1 Áádóó kʼad, shiyeʼ, nááná łaʼ baaníniʼ nílį́įgo baa ánááhoniisdzį́į́ʼ, éí doo bikʼiʼdiitįįh da—éí Diyin God bibeenahwiitʼaahii bąąhágiʼ atʼinígíí atíbidiʼdilnéhígíí bikʼih silá; háálá bąąhági atʼínígíí achʼįʼ nahwiiʼná bił hazʼą́ą góneʼ yeʼiiłníihgo doo ákótʼée da nínízin.

2 Áko shooh, shiyeʼ, díí hózhóʼí bee nandínééshtʼįįł. Háálá áko shooh, Bóhólníihii Diyin God tsʼídá áłtsé nihimá dóó nihizhéʼé dáʼákʼeh Edendę́ę́ʼ chʼíníʼeezhyę́ędą́ą́ʼ dóó bikʼijįʼ, dáʼákʼeh áhodooʼlííłgo, éí bitsʼą́ą́dóó ábiʼdiilyaa—aooʼ, áádééʼ diné chʼíínílóóz, dóó dáʼákʼeh Edendi haʼaʼaahjigo, diyin yá ndaalʼaʼí, dóó bééshʼhał tʼáá ałtsojigo dooką́ą́ł, tsin bee iináanii yaa áhalyą́ą doogo niinínil—

3 Áko, nihokááʼ dineʼé Diyin Godgi átʼé silį́į́ʼ, yáʼátʼéehii dóó doo yáʼátʼéehii bił bééhoozin, dóó dahdiilniiʼgo, tsin bee iináanii yąąh neiʼdidooʼááł, dóó yidooyį́į́ł dóó hoolʼáágóó hiináa doo, Bóhólníihii Diyin God diyin yá naalʼaʼí dóó bééshxał dooką́ą́łígíí akweʼé niinínil, áko doo tsin bineestʼą́ yidooyį́į́ł da biniyé—

4 Áádóó áko baa ákodaniidzį́į́ʼ, nihokááʼ dineʼé adaanáʼookąąh bee bá hooʼaʼ, aooʼ, nahasdzáán bikáaʼgi diné nabidiʼnítaah, áko adaanídaʼookąąh doo dóó Diyin God yíkáʼanájah doo biniyé bá hooʼaʼ.

5 Háálá áko shooh, Adam tʼáá íídą́ą́ʼ yikádeezhchidgo, dóó tsin bee iináanii bineestʼąʼ łaʼ yiyíyą́ąʼgo, hoolʼáágóó hiináa dooleeł ńtʼę́ę́ʼ, Diyin God bizaad bikʼehgo, adaanáʼookąąh doo bee bá hazʼą́ągóó; aooʼ, áádóó Diyin God bizaad ałdóʼ tʼáadoo biniyéhí da doo ńtʼę́ę́ʼ, áádóó ayóó átʼéego yisdáʼiildééh bihootʼááł doo bóhónéedzą́ą da doo ńtʼééʼ.

6 Ákondi shooh, nihokááʼ dineʼé dinónééłgo bee bá nihootʼą́—éí bąą, tsin bee iináanii doo bee bá ahóótʼiʼgóó éí nahasdzáángi bitsʼíís dahnídidoolyééłgo ályaa—dóó nihokááʼ dineʼé hoolʼáágóó yooʼaheeskai, aooʼ, nihokááʼ dineʼé ndaʼiisiihii daazlį́į́ʼ.

7 Áádóó áko, díí bee bikʼidinitą́ áłtsé nihimá dóó nihizheʼé yę́ę atsʼíís dóó iiʼ sizíiniikʼehjí Diyin Bóhólníihii doo yił hólǫ́ǫ́góó ábiʼdiilyaa; díí binahjįʼ baa nihił bééhoozin tʼáá bí íinízinígíí yikʼehgo naaʼaash silį́į́ʼ.

8 Áko shooh, nihokááʼ dineʼé atsʼíísjí anoonééł nahjįʼ yá kóyilaago doo ákótʼée da doo, háálá éí ayóó átʼéego ił hózhǫ́ bihootʼááł yidoołchxǫǫł.

9 Éí bąą, iiʼ sizíinii tsʼídá doo dadootsxaał da, dóó áłtsé asdzáán dóó hastiin ásihyę́ę bitsʼą́ą́dóó nihokááʼ dineʼé tʼáá átʼé iiʼ sizíiniikʼeh anoonééł dóó atsʼíískʼeh anoonééł bitsʼą́ą́dóó hazlį́į́ʼ, áko, Diyin Bóhólníihii doo yił dahólǫ́ǫ́ʼgóó adabiʼdiilyaa, áko nihokááʼ dineʼé iiʼsizį́kʼeh anoonééłdę́ę́ʼ yisdádootʼishgo bá yáʼátʼééh doo.

