1 Áádóó baa hoolzhiizh naaki jį́ʼ dóó naaki tłʼééʼ azlį́įgo bitsʼíís daneezná ndahalteeh góneʼ ndeiyííłteehgo, éí daneezná yóóʼ álnééh biniyé ádaalyaa.

2 Áko aláahdi naatʼáanii asdzáán éí Ammon baa haʼniih yidiiztsʼą́ą́go, áko ayííłʼaʼ dóó shaadoogááł niizį́į́ʼ.

3 Áádóó baa hoolzhiizh Ammon ábiʼdooniidígíí yeʼiiʼlaa, dóó aláahdi naatʼáanii asdzáán yaaníyá, dóó haʼátʼíí yáʼíídoolííł nízingo yaa níyá.

4 Áádóó kóyidííniid: Shichʼooní yándaalʼaʼí shił dahoolneʼ Diyin God yá yáłtiʼii nilį́, dóó áko adziilii neihólǫ́ǫgo ayóó átʼáo bízhiʼ binahjįʼ ndíílnish;

5 Éí bąą, díí kótʼéego, bił yahadíínááł dóó shichʼooní yidííltsééł, háálá naaki jį́, dóó naaki tłʼééʼ tʼóó tsáskʼeh yikáá sitį́; dóó łaʼ éí doo bizééʼ hazlį́į́ʼ da daaní, ákondi łaʼ éí bizééʼ hazlį́į́ʼ daaní dóó ayóó niłchxon, dóó daneeznánígíí ndahaʼnííł góneʼ ndooltééł; ákondi shí éí, dóó shił niłchxon da.

6 Áko, díí éí Ammon yinízin ńtʼę́ę́ʼ, háálá bił bééhózin aláahdi naatʼáanii Lamoni éí Diyin God bibeʼadziil bił hólǫ́; áko bił bééhózin chahałheeł dááʼdiníbaal doo bee oodlą́ąnii bintsékeesdóó nahjįʼ kólnééh, dóó adinídíín bintsékees yidiʼníłdládígíí, éí adinídíin Diyin God biʼayóóʼátʼéii átʼé, éí biyáʼátʼéehii bee adinídíín nizhónígíí átʼé—aooʼ, díí adinídíín biiʼ sizíinii hózhǫ́ ił hózhǫ́ biih yiyílá, chahałheeł bikʼos nahjįʼ kólyaa, dóó hoolʼáágóó iiná bibee adinídíín biiʼ sizíinii biiʼ diiltłah, aooʼ, bił bééhózin díí bitsʼíís neyiiłná, dóó Diyin God dahbidiiłtį́—

7 Éí bąą, aláahdi naatʼáanii asdzáán yinízinígíí tʼéiyá yinízin. Éí bąą, aláahdi naatʼáanii yidoołtséełgo yił yahííyá aláahdi naatʼáanii asdzáán íídoołííł yinízinyę́ę bikʼehgo; áko aláahdi naatʼáanii yiyiiłtsą́, dóó bił bééhózin doo éí bizééʼ hazlį́į da.

8 Dóó aláahdi naatʼáanii asdzáán íídííniid: Doo bizééʼ hazlį́į́ʼda, ákondi Diyin God biʼiiłhaazhgo bił hooʼaʼ, dóó yiską́ągo náádidooʼnah; éí bąą tʼáadoo yóóʼ ádaałéʼé.

9 Áádóó Ammon asdzáán ííłní: Daʼ díísh yinídlą́? Dóó asdzáán ábíłní: tʼáadoo shił ííshją́ą́ ílyaa da tʼáá hózhóʼí nizaad tʼéí bee, dóó nihándaalʼaʼí bizaad tʼéiyá; ákótʼée ndi ádíníniid yę́ę bikʼehgo áhodoonííłgo iinishdlą́.

10 Áádóó Ammon asdzáán ííłní: Neʼoodląʼ bidziilígíí biniinaa nikʼihojídlí; asdzą́ą́, ándishní, tʼáá ałtso Nephi bidineʼé bitahgóó doo łaʼ beʼoodląʼ kótʼáó ayóó átʼée da ńtʼę́ę́ʼ.

