1 Áádóó baa hoolzhiizh aláahdi naatʼáanii Lamoni bá nidaalʼaʼí daohsįįh dóó tʼáá átʼé áhóótʼįįdgo daołtsánígíí baa hadahoohdziih.

2 Áádóó tʼáá átʼé deiyiiłtsánígíí yee hadahaasdzíiʼgo, dóó bił bééhoozįįd Ammon dibé yéego yikʼídeezʼį́į́ʼgo yisdéinííłkaad, dóó ałdóʼ bichʼįʼ ńdadibaahígíí ayóó átʼéego bichʼįʼ bidziil, tʼáá íiyíísii yikʼee tsídoolyiz, dóó ádííniid: Tʼáá laʼ aaníí, díí nihokááʼ dineʼé yilááh átʼé. Áko shooh, daʼ díísh Iiʼ Sizį́ Ayóó Átʼéii átʼį́ éí díí diné ayóó átʼáo yá nahwiiʼaah, nidaʼałtseedígíí biniinaa?

3 Áádóó aláahdi naatʼáanii yił dahoolneʼ, dóó ádadííniid: Iiʼ Sizį́ Ayóó Átʼéii éí diné daatsʼí nilį́, doo nihił béédahózin da; ákondi díí nihił béédahózin, áko aláahdi naatʼáanii beʼanaaʼ doo dabidoołhééł da, dóó aláahdi naatʼáanii bilį́į́ʼ doo daʼníłtsʼą́ąjigo ałtsʼádeidínóołkał da bił ndaʼniilkaadgo, háálá tʼáadoo leʼé ayóó yiyichįįh dóó ayóó bidziil; éí bąą, aláahdi naatʼáanii yikʼis nilį́įgo nihił béédahózin. Dóó áko, O aláahdi naatʼáanii, łaʼ diné ákótʼáo ayóó áboodziilgo doo nihił béédahózin da, háálá nihił bééhózingo éí doo bidiʼyoolyéeł da.

4 Áádóó áko, díí saad yídiiztsʼą́ą́go, díí átʼáo yichʼįʼ haadzííʼ: Kʼad shił bééhoozin éí Iiʼ Sizį́ Ayóó Átʼéii átʼį́; dóó yisdánihidooʼishgo nihaa níyá, áko doo nanihideestsxił da nihikʼiské íishłaa yę́ęgi átʼáo. Áko díí éí Iiʼ Sizį́ Ayóó Átʼéii nihizází yaa hadahaasdzííʼ yę́ę átʼį́.

5 Áko díí éí Lamoni bibee óʼoolʼįįł átʼée ńtʼę́ę́ʼ, éí bizhéʼé bił hoolneʼ, éí Iiʼ Sizį́ Ayóó Átʼéii hólǫ́. Azhą́ Iiʼ Sizį́ Ayóó Átʼéii deiyoodlą́ą ndi, tʼáá bí ádeiłʼínígíí tʼáá aaníí átʼé danizin; ákótʼée ndi, Lamoni tʼáá íiyíísii náásdzííd, háálá doo ákóʼiilaagóó bá nidaalʼaʼí neistseed yę́ę yikʼee bił hóóyééʼ.

6 Háálá bikʼéí tʼóó ahayóí neistseed bidibé toohdi daʼníłtsʼą́ąjigo ałtsʼádeineeskaadígíí biniinaa; dóó áko, háálá bidibé daʼníłtsʼą́ąjigo ałtsʼádeineeskaadígíí biniinaa neistseed.

7 Áko Laman dineʼé Sebus tábąąhdi naazį́įgo diné bidibé daʼníłtsʼą́ąjigo ałtsʼánídeiniłkaʼgo ádaʼałʼį́, áko daʼníłtsʼą́ąjigo ałtsʼádeineeskaadígíí bikéyahjigo adeineiłkaad, áko kódaatʼį́į́go aheedaʼnitʼįįh.

8 Áádóó baa hoolzhiizh aláahdi naatʼáanii Lamoni bá nidaalʼaʼí neidéíłkid, kóníigo: Díí hastiin ayóó bidziilígíí háádish naaghá?

9 Áádóó ádeiłní: Áko shooh, niłį́į́ʼ yáʼniʼíłjóół. Áko aláahdi naatʼáanii bá nidaalʼaʼí, dibé taah dinóolkał tʼáá bítséedi íidííniid, shilį́į́ʼ dóó tsinaabąąs bijáád nidaakiígíí hashtʼedadoołííł yidííniid, dóó Nephi kéyahgóó dadiilbąs; háálá Nephi bikéyahdi ayóó átʼéego adazhniiyą́ą́ʼ jiní, Lamoni bizhéʼé bá, éí ákweʼé kéyah tʼáá átʼé yilą́ąjiʼ sizį́.

