1 Shiyeʼ, shizaad diitsʼį́į́h; tʼáá aníí ándíshní, Diyin God bibee hazʼáanii bikʼeh honíłʼį́įgo kéyah bikááʼ yáʼátʼéehgo náás yínááł doo.

2 Nihizásí dabiʼdishnah yęę béénílniihgo, díí íísdzaahígíí beʼdííłííł; háála naalteʼ danilį́į́ ńtʼę́ę́ʼ, doo łaʼ yisdábidooʼishí da tʼáá hazhoʼó Abraham biDiyin God, dóó Isaac biDiyin God, dóó Jacob biDiyin God tʼéiyá; dóó tʼáá íiyisíí bichʼįʼ ndahwiiʼnáádę́ę́ʼ yisdábííʼeezh.

3 Áádóó áko, O shiyeʼ Helaman, áko shooh, tʼah tsíłkéí nilį́, dóó áko, díí baa nánooshkąąh shizaad didíítsʼį́į́ł dóó shitsʼą́ą́dóó óhoołʼaa, háálá shił bééhózin háida Diyin God yaʼólíigo naʼbidiʼnitaahígíí, dóó biʼdiiłʼáhígíí, dóó bee bichʼįʼ nahwiiʼnanígíí yee bikáʼadoolwoł, éí nihóníyáadi yisdádoogááł.

4 Díí tʼáá shí bikʼiʼdiitʼą́ tʼáadoo niníziní—atʼíískʼehjí éí dooda iiʼ sizíiniikʼehjí áłdishní, atʼíískʼeh ntsáʼákees éí dooda ákondi Diyin God éí bitsʼą́ą́déeʼ.

5 Áko, shooh, ándishní, tʼáadoo Diyin God beʼaweeʼ síłį́įgo díí doo bikʼidiitʼą́ą́ da doo ńtʼę́ę́ʼ, ákondi Diyin God, Diyin bá naalʼaʼí diyinii shił hoolneʼ, doo éí tʼáá shí ánishtʼéhígíí binahjįʼ shił ííshją́ą́ áyiilaa da.

6 Háálá Mosiah biyeʼké bił naashdeeh ńtʼę́ę́ʼ, Diyin God bisodizin dadiilchxǫǫł daniizingo; ákondi shooh, Diyin bá naalʼaʼí diyinii nihichʼįʼ ayííłʼaʼgo nanihiníłtłʼah.

7 Áádóó áko shooh, nihichʼįʼ haadzííʼ, ayóó íítsʼaʼgo adiʼní nahalingo, nihiyaadóó niʼ tʼáá átʼé nahasnááʼ; dóó tʼáá aníítʼé niʼjįʼ naaʼaniideeʼ, háálá Diyin Bóhólníihii nihideesnáá.

8 Ákondi shooh, haʼoodzííʼgo kóshiʼdooʼniid: Yiizįįh. Áádóó nídiishnaʼ dóó yiizįʼ; dóó Diyin yá naalʼaʼí yiiłtsą́.

9 Áádóó kóshidííniid: Shidiʼyoołyééł nínízin ndi, Diyin God bisodizin éí dóó dííłchxǫǫł da.

10 Áádóó baa hoolzhiizh niʼjįʼ naaʼíítłizh; áádóó tágíjį́ dóó tágí tłʼééʼ azlį́į́ʼ chʼééh shizééʼ ąą áshłééh, áádóó shigaan dóó shijáád ałdóʼ doo ndaalnish da daazlį́į́ʼ.

11 Áádóó Diyin yá naalʼaʼí ląʼígo yee shichʼį́ hanáánáádzííh, éí shikʼiské deidiiztsʼą́ą́ʼ, ákondi shí éí tʼáadoo sidétsʼą́ą da; áko díí saad disítsʼą́ą́go—Shidiʼdoołyééł nínízin ndi, Diyin God bisodizin éí dóó dííłchxǫǫł da—Éí shidiyoołhééłgo da tʼóó bááhádzidgo béésésdzííd dóó bikʼee shił hooyééʼ, éí bąą niʼjįʼ naaʼíítłizh dóó jééhkał sélį́į́ʼ.

