1 Áko Ammon áłahjįʼ Lamoni bidineʼé neinitingo, Aaron dóó bikʼiské baa haneʼjįʼ ndadídíítʼįįł; Middoni dóó dahdiiyá. Nephi bikéyahjįʼ Iiʼ Sizį́ Diyinii abíílóóz, aláahdi naatʼáanii tʼáá ałtso kéyah yikʼi Bóhólníihii tʼáá hazhoʼó kéyah Ishmael éí ndagaʼ yighandi níyá; éí Lamoni yizheʼé nilį́.

2 Áádóó baa hoolzhiizh aláahdi naatʼáanii bighan tsohdi níyá, bikʼiské yił, dóó aláahdi naatʼáanii yidááhdóó yichʼįʼ yaah kódzaah, dóó íídííniid: Áko shooh, O aláahdi naatʼáanii, Ammon bikʼiské daniidlį́, awáalyahdééʼ chʼíínihííníʼeezh.

3 Áádóó áko, aláahdi naatʼáanii, niheʼiinaʼ baa jiiníbaah, nándaalʼaʼí dadiidleeł. Áádóó aláahdi naatʼáanii áháłní: Daosįįh, niheʼiinaʼ baajídeeshbaał, dóó doo shá ndadoołʼaał da; ákondi shíkaʼadoohjahgo tʼáá íiyisíí nisin; háálá shiniʼ bichʼįʼ nahwiiná háálá Ammon nihikʼis bee ajoobaʼ dóó bizaad ayóó átʼéhígíí biniinaa, dóó shił bééhodoozįįł nisin haʼátʼíí biniinaa Middonijįʼ tʼáadoo nił yíkai da.

4 Áádóó Aaron aláahdi naatʼáanii íídííniid: Áko shooh, Diyin Bóhólníihii biʼIiʼ Sizį́ Diyinii nááná łahjigo abííłʼaʼ; Ishmael kéyahjigo ííyá, Lamoni bidineʼé neidínóótʼį́į́ł biniyé.

5 Áko aláahdi naatʼáanii ábiłní: Díísh haitʼáó ááłdiní Diyin Bóhólníihii biʼIiʼ Sizį́ Diyinii? Áko shooh, díí shiʼdiiłʼá.

6 Áádóó ałdóʼ, Ammon ádííniidígíí haʼátʼíísh ááh yiłní—Ádaańdaʼsoohkango yisdádoohááł, dóó doo ádaańdaʼoohkąąhgóó, akéédi yoołkáałdi nahjįʼ kónihiʼdiʼdoolnííł.

7 Áádóó Aaron bił hoolneʼ dóó ííłní: Diyin God hólǫ́ǫgoósh yinídlą́? Dóó aláahdi naatʼáanii ání: Shił bééhózin Amaleki dineʼé Diyin God hólǫ́ daaní, áádóó hodílzingo biiʼ áłah ndaʼadleeh nideidooniłgo be lą́ aséłį́į́ʼ, áko áłah ndaadleehgo dahodísin doo. Áádóó kʼad Diyin God hólǫ́ diníigo, áko shí éí yideeshdląął.

8 Áádóó áko Aaron díí yidiiztsʼą́ągo, bijéí bił hóózhǫǫd, dóó ádííniid: Shooh, tʼáá aaníí hinínáago, O aláahdi naatʼáanii, Diyin God hólǫ́.

9 Áádóó aláahdi naatʼáanii ání: Diyin Godísh Iiʼ Sizį́ Ayóóʼátʼéii nihizází Jerusalemdę́ę́ʼ yiníʼeezh.

10 Áádóó Aaron ání: Aooʼ, éí Iiʼ Sizį́ Ayóóʼátʼéii átʼį́, dóó tʼáá ałtso yáʼąąsh dóó nihosdzáán áyiilaa. Díísh yinídlą́?

11 Áádóó ádííniid: Aooʼ, Iiʼ Sizį́ Ayóóʼátʼéii tʼáá ałtsóní áyiilaago yinishdlą́, dóó díí bidadéétʼįʼígíí tʼáá átʼé bee shił hodíílnih, dóó nizaad yideeshdląął.

12 Áádóó baa hoolzhiizh áko Aaron aláahdi naatʼáanii bizaad yidoodląąłgo yiyiiłtsą́ągo. Adam niilyáádóóʼ yaa ahoʼniilneʼ, aláahdi naatʼáanii Diyin bizaad bee akʼedaʼashchínígíí yichʼįʼ yółtaʼgo—haitʼáó Diyin God nihokááʼ dineʼé tʼáá beełtʼéego áyiilaa, dóó Diyin God bee hazʼáanii yaayiizlá, dóó asdzihígíí biniinaa, nihokááʼ dineʼé bąąhági átʼéii yiih yikai.

