1 Áko Ammon áłahjįʼ Lamoni bidineʼé neinitingo, Aaron dóó bikʼiské baa haneʼjįʼ nídadídíitʼįįł; Middonidóó dah diiyá. Nephi bikéyahjįʼ Iiʼ Sizį́ Diyinii abíílóóz, aláahdi naatʼáanii tʼáá ałtso kéyah yikʼi Bóhólníihii tʼáá hazhóʼó kéyah Ishmael éí ndagaʼ éí yighandi níyá; éí Lamoni yizhéʼé nilį́.

2 Áádóó baa hoolzhiizh aláahdi naatʼáanii bighan tsohdi níyá, bikʼiské yił, dóó aláahdi naatʼáanii yidááhdóó yichʼįʼ yaa kódzaa, dóó íidííniid: Áko shooh, O aláahdi naatʼáanii, Ammon bikʼiské daniidlį́, awáalyahdę́ę́ʼ chʼínihiníʼeezh.

3 Áádóó áko, aláahdi naatʼáanii, niheʼiinaʼ baa jiiníbaah, ná nidaalʼaʼí dadiidleeł. Áádóó aláahdi naatʼáanii áháłní: Daosįįh, niheʼiinaʼ baajídeeshbaał, dóó doo shá ndadoołʼaał da; ákondi shíkáʼadoohjahgo tʼáá íiyisíí nisin; háálá shiniʼ bichʼįʼ nahwiiʼná háálá Ammon nihikʼis bee ajoobaʼ dóó bizaad ayóó átʼéhígíí biniinaa, dóó shił bééhodoozįįł nisin haʼátʼíí biniinaa Middonijįʼ tʼáadoo nił yíkai da.

4 Áádóó Aaron aláahdi naatʼáanii íidííniid: Áko shooh, Diyin Bóhólníihii biʼIiʼ Sizį́ Diyinii nááná łahjigo abííłʼaʼ; Ishmael kéyahjigo ííyá, Lamoni bidineʼé neidínóotįįł biniyé.

5 Áko aláahdi naatʼáanii ábiłní: Díísh haitʼáó ááłdiní Diyin Bóhólníihii biʼIiʼ Sizį́ Diyinii? Áko shooh, díí shiʼdiiłʼá.

6 Áádóó ałdóʼ, Ammon ádííniidígíí haʼátʼíísh ááh yiłní—Ádaa ńdaʼsoohkango yisdádoohááł, dóó doo ádaa ńdaʼoohkąąhgóó, akéeʼdi yoołkáałdi nahjįʼ kónihidiʼdoolnííł.

7 Áádóó Aaron bił hoolneʼ dóó ííłní: Diyin God hólǫ́ǫgoósh yinídlą́? Dóó aláahdi naatʼáanii ání: Shił bééhózin Amaleki dineʼé Diyin God hólǫ́ daaní, áádóó hodílzingo biiʼ áłah ndaʼadleeh nideidooniłgo be lą́ aséłį́į́ʼ, áko áłah ndaadleehgo dahodísin doo. Áádóó kʼad Diyin God hólǫ́ diníigo, áko shí éí yideeshdląął.

8 Áádóó áko Aaron díí yidiiztsʼą́ąʼgo, bijéí bił hóózhǫǫd, dóó ádííniid: Shooh, tʼáá aaníí hinínáago, O aláahdi naatʼáanii, Diyin God hólǫ́.

9 Áádóó aláahdi naatʼáanii ání: Diyin Godísh Iiʼ Sizį́ Ayóó Átʼéii nihizází Jerusalemdę́ę́ʼ yiníʼeezh.

10 Áádóó Aaron ání: Aooʼ, éí Iiʼ Sizį́ Ayóó Átʼéii átʼį́, dóó tʼáá ałtso yáʼąąsh dóó nahasdzáán áyiilaa. Díísh yinídlą́?

11 Áádóó ádííniid: Aooʼ, Iiʼ Sizį́ Ayóó Átʼéii tʼáá ałtsoní áyiilaago yinishdlą́, dóó díí bidadéétʼiʼígíí tʼáá átʼé bee shił hodíílnih, dóó nizaad yideeshdląął.

12 Áádóó baa hoolzhiizh áko Aaron aláahdi naatʼáanii bizaad yidoodląąłgo yiyiiłtsą́ągo. Adam niilyáádóóʼ yaa ahoʼniilneʼ, aláahdi naatʼáanii Diyin bizaad bee akʼedaʼashchínígíí yichʼįʼ yółtaʼgo—haitʼáó Diyin God nihokááʼ dineʼé tʼáá beełtʼéego áyiilaa, dóó Diyin God bee hazʼáanii yaa yiizlá, dóó asdzihígíí biniinaa, nihokááʼ dineʼé bąąhági átʼéii yiih yíkai.