12 Ákondi hoolʼáágóó tiʼhooʼnííh shikʼihooleʼ; háálá shiiʼ sizíinii aláahdi ayóó atʼéego bichʼįʼ nahwiisʼnááʼ dóó shibąąhági ádaatʼéii tʼáá átʼé bikʼee tiʼhwiiséniiʼ.

13 Aooʼ, tʼáá átʼé shibąąhágiʼ ádaatʼéii dóó doo yáʼátʼéehii baa niséyahę́ę́ bénááshniiʼ, éí bąą chʼį́įdiitahdi tiʼhooʼnihígíí tʼáá íiyisíí bikʼee tiʼhwiiséniiʼ; aooʼ, shiDiyin God bikʼijįʼ sélį́į́ʼgo baa ákoniizį́į́ʼ, dóó diyingo bibee hazʼáanii doo bikʼeh honishį́į da ńtʼę́ę́ʼ.

14 Aooʼ, ląʼída baʼáłchíní niséłtseed, doodago doo yaaʼáhooshǫ́ǫ́jigo yóóʼáhéʼeezh; aooʼ, áádóó dooládóʼ bąąhágiʼ íísdzaa da lá, shiDiyin God bił yahadeeshááłgo baa tsídikeezgo tsʼídá doo bee hajódziih átʼéego shiiʼ sizíinii tiʼhoozʼniiʼ.

15 Atihíláaneʼ, niizį́į́ʼ, yóóʼáshidiʼdoolnííł dóó shitsʼíís dóó shiiʼ sizíinii náádidoolyééł, áko shiDiyin God doo bidááhdóó nashiʼdiʼdoodlóósgo, baa nisíyahą́ą́ʼ bee shánahidootʼááł da.

16 Áádóó áko, tʼáágíjį́ dóó tʼáágí tłʼééʼ tiʼhwiiséniiʼ, azhą́ chʼį́į́dii shiiʼ sizíinii neiloʼgo shichʼįʼ nahwiisnááʼ.

17 Áádóó baa hoolzhiizh tʼáá íiyisíí bikʼee tiʼhooshʼnííhgo, bąąhági áátʼįįdyę́ę bénááshniiʼ dóó tʼóó báhádzidgo yínííł biih yítłizh, áko shooh, shizheʼé Diyin bikʼeh áhodoonííłgo éí Jesus Christ doogááłgo diné yee yichʼįʼ haadzííʼyę́ę ałdóʼ bénááshniiʼ, Diyin God biYeʼ, éí nihokááʼgóó bąąhági ádaatʼéii yá ninaʼdoodlééł.

18 Áko, éí baa tsédíkeezgo, shijéí biyiʼdóó sodeeszin, O Jesus, Diyin God biYeʼ nílíinii, neʼayóóʼoʼóníinii bee shaa jiiníbaah, bikʼeʼashchʼííʼgo bikʼeʼíyééʼdéé dóó bąąhági átʼéii shótąʼgo shił hazʼą́, anoonééł bibéésh daʼahólzhʼaʼí shináztʼiʼ éí doo ninítʼiʼ da.

19 Áádóó áko, shooh, díí baa tsídíkéez, bikʼee tiʼhooshnííhyę́ę shikʼeeldoh, aooʼ, bąąhági áshtʼį́įgo yínííł yiih shííłtʼį́yę́ę kʼad doo bénáshniih da.

20 Áádóó dooládóʼ, baa hózhǫ́ǫ da, dóó díí tsʼidá tʼáá aaníinii nizhónígíí yiiłtsʼą́; aooʼ, shiiʼ sizíinii ił hózhǫ́ biiʼhadéíbįįd shichʼįʼ nahwiinánéé tsʼídá biláahdi!

21 Aooʼ, ándishní, shiyeʼ, adin tsʼídá doo kotʼáó naʼiiłnání da dóó bikʼeʼíyééʼgo tiʼhooshnííh da ńtʼę́ę́ʼ. Aooʼ, áádóó áłdó ánndishní, shiyeʼ, nááná łahgo ałdóʼ, adin tsʼídá doo kotʼáó naʼiiłnání da dóó tʼáá íiyisíí baa shił hózhǫ́.

22 Aooʼ, díí yiiłtsą́ nizį́į́ʼ, Nihizheʼé Lehi iiłtsánéégiʼ átʼáo; Diyin God yikááʼdóó nahaʼáii yikááʼ dasidah niizį́į́ʼ, tʼáadoo bee néelání Diyin yá ndaalaʼí bináztʼiʼgo, biDiyin God yá dahataał dóó yaa dahaniih; aooʼ, áádóó shiiʼ sizíinii áadi hónishłǫ́ǫ doo nízin.

