1 Áádóó áko Alma díí saad ałtso yee yichʼįʼ haadzíiʼgo niʼ neezdá, áádóó Amulek yiizįʼ dóó neidíníítą́ą́ʼ, kóníigo:

2 Shikʼéí, Christ doogááł haʼníigo baa haʼoodzíʼígíí tʼáadoo baa dahosidiitsʼą́ą da dadidoohniiłígíí éí doo ákótʼée da nisin, éí Diyin God biYeʼ átʼį́įgo bee ndaʼniitin; aooʼ, shił bééhózin díí tʼóó ahayóidi bee nidanihiʼdiʼneestą́ą́ʼ tʼahdoo nihitsʼánóhkáhą́ądą́ą́ʼ.

3 Áádóó shikʼis ayóó ííníshʼnínígíí adadohlííłígíí nihił ííshją́ą́ íídoolííł, nihichʼįʼ ndahwiiʼnánígíí biniinaa; dóó nihíniʼ hashtʼedaahłééh nihidííniid; aooʼ, tʼáá íiyisíí daʼiinohdlą́ dóó hadaʼíínółní nihidííniid—

4 Aooʼ, niheʼoodląʼ tʼáá íiyisíí niheehólǫ́ǫgo saad nihijéí biyiʼdi kʼidohłé, áko bee hozhǫ́ dooleełígíí bídadinóohtah.

5 Dóó baa ádahooniidzííʼ nihinitsékees biyiʼdi tsʼídá yéego ndaʼádoołkidígíí éí saad tʼáá aníínii Diyin God biYeʼ biiʼ hólǫ́, éí doodago daatsʼí Christ doo hólǫ́ǫ da.

6 Dóó shikʼis, ląʼída ałʼąą átʼéego naʼnitin, nihił ííshją́ą́ áyiilaa, Christ bitsʼą́ą́dę́ę́ʼ saad bee yisdáʼdoodáłígíí biiʼ hólǫ́.

7 Shikʼis Zenos saad yee haadzíʼę́ę choyoosʼįįd, Diyin God biYeʼ nináʼnídláhígíí binahjįʼ, áádóó Zenock bizaad ałdóʼ yee haadzííʼ; Moses bizaad ałdóʼ choyoosʼįįd, díí bee tʼáá aaníí ádaatʼé.

8 Áádóó áko, shooh, tʼáá shí ánihidideeshniił díí tʼáá aaníí ádaatʼé. Áko shooh, ánihidishní, Christ diné yitah doogáłígíí, dóó bidineʼé ndaʼiisiʼyę́ę ákʼiididootʼáłígíí shił bééhózin, dóó nihokááʼ dineʼé baʼáłchíní bibąąhági ádaatʼéii yá tíʼhodoonih; háálá Bóhólníihii Diyin God yee haadzííʼ.

9 Háálá bąąhági átʼéii bikʼé nináʼdoolyéełgo bee nihootʼą́; háálá Hoolʼáágóó Diyin God binahatʼaʼ ayóó átʼéii bikʼehgo éí bąąhági átʼéii bikʼé nináʼdoolyéełgo ályaa; éí doodago éí nihokááʼ dineʼé tʼáá ałtso hoolʼáágóó tihdahoonííh doo; aooʼ, tʼáá ałtso daastłʼis dóó tʼáá ałtso daʼasihgo yóó aheeskai, dóó hoolʼáágóó tihdahojoonííh dooleeł tʼáá hazhóʼó tsʼídá bąąhági átʼéii bikʼé nináʼílyáhígíí boholyaago tʼéiyá.

10 Háálá éí tsʼídá ayóó átʼéego dóó akéeʼdi nááʼiiniih ádoolnííł; aooʼ, doo éí diné nááhidoonih da, dóó ałdóʼ doo éí naaldlooshii daʼáłchínígíí da, dóó ałdóʼ doo éí tsídii da; háálá doo éí nihokááʼ dineʼé nááhidoonih da; ndi doo nineelʼą́ą́góó dóó hoolʼáágóó nááʼiiniih átʼée dooleeł.

