1 Áádóó kʼad, shiyeʼ, nááná łaʼ baaníniʼ nílį́įgo baa ánááhoniisdzį́į́ʼ, éí doo bikʼiʼdiitįįh da—éí Diyin God bibee nahwiitʼaahii bąąhági átʼínígíí atíbidilnéhígíí bikʼi silá; háálá bąąhági átʼínígíí achʼįʼ nahwiiʼná bił hazʼą́ą́ góneʼ yeʼiiłníihgo doo ákótʼée da nínízin.

2 Áko shooh, shiyeʼ, díí hazhóʼó bee nandínéeshtįįł. Háálá áko shooh, Bóhólníihii Diyin God tsʼídá áłtsé nihimá dóó nihizhéʼé dáʼákʼeh Edendę́ę́ʼ chʼíníʼeezhyę́ędą́ą́ʼ dóó bikʼijįʼ, dáʼákʼeh áhodoolíiłgo, éí bitsʼą́ą́dóó ábiʼdiilyaa—aooʼ, áádę́ę́ʼ diné chʼíínílóóz, dóó dáʼákʼeh Edendi haʼaʼaahjigo, diyin yá nidaalʼaʼí, dóó béésh hał tʼáá ałtsojigo dookʼą́ą́ł, tsin bee iináanii yaa áhályą́ą doogo niinínil—

3 Áko, nihokááʼ dineʼé Diyin Godgi átʼé silį́į́ʼ, yáʼátʼéehii dóó doo yáʼátʼéehii bił bééhoozin, dóó dahdiilniiʼgo, tsin bee iináanii yąąh neiʼdidooʼááł, dóó yidooyį́į́ł dóó hoolʼáágóó hináa doo, Bóhólníihii Diyin God diyin yá naalʼaʼí dóó bééshxał dookʼą́ą́łígíí ákweʼé niinínil, áko tsin bineestʼąʼ doo yidooyį́įł da biniyé—

4 Áádóó áko baa ákodaniidzį́į́ʼ, nihokááʼ dineʼé ádaa náʼookąąh bee bá hooʼaʼ, aooʼ, nahasdzáán bikáaʼgi diné nabidiʼnítaah, áko ádaa nídaʼookąąh doo dóó Diyin God yíkáʼanájah doo biniyé bá hooʼaʼ.

5 Háálá áko shooh, Adam tʼáá íídą́ą́ʼ yíkádeezhchidgo, dóó tsin bee iináanii bineestʼąʼ łaʼ yiyííyą́ąʼgo, hoolʼáágóó hináa dooleeł ńtʼę́ę́ʼ, Diyin God bizaad bikʼehgo, ádaa náʼookąąh doo bee bá hazʼą́ą́góó; aooʼ, áádóó Diyin God bizaad ałdóʼ tʼáadoo biniyéhí da doo ńtʼę́ę́ʼ, áádóó ayóó átʼéego yisdáʼiildééh bihootʼááł doo bóhónéedzą́ą da doo ńtʼééʼ.

6 Ákondi shooh, nihokááʼ dineʼé dinónéełgo bee bá nihootʼą́—éí bąą, tsin bee iináanii doo bee bá ahóótʼiʼgóó éí nahasdzáángi bitsʼíís dahnídidoolyéełgo ályaa—dóó nihokááʼ dineʼé hoolʼáágóó yooʼaheeskai, aooʼ, nihokááʼ dineʼé ndaʼiisiihii daazlį́į́ʼ.

7 Áádóó áko, díí bee bikʼidinitą́ áłtsé nihimá dóó nihizhéʼé yę́ę atsʼíís dóó iiʼ sizíiniikʼehjí Diyin Bóhólníihii doo yił hólǫ́ǫ́góó ábiʼdiilyaa; díí binahjįʼ baa nihił bééhoozin tʼáá bí íinízinígíí yikʼehgo naaʼaash silį́į́ʼ.

8 Áko shooh, nihokááʼ dineʼé atsʼíísjí anoonééł nahjįʼ yá kóyiilaago doo ákótʼée da doo, háálá éí ayóó átʼéego ił hózhǫ́ bihootʼááł yidoołchxǫǫł.

9 Éí bąą, iiʼ sizíinii tsʼídá doo dadootsxaał da, dóó áłtsé asdzáán dóó hastiin ásihyę́ę bitsʼą́ą́dóó nihokááʼ dineʼé tʼáá átʼé iiʼ sizíiniikʼeh anoonééł dóó atsʼíískʼeh anoonééł bitsʼą́ą́dóó hazlį́į́ʼ, áko, Diyin Bóhólníihii doo yił dahólǫ́ǫ́ʼgóó ádabiʼdiilyaa, áko nihokááʼ dineʼé iiʼ sizį́kʼeh anoonééłdę́ę́ʼ yisdádootʼishgo bá yáʼátʼééh doo.