13 Áádóó Aaron Diyin bizaad bee akʼedaʼashchínígíí hózhǫ́ ąą áyiilaa Adam bitsʼíís niilyáádóó, nihokááʼ dineʼé bąąhí ádeiłʼį́, dóó bibąąhági átʼéii bił hooʼaʼ dóó nináʼílyáago hootʼááł ałdóʼ, éí nihosdzáán álnééhdééʼ hashtʼeelyaa, Christ átʼį́įgo, tʼáá ałtso bízhi dayoodlání bá.

14 Áádóó nihokááʼ dineʼé bąąhí yiih yikaidą́ą́ʼ yiiʼ háádóókahgo doo yídaneelʼą́ą da; ákondi Christ tiʼhoozniiʼ dóó náádiilyá bibąąhági ádaatʼéii yá nináʼnídlá oodląʼ dóó ádaanáʼookąąhgo, dóó ákótʼéego; áádóó anoonééł bitłʼóól bee bedaʼastłʼónígíí kʼíyiisʼdláád, áko jishchááʼ doo hodínóołnééł da, áádóó haʼólní ayóó átʼáo anoonééł yishchʼíí ndi iidoołʼnah; dóó Aaron díí aláahdi naatʼáanii tʼáá átʼé yichʼįʼ ąą áyiilaa.

15 Áádóó baa hoolzhiizh Aaron díí yichʼįʼ ąą áyiilaago, aláahdi naatʼáanii ání: Haash deeshnííłgo áko díí hoolʼáágóó iiná baa hainídziʼígíí shee hólǫ́ǫ doo? Aooʼ, haitʼáó íʼdiishyáago Diyin God binahjįʼ nááshiʼdidoochííł, díí iiʼsizį́ doo yáʼátʼéehii shiyid dóó nahjįʼ kódoolnííł, dóó biʼIiʼ Sizį́ Diyinii shaadoolyééł, áko íłhózhóónii shiyiʼ hadidoobį́į́ł. Áko akéédi yoołkáałdi doo nahjįʼ kóshiʼdi doolnííł da? Áko shooh, ní, tʼáá ałtsóní shinaadeełii nahjįʼ kódeeshłííł, aooʼ, hazʼą́ bikʼi shóhólniihii nahjįʼ kódeeshłííł, áko díí ayóó átʼáo ił hózhóonii shaa doolyeeł.

16 Ákondi Aaron ábiłní: Díí nínízingo, Diyin God bichʼįʼ niʼkódíínííł, aooʼ, nibąąhági átʼéii tʼáá átʼé bee ádaanáʼiiníkąąh, dóó Diyin God bichʼįʼ yaa ánínééh, dóó neʼoodląʼ choiníłį́įgo bizhiʼ binahjįʼ bichʼįʼ sodílzin, shaa doolyeeł nínízingo yinídlą́ągo, áko índa bíká haʼíínílní nínízinée naadoolyééł.

17 Áádóó baa hoolzhiizh Aaron kódííniidgo, aláahdi naatʼáanii nijįʼ Bóhólníihii yichʼįʼ yaa kódzaa, ntsdinígo; aooʼ, niʼjįʼ neeztʼį́, dóó ayóó íítsʼaʼgo sodoolzin, kóníigo:

18 O Diyin God, Aaron shił hoolneʼ Diyin God hólǫ́; dóó Diyin God nílį́įgo, shichʼįʼ ádééh honílzįįh dóó shibąąhági ádaatʼéii tʼáá átʼé yóóʼ adideeshʼą́ą́łgo nééhodeesįįł, dóó anoonééłdééʼ náhideeshnaał, dóó akéédi yoołkáałdi yisdáshiʼdidooltééł. Áádóó áko aláahdi naatʼáanii kódííʼniidgo, bizééʼ hazlį́ nahalingo naaʼíítłiz.

19 Áádóó baa hoolzhiizh bánaalʼaʼí dahyiiteʼ dóó aláahdi naatʼáanii asdzáán tʼáá ałtsóní aláahdi naatʼáanii bił áhóótʼįįdígíí yee yił hoolneʼ; áádóó aláahdi naatʼáanii yaa níyá; dóó bizééʼ hazlį́į́ʼ nahalingo sitį́įgo yiyiiłtsʼą́, dóó naaʼíítłizhígíí éí Aaron dóó bikʼiské adaatʼį́ nízingo, yichʼįʼ báhóóchį́į́d, dóó bándaalʼaʼí doodago aláahdi naatʼáanii bá ndaalʼaʼí ííłní, daosxil dóó ndaałtseed.

