1 Áádóó áko baa hoolzhiizh tádiin yihah góneʼ ándawiiʼaahii dahwééʼaahgo, áłtsé yiziłígíí naakigóó yoołkáałgo, Moroni saad Helaman beiníʼą́, áájí kéyah hazʼą́ diné bitah ádahooníłígíí yee yił hoolneʼ.

2 Áádóó díí saad áyiilaa, kóníigo: Moroni shikʼis ayóó óóshníinii, Diyin Bóhólníihii bikʼehgo dóó anaaʼ bee nihichʼįʼ nahwiiʼná biyiʼ; áko shooh, shikʼis ayóó óóshníinii, díí kodi kéyahdi anaaʼ biiʼ neikaiʼígíí bee nił hashneʼ.

3 Áko shooh, naaki dimííl yázhí Ammon hastóí Nephi kéyahdééʼ yił nínánéé biyeʼké—nił bééhózin éí Laman nihizheʼé Lehi biyeʼ alą́ą́jįʼígíí yitsʼą́ą́dééʼ yikahígíí ádaatʼį́.

4 Áko éí bibeeʼádaʼoolʼįįł doodago doo daʼoodlánígíí éí doo baa hadeesdzih da, háálá tʼáá ałtso tʼáá íídą́ą́ʼ nił bééhózin—

5 Ákohgo bee nił hashneʼ díí naaki dimííl yázhí tsíłkéí yee ndaʼabaahí dadeidiijaaʼ, dóó nihinaatʼáanii dííleeł dashidííniid; dóó nihikéyah bichʼą́ą́h ndeibaahgóó dadiiʼnáh.

6 Áádóó áko dabizhéʼéyę́ę yee ahadaʼdeestʼánée éí nił bééhózin, éí yee ndaabaahígíí doo bikʼiské yee yichʼįʼ ndadoobahgóó ndeidoołtsxił da.

7 Ákondi naadiin hastʼą́ą́ yihah góneʼ, nihichʼįʼ ndahwiiʼnáago deiyiłtsʼą́ dóó nihitiʼhooʼníí bee bíniʼdeiʼaʼ, tʼáá ádeʼ yee ahadaʼdeestʼánée kʼídeetííhgo yee ndaabaahí kʼasdą́ą́ʼ nídeidiijaaʼ yee nihichʼą́ą́h ndadoobahgo.

8 Ákondi díí ahaʼdeetʼą́ ádayilaaʼígíí doo nahjįʼ kódeidoolííł da nisin, éí binahjįʼ Diyin God nihidziil ánihidoolííł nisin, áko doo yéigó tiʼdahodiiʼnih da háálá yee ádeihadaasdzííʼ yę́ę yedaʼiilaa.

9 Ákondi shooh, díí łahgo íiyisíí baa nihił dahózhǫ́ǫ doo. Háálá áko shooh, naadin hastą́ą́ yihah góne, shí, Helaman, díí naaki dimííl yázhí tsíkéí Judea kin dashijaaʼgóó níʼeezh, Antipus bíkáʼadiijahgo, éí diné binaatʼááh nilį́įgo bikʼi dadoołniiʼ yę́ę bikéyahdi.

10 Áádóó naaki dimííl shiyeʼké bił ahííshkai, (éí shiyeʼké yííníshní) Antipus bá ndaabaahí bił ahííkai, éí yee dabidziil daazlį́įgo Antipus tʼáá íyiisíí yaa bił hóózhǫǫd; háálá áko shooh, bándaabaahí tʼóó ahayóí Laman dineʼeʼ bitsʼą́ą́ʼ ndeistseed, ákóhoodzaaʼígíí biniinaa yínííł dasiidlį́į́ʼ.

11 Ákotʼée ndi, díí bee nihiiʼhaadahwiisdoh, biDiyin God dóó bikéyah yiká ádáátʼįįdgo nidaaztseed, aooʼ, dóó kʼad bił dahózhǫ́.

