1 Áádóó baa hoolzhiizh náás dah diikai, dóó Diyin God bizaad diné yee ndeinitingo hahoolzhiizh, bisodizin bá dahooghangóó, dóó dabighan góneʼ yił yah adahakáahgo; aooʼ, dóó kintah daʼnítiingóó ndi Diyin God bizaad yee ndaʼneeztą́ą́ʼ.

2 Áádóó baa hoolzhiizh yéego yił ndaashnishgo, diné baa dahojoobáʼígíí baa áłah ńdaadleeh daazlį́į́ʼ; háálá áko shooh, bisodizin yiiʼ áłah ńdaadleehdóó chʼíbidiʼneelkaad háálá beʼééʼ danichxǫ́ǫ́ʼígo biniinaa—

3 Éí bąą bisodizin biDiyin God yichʼįʼ sondadiilzį́į́h yę́ęgi bichʼįʼ baa hóchį́ʼ, tʼóó badaaʼih dabiʼdiʼní; áko téʼéʼį́ danilį́; aooʼ, éí bikʼéí tʼáadoo yee choodaaʼíní da dabiłʼní; áko niʼbikáaʼgi iiná binaalyéhé bee ádaadin; dóó ałdóʼ bijéí hojoobáʼ ádeinízin.

4 Áko, Alma Onidah dayiskʼidgi diné neiʼnitingo dóó yichʼįʼ yałtiʼgo, tʼóó ahayóí diné baa áłah silį́į́ʼ, éí éí baa yádeeltiʼę́ę ádáátʼį́, éí bijéí biyiʼ hojoobaʼ ádeinízin, háálá niʼbikáaʼgi téʼéʼį́ biʼniighááhígíí biniinaa.

5 Áádóó Alma yeíkai; dóó bá yáłtiʼii kóbiłní: Áko shooh, díí shikʼéí shąʼ haadadoonííł, háálá téʼéʼį́ danilinígíí biniinaa diné tʼáá ałtso dabijoołá, aooʼ, nihipriest danilínígíí tʼáá íiyisíí danihijoołá; háálá sodizin yilą́ąjįʼ naazínígíí nihisodizindóó chʼídanihineeskaad éí nihílaʼ bee yéígo bindashiilnishgo átah ádeiilyaa; dóó tʼáá íiyisíí nihaa dahojoobáʼígíí biniinaa tʼáadoo áajįʼ ndaahkaií nihiʼdooniid; dóó biyiʼdóó Diyin God bichʼįʼ sodadiilzin dooleełígíí éí nihee ádaadin; dóó áko shooh, haash dadiiʼnííł?

6 Áádóó áko Alma díí yidiiztsʼą́ąʼgo, yichʼįʼ náhaayá, éí haadzííʼ yę́ę yił ahinéílʼį́į́ʼ; dóó tʼáá íiyisíí ił hózhǫ́ yee yiyiiłtsą́; háálá tiʼhooʼnííh tʼáá íiyisíí baa dahojoobaʼí ádaabiilaago yiyiiłtsą́, dóó Diyin God bizaad deididootsʼį́į́łgo hashtʼeʼádaʼdiilyaa lá.

7 Áko łahjí áłah nilinéé tʼáadoo yichʼįʼ yanáánááłtiʼ da; ákondi yichʼįʼ dahdiilniiʼ, dóó diné yiyiiłtsʼánígíí ayóó íitsʼaʼgo yichʼįʼ haadzííʼ, éí tʼáá íiyisíí niheʼiinaʼ łahgo ádadiilnííł danízin, dóó kwíídííniid:

8 Tʼáá íiyisíí nihijéí biyiʼ hojoobaʼ ádeinóhsingo hanihisééd; dóó díí tʼáá aaníigo, nihikʼihoojisdlį́į́ʼ doo.

9 Shooh nihikʼéí kódííniid, Haash dadiiʼnííł?—háálá nihisodizin bá hooghan biyiʼdę́ę́ʼ chʼínihidiʼneelkaad, áko nihiDiyin God doo bichʼįʼ ndahwiidláágóó ánihiʼdiilyaa.

