1 Áko shooh, baa hoolzhiizh Ammon bidineʼé Jershon kéyahdi ndahazʼná, aooʼ, áádóó Laman dineʼé dineʼé kéyahdóó chʼíneelkaad, dóó daneeznánígíí éí diné tʼáá ákǫ́ǫ́ keedahatʼínígíí łeeh deiyiznil—

2 Áko éí daneeznánígíí bideʼ ádzaaʼgo tʼáádóó yééltaʼ da, Nephi dineʼé daneeznánígíí ałdóʼ tʼáádóó yééltaʼ da—ndi baa hoolzhiizh ndaaztseedígíí łééh deesznilgo, áádóó dahódísingo chʼiyáán ádaahyitʼį́, dóó yínííł dóó sodizin ádaalyaago deiniłką́, (dóó ándahwiiʼaahíí Nephi dineʼé yikʼi dahwééʼaahgo hastʼą́ą́ʼtsʼáadah yihahígíí biyiʼ) áádóó adahwiisʼáágóó hódiiyeelgo hooʼaʼ.

3 Aooʼ, áádóó dineʼé Diyin Bóhólníihii bibee náhazʼáanii yikʼeh dahółʼį́į́ ńtʼę́ę́ʼ; dóó Diyin God bibee óʼoolʼįįł tsʼídá tʼáá íiyisíí yikʼeh dahółʼį́į ńtʼę́ę́ʼ, Moses bibee hazʼáaniigiʼ átʼáo; háálá Moses bibee hazʼáanii ałtso bohodoolnííłgo bee ndaʼbidiʼneeztʼą́ą́ʼ.

4 Áádóó áko Nephi bidineʼé doo bichʼįʼ naʼabaahgo ándahwiiʼaahii dahwéeʼaahgo hastʼą́ą́tsʼáadah ałtso nááhai.

5 Áádóó baa hoolzhiizh tsostsʼidtsʼáadah ndááhai anahwiiʼaahii bikʼihdahwéeʼaahgo, ahodiizyéélgo bee hooʼaʼ.

6 Ákondi baa hoolzhiizh tsostsʼidtsʼáadah náhááhgo, Zarahemla kéyahdi hastiin léíʼ níyá, éí Christ yitsʼą́ą́jí nilį́, diyingo ííshją́ą́ ádaalyai Diyin yá yádaałtiʼii yee hadahaasdzííʼyę́ę yikʼijįʼ naʼnitin éí dineʼé yee neiʼnitin, éí Christ doogááłgo baa haneʼ.

7 Áko diné beʼoodląʼ yee naʼnitingo doo bee hazʼáanii kíínítʼiʼ da; háálá díí Diyin God bibee hazʼáanii doo bikʼihjįʼ da áko tʼáá aheełtʼéego doo éí ałʼąą átʼéego báhólǫ́ǫ da.

8 Háálá Diyin bizaad bee akʼedaʼashchínígíí ání: Dííjį́ bá nanilʼaʼ dooleełʼígíí, bikééʼ yiizįįh.

9 Áko diné Diyin God bá naashnish nízingo, tʼáá bí bá ahóótʼiʼ; doodago, Diyin God yidoodląąłgo éí tʼáá bí bóhólnííhgo yá naalnish doo; ákondi doo yoodlą́ą́góó doo laʼ bee hazʼáanii átíbidoolííł da.

10 Ákondi iishxį́į́go atíbiʼdiʼdoolnííłgo iiná baa naadiʼdoolyééł; dóó háída tʼáadoo leʼé bighajilééhgo ałdóʼ atíhoʼdiʼdoolnííł; áádóó ázhneezʼį́įgo ałdóʼ atíhoʼdiʼdoolnííł; dóó azhʼdííláago éí ałdóʼ atíhoʼdiʼdoolnííłʼ aooʼ, hááłá díí doo ádaalʼíinii adeiłʼíigo atídabiʼdiʼdoolnííł.

