1 Áádóó áko, díí saad Ammon bikʼéí yił chííníʼą́ągo, kódíínííd: shikʼiské dóó shikʼéí, shooh ánhidisní, ayóó átʼáo baa nihił hóózhǫǫd; daʼ Zarahemla kéyahdóó dahdiináó Diyin God tʼáá íiyisii akʼikʼihojídlí yee nihaajoosbaʼ doo ńtʼę́ę́ʼ.

2 Áádóó áko, nanihídishkid, haʼátʼíí éí ayóó átʼáo yee nihikʼijisdliʼ? Baa ákodanoozį́į́ʼísh?

3 Áko shooh, nihił náhashneʼ; nihikʼéí bá, Laman dineʼé, bąąhágiʼ átʼéii bee chahałheeł yiiʼ yíkai ńtʼę́ę́ʼ, aooʼ, tsʼídá yéego tłʼééʼ yiiʼchéékai, ákondi shooh, haanéelą́ą́ʼ Diyin God bibee adinídíín baa hózhóonii deiyiłtsą́! Áádóó díí bee nihikʼihojísdliʼ, áko Diyin God bílákʼeedóó bibeenaʼanishí dasiidlį́į́go díí naanish ayóó átʼéii łaʼ deilyaa.

4 Áko shooh, damííl yázhí biláahgo tʼáá íiyisíí bił dahóózhǫǫd, dóó Diyin God deiyoodlánígíí yidiikai.

5 Áko shooh, dáʼákʼehgi daʼiitsoigo, dóó nihikʼihojisdliʼ, háálá bee iigéshí bee daʼiilzhééh, dóó yéego daʼoołzhééʼ, aooʼ, tʼáá ndaałʼnishgo nihee iʼííʼą́, dóó shooh dooládóʼ laʼígo ałhą́ʼ ádaalyaa da! Áádóó niitʼahdi ndahashjool, áko doo tʼáadoo biniyéhí da dooleeł.

6 Aooʼ, yéego nahałtin doo atʼíbidoolííł da nihoníyáadi, aooʼ, doodago niyol tsoh doo tʼábiidooghas da; ákondi bikʼihjįʼ yéego ahoʼniiłtą́ągo tʼáá bił nahazʼą́ą́góó ahíídookah, áko doo bikʼih nahadoołtį́į́ł da; aooʼ, doodago níyol bááhádzidígíí doo beʼanaaʼ ádeinízinígóó bił adahidooyółgo adabidiyoojih da bichʼįʼ bił adaheeyółgo yóóʼadabidoojih da.

7 Ákondi shooh, Diyin Bóhólníihii dahootsooi yaa áhalyą́, dóó éí daabí; dóó nahoníyáadi neidiyoosįįł.

8 NihiDiyin God bikʼihojidlį́į doo; baa dahwiiʼniihgo bá dawiitaał doo, aooʼ, bizhiʼ dílzinii baa ahééh daniizin doo, háálá hoolʼáágóó diyingo naʼanish ííłʼį́.

9 Háálá tʼáadoo Zarahemla kéyahdéé haikaigóó, díí nihikʼéí ayóó adeiníinii, tsʼídá ayóó ádanihóóníinii, tʼahdii nihichʼį bádahachįʼ doo ńtʼę́ę́ʼ, aooʼ, dóó Diyin God yichʼįʼ tʼáá ádzaagóó ndaakai doo ńtʼę́ę́ʼ.

10 Áádóó baa hoolzhiizh Ammon díí saad yee haadzįįʼgo, bikʼis Aaron tóó yó bikʼijįʼ haadzííʼ, kóníigo: Ammon, binásdzid yéego nił hózhonígíí bee ádaadzíinídlíigo ániilaa.

11 Ákondi Ammon ábíłní: doo sheʼadziilii, éí doodago shił ééhózinii bee ádaajííníshdlíi da, ákondi shooh, íł hózhǫ́ shiiʼ hadeezbin, aooʼ, shijéí íiyisíí baa shił hózhǫ́, dóó shiDiyin God baa hashniih doo.

12 Aooʼ, shił bééhózin doo nishłíní da; sheʼadziil beego éí doo shitsxeʼ da; éí bąą doo ádaahojíínishdlíi da doo, ákondi shiDiyin God baa hashniih dooleeł, háálá bibeʼadziilii bee éí tʼáá ałtsoní adeeshłííł; aooʼ, áko shooh, tʼóó ahayóí álilee ayóóʼátʼéii díí kéyahjįʼ ndahaalyá, éí bee hoolʼáágóóo bizhíʼ bee baadahwiiʼniih dooleeł.