10 Áko shooh ánihidishní, daʼ Diyin God bisodizin bá hooghan góneʼísh tʼéiyá bichʼįʼ nahadlá danohsin?

11 Áádóó nááná, nanihídíshkid, tʼáásh łáhádi damóo náʼádleehgo tʼéiyá Diyin God bichʼįʼ nahadlá danohsin?

12 Ánihidishní, nihisodizin bá hooghan biyiʼdę́ę́ʼ chʼínihidiʼneelkaadígíí éí tʼáá ákonééhii, jó éí hojoobaʼ ádeinóhsingo ánihiilaa, dóó bee hódzá ńdadidoohłééł; háálá díí naʼnitin bee hódzáanii tʼáá ákonééhii átʼé; háálá chʼínihidiʼneelkaadígíí biniinaa, dóó tʼáá íiyisíí téʼéʼį́ danóhłinígíí biniinaa nihikʼis danihijoołá, éí bąą nihijéí hojoobaʼ ádanihósingo ádanihiilaa; éí bąą nihijéí hojoobaʼ nízingo ádanihiilaa.

13 Áádóó áko, hojoobaʼ ádeinosingo ánihiʼdiilyaaígíí biniinaa nihikʼihojisdliʼ; háálá łahda diné, hojoobaʼ íínízin ábiʼdilʼįįhgo, ádaanáʼookąąh yiká átʼį́į doo; áko kʼad tʼáá aaníí, tʼáá háiishį́į́ ádaanáʼooskanígíí éí Diyin bee ajoobaʼ yikʼídoogááł; dóó tʼáá háiishį́į́ Diyin bee ajoobaʼ yikʼíníyáago dóó nááʼdiilyá bijį́įjįʼ yéego átʼį́įgo yisdádoogááł.

14 Áádóó áko, ánihidííniid yę́ę, hojoobaʼ danóhsingo ánihiʼdiilyaaʼígíi biniinaa nihikʼihojisdliʼ, Diyin God bizaad biniinaa tʼáá aaníí hojoobaʼ ádeiniizį́ʼígíí daʼ éí Diyin God aláahdi yikʼidahojídlíi doo danohsin?

15 Aooʼ, tʼáá háishį́į́ tʼáá aaníí hojoobaʼ iiniizį́į́ʼgo, dóó bibąąhági ádaatʼéii yaa náʼooskango, dóó nihoníyáajįʼ yéego átʼį́įgo, éí bikʼihojídlíi dooleeł—aooʼ, éí kódaatʼáó aláahdi bikʼidahojídoodliił, tʼáá íiyisíí téʼéʼį́ biʼniigháago biniinaa hojoobaʼ danízingo ádabiʼdiilyáaʼígíí biláahdi.

16 Éí bąą, tʼáadoo bichʼįʼ nahwiiʼnání tʼáá bí hojoobaʼ ádaʼdiilyaaʼígíí éí bikʼidahojídlíi dooleeł; éí doodago, kótʼéego ááłdishní, diné Diyin God bizaad yoosdląądígíí, dóó tʼáadoo bijéí biyiʼ bízhą́ daʼílíní tó bee biʼdoolzį́ʼígíí, aooʼ, tʼáadoo Diyin binaʼnitin bichʼįʼ niidlóózgo bił béédahózinígíí, éí doodago tʼáadoo yikʼiʼdidootįįłgo binílchéhí, áko índa daʼiidoodląąłígíí.

17 Aooʼ, ląʼída ádaaní: Yáʼąąshdę́ę́ʼ nihił ííshją́ą́ ályaago, áko índa tʼáá aaníí nihił béédahozin doo; áko índa daʼiidiidląął.

18 Áko nanihídíshkid, daʼ díísh oodląʼ átʼé? Áko shooh, ánihidishní, Ndaga; háálá diné tʼáá íídą́ą́ʼ tʼáadoo leʼé bił bééhózingo éí oodląʼ doo choidoołʼįįł da, háálá tʼáá íídą́ą́ʼ bił bééhózin.

