1 Áko baa hoolzhiizh Nephi bidiné bitahgo andahwiiʼaahii dahweeʼaahgo hástʼą́ą́ nááhai, kéyah Zarahemladi doo saad ałchʼįʼ ahaʼnííł doodaiiʼ anaaʼ hólǫ́ǫ da;

2 Ákondí diné éí bichʼįʼ ndawiisʼnááʼ, aooʼ, bikʼiské ndaaztseedígíí biniinaa tʼáá íiyisíí bichʼįʼ ndawiisʼnááʼ, dóó bilį́į́ dóó ndeiniłkaad ndaaztseedígíí ałdóʼ biniinaa, dóó bitłʼoh náádą́ą́ deiyilʼá dááchxǫʼą́ą́go ałdóʼ, éí Laman dineʼé yikʼi naaldeehgo deiyiłchxǫʼ.

3 Áádóó yéego bichʼįʼ ndawiiʼnánígíí biniinaa diné biiʼ sizíinii tʼáá átʼé yínííł daazlį́į́ʼ; dóó Diyin God yee nahwiiʼáahii bikʼihjįʼ kólyaago deiyoosdląąd háálá bibąąhági ádaatʼéii dóó tsʼídá aláahdi woolchʼį́į́d yaa naakaiʼígíí biniinaa; éí bąą hónaanish béédazhdoolnih biniyé chʼééhonísid.

4 Áádóó sodizin tʼáá átʼé hadeidilééhgo hahoolzhiizh; aooʼ, dóó ląʼigo tooh Sidondi tó bee dabiʼdoolzį́į́ʼ dóó Diyin God bisodizin yidahidiikai; aooʼ, Alma tʼáá bí tó yee yiyíísį́į́ʼ, éí sodizin daʼatahígíí bihigh priest dooleełgo biʼdiilzį́į́ʼ, bizhéʼé Alma bikʼih sodoolzingo bíísį́į́ʼ.

5 Áádóó baa hoolzhiizh andahwiiʼaahii dahweeʼaahgo tsostsʼid náhááh góneʼ táádi dimííl dóó baʼaan ashdląʼdi neeznádiin diné yiltʼáó Diyin God bisodizin yihidiikai dóó tó bee dabiʼdoolzį́į́ʼ. Dóó bikʼiʼdahooshzhiizh Nephi bidineʼé anahwiiʼaahii bikʼihdahwéeʼaahgo tsostsʼid ndááhai; áko ahodeeszééhgo ahoolzhiizh.

6 Áádóó baa hoolzhiizh andahwiiʼaahii dahweeʼaahgo tseebíí náhááh góneʼ, sodizin daʼatahígíí adaadazoodlí daazlį́į́ʼ, tʼáá íiyisíí daʼatinígíí biniinaa, dóó naatʼą́hí daditsxǫsígíí, dóó naatʼą́hí nizhónígo-daastłʼónígíí, dóó bilį́į́ʼ dóó binaaldlooshii kʼeeʼaandinééstʼą́ biniinaa, dóó bibéésh óola, dóó bibéésh łigaii, dóó táá ałtso daʼílíinii ałʼąą ádaatʼéii, éí yiká ádaatʼį́į́go shódeiyoostʼeʼ; dóó díí táá ałtso yee adaadazodlį́įgo ádadootʼį́, dóó ééʼtʼáá íiyisíí daʼílíinii yee hadaditʼé daazlį́į́ʼ.

7 Áko díí Alma tʼáá íiyisíí bee bichʼįʼ nahwiiʼnah, aooʼ, dóó ląʼída diné sodizin yiiʼ ndaʼnitiní, dóó priest danilínígíí, dóó elder yikʼi sodadoolzingo yiyiisį́į́ʼyę́ę ałdóʼ; aooʼ, dóó ląʼí yéego yinííł daniizį́į́ʼ háálá diné bitahgóó bąąhágiʼ átʼéii dahazlį́į́ʼgo deiyooʼínígíí biniinaa.

8 Háálá deiyiłtsą́ tʼáá íiyisíí yinííł danilį́įgo diné bisodizin daʼatʼinígíí adaadadzódlí daazlį́į́ʼ, dóó bee daʼatʼíinii bijéí dóó nahasdzáán bikááʼgóó tʼáadoo bee chʼodaaʼínígíí ádiih deiyisdlá, ałhidiníłnáó, ahąą ndeiyiłhaał daazlį́į́ʼ, áádóó tʼáá bí ádanizinígíí dóó bił yáʼádaatʼééhígíí tʼáá háíshį́į́ʼ doo tʼáá bigiʼ ádaatʼínígíí atídeiłʼį́ daazlį́į́ʼ.

9 Áádóó áko, díí andahwiiʼaahii dahweeʼaahgo tseebíí yihah góneʼ, diné sodizin daʼatahígíí ayóó átʼéego daʼahijoodląʼ daazlį́į́ʼ; aooʼ, oolchʼį́į́d, dóó áhachįʼ, dóó ajoodlá dahazʼlį́į́ʼ, dóó atíʼilʼį́, dóó adaadadzódlí, Diyin God bisodizin doo daʼatahígíí bilahgo ndi adaadazodlí daazlį́į́ʼ.

