1 Áádóó baa hoolzhiizh naaki jį́ʼ dóó naaki tłʼééʼ azlį́įʼgo bitsʼíís daneezná ndahalteeh góneʼ ndeiyííłteehgo, éí daneezná yóóʼ álnééh biniyé ádaalyaa.

2 Áko aláahdi naatʼáanii asdzáán éí Ammon baa haʼniih yidiiztsʼą́ąʼgo, áko ayííłʼaʼ dóó shaadoogááł niizį́į́ʼ.

3 Áádóó baa hoolzhiizh Ammon ábiʼdooʼniidígíí yeʼiiʼlaa, dóó aláahdi naatʼáanii asdzą́ą́ yaa níyá, dóó haʼátʼíí yá íidoolííł nízingo yaa níyá.

4 Áádóó kóyidííniid: Shichʼooní yá nidaalʼaʼí shił dahoolneʼ Diyin God yá yáłtiʼii nilį́, dóó áko adziilii nee hólǫ́ǫgo ayóó átʼáo bízhiʼ binahjįʼ ndíílnish;

5 Éí bąą, díí kótʼéego, bił yah adíínááł dóó shichʼooní yidííltsééł, háálá naaki jį́, dóó naaki tłʼééʼ tʼóó tsáskʼeh yikááʼ sitį́; dóó łaʼ éí doo bizééʼ hazlį́į́ʼ da daaní, ákondi łaʼ éí bizééʼ hazlį́į́ʼ daaní dóó ayóó niłchxon, dóó daneeznánígíí ndahaʼnííł góneʼ ndooltééł; ákondi shí éí, dóó shił niłchxon da.

6 Áko, díí éí Ammon yinízin ńtʼę́ę́ʼ, háálá bił bééhózin aláahdi naatʼáanii Lamoni éí Diyin God bibeʼadziil bił hólǫ́; áko bił bééhózin chahałheeł dááʼdiníbaal doo bee oodlą́ąnii bintsékeesdóó nahjįʼ kólnééh, dóó adinídíín bintsékees yidiʼníłdládígíí, éí adinídíin Diyin God biʼayóó átʼéii átʼé, éí biyáʼátʼéehii bee adinídíín nizhónígíí átʼé—aooʼ, díí adinídíín biiʼ sizíinii hózhǫ́ ił hózhǫ́ biih yiyíílá, chahałheeł bikʼos nahjįʼ kólyaa, dóó hoolʼáágóó iiná bibee adinídíín biiʼ sizíinii biiʼ diiltłah, aooʼ, bił bééhózin díí bitsʼíís neyiiłná, dóó Diyin God dahbidiiłtį́—

7 Éí bąą, aláahdi naatʼáanii asdzáán yinízinígíí tʼéiyá yinízin. Éí bąą, aláahdi naatʼáanii yidoołtséełgo yił yah ííyá aláahdi naatʼáanii asdzáán íidoolííł yinízinyę́ę bikʼehgo; áko aláahdi naatʼáanii yiyiiłtsą́, dóó bił bééhózin doo éí bizééʼ hazlį́į da.

8 Dóó aláahdi naatʼáanii asdzáán íidííniid: Doo bizééʼ hazlį́į́ʼ da, ákondi Diyin God biʼiiłhaazhgo bił hooʼaʼ, dóó yiską́ągo náádidooʼnah; éí bąą tʼáadoo yóóʼ ádaałéhé.

9 Áádóó Ammon asdzáán ííłní: Daʼ díísh yinídlą́? Dóó asdzáán ábíłní: tʼáadoo shił ííshją́ą́ ályaa da tʼáá hazhóʼó nizaad tʼéí bee, dóó nihá nidaalʼaʼí bizaad tʼéiyá; ákótʼée ndi ádíníniid yę́ę bikʼehgo áhodooníiłgo yinishdlą́.

10 Áádóó Ammon asdzáán ííłní: Neʼoodląʼ bidziilígíí biniinaa nikʼihojídlí; asdzą́ą́, ándishní, tʼáá ałtso Nephi bidineʼé bitahgóó doo łaʼ beʼoodląʼ kótʼáo ayóó átʼée da ńtʼę́ę́ʼ.