12 Áádóó Laman dineʼé deesnááhígíí ałdóʼ ląʼí tʼah deiyótąʼ, éí tʼáá átʼé ndaabaahí binantʼaʼí danilį́, łaʼígíí eí tʼáá átʼé ndeestseed. Áádóó kʼad éí Nephi bikéyahdi yisnááh danilį́ daniidzin; éí tʼah doo ndabiʼditseed da.

13 Áádóó áko Laman dineʼé nihindaabaahí ayóí ádaatʼéii tʼóó ahayóí ndeiłtseedgo díí kinhadaasʼá yee ádídahoosnííʼ.

14 Manti kéyahdi, doodago Manti kin dashijaaʼgi, dóó Zeezrom kin dashijaaʼgi, dóó Cumeni kin dashijaaʼgi, dóó Antiparah kin dashijaaʼgi.

15 Áádóó díí kin dah naazhjaaʼ yee ádídahoosnííʼ lá Judea kin dashijaaʼdi níyáago; dóó Antipus dóó bá ndaabaahí kin daashijaaʼ yéígo yindaʼatłʼingo yiiłtsą́.

16 Aooʼ, áádóó bitsʼíís dóó biiʼnaazíinii baa ndahóókaad, háálá jį́įgo éí yéego ndaazbaaʼ dóó tłʼéego bikin dashijaaʼ yindaashnish; áádóó ałʼąą átʼéego ayóó átʼáo tiʼdahoozniiʼ.

17 Áádóó akweʼé akʼeh dadidoodleeł danízin doodaiiʼ yą́ą́h ndabiʼdiʼdootsxił; éí díí tʼáá díkwíhí ndaabaahí níʼeezhígíí, aooʼ, shiyeʼké danilinígíí, ayóó átʼáo yee bił dahóósih dóó tʼáá íiyisíí yaa bił dahóózhǫǫd.

18 Áádóó áko baa hoolzhiizh Laman dineʼé éí Antipus bá ndaabaahí hózhǫ́ bidziil ályaago hadeideesʼį́į́ʼ, Ammoron Judea kin dashijaaʼdi doo ndadohbah da dííniid, doodago doo nihikʼihjįʼ, ndadoobah da.

19 Áádóó kótʼáó Diyin Bóhólníihii nihaajoozbaʼ; háálá doo danihidziilgóó nihikʼiijééʼgo nihindaabaahi tʼáá díkwíhí yiltʼé yę́ę ndeistseed doo ńtʼę́ę́ʼ; ákondi yisdánihiʼdootʼeezh.

20 Ammoron díí kin dashijaaʼ yee ádídahoosniʼígíí tʼáá deinóhtąʼ bidííniid. Áádóó kótʼáó naadiin hastą́ą́ yiihahígíí ahoolzhiizh. Áádóó naadiin tsostsʼid yihahgo nihikin dashijaaʼ bidziilgo ádeilyaa dóó anaaʼ bichʼįʼ hashtʼeʼádadiilyaa.

21 Áko Laman dineʼé bíniʼ nihaa dadidoobah daniidzin; háálá nihí éí doo bikʼiidiijah da bidziilgóó bił nahazʼą́ądi.

22 Áádóó baa hoolzhiizh nihindaalchiʼí binaagóó hadaʼásíídgo ádeilyaa, Laman dineʼé deiyinééhgóó hadeiʼsííd, áko tłʼéego doo niihíígha chʼídoonééł da doodago jį́įgo náhookǫsjigo nihikin dah naazhjaaʼígíí doo yikʼiidoojah da.

23 Háálá nihił béédahózin éí kin dah naazhjaaʼgóó doo dabidziilgóó nahazʼą́; éí bąą díí kódeiniidzį́į́ʼ, nihił chʼénínáago, bikéé dahdidiinééł, áko kótʼáó bikéédééʼ dóó bidááhdééʼ tʼáá ałchishdééʼ bikʼiidiijah. Ákótʼáo bikʼehdadidiidleeł daniidzį́į́ʼ; ákondi shooh, díí bindahwiitʼahę́ę́ʼ doo nihá bikʼeh áhoodzaa da.

24 Tʼáá átʼé bándaabaahí nihííghah dahdidoonééłgo yéédaaldzid, tʼáá díkwíhí ndi yaa daastiʼ, háálá doo ayóó dabidziil da dóó ndabiʼdootsxił.