11 Kʼad éí doo tʼáá háíshį́į́ diné bidił yee nááná łaʼ diné bibąąhági ádaatʼéii yee yá yikʼé nináʼ doodlééł da. Áko shooh, diné iisxį́įgo, daʼ nihibee hazʼáaniiʼísh, tʼáá ákogi átʼáó bikʼéstʼiʼ, bikʼis yiyiisxį́įgo? Nihichʼįʼ haasdziihigo éí, Doodah.

12 Ákondi bee hazʼáanii éí iisxíinii tʼáá bí beʼiinaʼ yee yikʼé nináʼdoodlééł ní, áko tsʼídá nááná łaʼ éí doo bííghah da tʼáá hozhoʼó hoolʼáágóó bąąhági ádaatʼéii bikʼé nináʼílyáago tʼéiyá bee nihokááʼgi bííghah dooleeł.

13 Éí bąą, tsʼídá ayóó átʼéego dóó akéeʼdi nááʼiiniih ádoolnííł; índa kótʼée dooleeł, éí doodago ákódoolnííłʼ, dił bee nááʼiiniihyę́ę ndootʼih; áko índa Moses bibee hazʼáanii ałtso biʼdoolnííł; aooʼ, tʼáá ałtso biʼdoolnííł, tʼáá ałtso áłtsʼíísíjįʼ dóó dah łizhinjįʼ, dóó doo łaʼ bił áhodoolzhizh da.

14 Áádóó áko shooh, díí tʼáá átʼé bee hazʼáanii ííłní, tʼáá ałtsoní honíshééhíjįʼ tsʼídá ayóó átʼéego dóó akéeʼdi nááʼiiniih áá haʼní, dóó Diyin God biYeʼ éí tsʼídá ayóó átʼéego dóó akéeʼdi nááʼhiidoonihii nilį́į doo; aooʼ, hoolʼáágóó doo ninítʼiʼii átʼée doo.

15 Áádóó ákótʼáo tʼáá ałtso bízhiʼ yoodlánígíí yisdéídooʼish; díí éí biniyé tsʼídá akéeʼdi nááʼhiidoonih, hayiʼdi bee ajoobaʼ ndoolyééł, éí tʼáá ákogi átʼáo nihwiitʼaah yiláahgo bidziil, dóó binahjįʼ diné daʼiidoodląąłgo ádaańdaʼdookąął.

16 Áádóó ákótʼáo ajoobaʼ tʼáá ákogi átʼáo nihwiitʼaah bee átʼée dooleełígíí yiʼdoolííł, dóó hasih bee bińdoochił, áko biʼoodląʼ ádaadingo doo ádaańdaʼookąąhgóó éí tʼáá átʼé bee nihwiitʼaah bee haa hwiidínóotʼįįł; éí bąą tʼáá háiida oodląʼ yee ádaanáʼooskango tʼéiyá ayóó átʼáo dóó hoolʼáágóó nináʼílyáago hootʼááł bikʼéstiʼ dooleeł.

17 Éí bąą shikʼéí, Diyin God nahá hwiidoołʼaał, áko niheʼoodląʼ bee ádaańdaʼoohkąąhgo hahodoolzhish, áko bizhí dilzinígíí bee bichʼįʼ sodadołzingo hahodoolzhish, áko nihaa joobaʼ dooleeł.

18 Aooʼ, ajoobaʼ bíká bichʼįʼ sodadołzin; háálá éí bidziilgo yisdáʼnihidoonił.

19 Aooʼ, hojoobaʼ ádaʼdółnééh, áádóó tʼáá bichʼįʼ sodadołzin doo.

20 Nihidaʼakʼeh nahazʼáago yéego bichʼįʼ ndaʼoohkąąh, aooʼ, nihilį́į́ʼ tʼáá ałtso bá.

21 Danihighangóó yéego bichʼįʼ ndaʼoohkąąh, aooʼ, bił nihighanígíí tʼáá ałtso bá, abínígo, ałnéʼéʼááhgo, dóó eʼeʼááhgo.

22 Aooʼ, yéego bichʼįʼ sodadołzin niheʼanaaʼí bibee adziilii bikʼijįʼ.

23 Aooʼ, yéego bichʼįʼ sodadołzin biʼiiníziinii bikʼijįʼ, éí tʼáá ákogi ádaatʼéii tʼáá ałtso yikʼijįʼ nilį́.

24 Yéego bichʼįʼ sodadołzin dáʼákʼehgóó kʼidaʼdoołáhą́ą bá, áko ląʼígo ńdaʼdínóołtʼį́į́ł.

25 Yéego nihikéyahgóó nihilį́į́ʼ ndaakaígíí bá sodadołzin, áko ląʼída dooleeł.

26 Ákondi doo díí tʼéiyá da; doo naagháhí góneʼ yah anáńdaahkahgo tʼáá átʼé bee ádanohtʼéhígíí bee sodadołzin, dóó nahonitʼin nahazʼánídi, dóó doo kéédahojitʼínídi sodadołzin.