10 Éí bąą, atsʼíískʼeh, dóó atsʼíís tʼéiyá yikʼeh deíkáahii, atsʼíís bee tsiʼnaʼadá, dóó bidaʼiinízįįd, tʼáábí ádaatʼé naaldeeh silį́į́ʼ, díí nabiʼdinitaah hazʼą́ągi ákweʼé beʼiinaʼ łahgo ańdeidlééh; éí hashtʼehodiʼnééh biniyé hooʼaʼ.

11 Áádóó áko béénílniih, shiyeʼ, nináʼílyáago hootʼááł doo hólǫ́ǫ́góó, (díí doo hólǫ́ǫ́góó baa ntsáhákeesgóó) tʼáá danoonééł bikʼeh biiʼ naazíinii doo bił dahózhǫ́ǫ da doo, háálá Diyin Bóhólníihii doo bił dahólǫ́ǫ da.

12 Áádóó áko, díí bąąhági átʼéii biiʼooldeeʼ yę́ę biyiʼdę́ę́ʼ nihokááʼ dineʼé bee yisdándootʼishígíí ádin ńtʼę́ę́ʼ, éí diné tʼáá bí yee ádąąh dahoolʼaʼ háálá doo akʼeh hółʼínígíí biniinaa;

13 Éí bąą, Diyinkʼehgo ánahwiitʼaah, nináʼílyáago hootʼááł doo bohodoolnííł da, tʼáá hazhóʼó nihokááʼ dineʼé ádaa náʼookąąhgo tʼéiyá díí nabiʼdinitaah bił hazʼą́ą́gi, aooʼ, díí hashtʼehodínééh biniyé bá hazʼą́ągi; háálá díí doo bohoolyaagóó, ajoobaʼ doo choidooʼį́į́ł da éí doo ákódzaagóó Diyingo ánihwiitʼaah naanish yidoołchxǫǫł. Áko Diyingo ánihwiitʼaah éí doo doolchxǫǫł da; díí ákóhoodzaago éí, Diyin God doo Diyin God nilį́į da dooleeł.

14 Áádóó ákótʼáo bikʼidaʼdiitą́ nihokááʼ diné tʼáá ałtso ndaʼiisííh daazlį́į́, dóó Diyingo ánihwiitʼaah dabiiłtsood doo ńtʼę́ę́ʼ; Diyin God bibee ánihwiitʼaahii, éí Diyin hólónígíí hoolʼáágóó bitsʼą́ąjįʼ biʼdoolnih.

15 Áádóó áko, ajoobaʼ beehootʼááł éí doo bohodoolnííł da tʼáá hazhóʼó bąąhági átʼéii bikʼé nináʼílyáago tʼéiyá; éí bąą Diyin God tʼáá bí nihokááʼ dineʼé bibąąhági ádaatʼéii yá tiʼhoozniiʼ, áko ajoobaʼ bee hootʼááł bohodoolnííł, Diyingo ánihwiitʼaahígíí bá bohodoolnííł biniyé, áko Diyin God hadaałtʼéego, Diyingo nahwiiʼaahii, dóó ałdóʼ Diyin joobaʼii nilį́į doo.

16 Áko, nihokááʼ dineʼé ádaa náʼookąąh doo bee bá hwiidooʼaał da atíbidiʼdoolnííł bił siláago tʼéiyá, éí tʼáá níléídę́ę́ʼ tʼáá ákótʼé iiʼ sizíinii hinánígi átʼáo, éí ił hózhóonii bee hootʼáłígíí tʼáá bił ahąąh yitʼih, éí tʼáá níléídę́ę́ʼ ałdóʼ tʼáá ákótʼé iiʼ sizíinii hinánígi átʼáo.

17 Áko, haʼátʼíí biniyé nikokááʼ dineʼé ádaa náʼookąąh doo tʼáá hazhóʼó bąąhági átʼį́įgo tʼéiyá? Haash yitʼáo bąąhági ádóonííł bee hazʼáanii bąąh ádingo? Haʼátʼíí biniyé éí bee hazʼáanii hólǫ́ǫ dooleeł tʼáá hazhóʼó atíʼálʼį́ bá hólǫ́ǫgo tʼéiyá?

18 Áko, atíʼdoolnííł bee nihootʼą́, dóó Diyingo bee hazʼáanii niilyá, éí nihokááʼ dineʼé iisihgo yąąh bíniʼ yileeh.

19 Áko, bee hazʼáanii tʼáadoo niilyáágóó—diné iisxį́įgo bídóʼ bidiʼyoolyééł—diné iisxį́įgoósh shídóʼ shiʼdidoolyeeł nízingo naaldzid doo?

20 Áádóó ałdóʼ, bąąhági átʼéii bee hazʼáanii doo bikʼi siláago nihokááʼ dineʼé bąąhági átʼéii doo yéédaaldzid da doo.

21 Áádóó bee hazʼáanii tʼáadoo niilyáágóó, nihokááʼ dineʼé bąąhági ádaatʼį́įgo ánahwiitʼaah shąʼ haitʼáo bikáʼadoolwoł, éí doodago diyingo bee ajoobaʼ shąʼ, háálá díí tʼáá áłah nihokááʼ dineʼé doo bídéétʼiʼ da doo?