25 Áádóó Zarahemla bikin dashijaaʼ ałdóʼ doo bichʼįʼ dahdidiiʼnééł da danízin; áádóó tooh Sidon hideezlį́įdi doo tsʼinaa ndoonééł da, Nephihah bikin dashijaaʼjįʼ.

26 Áádóó kótʼáó, bindaabaahí yił, kin dah naazhjaaʼ yee ádidahoosníiʼígíí tʼáá íiyisíí tʼáá deiníitąʼ doo danizin.

27 Áádóó áko baa hoolzhiizh díí yihah biyiʼ naaki yiził góneʼ, díí naaki dimííl yázhí shiyeʼké bidishnígíí yee dabidziil dooleełígíí dabizhéʼé ląʼí nihaadeiyizjaaʼ.

28 Áádóó ałdóʼ Zarahemla kéyahdééʼ naaki dimííl yázhí diné ndaabaahí nihaa deizʼeezh. Áádóó kótʼáó neeznáá dimííl yázhí ndaabaahí bił hashtʼeʼádadiilyaa, dóó chodeidoołʼįįłígíí ałdóʼ, áádóó bizáanii dóó baʼáłchíní yídeʼdanilinígíí ałdóʼ.

29 Áádóó Laman dineʼé, tʼáá ákwííjį́ nihindaabaahí ląʼí yileełgo deiyooʼį́, dóó choideidiilįįłígíí nihaaʼhagheehgo biniinaa, nihéédaasdzííd, dóó nihichʼįʼ dahdadiibaaʼ, nihaaʼhageeh yę́ę dóó bee danihidziil ádaʼdiilnééhę́ę nihitsʼą́ą́ʼ niʼ kódeidoolííłgo.

30 Áko Laman dineʼé kódadoonííłgo baa ákodaniizį́į́ʼgo nihidaʼdiiłʼá, ádadiilníłʼígíí bidahosidiitʼą́: éí bąą Antipus shiyeʼké danilinígíí nihííghahgóó kin dashijaaʼ bichʼįʼ doohnééł nihidííniid, nihinaagóó kin dashijaaʼ bichʼįʼ daʼíínółjiid ádaʼdołʼį́įgo.

31 Áádóó Antiparah kin dashijaaʼ bííghahgóó chʼídiiʼnééł, biláahdi kin dashijaaʼ bichʼįʼ deeʼná nahalingo, éí tónteel binaashii.

32 Áádóó baa hoolzhiizh náás dahdadiiʼná, daʼíínnííjiid nahalingo, éí kin dashijaaʼ bichʼįʼjigo.

33 Áádóó baa hoolzhiizh Antipus łahdóó bandaabaahí yił dahdiiná, łaʼígíí éí tʼáá ákǫ́ǫ́ kin dashijaaʼ yaaʼádahalyą́. Ákondi tʼáadoo dahdiiʼnáa da shí tsíłkéí bił ndaashbaahígíí bił dahdiináago índa, dóó Antiparah kin dashijaaʼ bííghahjįʼ niiʼná.

34 Áádóó áko, Antiparah kin dashijaaʼgi Laman dineʼé ndaabaahí dabidziilígíí dahyinééłgo ályaa; aooʼ, tʼóó ahayóígo.

35 Áádóó baa hoolzhiizh bándaalchiʼí bił dahoolneʼgo, bindaabaahí yił níná dóó nihikʼijįʼ dadeezbaaʼ.

36 Áádóó baa hoolzhiizh bitsʼą́ą́jįʼ dahdadínííchą́ą́ʼ, náhookǫsjigo. Áádóó kótʼáó Laman dineʼé aláahdi dabidziilígíí dahdadíníítʼaaʼ;

37 Aooʼ, tʼáá nizaadjįʼ nihikééʼ níná, Antipus bikééʼ yinééł deiyiłtsʼą́ągo, bedaʼadziil yee, doo nishtłʼahjígo dóó doo nishʼnáájígo deinééh da, ákondi kʼéhasdon nihikééʼ yinééł; dóó ádaniidzingo, tʼah doo Antipus nihikʼííkááhgóó ndanihidoołtsxił yiniyé ádaatʼįʼ, dóó díí éí nihidineʼé doo bindootʼih dabiniyé.

