1 Áko shiyeʼ, łaʼ bee nichʼįʼ hanáádeesdzih; háálá bąąh níniʼ nisin éí daneeznánée náádahiidooʼnaałgo.

2 Áko shooh, ándishní, doo náádaʼiináa da—éí doodago, bee hadeesdzihígíí, kótʼáo ááhdishní, díí atsʼíseekʼeh hoolʼáágóó hináago doo ádoolníił da, díí ndahachxǫǫhii éí doo doo ndahachxǫǫhii ádoolníił da—Christ níyáádóó índa.

3 Áko shooh, bí éí daneeznáanii náádahináa doogo íidoolííł. Ákondi shooh, shiyeʼ, náádaʼiiná éí tʼahdoo álnééh da. Áko, doo bééhózinii łaʼ ííshją́ą́ áshłééh; ákótʼée ndi, doo béédahózinii ląʼí da ííshją́ą́ ádaalyaa da, doo bił bééhóziní da Diyin God tʼéiyá. Ákondi łaʼ nił ííshją́ą́ ádeeshłííł éí shił bééhodoozįįł yéego Diyin God baanéisiskan—éí nááʼiiná bídéétʼiʼ.

4 Áko shooh, tʼáá ałtsoní anoonééłdę́ę́ʼ nááʼiiná baa hodoolzhishgo bá hazʼą́. Áko doo łaʼ bił bééhóziní da; ákondi Diyin God díí bá hwiidooʼaałígíí bił bééhózin.

5 Áko, tʼáá łáhídi daatsʼí, éí doodaiiʼ naakidi daatsʼí bá hwiidooʼaał, éí doodaiiʼ táadi, dineʼé anoonééłdę́ę́ʼ náádahwiidooʼnaał, éí doo ílį́į da; háálá Diyin God díí tʼáá átʼé bił bééhózin; áádóó díí éí shił tʼáá ákohgo bee hazʼą́—áko daneeznáanii náádahiidooʼnaałgo bá hazʼą́ągo ályaa.

6 Áko anoonééł dóó náádahiizhdooʼnaał bitaʼgi hazʼą́ągo ádoolnííł.

7 Áádóó áko naʼídídeeshkił nihokááʼ dineʼé biiʼ sizíinii haash dadoonííł díí anoonééłdę́ę́ʼ dóó náádahidooʼnaał bá ndahastʼą́ąjįʼ?

8 Áko nihokááʼ dineʼé tʼáá łáhídi éí doodago biláahgo náádahiidooʼnaałgo bá nahootʼą́ągo éí doo bóhólnííh da; háálá tʼáá átʼé doo tʼáá łahjįʼ daninée da, díí éí doo bóholnííh da; tʼáá átʼé éí Diyin God bił tʼááłaʼajíní átʼé, dóó nihokááʼ dineʼé tʼéiyá oolkiłígíí yółtaʼ.

9 Éí bąą, nihokááʼ dineʼé anoonééłdę́ę́ʼ náádahiidooʼnaałgo bee bá nahootʼą́; dóó anoonééł dóó náádahiidooʼnaał bitaʼgi hazʼą́ągo bá nahootʼą́. Áádóó áko, díí bá nahootʼánígíí, nihokááʼ dineʼé biiʼ sizíinii haadooníłígíí shił bééhodoozįįłgo éí Diyin Bóhólníihii tʼáá íiyisíí nabídeełkid; áádóó díí éí shił bééhoozįįd.

10 Áádóó tʼáá ájítʼé náádaʼhiijiina baa hoolzhiizhgo, áko índa hwił béédahodoozįįł Diyin God éí tʼáá átʼé nihokááʼ dineʼé bá nidahwiistʼánígíí bił bééhózin.

11 Áko, iiʼ sizį́ anoonééł dóó náhidooʼnaał bitaʼgi haadooníłígíí—Áko shooh, Diyin yá naalʼaʼí shił ííshją́ą́ áyiilaa, tʼáá áłtso nihokááʼ dineʼé biiʼnáázíinii, bitsʼíís tsʼídá yitsʼáníyáadi, aooʼ, tʼáá ałtso nihokááʼ dineʼé biiʼ naazíinii, yáʼádaatʼééh éí doodago dóó yáʼádaatʼéeh da ndi, éí Diyin God iiná bee níláhę́ę bighangóó ńdooltééł.

12 Áádóó índa baa hodoolzhish, iiʼ naazíinii diyinkʼehgo deíkááh yę́ę ił hózhǫ́ hazʼą́ądi bá lą́ adooleełgo yah ahidookah, éí Diyin bikéyah hózhóní hoolyé, éí ił hózhóonii bił hazʼą́, éí hodeezyéel bił hazʼą́, áadi tʼáá átʼé bee bichʼįʼ nidahwiiʼnánée áádóó tʼáá áłtso bidaʼdiiłʼáhę́ę, dóó yínííł yitsʼą́ą́dóó háádadoolyįh.

13 Áádóó baa hodoolzhish, bąąhági ádaatʼínígíí biiʼ sizíinii, aooʼ, éí bedaʼiinízįįd—háálá áko shooh, éí Diyin Bóhólníihii biʼIiʼ Sizį́ Diyinii łahdóó éí doodago doo daʼatah da; háálá áko shooh, doo yáʼáshóoniijí ndaʼanish nídeidiilá yáʼátʼéehii éí tʼáadoo da; éí bąą chʼį́įdi biʼiiníziinii biiheeswod, dóó bitsʼíís ndeiloʼ daazlį́į́ʼ—díí éí tłʼóóʼjigo chahałheeł biyiʼjigo chʼídínóolkał; daacha, dóó yéego dadilwoshgo daacha, dóó biwooʼ ahideidiłkʼash, díí éí tʼáá bí tsiʼnidaakaiígíí biniinaa, biʼiiníziinii íinízingo dabisnahgo nidabilóóz.