11 Háálá nikookááʼ dineʼé niʼiisiʼígíí bikʼehgo bánahodootʼááł éí bee hazʼáanii bá hólǫ́. Ákótʼée ndi, nikookááʼ dineʼé beʼoodląʼ hólǫ́ǫgo doo bikʼijįʼ bee hazʼáanii hólóo da; ákohgo, nikookááʼ dineʼé asihígíí bikʼehgo atibiʼdiʼdoolnííł: éí bąą, nikookááʼ dineʼé tʼáá ałtso tʼáá aheełtʼéego bá hazʼą́.

12 Áádóó díí Christ-Yitsʼą́ą́jí Nilíinii, éí Korihor wolyé ńtʼę́ę́ʼ, (dóó bee hazʼáanii doo łaʼ bótąʼ da) Christ doo hólǫ́ǫ da níigo dineʼé neinitin. Áádóó díígiʼ átʼáo neinitin, kóníigo:

13 O tʼáadoo biniyéhígíí dóó tʼáá ádzaii bee hadaʼííłnoołninígíí éí yaa ádanihósin, haʼátʼíí biniinaa díí tʼáadoo biniyéhígíí nihizéédadeitʼį́į́h? Haʼátʼííshąʼ biniyé éí Christ hádadinóhʼį́į́ʼ? Háálá nihokááʼ dineʼé náásgóó adahodoonilígíí doo ła bił beehózin da.

14 Áko shooh, díí diyinkʼehjí bee éédahózinii dabidohnínígíí, éí Diyin yá yádaałtiʼii dadiyinii ałkééʼ yaadahoolneʼ dadohnínígíí, áko shooh, éí nihizází tʼáadoo biniyéhí bibee ádaʼoolʼįįłyę́ę ádaatʼé.

15 Haash yitʼáó tʼáá aníigo nihił béédahózin? Áko shooh, tʼáadoo leʼé doo daahʼínigíí doo nihił béédahózin da, áko éí Christ hólǫ́ǫgo doo nihił béédahózin da.

16 Náás bikádasídooʼį́į́ʼ dóó nihibąąhági ádaatʼéii bee nihaanídeitʼą́ągo nihił béédahózin dadohní. Ákondi shooh, éí ntséhákees digizígíí bitsʼą́ą́déé átʼé; dóó díí ntsáhákees yiichxǫʼígíí nihizází bitsʼą́ą́déé ádaʼoołʼįįłyę́ę biniinaa átʼé, éí biniinaa tʼóó ádaatʼéhígíí deinohdlą́ągo yikééʼ yooʼanihiiʼéésh.

17 Áádóó ląʼígo yee yichʼįʼ haháásdzííʼ, nihokááʼ dineʼé bibąąhági ádaatʼéii doo bikʼé nináʼdoolyééł da yiłní, ákondi nihokááʼ dineʼé tʼáá bí ádeinízinígiʼ átʼáo dahiiná; ákohgo nihokááʼ dineʼé tʼáá átʼé ayóó ntsekeesígíí bikʼehgo iiná łaʼ deiłʼį́, dóó nihokááʼ dineʼé tʼáá bí bidziilígíí yee akʼehdidlį́; dóó nihookʼááʼ diné áátʼįįłígíí doo adąąh dahastʼą́ą́ da.

18 Áádóó neineeztʼą́ą́ʼ, ląʼída bijéí yee yóóʼayizhʼeezh, bąąhágiʼ ádaatʼįįł ndaʼiisihígíí yee adaadadzódlíigo yee dahdaneitʼaah, aooʼ, ląʼída sáanii dóó hastóí, yooʼáyiʼéésh, áko atsʼíís yee tsiʼdeeskai—diné ádin yilééhgo, tʼáá ádíjįʼ nahónítʼįʼ yiłní.