13 Áko shooh, dikwiish dimííl yázhí bilááhgóó nihikʼéí chʼį́įdiitah bikʼeʼayééʼ nahjí kwóyiilaa; dóó ayóó óʼóʼní bee nináʼilyá biyiin yee dahataal, dóó díí éí bizaad bidziil nihiyiʼ dahólónígíí biniinaa, áko ayóó átʼáo bąąh nihił hodoozhǫ́ǫ́łígíísh nihee ádin?

14 Aooʼ, biniyé hoolʼáágóó baa dahwiiniih dooleełígíí nihił bééhózin, háálá Aláahdi Diyin God Nilíinii nilį́, dóó nihikʼéí chʼį́įdiitah bikʼeʼayeeʼdi bee bedaʼastłʼóo yę́ę néiyoozʼah.

15 Aooʼ, hoolʼáágóó bąąhági ádaatʼéii chahałheeł dóó yee atíʼhdabiʼdoołíłígíí bináztį́ ńtʼę́ę́ʼ; ákondi shooh, bihoolʼáágóó adinídíínjįʼ neiyizheezh, aooʼ, áhoolʼáágóó yisdáʼiildééhjįʼ, dóó beʼayóóʼóʼóʼní doo beełtʼéhígíí tʼáá áʼté ádíyóltąʼ; aooʼ, Diyin God bibee naʼanishí danilį́įgo binaanish ayóó áʼté dóó ayóó ánoolnin bindashiilnish.

16 Éí bąą, ayóó átʼáo nihił dahózhǫ́ǫ doolééł, aooʼ, Diyin Bóhólníihii baa dahwiiʼniih doo; aooʼ, tʼáá íiysisíí nihił dahózhǫ́ǫ dooleeł; háálá ił hózhǫ́ éí nihiyiʼ haadaʼdéíbįįd; aooʼ, nihiDiyin God ahoolʼáágóó baa dahwiiʼniih doo. Áko shooh, háísh éí doo ninítʼįʼgóó Diyin Bóhólníihii ayóó átʼáo yaahániih dooleeł? Aooʼ, háísh éí ayóó átʼáo beʼadziilii doo ałtso yaa hadoodzih, áádóó beʼadjoobaʼ, dóó nihokááʼ dineʼé baʼáłchíní yichʼįʼ nízaadgóó haʼólní? Áko shooh, nihił chʼihonishʼaah, shiyiʼdi átʼéhígíí ałtsiisí ndi chʼééh baa haasdziih.

17 Háísh íínízin doo ńtʼę́ę́ʼ nihiDiyin God bee ajoobaʼ bee tʼóó bahooʼih, bąąhági átʼéii baandaʼaldeehdę́ę́ʼ dóó dahoochxǫʼdéé hanihidoonił?

18 Áko shooh, áháchįʼ, ayóó átʼáo akʼijįʼ haʼiidziih bee bisodizin ndahiilchxǫǫhgo baanisiikai.

19 Ákótʼée ndi, haʼátʼíí biniyé doo tʼóó yéego hodoochxǫǫł bichʼįʼ kónihólééh da, aooʼ; haʼátʼíí biniyé doo tʼóó nahwiitʼaah bibéésh hał nihikʼinaakęęs da, dóó hoolʼáágóó doo hatsʼiid hazʼą́ąjįʼ kónihólééh da?

20 Oh, shiiʼ sizíinii, éí nahlingo, yaa ntsékees. Áko shooh, biʼánahwiitʼah tʼáádóó nihikʼijįʼ kóyiilaa da, ákondi ayóó átʼáo bee ajoobaʼ hoolʼáágóó anoonééł dóó tiʼhooʼnííh báhátxis nihinínil, nihiiʼ sizíinii yisdáyiniljįʼ ndi.

21 Áádóó áko shooh, shikʼéí, haʼátʼíí nihokááʼ dineʼé atsʼíískʼeh hiinánígíí shį́į́ díí bił bééhózin? Anhidishní, díí doo łaʼ bił bééhóziní da, ádaanaʼooskanígíí tʼéiyá.