11 Áádóó baa hoolzhiizh bahastiin sitʼį́įgi tʼáá íiyisíí haisííd, áádóó ńléí yiską́ą́jįʼ éí Ammon yee nahoníʼą́nééjįʼ náádidoonah.

12 Áádóó baa hoolzhiizh ńdiinaʼ, Ammon bizaad bikʼeh áhoodzaa; dóó yiizįʼgo, bizáánii yichʼįʼ dahdiilniiʼ, dóó ádííniid: Diyin God bízhiʼ bikʼihojisdliʼ dóó nikʼi hojidoodliił.

13 Háála tʼáá aaníí hinínáago, áko shooh, sháNináʼnídláii yiiłtsą́; dóó doogááł, dóó asdzáán łaʼ bidoołchííł, dóó nihokááʼ dineʼé tʼáá ałtso bízhiʼ deiyoosdląądígíí yá nináʼdoodlééł. Áko, díí saad yee haadzíiʼgo, bijéí biiʼ haʼdéébįįd, dóó ayóó átʼéego bił nááhóózhǫǫdgo naaʼíítłizh dóó aláahdi naatʼáanii asdzáán ałdóʼ naaʼíítłizh, Iiʼ Sizį́ Diyinii bidiisnááʼ.

14 Áko Ammon Diyin Bóhólníihii biʼIiʼ Sizį́ Diyinii bisodizin bikʼehgo Laman dineʼé dabidiisnááʼ yiyiiłtsą́ągo, éí bikʼéí danilį́, éí biniinaa Nephi dineʼé bitahgóó yéego yínííł biiʼ naʼasdeeʼ, éí doodago tʼáá áłtsé Diyin God bidineʼé bitahgóó ndaʼiisiʼígíí dóó bibee ádaʼoolʼįįł biniinaa, ntsidinígoʼ, dóó biʼiiʼ sizíinii tʼáá átʼéé ńtʼééʼ yee sodoolzin dóó Diyin God ahéheeʼ yidííniid bikʼéí yidiisnáʼígíí biniinaa; áádóó bí ałdóʼ ił hózhǫ́ bidiisnááʼ; dóó tʼáá átʼé tʼáaʼgo niʼjįʼ naaʼahineezdeeʼ.

15 Áko, aláahdi naatʼáanii bá nidaalʼaʼí naaʼaníídeeʼ deiyiiłtsą́ągo, bí ałdóʼ Diyin God yichʼįʼ yéego sodadiʼniilzin, háálá Bóhólníihii baʼódlí ałdóʼ dabidiisnááʼ, háálá bí éí aláahdi naatʼáanii yidááhdóó deizįʼ yę́ę ádaatʼį dóó Ammon ayóó átʼáo bidziilígíí tʼáá aaníigo yaa dahoolneʼ.

16 Áádóó baa hoolzhiizh Bóhólníihii bízhiʼ yee sodadoolzin, bedaʼadziil yee, tsʼídá niʼjįʼ naaʼahineezdeeʼjįʼ, tʼáá hazhóʼó Laman dineʼé asdzání léiʼ tʼéiyá, éí Abish wolyé, éí Diyin Bóhólníihii yoodlą́ągo ląʼí nááhai, bizhéʼé ayóó átʼáo bił áhoodzaaígíí biniinaa.

17 Áko, Bóhólníihii yidiiyá, dóó doo yaa halneʼ da, áko, asdzání éí Lamoni tʼáá átʼé bá nidaalʼaʼí niʼjįʼ naa aníídeeʼgo yiyiłtsą́, dóó asdzáán yá naalʼaʼí, aláahdi naatʼáanii bizáánii, dóó aláahdi naatʼáanii, dóó Ammon niʼgóó sitį́, asdzání éí Diyin God bibeʼadziilii átʼéego bił bééhózin; dóó díí ashjaʼiilaaʼídą́ą́ʼ átʼé niizį́į́ʼ, diné díí ashjaʼiilaaʼídą́ą́ʼ bił béédahodoozįįł, áko díí ahoodzaa deiyiiłtsą́ągo Diyin God bibeʼadziil deidoodląął, éí bąą dahooghangóó tádilyeedgo, yaa hoolneʼ.