19 Áko díí hastįį ałdóʼ Jershon kéyahgóó ííyá, Ammon bidineʼé díí yee neidínóotįįłgo, éí Laman dineʼé danilį́į́ ńtʼę́ę́ʼ.

20 Ákondi shooh éí Nephi dineʼé łaʼ yiláahgo dahóyą́; háálá deisił, dóó yedaʼaztłʼǫ́, dóó Ammon yidááhjįʼ ndeistʼį́ʼ, éi dineʼé bihigh priest nilį́į́ ńtʼę́ę́ʼ.

21 Áádóó baa hoolzhiizh éí kéyahdóó chʼídeidoołtééłgo yee hoołʼaʼ. Áádóó Gideon kéyahgóó ííyá, dóó ałdóʼ naʼnitin, dóó áadi chʼééh naʼneeztʼą́ą́, háálá dabiiłtsood dóó beʼdaʼaztłʼǫ́ dóó high priest bidááh niiltį́, dóó kéyah yikʼi naatʼáanii ánahwiiʼaahii nilínígíí ałdóʼ bidááhgi.

22 Áádóó baa hoolzhiizh high priest nilíinii ábíłní: Haʼatíí biniyé Diyin Bóhólníihii bohootʼaał nihíłchxǫǫh? Haʼatʼíí biniyé díí diné Christ doo halǫ́ǫ da diníigo nanítin, yaa bił dahozhónée nihiłchxǫǫ? Haʼatʼíí biniinaa Diyin yá yádaałtiʼii dadiyinii diyinkʼehgo bee ééhóziniiyę́ę bikʼihjįʼ yáníłtiʼ?

23 Áko high priest nilíinii éí Giddonah wolyé. Áádóó Korihor ábíłní: Háálá nihizází tʼáadoo biniyéhí bibee ádaʼoolʼįįł doo bee naʼnishtin da, dóó háálá ałkʼidą́ą́ʼ priest danilínée tʼáadoo biniyéhí bibee ádaʼoolʼįįłii dóó bibee hazʼáanii bee ádaʼalíinii doo bee yaa kwíínísingo bee nanishtin da, doo adziilii dóó óhólniih bee bikʼi kwíínísingo, doo yee bił éédahózin da, áko doo yee ndanitʼáá da, ákondi saad bee yaa kódabiʼdiʼdoolnííł.

24 Díí diné tʼáá bí ádeinízingo ndaakai dadóohní. Áko shooh, shí éí dabiʼdisnah dishní. Ałkíʼdą́ą́ʼ diyingo ííshją́ą́ adaalyaa yę́ę tʼáá aaníí ádaatʼé dadohní. Áko shooh, doo tʼáá aaníí átʼéego nihił béédahózin da dishní.

25 Díí diné ádídahodiiltʼiʼ dóó yóóʼadahaaskai dadoohní, háálá bishchíinii asihyę́ę biniinaa. Áko shooh, aweeʼ bimá dóó bizhéʼé biniinaa doo ádíhwidiiltʼiʼ da.

26 Áádóó Christ doogaał dadohní. Ákondi shooh, anihídishní Christ doogaałgo doo nihił bééhózin da. Áádóó nihokááʼ dineʼé bibąąhági ádaatʼéii yá náábidiʼdooltʼééł ałdóʼ dadohní—

27 Áádóó áko díí diné nihizází tʼáadoo biniyéhígo bibeeʼádaʼoolʼįįł bee yóóʼadahohéésh, dóó tʼáá nihí ádeinohsinígíí bikʼehgo, dóó niʼkódeinohsin, bidisnah nahalingo, áko bilaʼ yee ndaalnishígíí tʼóó bee daʼohtʼį́, áko doo adaahodzódlį́ yee dahdanéétʼaah da, dóó yikʼehgo hiináa dooleełígíí dóó yee báʼahootʼįʼígíí doo yaa bił dahózhǫ́ǫ́go yaa tsídadikees da.