13 Áádóó Aaron Diyin bizaad bee akʼedaʼashchínígíí hózhǫ́ ąą áyiilaa Adam bitsʼíís niilyáádóó, nihokááʼ dineʼé bąąhági ádaatʼį́, dóó bibąąhági átʼéii bił hooʼaʼ dóó nináʼílyáago hootʼááł ałdóʼ, éí nahasdzáán álnééhdę́ę́ʼ hashtʼeelyaa, Christ átʼį́įgo, tʼáá ałtso bízhiʼ dayoodlánígíí bá.

14 Áádóó nihokááʼ dineʼé bąąhági átʼéii yiih yíkaidą́ą́ʼ yiiʼ háádóókahgo doo yídaneelʼą́ą da; ákondi Christ tiʼhoozniiʼ dóó náádiilyá bibąąhági ádaatʼéii yá nináʼnídlá oodląʼ dóó ádaa náʼookąąhgo, dóó ákótʼéego; áádóó anoonééł bitłʼóól bee bedaʼastłʼónígíí kʼíyiisʼdláád, áko jishchááʼ doo hodínóołnééł da, áádóó haʼólní ayóó átʼáo anoonééł yishchʼíí ndi iidoołʼnah; dóó Aaron díí aláahdi naatʼáanii tʼáá átʼé yichʼįʼ ąą áyiilaa.

15 Áádóó baa hoolzhiizh Aaron díí yichʼįʼ ąą áyiilaago, aláahdi naatʼáanii ání: Haash deeshnííłgo áko díí hoolʼáágóó iiná baa hainídziʼígíí shee hólǫ́ǫ doo? Aooʼ, haitʼáó íʼdiishyáago Diyin God binahjįʼ nááshiʼdidoochííł, díí iiʼ sizį́ doo yáʼátʼéehii shiyid dóó nahjįʼ kódoolnííł, dóó biʼIiʼ Sizį́ Diyinii shaadoolyééł, áko íł hózhóonii shiyiʼ hadidoobį́į́ł. Áko akéeʼdi yoołkáałdi doo nahjįʼ kóshiʼdi doolnííł da? Áko shooh, ní, tʼáá ałtsoní shinaadeełii nahjįʼ kódeeshłííł, aooʼ, hazʼą́ bikʼi shóhólniihii nahjįʼ kódeeshłííł, áko díí ayóó átʼáo ił hózhóonii shaa doolyeeł.

16 Ákondi Aaron ábiłní: Díí nínízingo, Diyin God bichʼįʼ niʼkódíínííł, aooʼ, nibąąhági átʼéii tʼáá átʼé bee ádaa náʼiiníkąąh, dóó Diyin God bichʼįʼ yaa ánínééh, dóó neʼoodląʼ choiníłʼį́įgo bízhiʼ binahjįʼ bichʼįʼ sodílzin, shaa doolyeeł nínízingo yinídlą́ągo, áko índa bíká haʼíínílní nínízinée naadoolyééł.

17 Áádóó baa hoolzhiizh Aaron kódííniidgo, aláahdi naatʼáanii nijįʼ Bóhólníihii yichʼįʼ yaa kódzaa, ntsdinígo; aooʼ, niʼjįʼ neeztʼį́, dóó ayóó íítsʼaʼgo sodoolzin, kóníigo:

18 O Diyin God, Aaron shił hoolneʼ Diyin God hólǫ́; dóó Diyin God nílį́įgo, shichʼįʼ ádééhonílzįįh dóó shibąąhági ádaatʼéii tʼáá átʼé yóóʼ adideeshʼą́ą́łgo nééhodeesįįł, dóó anoonééłdę́ę́ʼ náhideeshnaał, dóó akéeʼdi yoołkáałdi yisdáshiʼdidooltééł. Áádóó áko aláahdi naatʼáanii kódííʼniidgo, bizééʼ hazlį́ nahalingo naaʼíítłiz.

19 Áádóó baa hoolzhiizh bá naalʼaʼí dahyiiteʼ dóó aláahdi naatʼáanii asdzáán tʼáá ałtsoní aláahdi naatʼáanii bił áhóótʼįįdígíí yee yił hoolneʼ; áádóó aláahdi naatʼáanii yaa níyá; dóó bizééʼ hazlį́į́ʼ nahalingo sitį́įgo yiyiiłtsą́, dóó naaʼíítłizhígíí éí Aaron dóó bikʼiské ádaatʼį́ nízingo, yichʼįʼ báhóóchįįd, dóó bá nidaalʼaʼí éí doodago aláahdi naatʼáanii bá nidaalʼaʼí ííłní, daosxil dóó ndaałtseed.