10 Áádóó áko andahwiiʼaahii dahweeʼaahgo tseebíí yíhai; dóó sodizin biyiʼdóó bąąhágiʼ adaatʼínígíí éiyá doo sodizin daʼatahígíí tʼáá íiyisíí bidínóołtłʼahii tʼáadoo bidáahjįʼ adahohʼníłídeiníłtłʼah; dóó sodizin náás bee hoogáłę́ę tʼą́ą́ʼ kódzaa.

11 Áádóó baa hoolzhiizh nahastʼéí haahááh góneʼ dahweeʼaahgo, Alma sodizin biyiʼ bąąhági adaajitʼį́įgo haideesʼį́į́ʼ, dóó sodizin atah danilínígíí doo daʼoodlánígíí doo yáʼátʼéehii dóó nááná łah doo yáʼáshóonii yichʼįʼ adeiyiʼééshgo ałdóʼ yiyiiłtsą́, áko diné atídadoonííł.

12 Aooʼ, diné tʼáá íiyisíí ałʼąą átʼáo nitsídaakeesgo yiyiiłtsą́, łaʼ ádaadadzolí, daaʼáhijoodłá, baa dahojoobáʼígíí dóó biʼééʼ ádaadinígíí dóó dichin danilínígíí dóó dibááʼ danizinígíí dóó bitah dahoneezgaiʼígíí dóó atídaadzaaígíí yitsʼą́ąjįʼ nínádaayis.

13 Áko díí diné bitahgóó áhootʼéhígíí biniinaa chah hahóóʼá, łaʼ éí hojoobá adaatʼį́, bikáʼadoowołígíí yikáʼadahaalyeed, atéʼéʼí danilínígíí dóó baa dahojoobáʼígíí yaa daʼiilé, dichin danilínígíí yaadaʼiiłtsóód, dóó tʼáá ałtsoní yikʼee tiʼdahooʼnííh, háálá éí Christ yá adaatʼį́, éí náásdi doogááłgo diyingo áhodooníłígíí bikʼehgo.

14 Éí bichʼįʼ yoołkaałgo ndeiyoolí, áko bibąąhági ádaatʼéii baaʼńdidootʼaał; háálá daneeznánígíí náádahiidooʼnaałgo tʼáá íiyisíí yaa bił dahózhǫ́ǫ́d, Jesus Christ bikʼehgo áhodoonííł dóó bibeʼadziilii dóó anoonééł bitłʼóól yitsʼą́ą́dééʼ yisdáʼdooʼish.

15 Áádóó áko baa hoolzhiizh Alma, baadahojoobáʼígo Diyin God yikʼééʼ deiyíkahígíí tiʼdahoonííhgo yiyiiłtsʼą́, dóó łaʼ diné chʼéékaiʼígíí atíʼalį́ bikʼih yáádeiyiitsih, dóó doo aheełtʼéégo baa ntsáhákees yiiłtsʼą́ą́, éí biniinaa tʼáá íiyisíí yiniił silį́į́ʼ; ákótʼée ndi Diyin Bóhólníihii biʼIiʼ Sizį́i Diyinii tʼáadoo bikʼideeyáa da.

16 Áádóó hastiin bił ééhózinii sodizin biyiʼdóó elder dahyikahdóó łaʼ yikʼidiilniiʼ, dóó diné adaanínígíí bikʼehgo bóhólníihgo abiʼdiilyaa, áko bee hazʼánii adaalyaayę́ę bikʼeh hólʼį́į doogo yee bóhólníih dooleełgo bąąh niilyá, dóó diné bąąhágiʼ átʼéii yaanaakaiʼígíí dóó adąąh ndahatʼą́ʼígíí yee bóhólníihgo yánahwiiʼaah doo.

17 Áko díí hastiin Nephihah wolyé, dóó éí aláahdi ánahwiiʼaah doogo bikʼihodiiniiʼ; dóó ánáhwiiʼaahgo-dahsidá dóó diné yikʼideezį́įʼgo yá nahaʼá.

18 Áko sodizin yikʼi high priest dooleełgo Alma tʼáadoo beediníʼáa da, ndi tʼáá bí high priest tʼahdii nilį́; ákótʼée ndi Nephihah ánahwiiʼaah nilį́įgo yeediníʼą́.

19 Áádóó tʼáá shí diné bitah naasháa doo nízingo ayiilyaa, doodago Nephi bidineʼé bitahgo, áko Diyin God bizaad yee neidinóotʼį́į́ł, Diyin bá naʼanish béédazhdoolnih biniyé, dóó háchʼįʼ kwíídoolííł, Diyin God bizaad bee, tʼáá ałtso adaahodzódlí dóó ndaʼadloʼ dóó tʼáá átʼé diné bitahgo saad ałchʼįʼ adajiniłígíí, éí doo bee hashtʼeʼninázhdookah da tʼáá hozhǫ́ʼí tʼáá aaníí yéego yee yikʼijįʼ haadzííʼgo tʼéiyá.

20 Áádóó baa hoolzhiizh nahastʼéí yiihah góneʼ Nephi bidineʼé yikʼi dahweeʼaahgo, Alma anahwiiʼaahii-sidáági Nephihah yeediníʼą́, dóó diyingo ałkééʼ nahatʼá hódahgo Diyin God bibeʼadziilii bohooghááł tʼéiyá yinaalnishgo áʼdiilyaa, Diyin God bizaad tʼáá aaníí yaa halneʼgo, diyingo ił ííshją́ą́ ályaaígíí dóó diyingo áhodooníłígíí bikʼehgo.