28 Aooʼ, tʼáá bí adaʼoołʼįįłígíí doo chodeidoołʼįįł da háálá bipriest danilinígíí yádahodoołchxįįł, bizééadaʼdeitʼį́į́h tʼáá bí ádeinízinígíí bikʼeh, dóó deiyoodląągo ádeiyiilaa, tʼáá bí bibeeʼádaʼoolʼįįł dóó yaa ndaayééłígíí dóó tʼáá hooshchʼį́ baa ntsóhodeeskeezígíí dóó bił ádahoodzaaʼígíí dóó tʼóó bił ádahatʼinígíí, adaʼdoolííł, yikʼeh ádeidoolííł, doo bizaadkʼeh ádahósin da, haʼatʼíí shį́į́ doo bééhodilzinígíí yee dahoodoołchxįįł, éí Diyin God nilį́ daaní—éí tsʼídá tʼah doo yiiltsʼééh da dóó doo bééhoʼdilzin da, éí tsʼídá doo holǫ́ǫ da doodago tsʼídá doo hodooleeł da.

29 Áko high priest danilíinii dóó naatʼáanii ándahwiiʼaahii bijéí yistłʼisígíí deiyiłtsą́, aooʼ, dóó Diyin God yikʼijįʼ hahadziih deiyiiłtsą́ągo, doo yichʼįʼ háádaasdzííʼ da; ákondi yedaʼaztłʼǫ́; dóó ánaazíinii yílákʼedeestʼeʼ, dóó Zarahemlagóó yił yíkai, Alma bidááhdóó ndeidoolóósgo, dóó naatʼáanii ánahwiiʼaahii yidááhdóó éí kéyah tʼáá átʼé yánahaʼá.

30 Áádóó baa hoolzhiizh Alma dóó naatʼáanii ánahwiiʼaahii bidááh niidlóózhgo, tʼáá Gideon kéyahdi yáłtiʼ yę́ęgi átʼáo; aooʼ, dadiyinígíí tʼóó yódziih.

31 Áádóó ayóó átʼáo Alma yidááhdóó saad hayiłtʼééh, dóó priest danilínígíí dóó ndaʼnitiní yikʼijįʼ hahaasdzííʼ, bizází bibee ádaʼoolʼįįł tʼáá ádzaaʼígíí bee yóóʼadahishooʼeezh yił níigo yee yikʼihodiiʼą́, diné ndaalnish yę́ę tʼóó yee daʼatʼį́.

32 Áko Alma ííłníh: Nihił bééhózin doo tʼóó diné nihikʼi deilníísh da; háálá áko shooh ándahwiiʼaahii dahodeezʼąądééʼ dóó kojįʼ yishnish, tʼáá shí shílaʼ bee nishishnish, ázhą́ kédaayahgóó Diyin God bizaad shidineʼé bee nanishtingo tádííyáán ndiʼ.

33 Áádóó azhą́ ląʼígo sodizin biiʼ nishishnish ndi, senine ndi tʼáadoo nishishnishígíí bikʼé sheitʼą́ą da, shikiské ndi tʼáadoo da, tʼáá hazhóʼó ánahwiiʼaahii nishlį́įgo-dasidáhę́ę́dą́ą́ʼ tʼéiyá; áádóó bee hazʼáanii bikʼeh daʼílkeed yę́ę tʼéiyá bikʼehgo nihichʼįʼ ndaʼiisyaʼ.

34 Áádóó áko, sodizin baa nidashiilnishígíí doo bee nihichʼįʼ azlą́ą́ da, doo nihichʼįʼ azlą́ą́góó éí haʼátʼíísh biniyé sodizin bá ndeilnish doo tʼáá hazhóʼó tʼáá aníinii baa dahodiilnihgo tʼéi biniyé, áko nihikʼiské bił dahózhónígíí biniinaa nihí ałdóʼ nihił dahózhǫ́ǫ doo?

