1 Áádóó áko baa hoolzhiizh łaʼtsʼáádah yiził dóó náhastʼéítsʼáadah yihah góneʼ, neeznáá jį́ yoołkaał góneʼ, Laman dineʼé bindaabaahí Ammonihah kéyah yichʼiʼ yinééłgo deyiiłtsą́.

2 Áádóó áko shooh, éí kin dashijaaʼ hastʼenánil, dóó Moroni kin dashijaaʼ binaagi ndaabaahí łaʼ dahyinééłgo áyiilaa, dóó łeezh binázgeedgo ádeiyilaaʼ Laman dineʼé beʼałtʼį́į́ biʼakʼaaʼ dóó bitsé bichʼą́ą́h doo biniyé; háálá áko shooh, tsé dóó akʼaaʼ yee daʼahíbááh.

3 Áko shooh, ádííniid Ammonihah kin dashijaaʼ hastʼenályaa. Ánihidishní, aooʼ, łahdóó hastʼenályaa; háálá Laman dineʼé łah deiyiiłchǫʼ éí diné bąąhágiʼ ádaatʼínígíí biniinaa, éí tʼáá hódíínaʼí náádoolchxǫǫł danízin.

4 Ákondi shooh, tʼóó báhádzidgo baandahóókaad; háálá áko shooh, Nephi dineʼé bináágóó ndaʼazgeed, éí tsʼídá hódahdi ádeiyiilaa áko Laman dineʼé bitsé dóó beʼakʼaaʼ tʼáadoo baa heezjééh da, áádóó ałdóʼ yikʼiidoojahgo doo yídeiyíghah da yaheʼetiingi tʼéiyá.

5 Áko ákweʼé hoolzhishgo Laman dineʼé bindaabaah binaatʼááh tʼóó bił daʼahooyóí, Nephi dineʼé bił éédahózinígíí hasih bił nahazʼą́ hashtʼedeiyiilaaʼígíí biniinaa.

6 Áko Laman dineʼé binaatʼáánii kódaniizį́į́ʼ, alááhgo tʼóó ahoniyóíʼígíí biniinaa, aooʼ, bikʼinéíjah yę́ęgiʼ átʼáo bee nihá áhóótʼiʼ danízin, aooʼ, áádóó ałdóʼ achʼąąh naatʼááhí, dóó béésh ééʼ yee hashtʼeʼádaʼdiilyaa, áádóó akał ééʼ ałdóʼ yee hashtʼeʼádaʼdiilyaa, aooʼ, ééʼ tʼáá íiyisíí ditʼą́ągo ákʼį́deestiʼ.

7 Áádóó áko hashtʼeʼádaʼdoolzingo doo nanitłʼahgo nihikʼéí yisná ádadiilnííł danízin, doodago tʼáá nihí ádaniidzinjįʼ atídadiilnííł dóó ndadiiltsxił.

8 Ákondi shooh, tʼáá íiyisíí bił adahóóyóíʼ, biká hashtʼeʼádadiilyaa łá, díígiʼ átʼáo Lehi baʼáłchíní tsʼídá tʼah doo deiyiiłtsééh da ńtʼę́ę́ʼ. Kʼad éí Laman dineʼé yídaháásdá, Moroni yee naʼneeztʼą́ą́ʼ yę́ęgiʼ átʼáo ndadoobah.

9 Áádóó baa hoolzhiizh Laman dineʼé, éí doodago Amalickiah bidineʼé, ndadoobah yichʼįʼ hashtʼeʼádadiilyaaígíí tʼáá íiyisíí yikʼee dadeeshxiz.

10 Áko, aláahdi naatʼáanii Amalickiah Nephi bikéyahdééʼ hadaayá, bándaabaahí yilą́ąjįʼ, Laman dineʼé éí Nephi dineʼé ałkʼiidoołjah ńtʼę́ę́ʼ Ammonihah bikin dashijaaʼdi; háálá áko shooh, bidineʼé ndabidiʼdooltsxiłgo doo yąąh bineʼ da.

11 Ákondi shooh, Amalickiah tʼáá bí tʼáadoo níyáá dah atah ndoobahgo. Áádóó áko shooh, binaabaah binaatʼááh Nephi dineʼé doo bikʼiidijah da danízin Ammonihah bikin dashijaaʼdi, hááłá Moroni Nephi dineʼé ádeiʼdoolíłígíí łahgo áyiilaa, éí biniinaa Laman dineʼé baa ndahookaadgo tʼą́ą́ʼ hideeskai áádóó yikʼiidoojah yę́ę doo bábííghah da silį́į́ʼ.