22 Aooʼ, háí da ádaanáʼooskango dóó oodląʼ choyoołʼį́įgo, dóó naanish yáʼátʼéehii ííłʼį́įgo, dóó doo niʼkónééhgóó sodilzingo—éí tʼéiyá Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii bił béédahózin dooleeł; aooʼ, éí doo ííshją́ą́ ádaalʼinée ííshją́ą́ ííłʼį́į doo; aooʼ, dóó nihokááʼ dineʼé dimííl yázhí bilááhgóó ńdeidooʼishgo ádaańdaʼdookąął, nihí niháhooʼaʼígiʼ átʼáo nihikʼéí ádaańdaʼdookąąłjįʼ ndahidiitʼish.

23 Áko béédaałniihish, shikʼéí, nihikéí Zarahemla kéyahdi bee bił dahwiilneʼ, Nephi kéyahgóó diikah, nihikʼéí, Laman dineʼé, ndadíníítʼį́į́ł, dóó nihándahałtiʼgo nihaa daadloh ńtʼę́ę́ʼ.

24 Háálá kódanihidiiniid: Daʼ Laman dineʼéísh tʼáá aníinii bił béédahodoozįįłgo bił ííshjáá ádadiilnííł? Daʼ Laman dineʼéísh dabizází bibee ádaʼoolʼįįł doo ákódaatʼéhígíí yaa ákodadínóózįįłgo ádadiilnííł, diné bikʼos danitłʼizígiʼ ádaatʼáo; bijéí ndaʼałtseedgo yaa bił dahózhǫ́; íyíisíí bąąhági átʼéii yaa naakaigo bideiníłką́; éí ndaʼiisííhii nahalingo ádaʼałʼį́įgo hahoolzhiizh? Áko shikʼéí, shą́ą́ʼ kótʼáó hadahaasdzííʼ.

25 Áádóó ałdóʼ ádaaní: Anaaʼ bee ndaaltseedii bikʼijįʼ bił hadadiidił, áko ndadiiltsxił dóó bibąąhági ádaatʼį́įgo kéyahdóó chʼídadíníílkał, áko da nihikʼiidoojah dóó ndanihidootsxił.

26 Ákondi shooh, shikʼéí ayóó anihíínishníinii, doo kééhojitʼiní góneʼ niikai doo nihikʼéí ndadiiltsxił biniyé da, ákondi biiʼ sizíinii łaʼ yisdádadiinił daniidzingo.

27 Áko nihijéí baa ndahóókaadgo, dóó kʼadę́ę́ nátʼą́ą́ nikééniikááhgo, shooh, Diyin Bóhólníihii nihił hóóshǫǫd, dóó ání: Nihikʼéí, Laman dineʼé, bitahgóó dohkááh, dóó nihichʼįʼ ndahwiiʼna bee ádanohtʼé dóó bee łaʼ doołííłii nihaadeeshlééł.

28 Áádóó áko shooh, áadi niikai, dóó bitaansiikai; dóó nihitiʼhooʼnííh bee ádaníitʼé, dóó achʼįʼ nahwiiʼná tʼáá átʼé bee tiʼdahwiisiiʼniiʼ; aooʼ, dahooghan bitaasiikai, nihokááʼ bibee ajoobaʼ badaʼííniidlí—doo nihokááʼ bibee ajoobaʼ tʼéiyá da ákondi Diyin God bibee ajooba bee.

29 Áádóó bighan góneʼ yah adasiikai dóó ndaniitą́ą́ʼ, dóó biʼdanítiingóó ndasiniitʼą́ą́ʼ; dóó bidahdaaskʼidgóó ndasiniitʼą́ą́ʼ; dóó diyin bighan naaznilgóó dóó dahodilzingóó ałdóʼ ndasiniitʼą́ą́ʼ; dóó chʼídanihiʼdineeskaad, dóó nihaa daʼoodloh ńtʼę́ę́ʼ, dóó nihikʼídahidiizhééh, dóó nihiniitsʼį ńdadooltsʼin, dóó tsé bee ndanihidineesneʼ, dóó danihisił dóó tłʼóół daditsʼidígíí bee niheʼdaʼastłʼǫ́, dóó awáalyah góneʼ anihiʼdeestłʼííd; áádóó Diyin God bibeʼadziil díí biʼééhózin bee yisdánánihiʼdoonil.