35 Áko haʼátʼíí biniyé díí diné ndaniitingo bee daʼiitʼį́ diní, tʼáá íídą́ą́ʼ, nił bééhózin doo nihichʼįʼ azláhígíí? Áádóó áko, daʼ dííʼísh dineʼé bindaʼiidlo nínízin, daʼ éíísh bijéí tʼáá íiyisíí bee bił da hózhǫ́?

36 Áádóó Korihor bichʼįʼ hanáádzííʼ, Aooʼ.

37 Áádóó ńtʼę́ę́ʼ Alma ábíłní: Diyin God hólǫ́ǫgooísh yiinídlą́?

38 Áádóó ádíínííd, Ndagaʼ.

39 Áko Alma áhałní: Diyin Godísh doo hólǫ́ǫ da náádidííniił, dóó Christ ałdóʼ doo hólǫ́ǫ da náádidííniił? Háálá áko shooh, ánídishní, Diyin God hólǫ́ǫgo shił bééhózin, áádóó Christ ałdóʼ doogááł.

40 Áádóó áko Diyin God doo hólǫ́ǫ da dinínígíí, doodago Christ doo doogááł da dinínígíí haash yitʼáo nił bééhózin? Ándishní bee nił bééhózinígíí nee ádin, nizaadígíí tʼéí átʼé.

41 Ákondi, shooh, díí tʼáá aaníí ádaatʼé éí tʼáá áłtsoní dahólónii tʼáá aaníí yaa dahalneʼ; áádóó ní ałdóʼ díí tʼáá aaníí ádaatʼéii nił bééhózin éí tʼáá áłtsoní dahólónii tʼáá aaníigo yaa dahalne; dóó díí tʼáá átʼé doo ákótʼée daʼísh didííniił? Daʼ díísh tʼáá aaníí ádaatʼéego yinídlą́?

42 Áko shooh, éí yinídlą́ągo shił bééhózin, ákondi iiʼsizį́ biyoochʼídígíí naniloʼ, dóó Diyin God biʼIiʼ Sizį́ Diyinii nahjįʼ kwiinlaa áko niyiʼdi doo báhosiniłʼą́ą́ da; ákondi biʼiiníziinii nikʼi bóhólnííh, dóó náhooʼááłgo nanilóóz, áko Diyin God baʼáłchíní yooʼíídoolííłgo yinahaʼá.

43 Áádóó áko Korihor éí Alma ííłní: bee ééhódoozįįłígíí łaʼ shił ííshją́ą́ ánílééh, áko Diyin God hólǫ́ǫgo shił bééhódoozįįł, aooʼ, beʼadziilii hólǫ́ǫgo shił ííshą́ą́ ánílééh, áko índa nizaad yídeeshdląął.

44 Ákondi Alma ábíłní: bee éédahódoozįįłígíí tʼáá íídą́ą́ʼ nił ííshją́ą́ʼ ádaalyaa; daʼ niDiyin Godísh bínítʼaah doo? Kódidíínííłísh, Bee ééhódoozįįłígíí shił ííshją́ą́ ánílééh, ni éí tʼáá íídą́ą́ʼ nikʼéí tʼáá aaníinii nił ííshją́ą́ ádeiyiilaa, áádóó tʼáá átʼé Diyin yá yádaałtiʼii dadiyinii ałdóʼ? Diyin bizaad bee akʼedaʼashchínígíí nidááhgo naaznil, aooʼ, dóó tʼáá ałtsóní Diyin God hólǫ́ǫgo yaa dahalneʼ, aooʼ, nahasdzáán ndi, dóó tʼáá átʼé bikááʼ siláhígíí, aooʼ, dóó nahaʼnánígíí, aooʼ, dóó tʼáá ałtso yá biyiʼdi deiyíkáhígíí nahasdzáán éí Tsʼídá Aláahdi Tʼáá Ałtsoní Áyilaií yaa dahalneʼ.