19 Áádóó áko, tsʼídá haa níłtsogo aláahgo hoyéego bikʼijįʼ haʼdoodzih háiida Diyin God íinízinígíí bił bééhózin ndi doo yeʼełʼį́į́góó, doodago diné tʼóó oodlánígíí, éí doodago tʼáá haʼátʼííshį́į́ yinahjįʼ oodlánígíí, dóó daʼ éí bąąhági ádaatʼį́įgo ndaʼiisííʼ?

20 Áko díí tʼáá nihí nihił bééhodoozįįł. Áko shooh, ánihidishní, łahjí átʼéhígíí éí łahjigo ałdóʼ tʼáá ákótʼé; dóó diné tʼáá ałtso yinaashnishígíí bikʼehgo ńdaʼdiyóołbįįł.

21 Áádóó áko oodląʼ baa yááłtiʼ yę́ę—oodląʼ éí doo tʼáá ałtsoní hoł bééhózingo óolyée da; éí bąą oodląʼ nihee hólǫ́ǫgo éí tʼáadoo leʼé doo daatʼíinii bíká haʼíínółní, éí éí tʼáá aaníinii ádaatʼé.

22 Áádóó áko, nihił hashneʼ, dóó béédaołniih dooleeł nisin, Diyin God tʼáá ałtso bízhiʼ dayoodlánígíí yaa joobaʼ; éí bąą, tsʼídá áłtsé, nihá íinízinígíí, éí daʼiidoohdląął, aooʼ, tsʼídá bizaad ndi deidoohdląął.

23 Áádóó áko, Diyin yá ndaalʼaʼí binahjįʼ bizaad diné yił ííshją́ą́ ííłʼį́, aooʼ, doo éí diné tʼéiyá da asdzání ałdóʼ. Kʼad doo tʼáá díí tʼéiyá da; áłchíní yázhí ląʼída saad bił ííshją́ą́ ádaalneʼ, éí diné dahóyáanii dóó daʼííłtaʼii yikʼeh dadidlį́.

24 Áádóó áko, shikʼéí ayóó ánihííníshʼníinii, atínihiʼdiilyaa dóó chʼínihiʼdeelkaadígíí biniinaa háálá dadiiʼnííł dashíínóhʼní—áko nihaa ńjítʼį́ éí tʼáadoo dashíínóhʼníní tʼáá hazhóʼó tʼáá aaníinii binahjįʼ tʼéiyá nihaa ndeeshtʼįįł—

25 Háálá doo tʼáá ánółtso hojoobaʼ ánihiʼdiilyaa dishníi da; háálá łąʼ tʼáá aaníí nihitah hojoobaʼ deinoozį́į́ʼ nisin, azhą́ nááná łahgo nihił áhootʼée ndi.

26 Áko, oodląʼ baa haasdzíʼę́ę—doo éí tʼáá ałtsoní hoł bééhózingo óolyée da—shizaad ałdóʼ tʼáá ákótʼé. Tʼóó áłtségo éí doo tʼáá íiyisíí tʼáá aaníí átʼéego nihił béédahodoozįįł da, hadíłtʼéejįʼ, oodląʼgi átʼéego doo tʼáá ałtsoní bééhózingo óolyé.

27 Ákondi shooh, nihíniʼ chʼéédanoosííd dóó ńdadoołtʼeʼ, shizaad bínóhtááh, dóó oodląʼ azhą́ tʼįįhdígo ndi choołʼįįh, aooʼ, azhą́ yideeshdląął daatsʼí nohsin ndi, díí íinohsinígíí bíniʼ nihinaalnish, shizaad tʼáá áłtsísí ndi nihiyiʼdi bá hoołʼaʼjįʼ.

