1 Shiyeʼ, shizaad yíísiniłtsʼą́ą́ʼ, háálá ándishní, Helaman bee bił hweeshneʼígíí átʼáo, Diyin God bibee hazʼáanii bikʼeh hóníłʼį́įgo kéyah bikááʼgóó náás díínááł; áádóó doo Diyin God bibee hazʼáanii bikʼeh honiłʼį́įgo éí bitsʼą́ądóó nahjįʼ kóndiʼdoolnííl.

2 Áádóó kʼad, shiyeʼ, ayóó átʼáo naa shił hózhǫ́ǫ dooleełgo naa haʼíínishní, háálá bíníłdzilígíí dóó Diyin God yiinídlánígíí biniinaa; háálá aniid nanínáádą́ą́ʼ Diyin Bóhólníihii bichʼįʼ díníʼį́į́ʼ sínílį́į́ʼ, áádóó haʼínilníigo bibee hazʼáanii tʼáá bikʼeh honiłʼį́į́ doo, háálá bikʼihojídlíi dooleeł háida bidziilgo iiná yółtʼihgo.

3 Ándishní, shiyeʼ, tʼáá íídą́ą́ʼ ayóó átʼáo naa shił hózhǫ́, háálá neʼoodląʼ dóó yéego ánítʼinígíí biniinaa, áádóó Zoram dineʼé bitahgóó haʼíínilní dóó nizaadgóó-tihwiisíníniiʼ.

4 Háálá neʼastłʼǫ́ǫ́n ńtʼę́ę́ʼgo shił beehózin, aooʼ, áádóó ałdóʼ shił bééhózin saadígíí biniinaa tsé bee nándiʼneesneʼ; áádóó díí tʼáá átʼé bee haʼínilní háálá Diyin Bóhólníihii nił hólǫ́ǫʼ ńtʼę́ę́ʼ; áádóó kʼad nił bééhózin Diyin Bóhólníihii yisdáníílóóz.

5 Áádóó áko shiyeʼ, Shiblon, áko díí béénilnííh, áko haashį́į́ nízáájįʼ Diyin God baʼíínílíigo tʼáá éí ínízahjįʼ tʼíhoonííh dééʼ yisdanidoolóós, dóó niʼdiiłʼáá dééʼ, dóó nichʼįʼ nahwiiʼnáá dééʼ, éí nohóníyáadi yisdánidoolóós.

6 Áko, shiyeʼ, díí tʼáá íídą́ą́ʼ shił bééhózingo tʼáadoo shaa nitsíníkeesí, ákondi Diyin God biʼIiʼ Sizį́ Diyinii átʼé éí shiiʼ hólǫ́ éí díí shił ííshją́ą́ ádeileʼ; háálá Diyin God doo diné ániidí áshiilaagóó díí doo shił bééhózin da doo ńtʼę́ę́ʼ.

7 Ákondi shooh, Diyin Bóhólníihii ayóó átʼáo shaa joozbaʼgo bá naalʼaʼí shichʼįʼ áyííłʼaʼ díí yee shił hodoolnih biniyé bidineʼé bitahgóó naanish atiʼdoolííłii niʼkódeeshlííł; aooʼ, dóó Diyin yá naalʼaʼí bił ahííłtsą́, dóó shichʼįʼ haadzííʼ, dóó nidiʼniʼ diitsʼaʼ nahalingo shichʼiʼ haadzííʼ dóó nahasdzáán tʼáá átʼé neiyisnááʼ.

8 Áádóó baa hoolzhiizh tʼáágí jį́ dóó táágí tłʼééʼ tʼóó baahádzidgo shił nahonigaah ńtʼę́ę́ʼ dóó shiiʼ sizíinii yéego tiʼhoozniiʼ; áádóó tsʼídá tʼah doo, Diyin Bóhólníihii Jesus Christ yéego ajoobaʼ bee bichʼįʼ haasdzííʼgo, shibąąhági ádaatʼéii bee shaaniʼdeitʼą́. Ákondi shooh, yéego bichʼį haasdzííʼ dóó shiiʼ sizíinii biiʼ hodiilzééʼ.

9 Áádóó áko, shiyeʼ, díí bee hóníyá dooleeł biniyeʼ bee nił hweeshneʼ, áko shitsʼą́ą́dóó akʼiʼdiʼdíítʼį́į́ł, doo nááná łahgiʼ átʼáo doodago átʼéhígiʼ átʼáo diné yisdáʼdoodloos, Christ biiʼ dóó biníkááʼ góneʼ tʼéiyá. Áko shooh, éí iiná dóó nihokááʼ dineʼé bibee adinídiin nilį́. Áko shooh, éí saad tʼáá aaníinii dóó tʼáá ákogiʼ átʼéii nilį́.

10 Áádóó kʼad, saad bee naʼnítin sínílį́įgo tʼáá bee naʼnítin doo; yéego ánítʼį́į doo dóó tʼáá ałtsojįʼ hazhóʼó íʼíłʼį́.

11 Tʼáadoo ádaadziinídlíigo naninání; aooʼ, áko tʼáadoo nihódzą́ bee ádaadzíínídlíhí, doodago ayóó neʼadziil bee.

12 Yéego hanidzih, ákondi tʼáadoo bilááhgóó áníłʼíní; áádóó ałdóʼ tʼáá átʼé bídenílinígíí hazhóʼó naniloʼ, áko ayóó óʼóní niiʼ hadeezbin doo; tʼáadoo tʼóó sínídáhí.

13 Zoram dineʼégiʼ átʼáo tʼáadoo sodílziní, háálá yiniłtsą́ dineʼé dabidiitsʼaʼgo sodadilzin, doodago biʼéédahózin bee baadahodoonihgo.

14 Kódóóneʼ lágo: O Diyin God, nihikʼiské bilááhgo yáʼádaniitʼé; ákondi kódíní: O Diyin Bóhólníihii, doo hodíínísinígíí beeshanídiʼníʼaah, dóó shikʼiské ajoobaʼ bee bénáshniih doo—aooʼ, tʼáá áłahjįʼ Diyin God doo hodíínísinígíí bidááhdóó bił ííshją́ą́ íínísin.

15 Áádóó Diyin Bóhólníihii niiʼ sizíinii yikʼijídlíi doo, dóó nihoníyáadi bíł hazʼą́ądi yahʼandoolóós, ahodíínílzééʼ sínídáa doo. Áko kʼad yínááł, shiyeʼ, dóó díí dineʼé Diyin bizaad bee nanítin. Shiyeʼ, hágoóneeʼ.