30 Áádóó tiʼhoonííh tʼóó ahayóí ałʼąą átʼéego bee tihdahosiiʼniiʼ, áádóó díí tʼáá átʼé, áko nihí daatsʼí nihinahjįʼ łaʼ iiʼ sizíinii yisdádadiitʼish; áko hózhǫ́ nihiiʼ hadadidoobį́į́ł nihinahjįʼ da łaʼ yisdádadiitʼish daniidzį́į́ʼ.

31 Áko shooh náásee bindashiilnish bineestʼą́ deidiiltsééł; daʼ tʼáásh dikwíhí? Ánihidishní, ndagaʼ, éí ląʼída; aooʼ, tʼáá aaníí ádaanínígíí deidiiltsééł, háálá bikʼéí ayóó ádeiyóní dóó nihí ałdóʼ.

32 Háálá áko shooh, tʼáá bí beʼiina náádeidiyoołnih ákondi biʼanaaʼí beʼiinaʼ éí doo ndeidoołtʼih da; yee ndaʼałtseed yę́ę nihosdzáán yiiʼ nízaadgóó yaa ndeideesʼį́į́h, háálá bikʼéí ayóó ádeiyónínígíí biniinaa.

33 Áádóó áko shooh nihił chʼinishʼaah, daʼ ayóó áʼtéii ayóóʼóʼóníísh doo łaʼ kótʼáó adahwiisʼáágóó kótʼée da? Áko shooh, ánihidishní, ndagaʼ, ádin doo łaʼ da azhą́ Nephi dineʼé bitah ndi.

34 Háálá áko shooh, bikʼéí bee ndaʼasteedii yichʼįʼ ndeididoojih; doo éí ndabiʼdidootsxiłgo yee ndahasʼą́ą da. Ákondi shooh haanéélą́ą́ʼ beʼiina niʼ ndeizlá; dóó nihił béédahózin éí biDiyin God yichʼįʼ anádahaaskai, háálá beʼayóó ádaʼooní dóó bąąhági átʼéii deijooláhígíí biniinaa.

35 Áko biniyé nihił dahózhónígíísh baa ákódaniidzin? Aooʼ, ánihidishní, doo łaʼ nihokááʼ dineʼé biniyé ayóó átʼáo bił dahodoozhǫǫł ninígiʼ átʼáo; aooʼ, dóó shił hózhǫ́ǫgo shíyoołkááł, azhą́ shiDiyin God baa hashniihjigo ndi; háálá tʼáá ałtsojįʼ bidziil tʼáá ałtsojįʼ bił ééhózin, dóó tʼáá ałtsojįʼ akʼeʼdiitą́; tʼáá ałtsóní bił bééhózin, dóó baa hojoobaʼii nilį́, yisdáʼiildééhjįʼ ndi, ádaańdaʼooskan dóó bizhiʼ deiyoodlánígíí yichʼįʼ.

36 Áko díí ádaah haʼniih átʼéego, áko ádaahashniih doo; háálá díí sheʼiinaʼ átʼé dóó sheʼadinídíín átʼé, shehózhǫ́ dóó shiyisdaʼiiniiłii, dóó shá nináʼnídlá hoolʼáágóó tiʼhooʼnííhdéé. Aooʼ, shiDiyin God bizhiʼ bikʼihojídlí, éí díí diné yaa ntsóhookos, éí Israel bitsin bitsaozʼá átʼé, dóó bitsʼíís bitsʼą́ą́dóó kéyah doo bééhózindi yóóʼeekah ńtʼę́ę́ʼ; aooʼ, ádishní, shDiyin God bizhiʼ bikʼihojídlí, éí nihaatsohookos; kéyah doo bééhózindi naanáánééłii.

37 Áko shikʼéí, Diyin God tʼáá átʼé dineʼé yaatsihookosgo baa áko daniidzin, tʼáá háíshį́į́ kéyah yikʼááʼ dahólónígíí; aooʼ, ánéélą́ʼígíí bił bééhózin, dóó beʼajoobaʼ tsʼidá biyiʼdiígíí nahasdzáán tʼáá átʼé bikááʼgóó hólǫ́ʼ. Áko díí baa shił hózhǫ́, dóó yéego baa áhééh nisin; aooʼ, dóó shiDiyin God ahéheeʼ bidishníigo ahoolʼáa doo. Amen.