12 Éí bąą doo kéédahojitʼíníjígo tʼóó dahdadínííchą́ą́ʼ, áádóó binábaal dahdeidiijaah dóó Noah bikéyahjigo dahdiiná, éí áádééʼ Nephi dineʼé bikʼiizhdoojahgo tʼáá íyiisíí bohónéédzą́ dazhniiʼzį́į́ʼ.

13 Áko doo bił béédahózin da Moroni tʼáá íiyisíí anaaʼ yá hashtʼeʼádiilyaago, doodago ndaabaahii bá hasih nahazʼą́ągo ádeiyiilaa, tʼáá ałtso kéyah kin dahnaazhjaaʼ binaagóó; áko, Noah bikéyahgóó tʼáá íyiizíí biniʼ bidadiitʼiʼgo náás dahdiiná; aooʼ, bándaabaahii binaatʼááh éí kin dahshijaaʼgi diné ndeidoołtsxiłgo yee ádáhadaasdzííʼ.

14 Ákondi shooh, yikʼee dadeesyiz; Noah bikin dashijaaʼdi, éí doo hózhǫ́ bidziilgóó hazʼą́ą́ ńtʼę́ę́ʼ, éí kʼad, Moroni bikʼehgo hózhǫ́ bidziilgo ályaa, aooʼ, Ammonihah bikin dashijaaʼ biláahdi bidziilgo.

15 Áádóó áko, shooh, díí éí Moroni bił ééhózingo átʼį́, háálá Ammonihah kin dashijaaʼdi ndadooldzííłgo bił bééhózin; háálá Noah bikin dashijaaʼdi doo bidziilgo hazʼą́ą ńtʼę́ę́ʼ, áádóó kótʼáó áadi bikʼiidiijah danízingo yinééł; éí íínízinééʼ bikʼehgo.

16 Áádóó áko shooh, Moroni Lehi ndaabaahii binaatʼááh nílį́į dooleełgo yikʼidiilniiʼ éí kin dashijaaʼdi ndaabaahii yikʼi; dóó Lehi éí tʼáá éí Laman dineʼé tooh Sidon haʼaʼaahjigo hootsohdi yił daʼahoogąʼą́ąʼ átʼį́.

17 Áádóó áko shooh baa hoolzhiizh, áko Laman dineʼé Lehi kin dahshijaaʼ yikʼibóholnííhgo bił béénáádahoozingo baąh nináádahóókaad, háálá Lehi ayóó yindaaldzid; ákótʼée ndi bindaabaahí binaatʼááh kin dashijaaʼ yikʼijįʼ ndadoobahgo yee ádééhadaasdzííʼ; éí bąą, bindaabaahí ndeiyizhʼeezh.

18 Áko shooh, sih nahazʼą́ągi Laman dineʼé doo nááná łahgiʼ átʼáo yiih doonééł da, tʼáá hozhóʼí yahʼ éʼétiingi tʼéiyá, háálá hózhǫ́ hódahgo ahéédaʼastłʼin éí łeezh adahaaskʼaadgo bee, dóó hoyahgo bináágóó ahéédaʼiisgeed, yah éʼétiingi éí ndagaʼ.

19 Áádóó kótʼáó díígiʼ átʼáo Nephi dineʼé hashtʼeʼádaʼdiilyaa ndaabaahii bá nahazʼą́ nááná łahdééʼ yah adadoonahígíí ndabiʼdiʼdoołtsxił, tsé yichʼįʼ adeiyiiłtłʼiid dóó kʼaaʼ yee deiyółtʼóóhgo.

20 Áádóó áko díígiʼ átʼáo hashtʼeʼádaʼdiilyaa, aooʼ, ndaabaahí dabidziilígíí łaʼ, bibéésh hał dóó bibee adiltłʼį́į́h yee, háida bisih nahazʼą́ yahʼeʼeʼtiingi yah adaakááhgo ndeidoołtsił; áádóó kótʼáó Laman dineʼé yichʼą́ą́h hashtʼeʼ ádadiilyaa.