45 Áádóó ákótʼée ndi nanináágóóʼísh, Diyin God doo hólǫ́ǫ da diníigo, díí dineʼé bijéí bee yooʼahílóós? Áádóó ákótʼée ndiʼ díí diné daʼiiłtsánígíí doo tʼáá aaníí ádaaníi da didííniił? Áádóó ání: Aooʼ, doo tʼáá aaníí átʼée da didééshniił, tʼáá hózhóʼó bee shił bééhódoozįįłígíí shił ííshją́ą́ íinlaago tʼéiyá.

46 Áádóó ákó baa hoolzhiizh Alma ábíłní: Áko shooh, nijéí yistłʼisígíí biniinaa baa yínííł nisin, aooʼ, tʼáá aaníinii baa haneʼígíí tʼahdii bikʼijįʼ nilíigo, niiʼ sizíinii yidoołchxǫǫł.

47 Ákondi shooh, niiʼ sizíinii yooʼadíínʼą́ągo tʼáá áko doo áko niniinaa łą́ągo diné biiʼ sizíinii doo yooʼahidííʼish da, niyoochʼííd dóó nizaad niłkanígíí bee; ákohgo doo iinishdlą́ą da náádíniigo, áko shooh Diyin God atíndoolííł, áko doo haadziihii dííleeł, áko tsʼídá doo hanáádíídzih da, áko díí diné doo bininááʼáloʼ da doo.

48 Áko Korihor ábíłní: Diyin God éí doo hiináa da doo dishníi da, ákondi Diyin God hólǫ́ǫgo doo yinishdlą́, áádóó ałdóʼ ádíshní, Diyin God hólónígíí doo nił bééhózin da, dóó tʼáá hazhʼoʼí bee ééhódoozįįłígíí shił ííshją́ą́ íínilaago tʼéiyá, doo yideeshdląął da.

49 Áko Alma ábíłní: Díí bee ééhódoozįįłígíí nił ííshją́ą́ ádeeshlííł, doo haadziihii bee atíndiʼdoolnííł, shizaad bikʼehgo, dóó ádíshní, Diyin God bízhiʼ binahjįʼ, doo haadziihii bee atíndiʼdoolnííł, áko doo niyiʼdę́ę́ hanááhozdooltsʼį́į́ł da.

50 Áko Alma díí saad yee haadzííʼgo, Korihor doo yaałtiʼ da silį́į́ʼ, áko tʼáadoo hanáánáádzíí da, Alma ádííniid yę́ę bikʼehgo.

51 Áádóó áko anahwiiʼaahii binaatʼáanii díí yiyiiłtsʼą́ągo, Korihor yichʼįʼ íʼiilaa, kóníigo: Diyin God beʼadziiliiʼísh kʼad yisinídląąd? Alma háíshą bee ééhódoozį́į́łígíí yinahjįʼ ííshją́ą́ íídoolííł nínínzin ńtʼę́ę́ʼ? Daʼ náánáá háídaaʼísh átíídoolííł yiníníí ńtʼę́ę́ʼ; bee nił bééhodoozįįłígíí nił ííshją́ą́ íídoolííłgo? Áko shooh, bee nił bééhodoozįįłígíí tʼáá ni nił ííshją́ą́ áyíílaa; áádóó kʼadísh łaʼ baa saad nááhoodííłeeł?

52 Áádóó Korihor dahdiilniiʼ dóó naʼíízoh, kóníigo: Doo haadziihii nishłį́įgo shił bééhózin, háálá chʼééh haasdziih; áádóó shił bééhózin doo nááná łaʼ díí kóshidoolííł da Diyin God bibeʼadziilii tʼéiyá; aooʼ, áádóó Diyin God hólónígíí éí tʼáá iidą́ą́ʼ shił bééhózin ńtʼę́ę́ʼ.