20 Áko ándaalʼaʼí aláahdi naatʼáanii yiniinaa nááʼíítłizhígíí deiyiiłtsą́, éí bąą Aaron dóó bikʼiské atʼídeidoolííłgo yichʼįʼ daastį́; áádóó aláahdi naatʼáanii asdzaan ndeiyookąąhgo adaaní: Haʼátʼíísh biniyé díí diné ndadoołtsxił nihidiní, háálá łaʼ bitahdóó tʼáá ániiłtso nihiláahgo ayóó bidziil? Éí bąą nanihidoołtsxilgo átʼé.

21 Áko aláahdi naatʼáanii asdzáán bá ndaalʼaʼí ńdaaldzidígíí yiyiiłtsʼą́ągo bí ałdóʼ tʼáá íiyisíí násdziid, doo yáʼáshóonii bikʼihodooleeł nizingo. Áádóó bándaalʼaʼí diné hágo deidinooniiłgo ayiisʼaʼ, áko Aaron dóó bikʼiské ndeidoołtsxił biniyé.

22 Áko Aaron éí aláahdi naatʼáanii asdzáán tʼáá íiyisíí yinízinígíí yaa ákoniizį́į́ʼgo, bí, diné bijéí daastłʼisígíí ałdóʼ bił bééhózingo, ląʼí diné ahíídookah nízingo yinásdzííd, dóó ayóó átʼáo saad hódoolééł dóó ałkʼiidoojah; éí bąą aláahdi naatʼáanii yichʼįʼ dahdiilniiʼ dóó niʼdóó neidiyiiłah, áádóó ííłí: Yiizʼį́į́. Áádóó yiizį́, áádóó bitah náhooʼnaʼ.

23 Áko díí éí aláahdi naatʼáanii asdzáán dóó ląʼí bándaalʼaʼí binááł ádahoodzaa. Áádóó díí deiyiłtsą́ą́go tʼóó bił adahóóyóíʼ, dóó ndaasdzííd. Áádóó aláahdi naatʼáanii yiizįʼ, dóó naʼdíníítʼą́ą́ʼ. Áádóó neineeztʼą́ą́ʼ, hónáásiiʼ tʼáá ałtso bighan hazʼą́ągiʼ Diyin Bóhólníihii deiyoosdląąd dóó yikééʼ niikai.

24 Áko łaʼ ahiikai háálá aláahdi naatʼáanii asdzáán ádííniidígíí biniinaa, áádóó Aaron dóó bikʼiské biniinaa bitahgo ayóó átʼáo saad hólǫ́ hazlį́į́ʼ.

25 Ákondi aláahdi naatʼáanii yitah yiizį́ʼ dóó yikáʼalwod. Áádóó Aaron dóó yił naakaiʼígíí yichʼįʼ ádahodiilzeeʼ.

26 Áádóó baa hoolzhiizh aláahdi naatʼáanii diné ádahodiilzeeʼgo deiyiiłtsą́, Aaron dóó bikʼiské ahiikaiʼígíí yichʼįʼ deizį́, áádóó Diyin bizaad yee ndeidinóotʼį́į́ł biniyé.

27 Áádóó baa hoolzhiizh aláahdi naatʼáanii haneʼ ílíinii tʼáá ałtso kéyah bikááʼgóó daʼníłtsʼą́ągo chʼédahastʼą́ą́góó áyiilaa, bidineʼé tʼáá ałtso bikéyah bikááʼgóó kéédahatʼínígíí, éí tʼáá ałtso bináágóó, éí tónteel binahjįʼ, éí haʼaʼaah dóó eʼeʼaahjigóó, dóó éí Zarahemla kéyahgi ałtsʼádzoh áłtsʼóózígo doo haida kééhojitʼínígi tsʼiʼnaa nahonítʼiʼ, éí haʼaʼaah tó nihínį́yí dóó eʼeʼaah tó nihíníyį́įjįʼ, dóó tónteel bináágóó nahwiizʼą́ąʼgi, haida doo kééhatʼinígíí éí Zarahemla kéyah binahjįʼ dóó náhookʼǫsjįʼ, éí éii Manti nineelʼą́ binahjįʼ, tooh Sidon deezlį́į́dóó, éí haʼaʼaahdééʼ dóó eʼeʼaahjigo íílį́—dóó kótʼáó Laman dineʼé dóó Nephi dineʼé bikéyah bee ałtsʼádzoh.