23 Ákondi shooh, shigaan dóó shijáád bidziil ńdaasdlį́į́ʼ, dóó yiizįʼ, áádóó Diyin God ániidí ánáshiidlaaʼígíí diné bił ííshją́ą́ ííshłaa.

24 Aooʼ, áádééʼ dóó kojįʼ, doo niʼkoshnééhgo yishnish, áko diné ádaańdaʼdookąąłgo biká adeeshwoł nisin, áko aláahdi ił hózhóonii bikʼiníyáhééʼ bí ałdóʼ yikʼídadookah, áko bí ałdóʼ Diyin God ániidí ándabidoodlííł, áádóó Iiʼ Sizį́ Diyinii bił dahólǫ́ǫ doo.

25 Aooʼ, dóó áko shooh, O shiyeʼ, nishishnishgo bitsʼą́ą́dóó idahidiikaiʼígíí binahjįʼ Diyin Bóhólníihii ayóó átʼáo ił hózhǫ́ sheenílá;

26 Saad shił ííshjání alyaaʼígíí, shooh, eí bee Diyin God ląʼída ániidí ándabiidlaa, shí shíł bééhózinígiʼ átʼéego, dóó shí iiłtsánígiʼ átʼáo binááʼ yee daʼiiłtsą́; éí bąą díí bee haasdzíʼígíí yikʼidaʼdiitą́, shí bikʼeʼdiitánígiʼ átʼáo; dóó díí shił bééhózinígíí éí Diyin God bitsʼą́ą́dééʼ nídiilá.

27 Áádóó azhą́ nashidiʼneestʼą́ą́ʼ dóó ałʼąą átʼéego shichʼįʼ nahwiisʼnáá ndi shíkáʼaʼoowod, aooʼ, tsʼídá ałʼąą átʼéego tiʼhooʼnííh biiʼ niséyáhígíí; aooʼ, Diyin God awáályahdééʼ shééʼníłniiʼ, dóó sheʼastłʼǫ́ǫ́dééʼ, dóó anoonéełdééʼ; aooʼ, áádóó baʼííníshłí, dóó tʼáá yisdáshiilóós doo.

28 Áádóó shił bééhózin nihóníyáadi nááshiidoołnaał, ayóó áhootʼéedi bił honishłǫ́ǫ doo; aooʼ, áádóó hoolʼáágóó baa hashniih doo, háálá nihizází Egyptdę́ę́ʼ yisdáyiiʼeezh, áádóó Egypt dineʼé Tónteel Łichííʼ yee yiyííghą́ą́ʼ; dóó kéyah baa deitʼą́ąjįʼ beʼadziil yee yiníʼeezh; aooʼ, biʼdisnááhgo ąąh shijééʼdééʼ tʼáá ahą́ą́ʼ yisdánéíʼish ńtʼę́ę́ʼ.

29 Aooʼ, áádóó ałdóʼ nihizází Jerusalem kéyahdę́ę́ʼ chʼííníʼeezh, áádóó ałdóʼ, hoolʼáágóó beʼadziilii yee yisdáyííʼeezh, biʼdisnááhgo ąąh shijééʼdééʼ; tʼáá ahą́ą́ʼ dóó dííjį́įjįʼ; áádóó dabiʼdisnahą́ą́h tʼáá áłahjįʼ bénáshniih; aooʼ, éí bidisnááh yę́ę nihídoʼ béédaałniih, shí íísdzaahígiʼ átʼáo.

30 Ákondi shooh, shiyeʼ, doo díí tʼéiyá da; shí shił bééhózinígiʼ átʼáo ni ałdóʼ nił bééhózin doo, Diyin God bibee hazʼáanii bikʼeh honiłʼį́įgo kéyah bikááʼgóó bee náásdíínááł; áádóó ałdóʼ nił bééhózin doo, Diyin God bibee hazʼáanii doo bikʼeh honíłʼį́įgo éí bił hazʼą́ą́dóó chʼíndiʼnóólchxééł. Áko díí éí yee haaʼdzíʼígíí bikʼehgo.