azhą́ diyingo áhodooníłígíí bikʼehgo éí shiiʼ silá ndi, jó éídóʼ Diyin God biʼIiʼ Sizį́ Diyinii bee ííshjání ádaalyaa.

48 Ánihidishní, áko náásgóó ádahodoonííł, bee nihichʼįʼ hadeesdzihígíí, éí tʼáá shí tʼáá aaníí átʼéego shił bééhózin, dóó ánihidishní, Jesus Christ doogáłígíí éí shił bééhózin, aooʼ, aYeʼ, nihiTaaʼ Tʼáá Éí Tʼéiyá Bá Yizhchíinii, bibee ajoobaʼ, dóó ajoobaʼ, dóó tʼáá aaníinii biiʼ hólóonii. Áádóó áko shooh, eii éí nihokááʼ dineʼé bibąąhági ádaatʼéii nahjįʼ kwíidoolííł biniyé yighááh, aooʼ, diné tʼáá ałtso bibąąhági ádaatʼéii bidziil go bízhiʼ binahjįʼ daʼoodlą́ągo yikééʼ naazínígíí.

49 Áádóó áko ánihidishní díí bee hazʼáanii bikʼehgo shinaanish ályaa, aooʼ, shikʼiské ayóí ánihííníshʼníinii nanishtin doo biniyé, aooʼ, dóó tʼáá ałtso ákǫ́ǫ́ kéyah yikááʼgóó kéédahatʼíinii; aooʼ, tsʼídá tʼáá ałtso nanishtin doo, hadaastihii dóó ániid ndaakaiígíí tʼáá áłaʼ, dóó naalteʼé danilíinii dóó tʼáá bíniikʼehgo naaldeehii; aooʼ, ánihidishní náás dasoolį́įʼii, dóó tʼáá bitaʼígíí ndanohseʼígíí, dóó ániid hanáánoohtʼáanii; aooʼ, bichʼįʼ ádideeshniił ádaańdaʼoohkąąh dóó diyingo nináádanihiʼdiichííh.

50 Aooʼ, Iiʼ Sizį́ Diyinii éí kóní: Ádaańdaʼoohkąąh, tsʼídá tʼáá ánółtso nahasdzáán bikáaʼgi kéédahohtʼíinii, háálá yáʼąąshdi bił hazʼáanii éí kʼadę́ę nihichʼįʼ kólnééh; aooʼ, Diyin God biYeʼ ayóó átʼáo beʼtsaʼadinilííd, bibee adziil, aláahdi nilíinii, bee bidziilii, dóó bibee óhólníihii, yee nihai yíghááh. Aooʼ, shikʼiské ayóí ánihííníshʼníinii, ánihidishní, Iiʼ Sizį́ Diyinii ání: Áko shooh nahasdzáán tʼáá átʼé nineesʼą́ąjįʼ biNaatʼáanii bibee Ayóóʼátʼéii; dóó ałdóʼ yáʼąąshdi Naatʼáanii nilíinii hodíinaʼgo nihokááʼ dineʼé baʼáłchíní tʼáá ałtso bitahgóó bee adinídíín dooleeł.

51 Áádóó Iiʼ Sizį́ Diyinii ałdóʼ áshiłní, aooʼ, biinééʼ bidziilgo yee shichʼįʼ hadoolghaazh, kóníigo: Diné bitahgóó dínááh dóó kóbidiní—Ádaańdaʼoohkąąh, háálá ádaańdaʼsookango tʼéiyá yáʼąąsh hazʼą́ądi nihí dooleeł.

52 Áádóó ánáánihidishní, Iiʼ Sizį́ Diyinii ání: Áko shooh, tsénił éí tsin bikétłʼóolgi niitʼą́; éí bąą tsin bineestʼąʼ tʼáá ałtso doo yáʼátʼééhgóó éí kʼídahidoolniił dóó kǫʼ biyiʼ góneʼ ahidooltłʼił, aooʼ, kǫʼ doo nitséesii, índa kǫʼ doo dínóoltsisii átʼé. Áko shooh, dóó béédaołniih, Diyin Ayóóʼátʼéii yee haadzííʼ.

53 Áádóó kʼad shikʼiské ayóí ánihííníshʼníinii, ánihidishní, díí saadígíísh bídanółdzil doo; aooʼ, daʼ díísh nahjįʼ kódadoohłííł, dóó Diyin Ayóó Átʼéiísh tʼóó bikʼindoohkah; aooʼ, daʼ nihijéí biyiʼdę́ę́ʼ ádaa hodzódlí bee ádaa dahohniih dooleeł, aooʼ, daʼ ééʼ daʼílíinii tʼah biiʼ nishoojééʼ dooleeł dóó nihokááʼ bikáaʼgi tsʼídá aláahdi nidzinígíí nihijéí yíká ádáátʼį́, éí nihinaadeełii daʼílíinii átʼé?