11 Áádóó baa hoolzhiizh bahastiin sitʼį́įgiʼ tʼáá íiyisíí haisííd, áádóó níléí yiską́ą́jįʼ éí Ammon yee nahoníʼą́nééjįʼ náádidoonah.

12 Áádóó baa hoolzhiizh ńdiinaʼ, Ammon bizaad bikʼeh áhoodzaa; dóó yiizįʼgo, bizáánii yichʼįʼ dahdiilniiʼ, dóó ádííniid: Diyin God bízhiʼ bikʼihojisdliʼ dóó nikʼih hojidoodliił.

13 Háála tʼáá aaníí hinínáago, áko shooh, sháNináʼnídláii yiiłtsą́; dóó doogááł, dóó asdzáán łaʼ bidoołchííł, dóó nihokááʼ dineʼé tʼáá ałtso bízhiʼ deiyoosdląądígíí yá nináʼdoodlééł. Áko, díí saad yee haadzííʼgo, bijéí biiʼ haʼdéébįįd, dóó ayóó átʼéego bił nááhóózhǫǫdgo naaʼíítłizh dóó aláahdi naatʼáanii asdzáán ałdóʼ naaʼíítłizh, Niłchʼi Diyinii bidiisnááʼ.

14 Áko Ammon Diyin Bóhólníihii biʼIiʼ Sizį́ Diyinii bisodizin bikʼehgo Laman dineʼé dabidiisnááʼ yiyiiłtsą́ągo, éí bikʼéí danilį́, éí biniinaa Nephi dineʼé bitahgóó yéego yínííł biiʼnaʼasdeeʼ, doodago tʼáá ałtse Diyin God bidineʼé bitahgóó ndaʼiisiʼígíí dóó bibeeʼádaʼoolʼįįł biniinaa, ntsidinígoʼ, dóó biʼiiʼ sizíinii tʼáá átʼéé ńtʼę́ę́ʼ yee sodoolzin dóó Diyin God ahéheeʼ yidííniid bikʼéí yidiisnáʼígíí biniinaa; áádóó bí ałdóʼ ił hózhǫ́ bidiisnááʼ; dóó tʼáá átʼé tʼááʼgo niʼjįʼ naaʼahineezdeeʼ.

15 Áko, aláahdi naatʼáanii bándaalʼaʼí naaʼaníídeeʼ diyiłtsʼą́ągo, bí ałdóʼ Diyin God yichʼįʼ yéego sodadiʼniilzin, háálá Bóhólníihii baʼódlí ałdóʼ dabidiisnááʼ, háálá bí éí aláahdi naatʼáanii yidááhdóó deizįʼ yę́ę ádaatʼį dóó Ammon ayóó átʼáo bidziilígíí tʼáá aníigo yaa dahoolneʼ.

16 Áádóó baa hoolzhiizh Bóhólníihii bízhiʼ yee sodadoolzin, bedaʼadziil yee, tsʼídá niʼjįʼ naaʼahineezdeeʼjįʼ, tʼáá hazhoʼó Laman dineʼé asdzání léíʼ tʼéiyá, éí Abish wolyé, éí Diyin Bóhólníihii yoodlą́ągo ląʼí nááhai, bizhéʼé ayóó átʼáo bił áhoodzaaígíí biniinaa.

17 Áko, Bóhólníihii yidiiʼyá, dóó doo yaa halneʼ da, áko, asdzání éí Lamoni tʼáá átʼé bándaalʼaʼí niʼjįʼ naa aníídeeʼgo yiyiłtsą́, dóó asdzáán yá naalʼaʼí, aláahdi naatʼáanii bizáánii, dóó aláahdi naatʼáanii, dóó Ammon niʼgóó sitį́, asdzání éí Diyin God bibeʼadziilii átʼéego bił bééhózin; dóó díí ashjaʼiilaaʼídą́ą́ʼ átʼé niizį́į́ʼ, diné díí ashjaʼiilaaʼídą́ą́ʼ bił béédahodoozįįł, áko díí ahoodzaa deiyiłtsʼą́ągo Diyin God bibeʼadziil deidoodląął, éí bąą dahooghangóó tádilyeedgo, yaa hoolneʼ.