18 Áádóó aláahdi naatʼáanii bighangi áłah silį́į́ʼ. Dóó tʼóó ahayóí niheeskai, dóó aláahdi naatʼáanii dóó aláahdi naatʼáanii asdzání, dóó bá nidaalʼaʼí niʼgo shijéeʼgo yikʼee dadeesyiz, dóó daneezná nahalingo naazhjééʼ; áádóó Ammon ałdóʼ deiyiiłtsą́ʼ, dóó áko shooh, éí Nephi dineʼé nilį́į́ lá.

19 Áádóó áko diné saad dahółǫ́ǫgo nihił hooʼaʼ; łaʼ ádaaníigo éí ayóó átʼáo doo yáʼáshóonii nihikʼi hooleʼ, éí doodago aláahdi naatʼáanii dóó bighandóó naaldeehii ałdóʼ, háálá Nephi dineʼé kéyah tʼáá yiiʼ kééhatʼį́ yee hoołʼaʼígíí biniinaa.

20 Ákondi łaʼ éí bikʼijįʼ hadaasdzííʼ; kódaaníigo: Aláahdi naatʼáanii díí doo yáʼáshóonii bighan yikʼi niinílá, háálá bá nidaalʼaʼí neistseed éí Sebus tábąąhdi bidibé daʼníłtsʼą́ąjigo ałtsʼádahinoolkaad.

21 Áádóó hastóí Sebus tábąąhdi naazį́įgo aláahdi naatʼáanii bidibé daʼníłtsʼą́ąjigo ałtsʼádeineeskaad yę́ę hakʼijįʼ hadahaasdzííʼ, háálá Ammon yichʼįʼ bádahachįʼ bikʼéí Sebus tábąąhdi neistseedígíí biniinaa, éí aláahdi naatʼáanii bidibé yichʼą́ąh naaldeehgo.

22 Áko, díí łaʼ, bikʼis biʼdiisxí Ammon bibéésh hał bee, Ammon íiyisíí yichʼįʼ báháchįʼgo, bibéésh hał yił haadeel dóó Ammon yidiyoołhéełgo yichʼįʼ dahiiteʼ; dóó yidiyoołheełgo béésh hał yichʼįʼ dah yidiitą́ą́ ńtʼę́ę́ʼ, áko shooh, tʼáá áajįʼ naaʼíítłizh dóó bizééʼ hazlį́į́ʼ.

23 Áko Ammon doo bidiʼyoolyééłgóó bééhoozin, háálá Bóhólníihii Mosiah íidííniid, éí bizhéʼé: éí doo haada doonííł da, neʼoodląʼígíí binahjįʼ díí kótʼée doo éí bąą, Mosiah Bóhólníihii yaa áháłyáa doogo yee yaʼoozliʼ.

24 Áádóó baa hoolzhiizh diné áłah nílínígíí hastiin naaʼiitłizhgo bizééʼ hazlį́ʼígíí deiyiiłtsą́, éí Ammon béésh hał yichʼįʼ dah yidiitą́ yidiyoołhééł biniyé, tʼáá átʼé nídaasdzííd, dóó yidadidoolchiłgo éí doo deinízin da, éí doodago tʼáá átʼé naaʼaníídeeʼígííʼ dóó yaa bił dahóóyéeʼgo ałchʼįʼ ayánáádaʼdíníiłtiʼ éí haʼátʼíí lá ayóó átʼáo adziilii shį́į́ choozʼįįd, éí doodago haʼátʼíí éí kweʼé áá haʼní.

25 Áádóó baa hoolzhiizh ląʼí da Ammon éí Iiʼ Sizį́ Ayóó Átʼéii nilį́ daaní, dóó łaʼ éí Iiʼ Sizį́ Ayóó Átʼéii abííłʼaʼ daaní;

26 Ákondi łaʼ éí tʼáá átʼé yikʼijįʼ daazlį́į́ʼ, éí éí báhádzidii tsoh átʼį́ daaní, Nephi dineʼé adeisʼaʼ nihichʼįʼnahwiiłnáa doo biniyé.

