1 Áádóó baa hoolzhiizh Nephi dineʼé tʼáadoo anaaʼjíkʼehgo, ndabiʼdistseed yę́ę yooʼadeiyiilaa—ndaaztseedígíí tʼáadoo wóóltaʼ da, tsʼídá ląʼígo biniinaa—daneeznanígíí ałtso yooʼádeiyiilaago dabikéyahgo andahaaskai, dóó dabighango, dóó beʼadzáán, dóó baʼáłchíní bichʼįʼ.

2 Áko ląʼída sáanii dóó áłchíní béésh hał bee ndabiʼdistseed, dóó ląʼída bilíí dóó ndeiniłkadígíí ałdó; dóó ląʼída bitłʼoh naadą́ą́ daalchxǫʼ, háálá diné ląʼígo yikʼi naazhjééʼ.

3 Áádóó áko Laman dineʼé dóó Amlici dineʼé tooh Sidon bąąhgiʼ ndaaztseedígíí éí tooh Sidon biihdahaastłʼįįd; dóó shooh ląʼí daneeznánée bitsʼin tónteel bitłʼááhdi ndadeeztąąd.

4 Áádóó Amlici dineʼé éí Nephi dineʼé ałʼąąh ádanoolnin, háálá éí bitaahgiʼ łichííʼgo dahdaashdléézh Laman dineʼé ádanoolningiʼ átʼáo; ákótʼée ndi bitsʼiiʼ doo daalzheeʼ da Laman dineʼégiʼ átʼáo.

5 Áko Laman dineʼé bitsʼiitsʼiin daalzhééʼ; dóó tʼáá daalchʼííʼ, tʼáá hózhóʼí boozhneeʼ gónaa akahgí bikʼidaastʼį́, áádóó naʼaabaají ééʼ, éí yiʼ hadadítʼé, áádóó beʼáltʼį́į́h, dóó kʼaaʼ, dóó tsé, dóó beeʼadiltłʼį́hí, áádóó nááná łaʼ.

6 Áádóó Laman dineʼé bitsʼi daashtłish, dabizhéʼé baa dahaasyáhą́ą́ bikʼehgo, éí bikʼijįʼ haʼoodzííʼ háálá ndaʼiisííʼ dóó bikʼiské yikʼijįʼ daazlíʼígíí biniinaa, éí Nephi, Jacob, dóó Joseph, dóó Sam daolyé, éí diné tʼáá ákogiʼ adaatʼé dóó dahodísin ńtʼę́ę́ʼ.

7 Áádóó bikʼiské ndabidoołtsiłgo biká ádaatʼįįd, éí bąą hóyeeʼgo bá haʼoodzííʼ; áádóó Bóhólníihii Diyin God yishtłizhgo áyiilaa, aooʼ, Laman dóó Lemuel, dóó Ishmael biyeʼké, dóó Ishmaelitish sáanii ałdóʼ.

8 Áádóó díí kólyaa áko éí bílástsiiʼ éí bikʼiské bílástsiiʼ yee ałʼąą ádanoolnin doo biniyé, áko Bóhólníihii Diyin God bidineʼé yaa áhalyáa doo, áko éí doo ałtaańdookah da biniyé dóó doo ákótʼéego óʼoolʼįįł deiyoodláago dabidoołchxǫǫł.

9 Áádóó baa hoolzhiizh tʼáá háíshį́į́ Laman dineʼé yił ahidiiʼáazhgo bílástsiiʼ ałhiiʼ silį́į́ʼgo éí akʼihjįʼ haʼoodzííʼyę́ę hálástsiiʼ ałdóʼ bikʼih siláa doo.

10 Éí bąą, tʼáá háíshį́į́ Laman dineʼé yikééʼ dahdiiyáago yooʼabiloozgo éí áajigo bee biʼdójíi doo, dóó hatsįʼ yishtłizh bee hwééhózin dooleeł.

11 Áádóó baa hoolzhiizh tʼáá háíshį́į́ Laman dineʼé bibee óʼoolʼįįł doo deiyoodlą́ą́góó, ákondí Jerusalem kéyahdę́ę́ʼ haneʼ ńdaháasdzo deiníjaaʼígíí deiyoosdląąd, dóó dabizhéʼéyę́ę bibeʼ óʼoolʼįįł ałdóʼ deiyoodlą́ą́góó, éí tʼáá aaníinii átʼé, éí Diyin God bibee hazʼáanii deiyoosdląąd dóó yikʼeh dahóółʼįįd, éí Nephi dineʼé daosyeʼ, doodago Nephi bidineʼé, áádóó náás hodeeshzhiizh—

12 Áádóó díí éí bidineʼé baa haneʼ ńdaháasdzo tʼáá ánii átʼéhígíí bee dahólǫ́, dóó Laman dineʼé ałdóʼ.

13 Áko Amlici dineʼé chʼihnáádadiitʼááł, háálá éí ałdóʼ bikʼihdaʼashchį́, aooʼ, tʼáá bí akʼihdaʼashchį́, bitááʼgiʼ dajíchiiʼgo ádeiyiilaa.