54 Aooʼ, índa daʼ tʼahdii nááná łaʼ diné biláahgo áníshtʼé tʼah danohsin, aooʼ, daʼ tʼahndiísh nihikʼiské atídaałʼį́į dooleeł, hojoobaʼ ádaʼdiilyaa dóó Diyin God ayóó átʼáo bibee óʼoolʼįįł yikééʼ deikááh; binahjįʼ díí sodizin biyiʼjįʼ yah ábiʼdiishtʼeezh, Iiʼ Sizį́ Diyinii hadaałtʼé ádabiilaa, dóó ádaańdaʼooskango binaʼanishígíí ndeiyiijááh—

55 Aooʼ, dóó daʼ diné baa dahojoobáʼí, dóó bichʼįʼ ańdahaztʼiʼígíí, dóó doo baa daʼnohłéego, dóó nihinaalyeʼé bichʼįʼ baa danohchįʼ?

56 Áádóó akéeʼdi, tʼáá ánółtso bąąhági átʼéii doo niʼkódaałéehii, ánihidishní díí kódaatʼéí éí tʼááhodinaʼí kʼíhidoolniił dóó tsídzáhídóótłʼił tʼáá hazhóʼó tsxį́įłgo ádaańdaʼooskango tʼéiyá.

57 Áádóó kʼad ánihidishní, tʼáá ánółtso naʼniłkaad yáʼátʼéehii biinééʼ bikééʼ yiikah dooleeł danohsinígíí, doo yáʼátʼéehii bitahdę́ę́ʼ chʼíhóhkááh, dóó tʼáá sahdii danohłį́, dóó binichxǫ́ǫ́ʼí tʼáadoo bídadołnihí; áko shooh áádóó, bízhiʼ éí nahjįʼ kódadoolnííł, áko diné doo yáʼádaatʼéehii éí diné yáʼádaatʼéehii doo bízhiʼ bił daʼóltaʼ da dooleeł, áko Diyin God bizaad biʼdoolnííł, éí kóní: Diné doo yáʼádaashóonii dabízhiʼ éí shidineʼé dabízhiʼígíí doo bił daʼatah da dooleeł;

58 Háálá diné yáʼádaatʼéehii éí iináájí naaltsoos bízhiʼ bikááʼ ádadoolnííł, áádóó éí shinishʼnáájí bee aahidishʼaahii bichʼįʼ kódeeshłííł. Dóó kʼad, shikʼiské danohłíinii, haash yitʼéego éí díí bikʼijįʼ hadoohdzih? Nihichʼįʼ haasdziih, bikʼijįʼ haahdziihgo, éí éí bíniʼdii, háálá Diyin God yee haadzíʼígíí éí biʼdoolnííł.

59 Háálá háíshąʼ nihitahdóó naʼniłkaadii bilį́į́ʼ tʼóó ahayóígíí doo yaa áhályą́ą da dooleeł, áko doo maʼiitsoh bilį́į́ʼ yitah yílyeed da dóó doo bitsʼą́ą́ʼ adoolghał da? Áádóó áko shooh, maʼiitsoh bilį́į́ʼ yitah yilwogo daʼ doósh nahjįʼ baa adoolwoł da? Aooʼ, dóó índa akéeʼdi, yíighahgo da, yidiyoołhééł.

60 Áádóó kʼad ánihidishní naʼniłkaadii yáʼátʼéehii éí níkáʼání; dóó biinééʼ yísínóołtsʼą́ąʼgo atah doohááł, dóó bidibé nohłį́į dooleeł; dóó ánihiłní maʼiitsoh tʼáá íiyisíí dichin nilíinii éí doo łaʼ nihitahdoolwoł da, áko doo nihidoolgał da.

61 Áádóó kʼad shí, Alma, díí kóshidííniidígíí bizaad bee kónihidishní, díí saad bee nihichʼįʼ haasdzíʼígíí hazhóʼó bidaʼdoohłííł.

62 Díí éí bee hazʼáanii bikʼehgo nihí sodizin atah danohłínígíí bee nihichʼįʼ yáshtiʼ; dóó doo sodizin atah danohłínígíí éí ałdóʼ wóshdę́ę́ʼ nihidishníigo yáshtiʼ, kódishníigo: Hágo dóó ádaańaʼookąąhjįʼ tó bee danihiʼdilzį́į́h, ákohgo nihídóʼ tsin bee iináanii bineestʼąʼ atah dadoohsį́į́ł.