10 Éí bąą, atsʼíískʼeh, dóó atsʼíís tʼéiyá yikʼeh deiyíkááhii, atsʼíís bee tsiʼnaʼadá, dóó bidaʼiinízįįd, tʼáábí ádaatʼé naaldeeh silį́į́ʼ, díí nabiʼdinitaah hazʼą́ągi ákweʼé beʼiiná łahgo ańdeidlééh; éí hashtʼehodiʼnééh biniyé hooʼaʼ.

11 Áádóó áko béénílniih, shiyeʼ, nináʼílyáago hootʼááł doo hólǫ́ǫ́góó, (díí doo hólǫ́ǫ́góó baa ntsáhákeesgóó) tʼáá danoonééł bikʼeh biiʼ naazíinii doo bił dahózhǫ́ǫ da doo, háálá Diyin Bóhólníihii doo bił dahólǫ́ǫ da.

12 Áádóó áko, díí bąąhági átʼéii biiʼooldeeʼ yę́ę biyiʼdę́ę́ʼ nihokááʼ dineʼé bee yisdándootʼishígíí ádin ńtʼę́ę́ʼ, éí diné tʼáá bí yee ádąąh dahoolʼaʼ háálá doo akʼeh hółʼínígíí biniinaa;

13 Éí bąą, Diyinkʼehgo ánahwiitʼaah, nináʼílyáago hootʼááł doo bohodoolnííł da, tʼáá hazhóʼó nihokááʼ dineʼé adaanáʼookąąhgo tʼéiyá díí nabiʼdinitaah bił hazʼą́ą́gi, aooʼ, díí hashtʼehodínééh biniyé bá hazʼą́ągi; háálá díí doo bohoolyaagóó, ajoobaʼ doo choidooʼį́į́ł da éí doo ákódzaagóó Diyingo ánihwiitʼaah naanish yidoołchxǫǫł. Áko Diyingo ánihwiitʼaah éí doo doolchxǫǫł da; díí ákóhoodzaago éí, Diyin God doo Diyin God nilį́į da dooleeł.

14 Áádóó ákótʼáo bikʼidaʼdiitą́ nihokááʼ diné tʼáá ałtso ndaʼiisííh daazlį́į́, dóó Diyingo ánihwiitʼaah dabiiłtsood doo ńtʼę́ę́ʼ; Diyin God bibee ánihwiitʼaahii, éí Diyin hólónígíí hoolʼáágóó bitsʼą́ą́jįʼ biʼdoolnih.

15 Áádóó áko, ajoobaʼ beehootʼááł éí doo bohodoolnííł da tʼáá hazhóʼó bąąhági átʼéii bikʼé nináʼílyáago tʼéiyá; éí bąą Diyin God tʼáá bí nihokááʼ dineʼé bibąąhági ádaatʼéii yá tʼihoozniiʼ, áko ajoobaʼ bee hootʼááł bohodoolnííł, Diyingo ánihwiitʼaahígíí bá bohodoolnííł biniyé, áko Diyin God hadaałtʼéego, Diyingo nahwiiʼaahii, dóó ałdóʼ Diyin joobaʼii nilį́į doo.

16 Áko, nihokááʼ dineʼé adaanáʼookąąh doo bee bá hwiidooʼaał da atíbidiʼdoolnííł bił siláago tʼéiyá, éí tʼáá niléídę́ę́ʼ tʼáá ákótʼé iiʼ sizíinii hiinánígiʼ átʼáo, éí ił hózhóonii bee hootʼáłígíí tʼáá bił ahąąh yiitʼih, éí tʼáá niléídę́ę́ʼ ałdóʼ tʼáá ákótʼé iiʼ sizíinii hiinánígi átʼáo.

17 Áko, haʼátʼíí biniyé nikokááʼ dineʼé adaanáʼookąąh doo tʼáá hazhóʼó bąąhági átʼį́įgo tʼéiyá? Haash yitʼáo bąąhági ádóonííł bee hazʼáanii bąąh ádingo? Haʼátʼíí biniyé éí bee hazʼáanii hólǫ́ǫ dooleeł tʼáá hazhóʼó atíʼálʼį́ bá hólǫ́ǫgo tʼéiyá?

18 Áko, atíʼdoolnííł bee nihootʼą́, dóó Diyingo bee hazʼáanii niilyá, éí nihokááʼ dineʼé iisihgo yąąh bíneʼ yileeh.

19 Áko, bee hazʼáanii tʼáadoo niilyáágóó—diné iisxį́įgo bídóʼ bidiʼyoolyééł—diné iishxį́į́goósh shídóʼ shiʼdidoolyeeł nizingo naaldzid doo?

20 Áádóó ałdóʼ, bąąhági átʼéii bee hazʼáanii doo bikʼih siláágóó nihokááʼdineʼé bąąhági átʼéii doo yéédaaldzid da doo.

21 Áádóó bee hazʼáanii tʼáadoo niilyáágóó, nihokááʼ dineʼé bąąhági ádaatʼį́įgo ánahwiitʼaah shąʼ haitʼáo bikáʼadoolwoł, éí doodago diyingo bee ajoobaʼ shąʼ, háálá díí tʼáá áłah nihokááʼ dineʼé doo bídéítʼiʼ da doo?