27 Áádóó łaʼ éí Ammon Iiʼ Sizį́ Ayóó Átʼéii nihichʼįʼ ayííłʼaʼ bąąhági ádeitʼinígíí biniinaa nihichʼįʼ nahwiilná daaní; áádóó Iiʼ Sizį́ Ayóó Átʼéii áłahjįʼ Nephi dineʼé yił nilį́, éí bílákʼeedóó yisdábííʼeezh; áádóó éí Iiʼ Sizį́ Ayóó Átʼéii ląʼí da bikʼéí Laman dineʼé neistseed.

28 Áádóó áko yéego ałchʼįʼ nídaʼditsihgo yaa nídiikai. Áádóó ałchʼįʼ daʼditsihgo, asdzáán naalʼaʼí diné ałhąʼ neiyiizheez yę́ę níyá, dóó dah deíkááhgóó saad ahídeitʼááh yiyiiłtsą́ągo tʼáá íiyisíí yaa yínííł silį́į́ʼ, hónáásiiʼ yikʼee yícha.

29 Áádóó baa hoolzhiizh aláahdi naatʼáanii asdzání yílaʼ yiyiiłtsood, łeeyiʼdę́ę́ʼ yiidoosįįʼgo; áádóó tʼóó bílaʼ yideelchidgo yiizįʼ, dóó bízhí yee hadoolghaazh, kóní: O Jesus bikʼihojidlíí, díí chʼį́įdiitah doo yáʼáshóoniidę́ę́ʼ yisdáshííníłtį́! O Diyin God bikʼihojídlí, díí diné baa jiiníbaah.

30 Áádóó kódííniidgo, ahízkad, ił hózhǫ́ íiyisíí biiʼ hazlį́į́ʼ, saad ląʼí da doo bikʼiʼdiitįįhgóó yee hahaasdzííʼ; áádóó díí kódzaago, aláahdi naatʼáanii, Lamoni, bílaʼ yisił, dóó bikeeʼ yee yiizįʼ.

31 Áádóó bí, tʼáá hooshchʼįʼ diné ałchʼįʼ daʼditsihígíí yiyiiłtsą́ągo, yichʼįʼ níyá dóó yichʼįʼ hahadziihgo yaa nídiidzá, dóó Ammon saad yee yáłtiʼgo yidiiztsʼą́ą́ʼ yę́ę neidíníitą́ą́ʼ; dóó dabidiiztsʼaʼígíí daʼoosdląąd dóó Bóhólníihii dayoodlą́ daazlį́į́ʼ.

32 Ákondi ląʼí da bitahgóó bizaad doo dayíistsʼą́ąʼ da; éí bąą tʼáá bí ádeinízingóó dahdahidiikai.

33 Áádóó baa hoolzhiizh Ammon yizįʼgo ałdóʼ ákaʼaalwod, dóó tʼáá ałtso Lamoni bá nidaalʼaʼí ałdóʼ; dóó tʼáá átʼé diné tʼáá aheełtʼéego nideinitin—bijéí łahgo ádaadzaa; áko bąąhági átʼéii ádeidoolíiłgo doo deinízin da daazlį́į́ʼ.

34 Áádóó áko shooh, ląʼí da Diyin yá nidaalʼaʼí deiiltsą́ dóó bił ałchʼįʼ yádeiiltiʼ daaníigo diné yee yichʼįʼ hadaasdzííʼ; dóó áko Diyin God bitsʼą́ą́dę́ę́ʼígíí yee nihił dahoolneʼ dadííniid, dóó biyáʼátʼéehii.

35 Áádóó baa hoolzhiizh ląʼí da bizaad dayoosdląąd; dóó daʼoosdlaadígíí tó bee dabiʼdoolzį́į́ʼ; dóó diné yáʼátʼéehii daazlį́į́ʼ, dóó bitahgi sodizin yee dah yikahgo ádeiyiilaa.

36 Áádóó áko Bóhólníihii binaanish éí Laman dineʼé bitahgóó hahoolzhiizh; áko Bóhólníihii biʼIiʼ Sizį́ Diyinii hózhǫ́ bił dahólǫ́ silį́į́ʼ; dóó baa ákódaniidzį́į́ʼ tʼáá ałtso diné wóshdę́ę́ʼ yił níigo bigaan yee yichʼįʼ dah doolnih éí ádaa ńdaʼookąąhígíí dóó bizhí deidósinígíí.