28 Áko, díí saad yáʼátʼéehii álástsiiʼ nahalingo baa ntsídadiikos. Kʼad, nihiyiʼ bá dahoołʼaah, áko nihijéí biyiʼ akʼǫ́ǫ́ʼ kʼídoolyáago, áko shooh, ákʼǫ́ǫ́ʼ tʼáá aaníí átʼéego, éí doodago ákʼǫ́ǫ́ʼ yáʼátʼéehii átʼéego, dóó doo daʼiinohdlánígíí bee yíwohjįʼ kódaahłéehgóó, Diyin Bóhólníihii biʼIiʼ Sizį́ Diyinii bikʼijįʼ nohłį́į́go, áko shooh, nihiyiʼdi ąąh dadínóosééł; dóó díí nihiyiʼdi ąąh kwáánííłgo baa ákodanohsingo, tʼáá nihiyiʼdóó kódadohníi doo—Díí ákʼǫ́ǫ́ʼ yáʼátʼéehii átʼéé lá, éí doodago saadígíí yáʼátʼééh lá, háálá shiiʼ sizíinii ntsaago akʼiʼdiitą́; aooʼ, hazhóʼó tʼáadoo leʼé baa ákonisingo áshiʼniilaa, aooʼ, shił łikan silį́į́ʼ.

29 Áko shooh, díísh niheʼoodląʼ ntsaago íidoolííł? Ánihidishní, Aooʼ; ákótʼée ndi tʼahdoo tʼáá ałtso bééhoozinjįʼ dínísééh da.

30 Ákondi shooh, akʼǫ́ǫ́ʼ ąąh kwáánííłgo, dóó biiʼ haʼníísą́, dóó dah díníísą́, áadi índa ádidoohniił díí akʼǫ́ǫ́ʼ yáʼátʼéhígíí átʼée lá; háálá áko shooh ąąh kódzaa, dóó biiʼ haʼníísą́ dóó dah díníísą́. Áádóó áko, shooh, daʼ díísh niheʼoodląʼ bidziilgo ádeidoolííł? Aooʼ, niheʼoodląʼ bidziilgo ádeidoolííł: háálá ádadidoohniił díí akʼǫ́ǫ́ʼ yáʼátʼéehii átʼé; háálá áko shooh biiʼ haʼníísą́ dóó dah díníisą́.

31 Áádóó áko, shooh, daʼ díísh tʼáá aaníí akʼǫ́ǫ́ʼ yáʼátʼéehii átʼé? Ánihidishní, Aooʼ; háálá tʼáá ałtso akʼǫ́ǫ́ʼ bitsʼą́ą́dóó hazlį́ʼígíí tʼáá beełtʼéego hadínóotʼį́į́ł.

32 Éí bąą, akʼǫ́ǫ́ʼ dínísééhgo éí éí yáʼátʼééh, ndi doo dínísééhgóó, áko shooh éí éí doo yáʼátʼéeh da, éí bąą tʼóó yóóʼ áhálghą́ą́h.

33 Áádóó áko, shooh, díí bínoohtą́ąʼgo, dóó akʼǫ́ǫ́ʼ kʼidooláago, dóó ąąh kódzaa dóó biiʼ haʼníísą́, dóó dah díníisą́ągo, áko akʼǫ́ǫ́ʼ yáʼátʼéehii átʼéego baa ákodínóohsįįł.

34 Áádóó áko, shooh, daʼ tʼáá ałtsonísh nihił bééhózin doo? Aooʼ, éídi éí tʼáá ałtso baa nihił bééhózin doo, dóó niheʼoodląʼ éí doo dilníish da; díí éí nihił bééhózinígíí biniinaa, háálá saadígíí nihiiʼ sizíinii ntsaago ádeidoolííł, dóó nihiyiʼdi dah díníisą́ągo nihił bééhózin, dóó tʼáadoo leʼé baa ákonohsin soolį́į́ʼ, dóó baa ákonohsinígíí ąąh kódzaa.

35 O índa, daʼ ákoósh díí tʼáá aaníí átʼé? Aooʼ, nihidishní, háálá adinídíín átʼé; áko tʼáadoo leʼé adinídíín átʼéego, éí yáʼátʼéehii átʼé, háálá adinídíín éí bééhózin, éí bąą yáʼátʼéhígíí átʼéego nihił bééhózin; áádóó áko shooh, díí adinídíín dasołnihgo daʼ tʼáá ałtsonísh nihił béédahózin?