18 Áádóó aláahdi naatʼáanii bighangiʼ áłah silį́į́ʼ. Dóó tʼóó ahayóí niheeskai, dóó aláahdi naatʼáanii dóó aláahdi naatʼáanii asdzání, dóó bándaalʼaʼí niʼgo shijééʼgo yikʼee dadeesyiz, dóó daneeznaaʼ nahalingo naazhjééʼ; áádóó Ammon ałdóʼ deiyiłtsą́ʼ, dóó áko shooh, éí Nephi dineʼé nilį́į́ lá.

19 Áádóó áko diné saad dahółǫ́ǫgo nihił hooʼa; łaʼ ádaaníigo éí ayóó átʼáo doo yáʼáshóonii nihikʼiholeʼ, doodago aláahdi naatʼáanii dóó bighandóó naaldeehii ałdóʼ, háálá Nephi dineʼé kéyah tʼáá yiiʼ kééhatʼį́ yee hoołʼaʼígíí biniinaa.

20 Ákondi łaʼ éí bikʼijįʼ hadaasdzíí; kódaaníigo: Aláahdi naatʼáanii díí doo yáʼáshóonii bighan yikʼi niinílá, háálá bá ndaalʼaʼí neistseed éí Sebus tábąąhdi bidibé daʼníłtsʼą́ąjigo ałtsʼádahinoolkaad.

21 Áádóó hastóí Sebus tábąąhdi naazį́įʼgo aláahdi naatʼáanii bidibé daʼníłtsʼą́ąjigo ałtsʼádeineeskaad yę́ę hakʼijįʼ hadahaasdzííʼ, háálá Ammon yichʼįʼ bádahachįʼ bikʼéí Sebus tábąąhdi neistseedígíí biniinaa, éí aláahdi naatʼáanii bidibé yichʼą́ąh naaldeehgo.

22 Áko, díí łaʼ, bikʼis biʼdiisxí Ammon bibéésh hał bee, Ammon íiyísii yichʼįʼ báháchįʼgo, bibéésh hał yił haadeel dóó Ammon yidiyoołhééłgo yichʼįʼ dahiiteʼ; dóó yidiyoołheełgo béésh hał yichʼįʼ dayidiitą́ą ńtʼę́ę́ʼ, áko shooh, tʼáá áajįʼ naaʼíítłizh dóó bizééʼ hazlį́į́ʼ.

23 Áko Ammon doo biʼdiʼyoolyééł dago yitʼį́ silį́į́ʼ, háálá Bóhólníihii Mosiah íídííniid, éí bizhéʼé: éí doo haada doonííł da, neʼoodląʼígíí binahjį díí kótʼée doo éí bąą, Mosiah Bóhólníihii yaa áháłyáa doogo yee yaʼoozliʼ.

24 Áádóó baa hoolzhiizh diné áłah nilinígíí hastiin naaʼiitłizhgo bizééʼ haslįʼígíí deiyiłtsą́, éí Ammon béésh hał yichʼįʼ dayidiitą́ yidiyoołhééł biniyé, tʼáá átʼé ndaasdzííd, dóó yidadidoolchiłgo éí doo deinízin da, doodago tʼáá átʼé naaʼaníídeeʼígííʼ dóó yaa bił dahóyéego ałchʼįʼ ayáánaadaʼdínííłtiʼ éí haʼátʼíí lá ayóó átʼáo adziilii shį́į́ choozʼįįd, doodago haʼátʼíí éí kweʼé áá haʼní.

25 Áádóó baa hoolzhiizh łaʼída Ammon éí Iiʼ Sizį́ Ayóóʼátʼéii nilį́ daaní, dóó łaʼ éí Iiʼ Sizį́ Ayóóʼátʼéii abííłʼaʼ daaní;

26 Ákondi łaʼ éí tʼáá átʼé yikʼijįʼ daazlį́į́ʼ, éí éí báhádzidii tsoh átʼį́ daaní, Nephi dineʼé adeisʼaʼ nihichʼįʼnahwiiłnáa doo biniyé.