27 Aooʼ, áádóó Diyin Bóhólníihii bichʼįʼ sodadołzin doo bííghahgóó, bíniʼ nihijéí biiʼdóó, áłahjįʼ Diyin God bichʼįʼ ádá sodadołzin, dóó tʼáá ałtso diné nihinaagóó dahólóonígíí ałdóʼ bá.

28 Áádóó áko shooh, shikʼéí ayóó ánihííníshʼníinii, ánihidishní, díí tʼáá ákódí tʼáadoo danohsiní, háálá díí ałtso ádaohłaago, bichʼįʼ ańdahaztʼiʼígíí, dóó beʼééʼ ádaadinígíí doo bíkáʼ oohjééʼgóó, dóó bitah dahoneezgaiígíí dóó bichʼįʼ ndahwiiʼnánígíí doo bandaohkahgo, dóó tʼáadoo leʼé nihee dahólónígíí, tʼáá háiida bee ádaadinígíí doo bee bíká oołyeedgóó—ánihidishní, díí tsʼídá doo ádaahtʼį́į́góó, áko shooh, nihisodizin éí tʼáadoo biniyéhé da, dóó doo nihíká adoolwoł da, dóó diné tʼóó ádahoʼdilʼínígíí éí oodląʼ doo deinízinígíí ndahonohłin.

29 Éí bąą, diyingo ayóó óʼóʼní doo béédaohłniihgóó, béésh bąąhdóó nahjįʼ dilyį́hígíí nohłį́, éí béésh yidiłhį́įhii chʼídayiiłtłʼiid, (eii éí doo bą́ą́hílíinii átʼée da) dóó diné tʼóó yikʼindaakai.

30 Áádóó áko, shikʼéí, nihá kwíínísin, ląʼída nihił ííshą́ą́ ályaaʼígíí woołtsą́ągo índa, Diyin bizaad dílzingo bee akʼedaʼashchínígíí díí yaa halneʼgo binahjį baa ákonohsin doo, bee ádaańdaʼsookanígíí bee wóshdę́ę́ʼ nihohkááh.

31 Aooʼ, wóshdę́ę́ʼ nihidoohkahą́ą nihá nisin dóó tʼáadoo nihijéí daołtłʼisí; háálá áko shooh, yisdádooháałjįʼ oʼoolkid dóó ayííłką́; háálá áko shooh, ádaańdaʼoohkąąh dóó nihijéí doo dasoołtłʼisgóó, tʼáá hooshchʼįʼ ayóó átʼéego nináʼílyáago bee hootʼááł nihaadoolyééł.

32 Háálá áko shooh, díí iiná biyiʼ éí diné Diyin God yaa doogááłgo yiniyé hashtʼeʼádiʼdoolnííłgo bá hooʼaʼ, aooʼ, áko shooh díí iiná yitʼihígíí bijį́ éí diné ndoolnish biniyé ooʼááł.

33 Áádóó áko, bee nihił hweeshneʼę́ę bikʼehgo, ląʼída nihił ííshą́ą́ ályaaʼígíí daołtsą́ągo, éí bąą, baa nánihooshkąąh tʼahdoo iiná ałtso ádaałeʼ bijį́įdi índa ádaańdaʼookąąhí; háálá dííjį́ iiná yitʼihígíí ííłtsogo; hoolʼáágóó iiná bá hashtʼeʼádadidiilnííł biniyé nihaílyá, áko shooh, díí iiná biyiʼ doo hazhóʼó hashtʼeʼádadiilnéehgo, éí bikééʼdę́ę́ʼ tłʼéeʼgo chahałheeł biyiʼ naanish ádooníłígíí ádin.