20 Áko á nidaalʼaʼí aláahdi naatʼáanii yiniinaa nááʼíítłizhígíí deiyiiłtsą́, éí bąą Aaron dóó bikʼiské atídeidoolíiłgo yichʼįʼ daastį́; áádóó aláahdi naatʼáanii asdzaan ndeiyookąąhgo ádaaní: Haʼátʼíísh biniyé díí diné ndadoołtsxił nihidiní, háálá łaʼ bitahdóó tʼáá ániiłtso nihiláahgo ayóó bidziil? Éí bąą nanihidoołtsxilgo átʼé.

21 Áko aláahdi naatʼáanii asdzáán bá nidaalʼaʼí ńdaaldzidígíí yiyiiłtsą́ągo bí ałdóʼ tʼáá íiyisíí násdzííd, doo yáʼáshóonii bikʼihodooleeł nízingo. Áádóó bá nidaalʼaʼí diné hágo deidinooniiłgo ayiisʼaʼ, áko Aaron dóó bikʼiské nideidoołtsxił biniyé.

22 Áko Aaron éí aláahdi naatʼáanii asdzáán tʼáá íiyisíí yinízinígíí yaa ákoniizį́į́ʼgo, bí, diné bijéí daastłʼisígíí ałdóʼ bił bééhózingo, ląʼí diné ahíídookah nízingo yinásdzííd, dóó ayóó átʼáo saad hodooleeł dóó ałkʼiidoojah; éí bąą aláahdi naatʼáanii yichʼįʼ dahdiilniiʼ dóó niʼdóó neidiyiiłah, áádóó ííłí: Yiizʼį́į́. Áádóó yiizį, áádóó bitah náhooʼnaʼ.

23 Áko díí éí aláahdi naatʼáanii asdzáán dóó ląʼí bá nidaalʼaʼí binááł ádahoodzaa. Áádóó díí deiyiiłtsą́ągo tʼóó bił adahóóyóíʼ, dóó nídaasdzííd. Áádóó aláahdi naatʼáanii yiizįʼ, dóó naʼdíníítą́ą́ʼ. Áádóó neineeztą́ą́ʼ, hónáásiiʼ tʼáá ałtso bighan hazʼą́ągi Diyin Bóhólníihii deiyoosdląąd dóó yikééʼ niikai.

24 Áko łaʼ ahíikai háálá aláahdi naatʼáanii asdzáán ádííniidígíí biniinaa, áádóó Aaron dóó bikʼiské biniinaa bitahgo ayóó átʼáo saad hólǫ́ hazlį́į́ʼ.

25 Ákondi aláahdi naatʼáanii yitah yiizįʼ dóó yíká aalwod. Áádóó Aaron dóó yił naakaiʼígíí yichʼįʼ ádahodiilzééʼ.

26 Áádóó baa hoolzhiizh aláahdi naatʼáanii diné ádahodiilzéeʼgo deiyiiłtsą́, Aaron dóó bikʼiské ahíikaiʼígíí yichʼįʼ deizįʼ, áádóó Diyin bizaad yee nideidínóotį́į́ł biniyé.

27 Áádóó baa hoolzhiizh aláahdi naatʼáanii haneʼ ílíinii tʼáá ałtso kéyah bikááʼgóó daʼníłtsʼą́ą́góó chʼédahastʼą́ągo áyiilaa, bidineʼé tʼáá ałtso bikéyah bikááʼgóó kéédahatʼínígíí, éí tʼáá ałtso bináágóó, éí tónteel binahjįʼ, éí haʼaʼaah dóó eʼeʼaahjigo, dóó éí Zarahemla kéyahgi ałtsʼádzoh áłtsʼóózígo doo háiida kééhojitʼínígi tséʼnaa nahonítʼiʼ, éí haʼaʼaah tó nihiníyį́ dóó eʼeʼaah tó nihíníyį́įjįʼ, dóó tónteel bináágóó nahwiizʼą́ąʼgi, háiida doo kééhatʼínígíí éí Zarahemla kéyah binahjįʼ dóó náhookʼǫsjįʼ, éí éii Manti nineelʼą́ binahjįʼ, tooh Sidon deezlį́į́dóó, éí haʼaʼaahdę́ę́ʼ dóó eʼeʼaahjigo íílį́—dóó kótʼáo Laman dineʼé dóó Nephi dineʼé bikéyah bee ałtsʼádzoh.