22 Ákondi bee hazʼáanii éí niilyá, dóó tiʼhooʼnííh niilyá, dóó ádaa náʼookąąh bee hooʼaʼ; éí ádaa náʼookąąh, ajoobaʼ neiyiilááh; doo ákótʼéego éí, diyingo nihwiitʼaah nihokááʼ dineʼé yiyiiłtsoʼ dóó bee hazʼáanii bohoolʼįįh, dóó bee hazʼáanii doo yeʼiilaagóó atíbidiʼdoolnííł; díí doo ákódzaago, éí diyingo nihwiitʼaahii choozʼį́į́dígíí doochxǫǫł, dóó Diyin God doo Diyin God nilį́į da doo.

23 Ákondi Diyin God tʼahdii Diyin God nilį́, dóó ádaa náʼooskanígíí ajoobaʼ biiłtsoʼ, dóó diyingo ajoobaʼ éí bąąhági átʼéii bikʼé nináʼílyáhígíí biniinaa niilyá; dóó bąąhági átʼéii bikʼé nináʼílyáhígíí daneeznánée náádahiidooʼnaałgo áyiilaa; dóó daneeznánée náádahiiʼnaʼgo Diyin God yił yah anáhidookah; dóó yił náádahódlǫ́ǫgo ándoolnííł, dóó naanish ádayiilaayę́ę bikʼehgo bá nidahodootʼááł, bee hazʼáanii dóó Diyingo ánahwiitʼaah bikʼehgo.

24 Háálá áko shooh, Diyingo ánahwiitʼaah yee átʼéhígíí tʼáá ałtso yeʼiilaa, dóó ajoobaʼ ałdóʼ tʼáá ałtso bíhígíí yidoołtsoł; dóó ákótʼáo, tʼáá aaníí ádaa nídaʼooskanígíí tʼéiyá yisdádookah.

25 Haʼátʼíí, daʼ ákoósh ajoobaʼ Diyingo ánahwiitʼaah yee adínóoʼį́į́ł nínízin? Ándishní, tʼįįhdígo ndi; Dooda. Díí kótʼéedą́ą́ʼ éí, Diyin God doo Diyin God nilį́į da doo.

26 Áádóó ákótʼáo Diyin God beʼayóó átʼéii dóó hoolʼáágóó dabiniyéii áyiilaa, éí nahasdzáán álnéhę́ędą́ą́ʼ hadadilyaa. Dóó éí bee nihokááʼ dineʼé yisdáhákááh dóó bá nináʼílyá, dóó ałdóʼ tiʼdahoonííh dóó yínííł yiih yikááh.

27 Éí bąą, O shiyeʼ, tʼáá háiishį́į́ deeshááł nízinígíí níyáago dóó tó doo baa hóchįʼgóó yidoodlį́į́ł éí hoolʼáágóó iiná átʼé; dóó tʼáá háiishį́į́ doo deeshááł da nízinígíí ałdóʼ doo bee bíʼnílchéeh da; ndi nihoníyáadi áyiilaa yę́ę bináłtʼéego baa nídoolyééł.

28 Bąąhági átʼéii baa naasháa doo nízingo, dóó doo ádaa náʼookąąhgóó biiníłką́ągo, áko shooh, doo yáʼáshóonii i bee átíbidiʼdoolnííł, Diyin God hááhodiidlaaígíí bikʼehgo.

29 Áádóó áko, shiyeʼ, díí tʼáadoo baa níniʼí doo, bąąhági ánítʼínígíí tʼéiyá bíniʼ niʼdiiłʼá, éí nichʼįʼ nahwiiʼnánígíí bee hojoobaʼ íinínízingo ádaa náʼiidííkąął.

30 O shiyeʼ, Diyin God biʼánahwiitʼaah tʼáadoo bikʼijįʼ níníłʼíní dooleeł nisin. Diyin God biʼánahwiitʼaah tʼáadoo bikʼijįʼ níliní, azhą́ tʼįįhdígóó bąąhági ánítʼį́į ndi tʼáadoo tʼáá ákoshį́į́ níníziní; ndi éí Diyin God bibee ánahwiitʼaah, dóó beʼajoobaʼ, dóó bibee haʼólníh bíniʼ nijéí nayiiłná; dóó bíniʼ naahojoobaʼíʼgo niʼtsidígeeh.

31 Áádóó áko, O shiyeʼ, díí diné Diyin God bizaad bee nanítin doo biniyé Diyin God nikʼidiilniiʼ. Áádóó áko, shiyeʼ, yínááł, saad tʼáá aaníinii dóó hojoobaʼ íinínízingo baa hólneʼ, áko ninahjįʼ iiʼ sizíinii ádaa nídáʼdookąąłgo ńdííʼish, áko ayóó átʼáo ajooba bee hootʼáałii dabidoołtsoł. Áádóó shizaad bee haasdzíʼígíí bikʼehgo Diyin God náʼáhodoolííł. Amen.