34 Diyin bikéyah hózhónídi baa nooyáago, doo éí kódidoohniił da, kʼad ádaanáʼiideeshkąął, áko shiDiyin God baa nídeeshdááł. Dooda, doo éí kódidoohniił da; háálá tʼáá éí iiʼ sizíinii tʼahdoo náándiilyéhę́ędą́ą́ʼ nihitsʼíís yiyiʼ hólónée, tʼáá éí iiʼ sizíinii adziilii bee hólǫ́ǫgo nihitsʼíís nayiiłnáa dooleeł hoolʼáágóó iiná bił hazʼą́ądi.

35 Háálá áko shooh, tʼah índa dadoohníígo tʼáadoo ádaańdaʼsookangóó náánihiʼdiilyáajįʼ ayííłką́ągo, áko shooh, chʼį́įdii biʼiiníziinii nanihiloʼ dooleeł, dóó bíjístłʼǫ́ǫ dooleeł; éí bąą, Diyin Bóhólníihii biʼIiʼ Sizį́ Diyinii nitsʼą́ą́jįʼ kódoonííł, dóó doo nihiyiʼ hólǫ́ǫ da dooleeł, dóó biʼiiníziinii tʼáá ałtsojįʼ nanihiloʼ dooleeł; dóó díigi átʼéego éí bąąhágiʼ ádaatʼinígíí akéeʼdi bił hazʼą́ą dooleeł.

36 Áádóó díí shił bééhózin, háálá Diyin Bóhólníihii éí ání atsʼíís doo biiʼ hodilzinígíí éí doo biiʼ honishłǫ́ǫ da, ndi diné yáʼátʼéehii bijéí biiʼ honishłǫ́; aooʼ, áádóó ałdóʼ ádííniid diyinkʼehgo deiyíkaahígíí éí shił hazʼą́ądi shił yahidookah, doo chʼéédoodááłgóó; ndi biʼééʼ éí Diyin biDibé Yázhí bidił bee daalgaigo ádoolníił.

37 Áádóó áko, shikʼéí ayóó ánihííníshʼníinii, díí béédaohłniih dooleeł nisin, dóó Diyin God bá dahódínóhsingo yisdádadoohkahígíí bindaałnish dooleeł, dóó Christ éí doo doogááł da tʼáadoo dadohníní;

38 Áko tʼáadoo Iiʼ Sizį́ Diyinii bikʼijįʼ naałdzilí, bíniʼ nihiyiʼ hólǫ́ǫ dooleeł, dóó Christ bízhiʼ ákʼidadohtʼaah; áko tʼáá íiyisíí hojoobaʼ ídaʼdółnéehgo niʼjįʼ ntsidahidoohgeeh, dóó Diyin God bichʼįʼ sodadołzin, tʼáá naaháágóó, diyingo dóó tʼáá aaníinii nihił bééhózinígíí binahjįʼ, dóó tʼáá ákwíí jį́ bichʼįʼ ahééh danohsin, yee nihaa joobaʼígíí dóó yee nihikʼijidlíhígíí- nihaayizlá.

39 Aooʼ, áádóó ałdóʼ tʼáá íiyisíí ánihidishní, shikʼéí danohłíinii, tʼáá áłahjįʼ sodizin bee ádaa áhółyą́, áko biʼiiníziinii yee yíʼoołkąąhígíí doo yee yóó anihidínóoʼah da, áko doo nihikʼehdidoodleeł da, áko ałtso iiyííłką́ągo doo nanihiloʼ da dooleeł; háálá áko shooh, yáʼátʼéehii éí doo nihaidoolééł da.

40 Áádóó áko shikʼéí ayóó ánihííníshʼníinii, haʼíínólnígo, achʼįʼ nahwiiʼná tʼáá ałtso bichʼįʼ nihidziil; áádóó teʼéʼí biniinaa chʼídanihineeskadígíí tʼáadoo deinóhdziihí, háálá ákódaahdzaago éí bígi átʼáo bąąhági ádaohtʼį́į doo.

41 Ákondi hadaʼíínółní, dóó achʼįʼ ndahwiiłnáanii bichʼįʼ danihidziil, dóó haaʼígííshį́į́ hoozhizhgo tʼáá ałtso bee nihichʼįʼ ndahwiiʼnáanée biiʼ hadookah dóó háádadoołyįh.