38 Áádóó áko Antipus, atídeiʼneeh yiyiłtsʼą́ągo, bá ndaabaahí tsxį́į́łgo yił dahdiiná. Ákondi shooh, chahóółhéél, éí bąą tʼáadoo nihíníjééʼ da, áádóó Antipus ałdóʼ tʼáadoo bikʼíníjééʼ da; éí bąą tłʼéégo daʼiilghaazh.

39 Áádóó baa hoolzhiizh tʼah doo haʼaʼaahdą́ą́, áko shooh, Laman dineʼé nihikééʼ yinééł. Áko kʼad bił daʼahidiighááłgo doo bídeiníighah da; aooʼ, shiyeʼké tsíłkéí ndabiʼdidooltsiłgo doo bee hoséłʼą́ą da; éí bąą tʼáá náás yiiʼnééł, diné doo kééhojitʼíníjigo dahdiiʼná.

40 Áko kʼad bíndadoohtʼih biniinaa doo nishtłʼajigo dóó doo nishnáajigo dadidoonééł da; áádóó ałdóʼ shikʼeh dadoodleeł biniinaa doo nishtłʼajigo dóó doo nishʼnáájígo kóshneeh da, dóó doo bikʼeh dadidiidleeł da, ndi dashiidoołheeł, dóó nihitsʼą́ą́ chʼídoojah; áádóó kótʼáó diné doo kééhojitʼíníjigo daníichééhgo iʼííʼą́, chahałheeł hazʼíįjįʼ ndi.

41 Áádóó baa hoolzhiizh nááná, haʼííʼą́ągo Laman dineʼé nihikʼékai, dóó bitsʼą́ą́ dahdadíníichą́ą́ʼ.

42 Ákondi baa hoolzhiizh doo nizaad danihinééłchééhgóó ndahaastłah; tsostsʼid yiził dóó tááʼgóó yoołkáałgo haʼííʼą́ągo áhóótʼįįd.

43 Áádóó áko, Antipus daatsʼí bikʼíkai hólaaʼ, ákondi shándaabaahí ábidishní: Áko shooh, doo nihił béédahózin da ákondi bikʼijįʼ diikah biniyé ndahaastłah, áko binahatʼá yee azahdanihidínóoʼahgo danihidoosił biniyé.

44 Éí bąą shiyeʼké, haʼátʼáo baa ntsídaahkees, daʼ bikʼijįʼ ndadiibahísh?

45 Áádóó áko ándishní, Moroni shikʼis ayóó aníshníínii, tsʼídá tʼah doo ayóó atʼéego adziilii yiistsééh da ńtʼę́ę́ʼ, ndagaʼ, doo Nephi dineʼé bitah łaʼ kótʼée da.

46 Háálá tʼáá áłahjįʼ shiyeʼké danilį́įgo baa ntséskees (háálá tʼáá átʼé tʼah ániid ndaakai) bí ałdóʼ ákódashiłní: Nihizheʼé, shooh nihiDiyin God nihił hólǫ́, dóó nanihidiʼdootsxiłgo doo yee hasʼą́ą da; éí biniinaa dahdadidiibah; doo éí nihikʼis ndadiiltsxił da doo nihichʼįʼ ndahwiiłnáágóó, éí bąą txįʼ dah dadidiibah, Antipus bindaabaahí da yikʼehdadidoodleeł.

47 Áko tʼah doo dadibaah da ńtʼę́ę́ʼ; ákondi anoonééł doo yee daaldzid da; áádóó bizází tʼáá bí ádeinízingo kéédahatʼínéé hózhǫ́ bił danilį́ tʼáá bí beʼiinaʼ éí ndagaʼ; aooʼ, háálá bimá ndabineeztʼą́ą́ʼ, doo bił naaki danilį́į́góó, Diyin God éí yisdábidooʼish.