27 Áádóó łaʼ éí Ammon Iiʼ Sizį́ Ayóóʼátʼéii nihichʼįʼ ayííłʼaʼ bąąhágiʼ ádeitʼinígíí biniinaa nihichʼįʼ nahwiilná daaní; áádóó Iiʼ Sizį́ Ayóóʼátʼéii áłahjįʼ Nephi dineʼé yił nilį́, éí bílákʼeedóó yisdábííʼeezh; áádóó éí Iiʼ Sizį́ Ayóóʼátʼéii ląʼída bikʼéí Laman dineʼé neistseed.

28 Áádóó áko yéego ałchʼįʼ daʼditsihgo yaa nídiikai. Áádóó ałchʼįʼ daʼditsihgo, asdzáán naalʼaʼyę́ę diné aíyizʼeezhyę́ę níyá, dóó dahdeiyíkááhgóó saad ahídeitʼááh yiyiłtsą́ągo tʼáá íiyisíí yaa yínííł silį́į́ʼ, hónáasiiʼ yikʼee yichah.

29 Áádóó baa hoolzhiizh aláahdi naatʼáanii asdzání yílaʼ yiyiłtsood, łeeyiʼdéé yiidoosįįʼgo; áádóó tʼóó bilá yidiilchidgo yiizįʼ, dóó bízhí yee hadoolghaazh, kóní: O Jesus bikʼihojidlíí, díí chʼį́įdiitah doo yáʼáshóoniidééʼ yisdáshííníł tį́! O Diyin God bikʼihojídlí, díí diné baa jiiníbaah.

30 Áádóó kódííniidgo, ahízkad, ił hólǫ́ íiyisíí biiʼ haslį́į́ʼgo, saad ląʼída doo bikʼeʼ diitįįhgo yee hahaasdzííʼ; áádóó díí kódzaago, aláahdi naatʼáanii, Lamoni, bílaʼ yisił, dóó bikeeʼ yee yiizįʼ.

31 Áádóó bí, tʼáá hooshchʼįʼ diné ałchʼįʼ daʼditsihígíí yiyiłtsą́ągo, yichʼįʼ níyá dóó yichʼįʼ hahadziihgo yaanídiidzá, dóó Ammon saad yee yáłtiʼgo yidiiztsʼąʼ yę́ę neidíníítą́ą́ʼ; dóó dabidiiztsʼaʼígíí daʼoosdląąd dóó Bóhólníihii dayoodlą́ daazlį́į́ʼ.

32 Ákondi ląʼída bitahgóó bizaad doo dayoostʼą́ą da; éí bąą tʼáá bí ádeinízingóó dahdahidiikai.

33 Áádóó baa hoolzhiizh Ammon yizįʼgo ałdóʼ ákaʼaalwod, dóó tʼáá ałtso Lamoni bándaalʼaʼí ałdóʼ; dóó tʼáá átʼé diné tʼáá aheełtʼéego ndeinitin—bijéí łahgo ádaadzaa; áko bąąhágiʼ atʼéíi ádeidoolííłgo doo deinízin da daazlį́į́ʼ.

34 Áádóó áko shooh, ląʼída Diyin yá ndaalʼaʼí deiłtsą́ dóó bił ałchʼįʼ yádeiltiʼ daaníigo diné yee yichʼįʼ hadaasdzííʼ; dóó áko Diyin God bitsʼąądééʼígíí yee nihił dahoolneʼ daadííniid, dóó biyáʼátʼéehii.

35 Áádóó baa hoolzhiizh łąʼída bizaad dayoosdląąd; dóó daʼoosdlaadígíí tó bee dabiʼdoolzį́į́ʼ; dóó diné yáʼátʼéehii daazlį́į́ʼ, dóó bitahgi sodizin yee dahyikahgo ádeiyiilaa.

36 Áádóó áko Bóhólníihii binaanish éí Laman dineʼé bitahgo hahoolzhiizh; áko Bóhólníihii biʼIiʼ Sizį́ Diyinii hózhǫ́ bił dahólǫ́ silį́į́ʼ; dóó baa ákódaniidzį́į́ʼ tʼáá ałtso diné wóshdę́ę́ʼ yił níigo bighaan yee yichʼįʼ dahdoolnih éí ádaańdaʼoohkąąhígíí dóó bizhí deidósinígíí.