36 Áko shooh nihił chʼíhonishʼaah, Ndagaʼ, nihidishní; dóó ałdóʼ doo éí niheʼoodląʼ nahjįʼ ndoohłeeł da, háálá niheʼoodląʼ éí bee akʼǫ́ǫ́ʼ kʼidadoołá éí díí akʼǫ́ǫ́ʼ daatsʼí yáʼátʼéehii átʼé danoozį́įʼgo biniyé bídanootą́ą́ʼ.

37 Áádóó áko shooh tsin dah díníisą́ągo, kódadidoohniił: Hazhóʼó baa ádahwiilyą́ą dooleeł, áko bikétłʼóól hodooleeł, áko dínóosééł, dóó bineestʼąʼ nihichʼįʼ kwíidoolííł. Áádóó áko shooh, tʼáá íiyisíí baa ádahołyą́ągo bikétłʼóól hodooleeł, dóó dínóohsééł, dóó bineestʼąʼ hodooleeł.

38 Ákondi tsin doo baa ádahołyą́ągo, dóó baa áháyánígíí doo baa ntsídaahkeesgóó, áko shooh doo bikétłʼóól hodooleeł da; dóó jóhonaaʼéí bitsʼáhonigááh silį́įʼgo yidoołchʼił, bikétłʼóól ádingo biniinaa ałtso dínóołnah, dóó hadoohʼnish dóó yóó ahidoołhą́ą́ł.

39 Áko, díí éí akʼǫ́ǫ́ʼ doo tʼóó baaʼihígíí biniinaa da, dóó ałdóʼ doo éí tsin bineestʼąʼ doo nidzinígíí biniinaa da; ndi éí nihileezh bikááʼ doo naniseʼígíí biniinaa, dóó tsin doo baa áhółyą́ą́góó biniinaa, éí bąą bineestʼąʼ doo nihá hodooleeł da.

40 Áádóó ákó, díí saad yáʼátʼéehii doo baa áhółyą́ągo, niheʼoodląʼ bee bineestʼąʼ hásídóoʼį́įʼgo, éí tsin bee iináanii bineestʼąʼ doo łaʼ náhidoohłah da.

41 Ákondi díí saad yáʼátʼéehii baa áhółyą́ą́góó, aooʼ, tsin dah díníisą́ągo baa áhółyą́ągo, yéego yinohdlą́ągo, dóó hadaʼíínółníinii bee, bineestʼąʼ hásídóoʼį́įʼgo, bikétłʼóól hodooleeł; áko shooh áádóó tsin dínéesą́ągo hoolʼáágóó iiná hodooleeł.

42 Áádóó háálá yéego óohtʼį́įgo, dóó oohdlą́ągo dóó haʼíínółníinii bee saad yáʼátʼéehii baa áhółyą́ągo, nihiyiʼdi bikétłʼóól hodooleeł, áko shooh, baa hoolzhiizhgo bineestʼąʼ ńdidoohʼááł, éí éí tsʼídá aláahdi ílį́, dóó tsʼídá tʼáá ałtsoní biláahdi łikan, dóó tsʼídá tʼáá ałtsoní biláahdi łigai, aooʼ, dóó tsʼídá tʼáá ałtsoní biláahdi chin bąąh ádin; dóó díí neestʼąʼ doohsį́į́ł nánoochaadjįʼ, doo dichin náádoohdleeł da, dóó doo dibááʼ náádoohdleeł da.

43 Ákohgo índa, shikʼéí, tsin bineestʼąʼ hodooleełjįʼ niheʼoodląʼ, dóó yéego ádaahtʼį́įgo, dóó haʼahóóní bee, dóó achįʼnahwiiná bichʼįʼ nihidziil, tsin bineestʼąʼ nihá bąąh hazlį́įjįʼ.