48 Áádóó bimá yee ndabineeztʼą́ą́ yę́ę shił ndeiyóóltaʼ, kódaaníigo: Nihí doo naaki nihił danilį́į da háálá díí éí nihimá deiyoodlą́.

49 Áádóó baa hoolzhiizh shiyeʼké naaki dimííl yázhíʼígíí bił Laman dineʼé bikééʼ yíínééł yę́ę nátʼą́ą́ʼ yichʼįʼ dah dadiibaaʼ. Áádóó áko shooh, Antipus bindaabaahí bikʼiijééʼ, tʼóó báhadzidgo yił ałkʼiijééʼ.

50 Antipus bándaabaahí chʼéédadeeskai, háálá nízaadééʼ tsxiłgo nínánígíí biniinaa, Laman dineʼé kʼadę́ę́ yilákʼeekááhgo; dóó tʼáadoo shinaaki dimííl yázhí ndaabaahí bił náníshnáágóó éí shį́į́ ndabiʼdiztseed doo ńtʼę́ę́ʼ.

51 Áko Antipus bééshał bee biʼdiisyį́, dóó ląʼí binaatʼáánii ałdóʼ, háálá chʼééhdeeskai, tsxį́į́łgo nínánígíí biniinaa—éí bąą Antipus bindaabaahí, binaatʼáánii ndabiʼdistxeedígíí biniinaa bił dahóóląąd, éí Laman dineʼéjígo dahwiʼniilná.

52 Áádóó baa hoolzhiizh Laman dineʼé doo tʼą́ą́ ndahiniyéés da daazlį́į́ʼ, dóó bikééʼ dahdiijééʼ; dóó Laman dineʼé yéigo bikééʼ yinééłgo Helaman bikééʼdééʼ naaki dimííl yázhí níná, dóó ląʼí ndeestseed, áko Laman dineʼé bindaabaahí ndahaastłah dóó Helaman yichʼįʼ náhaaskai.

53 Áko Antipus bidineʼé Laman dineʼé nahaskaigo deiyiłtsʼą́, bihastóí ahídeiyizheezh áádóó Laman dineʼé yikéédóó yikʼiijééʼ.

54 Áádóó áko baa hoolzhiizh éí nihí, Nephi bidineʼé, Antipus bidineʼé, dóó shí shinaaki dimííł yázhí bił, Laman dineʼé bindasiitʼiʼ; dóó ndasiiltseed; aooʼ, bee ndaʼabaahí doo ádeinízin da ndi ndeiyizhjaaʼ dóó ałdóʼ dabidiʼdisnáá.

55 Áádóó áko baa hoolzhiizh ałtso nihaaʼádaʼdeestʼą́ągo, áko shooh, díí tsíłkéí bił ndasébaaʼígíí yííłtaʼ, tʼóó ahayóí ndaaztseed nisingo béésésdzííd.

56 Ákondi shooh, ayóó átʼéego shił hóózhǫǫd, doo łaʼ nahasdzáán bikáajįʼ naaíítłiz da; aooʼ, Diyin God beʼadziil bee dahólǫ́ nahalingo ndaazbaaʼ; aooʼ, doo ła hastóí kótʼáó álilee bikʼeh adziilgo yee ndaʼałtseed da ńtʼę́ę́ʼ, dóó díí ayóó átʼáo adziil Laman dineʼé yee ndeistseed; áádóó díí biniinaa Laman dineʼé tʼóó yisnááh dadiidleeł daniizį́į́ʼ.

57 Áádóó dabiʼdisnááhígíí doo báhazʼą́ nihee hólǫ́ǫ́góó, éí tʼóó bikʼidadíníítʼį́į́ʼ Laman dineʼé bindaabaahí bitsʼąą, éí bąą Zarahemla bikéyahgóó adashiitʼeezh, dóó łahdóó hastóí Antipus bindaabaahí tʼáadoo ndabiʼdiztseedígíí, éí adabizheezh, áádóó łaʼ chʼéédziʼígíí éí shitséłkéí Ammon dineʼé yidiikai, dóó Judea kin dashijaaʼgóó bił ndaniiʼná.