28 Áko, Laman dineʼé bił dahoyéʼígíí háída doo kééhatʼíídi tádadinééh, dóó níbaal yiiʼdabighan; áádóó eʼeʼaahjigo doo nahaghahídadi kéédahatʼį́, Nephi bikéyahdi; aooʼ, dóó Zarahemla kéyahdóó eʼeʼaahjigo ałdóʼ, tónteel nihiníyíníjįʼ, dóó Nephi bikéyah dóó eʼeʼaahjigo, dabizází tʼóó ałtsé kéyah baa deitʼánééʼgi, dóó áko tónteel níneilą́ bííghah góneʼ.

29 Áádóó ałdóʼ tʼóó ahayóí Laman dineʼé haʼaʼaahjigo kéédahatʼį́ tónteel nihiníyínígiʼ, Nephi dineʼé adabineeskaadjįʼ. Áádóó áko Nephi dineʼé éí Laman dineʼé tʼáá átʼé binaagóó kéédahatʼį́; ákótʼée ndi Nephi dineʼé éí náhookǫs bichʼįʼjigo háída doo kéédahatʼį binahjįʼ kéyah naaznilígíí yee ádídahoosnííʼ, tooh Sidon deezlį́į́dééʼ, haʼaʼaahdééʼ dóó eʼeʼaahjigo, háída doo kééhatʼiní nahósʼaʼgi; náhookǫsjigo, áádóó náás niléí kéyah Bountiful yoolyéejįʼ nidahazná.

30 Áádóó kéyah Ádahasdįįd deiłninígíí bee hoodzohjįʼ, éí náhookǫsjigo tʼáá nizaad diné akweʼé keedahatʼį ńtʼę́ę́ʼ éí ałtso ádábiʼdisdįįd, éí bitsʼin hadaasʼáó baa haneʼ, éí Zarahemla dineʼé yikʼídaneeztʼą́ą́ʼ, éí ákwéʼé tsʼídá áłtsé niníná.

31 Áádóó áádę́ę́ʼ iníná háída doo kééhatʼiní góneʼ ńléí shádíʼááhjigo. Áko kéyah náhookǫsjigo Ádahasdįįd deiłní, dóó kéyah shádiʼaahjigo éí ákweʼé Bountiful deiłní, éí háída doo kééhatʼínígi naadlooshii daʼałchinígíí tʼóó ahayóí ałʼąą átʼéego hólǫ́, éí łaʼ náhookǫsdę́ę́ʼ chʼíyaan yikah yíkai.

32 Áádóó áko, Nephi dineʼé bigáál yitʼį́ tʼááłaʼí jį́ dóó náʼáłnííʼ bíighah, Bountiful dóó Ádahasdįįd kéyah hoodzoh góneʼ, haʼaʼaahdę́ę́ʼ dóó eʼeʼaahjįgo tónteel nihoníyį́įjįʼ, áádóó áko Nephi dóó Zarahemlajįʼ kʼasdą́ą́ tó ałtso bináhaazyį́, kéyah náhookʼǫsjigo dóó kéyah shádiʼaahjigo bitahgi ałtsoozígo kéyah ahidiitʼiʼ.

33 Áádóó baa hoolzhiizh Nephi dineʼé éí Bountiful kéyahgiʼ kééhatʼį́, haʼaʼaahdééʼ tónteel dóó eʼeʼaah tónteeljįʼ, dóó áko Nephi dineʼé bił éédahozingo, baa adahalyáanii dóó bándaabaahii yił, éí Laman dineʼé shádiʼaahjigo yichʼą́ą́ ndahaazbaaʼ, áko kéyah náhookǫsdjigo doo bee bidahoolnih da silį́į́ʼ, dóó áko kéyah náhookǫsjigo doo yiih doonééł da.

34 Éí bąą Laman dineʼé kʼad doo kéyah bee bidahoolnííh da Nephi kéyahgiʼ tʼéiyá, doo háída kééhatʼį́įgi. Áko díí Nephi dineʼé bił éédahozinígíí biniinaa—háálá Laman dineʼé beʼanaaʼ danilį́, doo tʼáá háádę́ę́ʼ da atʼíʼbidiʼdoolnííłgo doo yee ńdahasʼą́ą da, áádóó ałdóʼ adeinízinígíí bikʼehgo, kéyah łaʼ yiih dadinóochééłgo yiká ádaatʼį́.

35 Áádóó áko shí, díí ádííniidígíí bikéédóó, Ammon dóó Aaron, Omner, dóó Himni, dóó bikʼiské adáátʼįįdígíí baa nááhashneʼ dooleeł.