14 Áko Diyin God bizaad bóhólyaa, háálá díí saad Nephi yee yichʼįʼ haadzííʼ: Áko shooh Laman dineʼé éí hóyéeʼgo bá haasdzííʼ, dóó éí bitsʼįʼ daazhtłʼizhgo ííshlaa áko bílástsiiʼ dóó nílástsiiʼ yee ałʼąą ánoolnin doo, kódóóʼ hoolzhiizh dóó hoolʼáágóó, tʼáá hózhoʼí doo yáʼáshóonii yaanaakaiyę́ę yaa ádaańdaʼooskango tʼéiyá dóó shichʼįʼ ninákaigo áko índa baajiideeshbaał.

15 Áádóó nááná: háida nihikʼiské yił ałhádaʼasgehgo éí ałdóʼ báʼáłchíní bitsʼįʼ yishtłizhgo ádeeshłííł, éí ałdo hóyéego bá haʼdoodzih.

16 Áádóó nááná: háida ní dóó nílástsiiʼ yikʼijįʼ naabaahgo bí ałdóʼ bitsįʼ yishtłizgo ádeeshlííł.

17 Áádóó nááná, ádishní háida nihitsʼą́ąjįʼ dahdiiyáago éí doo nihílástsiiʼ yitah nilį́į da doo, dóó nihikiʼhojideeshłiił, dóó tʼáá háíshį́į́ nihílástsiiʼ yitsʼą́ą́dóó yigáłígíí, kódóó dóó hoolʼáágóó, áádóó díí éí Bóhólníihii Nephi dóó bílástsiiʼ yikʼi hojididoodliiłgo yee haadzííʼ.

18 Áko Amlici dineʼé Diyin God bizaad yidahóolaʼígíí doo yaa ákodanizin da bitááʼgiʼ deezhdléézhgo; ákótʼée ndi éí tʼáá bahatʼaadí Diyin God yikʼijįʼ daazlį́į́; éí bąą hóyéego bąą niilyáago bee haʼoodzííʼ.

19 Áko nihá íínisin nihił béédahodoozį́į́ł hóyéego bá haʼoodzíʼígíí tʼáá bí adąąh ndeisdlá; tʼáá ákótʼáo diné tʼáá ałtso tʼáá bí ádaatʼį́įgo hóyéego haʼoodzííʼ adąąh ndeiyidlé.

20 Áko baa hoolzhiizh tʼáadoo díkwíída yiłkaahí anaaʼ nááháásdlį́į́ʼ, Zarahemla kéyahdi Laman dineʼé dóó Amlici dineʼé ałkʼiijééʼ, éí nááná łaʼ Laman dineʼé ndaabaahii Nephi bidineʼé yikʼiijééʼ, tʼóó ałtsé Amlici dineʼé yił ałkʼą́ą́h daazbaaʼ yę́ęgiʼ.

21 Áádóó baa hoolzhiizh naabaahii łaʼ bikéyahdóó chʼíbiʼdinóółkałgo bichʼįʼ eelʼaʼ.

22 Áko Alma atʼíbiʼdiilyaaʼígíí biniinaa Laman dineʼé bikʼijiijééʼdí tʼáadoo atah naazbaaʼ da;

23 Ákondí ląʼí ndaabaahii yichʼįʼ ayiiłʼáʼ; dóó éí ákode níná dóó Laman dineʼé ląʼí ndeestseed, dóó chʼééhkaaiʼígíí kéyahdóó chʼídeineeskaad.

24 Áádóó náánáʼ dóó kéyah hódeesyéelgo náádahoołʼaʼ, anaaʼ doo bichʼįʼ ndahwiiłnáágóó haashį́į́ nízahjįʼ bił hooʼaʼ.

25 Áko díí tʼáá átʼé adahoodzaa, aooʼ, díí tʼáá ałtso anaaʼ dóó ałkʼéíʼiijah adahoodzaa dóó ańdahwiiʼaahii dahwééʼaahgo ashdląʼ nááhaijįʼ nihoolzhiizh.

26 Áádóó łaʼ nááhaijįʼ dimííl dóó neeznaa dimííl diné iiʼ sizíinii tʼahgóó daazlį́į́ʼ, áko da naanish ádayiilaayę́ę bikʼehgo bá ndahodootʼááł, yáʼátʼéhígíí doodago doo yáʼádaatʼéhígíí, hoolʼáágóó ił hózhǫ́ éí doodago hoolʼáágóó tiʼhooʼnííh deidoołbįįł, iiʼ sizíinii deiyístsʼą́ʼígíí bikʼehgo, iiʼ sizíinii yáʼátʼéhígíí éí doodago doo yáʼátʼéhígíí bikʼehgo.

27 Háálá diné tʼáá háíshį́į́ʼ yikʼeh hółʼínígíí bikʼehgo bichʼįʼ niʼdoolééł, dóó diyingo áhodooníłígíí bikʼehgo; éí bąą bíneʼdii tʼáá aaníinii átʼéii bikʼeh doo. Dóó ańdahwiiʼaahii dahwééʼaahgo ashdląʼ nááhaijįʼ nihoolzhiizh.