21 Áádóó baa hoolzhiizh Laman dineʼé binaatʼááh bá ndaabaahí yah eʼeʼtiingi ndahaazná, dóó Nephi dineʼé yichʼįʼ dadeezbaaʼ, sih nahazʼą́ągi yah adoonééłgo; ákondi shooh, díkwíidi da nátʼą́ą́ʼ anbiníʼdiʼnoolkaad, áko ląʼígo ndabiʼdistseed.

22 Áko Nephi dineʼé yikʼi bidahólnííh doogo chʼééh ádeiyííłʼįįd yah éʼétiingi, áádóó łeezh deiyílkʼid yę́ę nahjįʼ adeiyizgeed áko bindaabaahí yichʼįʼ éʼétin ádeidoolííłgo, áko tʼáá bídeiyííniighahgo bichʼįʼ ndadiibah danízin; ákondi shooh, díí daʼágeedgóó tsé bichʼįʼ ahiltłʼiidígíí dóó kʼaaʼ yee deiyółtʼóhígíí ndabistseed; deiyíldzis łeezh yee hadeididoołbį́į́ł ndi, daneeznánígíí dóó atídabiʼdilyaaígíí bee hadadéíbįįd.

23 Áko Nephi dineʼé tʼáá ałtso anaaʼí yikʼi dabidziil; áádóó kótʼáó Laman dineʼé Nephi dineʼé ndeidoołtsiłgo yidanitaah ńtʼę́ę́ʼ bindaabaahí binaatʼááh ałtso ndabiʼdistseed; aooʼ, áádóó Laman dineʼé dimííl yázhí bilááhgóó ndabiʼdistseed; áko, łahjígo éí, Nephi dineʼé doo łaʼ seesyį́į da.

24 Ashdladiin éí atídaadzaah, éí yah eʼetiin góneʼ Laman dineʼéʼ beʼkʼaaʼ atídabiilaa, ákondi beʼachʼą́ą́h naatʼáhí, béésh ééʼ, béésh chʼah dabichʼą́ą́h ntʼééʼ, áko dabijáád atídaalyaa, laʼída yéigo atídaadzaa.

25 Áádóó baa hoolzhiizh, éí Laman dineʼé ndaabaahí binaatʼááh ałtso ndabiʼdiztseedgo doo kééhojitʼínígóó adahineezhchą́ą́ʼ. Áádóó baa hoolzhiizh Nephi bikéyahgóó anááʼná, biʼaláahdi naatʼáanii, Amalickiah, éí Nephi dineʼé bitsʼą́ą́dóó biʼdizhchí, ląʼígo abiʼdisdį́į́dígíí yee yił dahoolneʼ.

26 Áádóó baa hoolzhiizh tʼáá íiyisíí bidineʼé yichʼįʼ bá hoochįįd, Nephi dineʼé tʼáadoo yikʼeh deesdlííʼígíí biniinaa, éí tʼáadoo yisná ádeiyiilaa da.

27 Aooʼ, tʼáá awołíbee báhoochííd, dóó Diyin God yiyíídzííʼ, dóó Moroni ałdóʼ, tʼáá aaníí hadił deeshdlííł níigo ádahaadzííʼ; dóó Moroni éí Diyin God bibee hazʼáanii yikʼeh hółʼínígíí biniinaa bidineʼé hasih hazʼą́ągo yá hashtʼeʼhoolaa.

28 Áádóó baa hoolzhiizh, łahjígo éiyá Nephi bidineʼé biBóhólníihii Diyin God ahéheeʼ deidííniid, háálá bidziilgo doo yineelání da dabidisnáádę́ę́ʼ yisdábidooʼishgo.

29 Áádóó kótʼáó ańdahwiiʼaahii Nephi bidineʼé yikʼi dahwééʼaahgo náhástʼéítsʼáadah ałtso nááhai.

30 Aooʼ, tʼáá áłahjįʼ kʼé bił naaztʼiʼgo bił hooʼaʼ, áádóó yéego sodizin biyiʼ náás deeskai Diyin God bizaad deiyíístsʼą́ą́ʼ dóó yéego yindaalnishígíí biniinaa, éí Helaman, dóó Shiblon, dóó Corianton, dóó Ammon dóó bikʼiské yee ndabidineeztʼą́ą́ʼ, aooʼ, áádóó tʼáá áłtso Diyin God diyingo bihootʼááł bee bikʼidahodiinííʼígíí ałdóʼ, ádaańdaʼooskango tó bee dabiʼdoolzį́į́ʼ, dóó diné bitahgóó ndanitingo adahaasʼaʼ.