28 Áko, Laman dineʼé bił dahoyéʼígíí háiida doo kééhatʼį́įdi tádadinééh, dóó níbaal yiiʼdabighan; áádóó eʼeʼaahjigo doo nahaghahídadi kéédahatʼį́, Nephi bikéyahdi; aooʼ, dóó Zarahemla kéyahdóó eʼeʼaahjigo ałdóʼ, tónteel nihiníyíníjįʼ, dóó Nephi bikéyah dóó eʼeʼaahjigo, dabizází tʼóó áłtsé kéyah baa deetʼánéegi, dóó áko tónteel nineelʼą́ bíighah góneʼ.

29 Áádóó ałdóʼ tʼóó ahayóí Laman dineʼé haʼaʼaahjigo kéédahatʼį́ tónteel nihiníyínígi, Nephi dineʼé adabineeskaadjįʼ. Áádóó áko Nephi dineʼé éí Laman dineʼé tʼáá átʼé binaagóó kéédahatʼį́; ákótʼée ndi Nephi dineʼé éí náhookǫs bichʼįʼjigo háiida doo kéédahatʼį binahjįʼ kéyah naaznilígíí yee ádídahoosnííʼ, tooh Sidon deezlį́į́dę́ę́ʼ, haʼaʼaahdę́ę́ʼ dóó eʼeʼaahjigo, háiida doo kééhatʼíní nahósʼaʼgi; náhookǫsjigo, áádóó náás níléí kéyah Bountiful yoolyéejįʼ nidahazná.

30 Áádóó kéyah Ádahasdįįd deiłninígíí bee hoodzohjįʼ, éí náhookǫsjigo tʼáá nizaad diné ákweʼé kéédahatʼį́ ńtʼę́ę́ʼ éí ałtso ádabiʼdisdįįd, éí bitsʼin hadaasʼáó baa haneʼ, éí Zarahemla dineʼé yikʼídaneeztą́ą́ʼ, éí ákwéʼé tsʼídá áłtsé niníná.

31 Áádóó áádę́ę́ʼ chʼíníná háiida doo kééhatʼíní góneʼ ńléí shádíʼááhjigo. Áko kéyah náhookǫsjigo Ádahasdįįd deiłní, dóó kéyah shádiʼáahjigo éí ákweʼé Bountiful deiłní, éí háiida doo kééhatʼínígi naadlooshii daʼałchinígíí tʼóó ahayóí ałʼąą átʼéego hólǫ́, éí łaʼ náhookǫsdę́ę́ʼ chʼíyaan yíká yíkai.

32 Áádóó áko, Nephi dineʼé bigáál yitʼį́ tʼááłáʼí jį́ dóó nááʼáłnííʼ bíighah, Bountiful dóó Ádahasdįįd kéyah hoodzoh góneʼ, haʼaʼaahdę́ę́ʼ dóó eʼeʼaahjįgo tónteel nihoníyį́įjįʼ, áádóó áko Nephi dóó Zarahemlajįʼ kʼasdą́ą́ tó ałtso bináhaazyį́, kéyah náhookʼǫsjigo dóó kéyah shádiʼáahjigo bitaʼgi áłtʼsóózígo kéyah ahidiitʼiʼ.

33 Áádóó baa hoolzhiizh Nephi dineʼé éí Bountiful kéyahgi kééhatʼį́, haʼaʼaahdę́ę́ʼ tónteel dóó eʼeʼaah tónteeljįʼ, dóó áko Nephi dineʼé bił éédahózingo, baa ádahalyáanii dóó bá nidaabaahí yił, éí Laman dineʼé shádiʼáahjigo yichʼą́ą́h nidahaazbaaʼ, áko kéyah náhookǫsjigo doo bee bidahoolnih da silį́į́ʼ, dóó áko kéyah náhookǫsjigo doo yiih doonééł da.

34 Éí bąą Laman dineʼé kʼad doo kéyah bee bidahoolnííh da Nephi kéyahgi tʼéiyá, doo háiida kééhatʼį́įgi. Áko díí Nephi dineʼé bił éédahózinígíí biniinaa—háálá Laman dineʼé beʼanaaʼ danilį́, doo tʼáá háádę́ę́ʼ da atíbidiʼdoolníiłgo doo yee ńdahasʼą́ą da, áádóó ałdóʼ adeinízinígíí bikʼehgo, kéyah łaʼ yiih dadinóochééłgo yíká ádaatʼį́.

35 Áádóó áko shí, díí ádííniidígíí bikééʼdóó, Ammon dóó Aaron, Omner, dóó Himni, dóó bikʼiské adáátʼįįdígíí baa nááhashneʼ dooleeł.