1 Dooládóʼ Diyin yá naalʼaʼí nishlį́į leʼ, dóó shijéí yinizinígíí bee shá lą́ adooleeł leʼ, áko náásgóó Diyin God biʼdilnígiʼ átʼáo yashtʼį́ doo, ázhí bee nahasdzáán yididoołnááłgo, áádóó tʼáá ałtso diné yéego ádaańdaʼoohkąąh bidideeshniił!

2 Aooʼ, tʼáá ałtso iiʼ sizíinii bee bił hodeeshni, bizhí aʼdiʼní bee didootsʼį́į́ł, ádaanáʼookąąh dóó nináʼílyáago hootʼááł, áko ádaańdaʼookąąhgo nihiDiyin God yił yah anáhidoohkah, áko tʼáá ałtso nahasdzáán bikááʼgóó yinííł adin doo.

3 Ákondi shooh, nihokááʼ dineʼé éí nishłį́, dóó tʼáá íiyisíí nisinígíí biniinaa bąąhági átʼéii ánéishtʼįįh; háálá Diyin Bóhólníihii shee diníʼánígíí bąą aheeh nisin doo ńtʼę́ę́ʼ.

4 Diyin God tʼáá ákogiʼ átʼéii yee nihoníʼánígíí tʼáá shí laanaa nisinígíí bee wooshchxǫǫh lágo, háálá shił bééhózin nihokááʼ dineʼé yinizinígíí bikʼehgo yee yichʼįʼ lą́ naʼiiłeeh; anoonééł doodago iiná bichʼįʼjigo; aooʼ, shił bééhózin nihokááʼ dineʼé yichʼįʼ ląʼ naʼiiłeeh, aooʼ, díí bee ndahwiistʼą́ doo łahgo andoolnííłgóó bee bił hashneʼ, ádeinízinígíí bikʼehgo, yisdáʼiildeeh doodaiiʼ hoʼdoochxǫǫlʼjí.

5 Aooʼ, dóó shił bééhózin nihokááʼ dineʼé tʼáá ałtso yáʼátʼéehii dóó doo yáʼáshóonii bidááh naaznil; tʼáá háíshii yáʼátʼéehii dóó doo yáʼáshóonii doo bił bééhózinígíí asihgo doo bikʼijįʼ siláa da, ndi yáʼátʼéehii dóó doo yaʼashóonii bił bééhózinígíí, éí tʼáá bí yinízinígíí baa halyé, yáʼátʼéehii doodago doo yaʼashóonii yinízinígíí bikʼehgo, iiná doodago ánoonééł, ił hózhǫ́ doodago asihgo yąąh bíneʼígíí.

6 Áko, díí shił bééhózingo, haʼatʼíísh biniinaa naanish bee shikʼih hoodiiniiʼígíí ashį́į́go biláahgo náánisdzin doo?

7 Haʼatʼíísh biniyé Diyin yá naalʼaʼí deeshłeełgo ntséskees, áko adahwiisʼáágóó shizhí diitsʼąʼ doo?

8 Háálá áko shooh, Diyin Bóhólníihii tʼáá ałtso diné dah deiyíkááhgóó, tʼáá bí kéédahatʼį́įgo dóó tʼáá bí dabizaad, diyin bizaad bee ndabiʼdínóotʼįįłgo yee yá hasʼą́, aooʼ, ił ééhózin bee, tʼáá ałtso bee bichʼįʼ ańdahaztʼiʼígíí bee dahoolǫ́ǫ doo éí yee yá hasʼą́; éí bąą Diyin Bóhólníihii bił ééhózingo naʼnitinígíí bikʼihdaʼdiitʼą́, éí éiyá tʼáá aaníí dóó tʼáá ákogi ádaatʼéii bikʼehgo.