14 Áko díí éí bąąhági ádaatʼínígíí biiʼ sizíinii bá hazʼą́, aooʼ, chahałheeł góneʼ, tʼóó bahooʼih góneʼ, Diyin God bibee áteʼelʼíinii báháchįʼ dookʼą́ą́ł nahalinígíí yinídaaldzidgo yíká dadéezʼį́į́ʼ; dóó tʼáá kótʼáo bił hazʼą́, diyingo dahináanii éí Diyin bikéyah hózhǫ́ǫdi, náádaʼiiná bá baa hoolzhiizhjįʼ índa.

15 Áko, łaʼ díí ił hózhǫ́ dóó tʼóó baaʼihgo iiʼ sizíinii bá hazʼą́ danízin, tʼahdoo nááʼiiná baa hoolzhíízhgo, éí díí tsʼídá áłtsé nááʼiiná átʼé danízin ńtʼę́ę́ʼ. Aooʼ, tʼáá aaníí nááʼiiná wolyée ndi, yiiʼ sizį́ doodago iiʼ sizíinii íł hózhǫ́ éí doodaiiʼ tʼóó bahooʼih hazʼą́ąjįʼ adoogááł, saad bee hadaʼiisdzííʼ yę́ę bikʼehgo.

16 Áádóó áko shooh, díí baa nááhóóneʼ, tsʼídá áłtsé nááʼiiná éí hólǫ́, daneeznánée, éí doodaiiʼ daneeznánígíí, éí doodaiiʼ dadínóonéłígíí náádahidooʼnaał, níléí Christ náádiilyáádę́ę́ʼ dóó nááhiiʼnaʼjįʼ.

17 Áko, doo baa nitsídeikees da díí tsʼídá áłtsé nááʼiiná, kótʼáo baa haʼoodzíʼígíí, éí iiʼ naazíinii ił hózhǫ́ dóó tʼóó bahooʼihjįʼ ndahaaskaiígíí náádahiidooʼnaał. Díí kótʼáo áá haʼnínígíí doo kótʼáo baa ntsídadoohkos da,

18 Áko shooh, ánihidishní, ndagaʼ; ákondi iiʼ sizį́ dóó atsʼíís ahiihnidootʼashgo áá haʼní, Adam hinánée dóó Christ nááhiiʼnaʼjįʼ.

19 Áko, iiʼ sizíinii dóó atsʼíís baa dahóóneʼę́ę ahiih nídahidookah tʼáá hooschįʼ, bąąhági ádaadzaaígíí dóó diyingo dahinánée, éí doo áłdíshníi da, bíniʼ shį́į́ tʼáá ákótʼé, éí tʼáá átʼé nihidookah dishní; éí doodago kótʼáo ááhdishní, éí Christ náádiidzá dóó bikʼijįʼ naadahiidooʼnaałígíí bilą́ąjįʼ náádahináa doo.

20 Áko, shiyeʼ, Christ nááhiiʼnaʼdi náádahináa doo doo áłdishníi da; ákondi shooh, shí éí kwíínisin, éí iiʼ sizíinii dóó atsʼíís ałhiihnídahidookah, yáʼátʼéehgo dahinánígíí, Christ nááhiiʼnaʼgo, dóó yáʼąąsh góde dah nídiidzáadi.

21 Ákondi nááhiiʼnaʼdi éí doodago bikééʼdóó, éí doo ááhdishníi da; ákondi kóníltsogo bee nihił hashneʼ, anoonééł dóó nááʼiiná bitaʼgi hazʼą́, dóó iiʼ sizíinii bił hózhǫ́ éí doodaiiʼ tʼóó baaʼihgo bił hazʼą́ éí Diyin God yee hoołʼaʼ daneeznánée náádahináa doo, dóó ałhiihnááhiidookah, iiʼ sizíinii dóó atsʼíís tʼáá áłah, áádóó Diyin God yidááhdóó deidoozįįł, dóó naanish ádayiilaayę́ę bikʼehgo bá ndahodiyootʼááł.

22 Aooʼ, díí tʼáá átʼé ninádahaasyaii háádadilyaa éí Diyin yá yádaałtiʼii yee hadahaasdzííʼ.

23 Iiʼ sizíinii atsʼíís yił ahiih nídootʼash, dóó atsʼíís iiʼ sizíinii yił; aooʼ, dóó tʼáá ałtso atsʼádaazʼaʼí dóó ahadaditʼánígíí atsʼíís bee háádidoolnííł; áóóʼ, atsiiʼ ndi do laʼ yóóʼadoodił da; áko tʼáá ałtso ádaatʼéhée dóó hadadíłtʼéejįʼ háádadidoolnííł.

24 Áádóó áko, shiyeʼ, díí háádadilyaii éí Diyin yá yádaałtiʼii yee hadahaasdzííʼ—

25 Áádóó diyingo dahináanii Diyin God bił hazʼą́ądi bitsʼádadeezlííd doo.

26 Ákondi shooh, bąąhági ádáátʼįįd yę́ę tʼóó baaʼihgo dadínóonééł; háálá dadiyinígíí bidadéétʼiʼjí yikʼiʼ dadínóonééł; háálá chin daabąąh, áko nahjįʼ kódaalyaa, daʼneestʼą́ nahalingo ídaʼiilaa dóó ndaashnishę́ę deidoolnih, éí eii chʼį́įdiikʼeh ádaʼiilaa; áádóó daadlánígíí bitłʼááh díchʼííʼgo shijaaʼígíí beeʼadlání yiyiʼdóó deidoodlį́į́ł.