53 Ákondi shooh, biʼiiníziinii shinaʼazloʼ; háálá Diyin yá naalʼaʼí nahalingo shichʼįʼ ííshjání íʼdiilyaa dóó áshidííniid: Díí diné bichʼįʼ dínááhgo hashtʼeʼninááníʼéésh, háálá tʼáá ałtso Diyin God doo bééhoʼdilzinígíí yikééʼ yooʼaheeskai. Áádóó kóshidííniid: Diyin God doo hólǫ́ǫ da; aooʼ, dóó bee hadeesdzihígíí yee nashineeztą́ą́ʼ. Áádóó bizaad bee naʼnítą́ą́ʼ; dóó doo yaʼáshóonii yaa ntsídaakeesgo bił yáʼádaatʼéhígíí biniinaa nánétą́ą́ʼ; áko bee nánétʼą́ą́ʼ, áko ayóó átʼéego íísdzaa, ákogaʼ tʼáá íiyisí tʼáá aaníí átʼéego biʼniishdląąd, díí biniinaa tʼáá aaníinii tʼáá íiyisíí bitsʼą́ą́jįʼ sélį́į́ʼ, hónáásiiʼ díí hoyééʼ ayóóʼátʼéii tʼáá shí ákʼidiishtʼą́.

54 Áádóó díí kódííniidgo, Alma Diyin God yichʼįʼ bá sodidoolzįįłgo néíyooskan, áko hoyeeʼgo bá haʼoozihígíí nahjįʼ kódoolnííł.

55 Ákondi Alma ábíłní: Díí hoyeeʼgo náhaʼoodzíí yę́ę nahjįʼ kólyaago díí diné bijéí yóóʼánáádííʼish; éí bąą, Diyin Bóhólníihii yinízinígíí bikʼehgo ándiʼdoolnííł.

56 Áádóó baa hoolzhiizh Korihor hoyééʼgo bichʼįʼ haʼoodzííʼ yę́ę tʼáadoo bá nahjįʼ kólyaa da; áko tʼóó chʼídeineeschą́ą́ʼ, dóó dahooghangóó bichʼiyąʼ yóókeedgo tádíghááh.

57 Ákohgo Korihor ábiʼdiilyaaʼígíí tʼááhodinaʼí adahwiisʼáago baa dahóoneʼ; aooʼ, ílíinii saad náháásdzooʼígíí anahwiiʼáahii binaatʼáanii dineʼé kéédahatʼíigo tʼáá ałtso bichʼįʼ ádaalyaa, Korihor bizaad deiyoodlánééʼ tsxiłgo ádaańdaʼoohkąąh biʼdooʼniid, doodago éí tʼáá ákotʼáó bá ndahwidootʼaał.

58 Áádóó baa hoolzhiizh Korihor bibąąhági ádzaa yę́ę tʼáá átʼé yaa ákodaniizį́į́ʼ; éí bąą tʼáá átʼé Diyin Bóhólníihii yikééʼ ninákai; áádóó díí Korihor bąąhágiʼ átʼinéé niʼkólyaa. Áádóó Korihor hootahgóó, chʼiyáán yókeedgo akʼindidah.

59 Áádóó baa hoolzhiizh diné yitah naagháaʼgo, aooʼ, éí diné yitah naaghá éí Nephi dineʼé yitsʼą́kaiʼígíí Zoram dineʼé daolyé, éí hastiin Zoram wolyéíigo booʼish—áádóó yitah naagháago, áko shooh, bikʼí níjééʼ dóó bikʼínaaskai, deiyisxęęjįʼ.

60 Áádóó áko bikʼidaʼdiitą́ Diyin Bóhólníihii bohoogááł yiyíłchxǫ́ yę́ę nahjįʼ kóbiʼdiilyaa; áádóó áko bikʼidaʼdiitą́ biʼiiníziinii baʼáłchíní niʼhóníyáadi doo yiká adoolwoł da, ákondi tsxiłgo chʼį́įdiitah goyáaʼí ayiidzį́į́s.