9 Diyin Bóhólníihii yichʼįʼ áshiiłʼaadʼígíí shił bééhózin, dóó bee baa hashniih. Doo éí bee adąąh hashniih da ndi Diyin Bóhólníihii yichʼįʼ áshiiłʼą́ʼígíí baa hashniih; aooʼ, díí eí bee adaahashniih, Diyin God bilákʼeedóó bibee naʼanishí deeshlééł nisin áko diné łaʼ ádaańdaʼdookąął; dóó díí éí baa shił hózhǫ́.

10 Áádóó áko shooh, ląʼída shikʼéí tʼáá aaníí ádaanídaʼookąąhgo yiłtsʼą́ągo, dóó biBóhólníihii Diyin God yichʼįʼ nináhákááhgo, áko índa shiiʼ sizʼíinii ił hózhǫ́ biiʼhadéébįįd; áko índa Bóhólníihii yee shikaaʼalwodígíí bénááshniiʼ, aooʼ, shisodizin ndi yidiiztsʼą́ą́ʼ; aooʼ, áko índa bigaan yee ajoobaʼ shichʼįʼ kóyiilaago bénááshniiʼ.

11 Aooʼ, dóó shizází dabiʼdisnah yę́ę ałdóʼ bénááshniiʼ; háálá tʼáá aaníigo shił bééhózin Bóhólníihii Diyin God dabiʼdootʼą́ déé yisdáʼbiiʼeezh, dóó bisodizin haidiilaa; aooʼ, éí Bóhólníihii Diyin God, Abraham biDiyin God, Isaac biDiyin God, dóó Jacob biDiyin God, éí dabiʼdisnáádééʼ yisdáʼyiiʼeezh.

12 Aooʼ, shizází dabidisnáá yę́ę tʼáá áłahjįʼ bénááshniiʼ; dóó éí Diyin God Egypt dineʼé bilákéédóó yisdáʼyiiʼeezh, dabiʼdeesnáádééʼ.

13 Aooʼ, dóó Diyin God tʼáá bí bisodizin báhoghan bił nahazʼáagóó haidiilaa; aooʼ, dóó Diyin God tʼáá bí diyingo naanish yee shikʼihdiilniiʼ, díí dineʼé diyin bizaad bee nadinééshtʼį́į́łgo, dóó ląʼí nizhónígo iʼiishłaaʼígíí sheinílá, éí binahjįʼ shiʼsizʼíínii ił hózhǫ́ biiʼ hadéébįįd.

14 Ákondi doo nizhónígo iʼiishłaaʼígíí tʼéiyá baa shił hózhǫ́ǫ da, ákondi shikʼéí nizhónígo adaʼiilaaʼígíí biniinaa yiwohgo ił hózhǫ́ shiiʼ hadéébįįd, éí Nephi bikéyah gódeh yíkai ńtʼę́ę́ʼ.

15 Áko shooh, tʼáá íiyisíí yéígo ndaashnish, áádóó ląʼígo daʼneestʼą́; dóó dooládóʼ ayóó átʼáo baʼdaʼdoolyééł!

16 Áko, díí shikʼéí nizhónígo adaʼiilaaʼígíí baa nitséskeesgo shiiʼ sizʼíinii ayóó átʼáo bił ahoodzaa, shitsʼíís yitsʼáníyá, nahalingo, dooládóʼ tsʼídá baa shił hózhǫ́.

17 Áádóó áko Diyin God yee niháhwiidoołʼaał, shikʼéí, áko Diyin God bił hazʼą́ądi yił dahdínóobįįł; aooʼ, dóó tʼáá ałtso náánish yítsʼą́ą́dóó neistʼáán dahólǫ́ǫ doo idahídiikaiʼígíí ałdóʼ áko doo yiitsʼą́ą́jigo nídahídookah da, áádóó hoolʼáágóó baa dahaniih doo. Áádóó Diyin God yee sháhwiidoołʼaał áko shizaadígíí bikʼehgo áhodoonííł, bee haasdzíhígiʼ átʼáo. Amen.