22 Ákondi bee hazʼáanii éí niilyá, dóó tihooʼnííh niilyá, dóó adaanáʼookąąh beehooʼaʼ; éí adaanáʼookąąh, ajoobaʼ neiyiilááh; doo ákótʼéego éí, diyingo nihwiitʼaah nihokááʼ dineʼé yiyiiłtsoʼ dóó bee hazʼáanii bohoolʼįįh, dóó bee hazʼáanii doo yeʼiilaagóó atíʼbidiʼdoolnííł; díí doo ákódzaago, éí diyingo nihwiitʼaahii choozʼį́į́dígíí doochxǫǫł, dóó Diyin God doo Diyin God nilį́į da doo.

23 Ákondi Diyin God tʼahdii Diyin God nilį́, dóó adaanaʼooskanígíí ajoobaʼ biiłtsoʼ, dóó diyingo ajoobaʼ éí bąąhági átʼéii bikʼé nináʼílyáhígíí biniinaa niilyá; dóó bąąhági átʼéii bikʼé nináʼílyáhígíí daneeznánée náádahiidooʼnaałgo áyiilaa; dóó daneeznánée náádahiiʼnaʼgo Diyin God yił yah anáhidookah; dóó yił náádahódlǫ́ǫgo ándoolnííł, dóó naanish ádayiilaayę́ę bikʼehgo bá ndahodootʼááł, bee hazʼáanii dóó Diyingo ánahwiitʼaah bikʼehgo.

24 Háálá áko shooh, Diyingo ánahwiitʼaah yee átʼéhígíí tʼáá ałtso yeʼiilaa, dóó ajoobaʼ ałdóʼ tʼáá ałtso bíhígíí yidoołtsoł; dóó ákótʼáo, tʼáá aaníí adaandaʼooskanígíí tʼéiyá yisdádookah.

25 Haʼátʼíí, daʼ ákoósh ajoobaʼ Diyingo ánahwiitʼaah yee ádínooʼį́į́ł nínízin? Ándishní, tʼįįhdígo ndi; Dooda. Díí kótʼéedą́ą́ʼ éí, Diyin God doo Diyin God nilį́į da doo.

26 Áádóó ákótʼáo Diyin God beʼayóó átʼéii dóó hoolʼáágóó dabiniyéii áyilaa, éí nahasdzáán álnéhę́ędą́ą́ʼ hadadilyaa. Dóó éí bee nihokááʼ dineʼé yisdáhákááh dóó bá nináʼílyá, dóó ałdóʼ tiʼdahoonííh dóó yínííł yiihyikááh.

27 Éí bąą, O shiyeʼ, tʼáá háiishį́į́ deeshááł nizinígíí niyáago dóó tó doo baa hóchʼįʼgóó yidoodlį́į́ł éí hoolʼáágóó iiná átʼé; dóó tʼáá háiishį́į́ doo deeshááł da nízinígíí ałdóʼ doo bee bíʼnílchéeh da; ndi nihoníyáadi áyiilaa yę́ę bináłtʼéego baanídoolyééł.

28 Bąąhági átʼéii baa naasháa doo nízingo, dóó tʼáadoo adaanáʼooskąąhgo biiníłką́ąhgo, áko shooh, doo yáʼáshóonii i bee átíbidiʼdoolnííł, Diyin God haahodiidlaaígíí bikʼehgo.

29 Áádóó áko, shiyeʼ, díí tʼáadoo baa níniʼí doo, bąąhági ánítʼínígíí tʼéiyá bíniʼ niʼdiiłʼá, éí nichʼįʼ nahwiiʼnánígíí bee hojoobaʼ ííninízingo adaanáʼiidííkąął.

30 O shiyeʼ, Diyin God biʼánahwiitʼaah tʼáadoo bikʼijįʼ níníłiní dooleeł nisin. Diyin God biʼánahwiitʼaah tʼáadoo bikʼijįʼ níliní, azhą́ tʼįįhdígóó bąąhági ánítʼį́į ndi tʼáadoo tʼáá ákoshį́į́ níníziní; ndi éí Diyin God bibee ánahwiitʼaah, dóó beʼajoobaʼ, dóó bibee haʼólníh biniʼ nijéí nayiiłʼná; dóó bíniʼ naahojoobaʼíʼgo niʼtsidígeeh.

31 Áádóó áko, O shiyeʼ, díí diné Diyin God bizaad bee nanítin doo biniyé Diyin God nikʼidiilniiʼ. Áádóó áko, shiyeʼ, yínááł, saad tʼáá aaníinii dóó hojoobaʼ ííninízingo baa hólneʼ, áko ninahjįʼ iiʼ sizíinii adaanídáʼdookąąłgo ńdííʼish, áko ayóó átʼáo ajooba bee hootʼáałii dabiidoołtsoł. Áádóó shizaad bee haasdzíʼígíí bikʼehgo Diyin God náʼáhodoolííł. Amen.