10 Áko aláahdi naatʼáanii Lamoni Ammon bilį́į́ʼ dóó bitsinaabąąs hashtʼeiléehgo yidiiztsʼą́ąʼgo tʼáá íiyisíí bidiisnááʼ, Ammon tʼáá íiyisíí akʼeh hółʼínígíí biniinaa, kóníigo: Tʼáá laʼ aaníí tʼáá ałtso shá nidaalʼaʼí bitahdóó doo łaʼ díí hastiingi átʼáo tʼáá íiyisíí akʼeh hółʼį́į da ńtʼę́ę́ʼ; háálá tʼáá ałtso shibee hazʼáanii yénálniihgo yeʼałʼį́.

11 Áko tʼáá aaníí díí Iiʼ Sizį́ Ayóó Átʼéii átʼį́į́ lá, dóó shaa doogááł nisin, ndi baa shistiʼ.

12 Áádóó baa hoolzhiizh Ammon aláahdi naatʼáanii dóó bá nidaalʼaʼí bilį́į́ʼ dóó bitsinaabąąs yá hashtʼeyiilaago, aláahdi naatʼáanii yił yah ííyá, dóó aláahdi naatʼáanii biniiʼ łah ádzaago yiyiiłtsą́; éí bąą kʼasdą́ą́ʼ tʼóó yitsʼą́ąjįʼ chʼínálwod.

13 Áádóó aláahdi naatʼáanii bá nidaalʼaʼí łaʼ ábiłní, Rabbanah, éí éii, naatʼáanii ayóó átʼéii éí doodago ayóó átʼáo bidziilgo, áá haʼní, jó biʼaláahdi naatʼáanii ayóó dabidziilgo yaa ntsidaakees; áádóó ááh yiłní: Rabbanah, aláahdi naatʼáanii tʼáá kǫ́ǫ́ shił honílǫ́ nóʼníh.

14 Éí bąą Ammon aláahdi naatʼáanii yichʼįʼ naanásdzá, áádóó ííłní: Haʼátʼíí lá bee níkáʼiishyeed, O aláahdi naatʼáanii? Áádóó aláahdi naatʼáanii ahééʼílkidgo índa bichʼįʼ haadzííʼ, bindaʼalkidígíí bikʼehgo, háálá haʼátʼíí yididooniiłígíí doo bił bééhózin da.

15 Áádóó baa hoolzhiizh Ammon ánáádooʼniid: Haʼátʼíísh shítsʼą́ą́dóó nínizin? Ákondi aláahdi naatʼáanii tʼáadoo bichʼįʼ haadzíiʼ da.

16 Áádóó baa hoolzhiizh Ammon, Diyin God biʼIiʼ Sizį́ Diyinii bił hólǫ́ǫgo, éí bąą aláahdi naatʼáanii yaa nitsékeesígíí bił bééhoozin. Áádóó kóyidííniid: Daʼ ná nidaalʼaʼí dóó nidibé bichʼą́ą́h nisíníbaaʼígíí, dóó bikʼiské tsostsʼidgo bee atłʼį́hí dóó béésh hał bee atíishłaago baa hosidínítsʼą́ʼígíí biniinaa, dóó łaʼ éí bigaan kʼéhékal, áko nidibé dóó nánidaalʼaʼí bichʼą́ą́h nideeshbaał; éí bąą, daʼ dííʼish biniinaa nidiisnááʼ?

17 Ándishní, haʼátʼíísh biniinaa, ayóó átʼáo niʼdiisnáá? Áko shóóh, diné nishłį́, dóó ná naalʼaʼí nishłį́; éí bąą, haʼátʼíí shį́į́ tʼáá ákogi átʼéego nínizinígíí, ná beʼdeeshłííł.

18 Áko aláahdi naatʼáanii díí saad yidiiztsʼą́ąʼgo, ayóó átʼáo náábiʼdiisnááʼ, háálá yaa nitsékeesígíí Ammon bił bééhózin; azhą́ díí ákótʼée ndi, aláahdi naatʼáanii Lamoni haadzííʼ, dóó ííłní: Háish ánítʼį́? Iiʼ Sizį́ Ayóó Átʼéii eiísh ánítʼį́ʼ, tʼáá ałtsoní bił bééhózinii?

19 Ammon nátʼą́ą́ʼ hánáádzííʼ dóó kóní: Éí doo shí áshtʼį́į da.

20 Áádóó aláahdi naatʼáanii ání: Haash yitʼáo shijéí biyiʼdi baa nitséskeesígíí nił bééhózin? Tʼáadoo náhinílyésí handziih, dóó díí nił bééhózinígíí baa handziih, áádóó ałdóʼ haʼátʼíí adziilii bee shikʼéí shidibé daʼníłtsʼą́ąjigo ałtsʼádeineeskaadę́ę bigaan kʼídahííníkal éí bee shił hólneʼ—

21 Áádóó áko, díí nił bééhózingo bee shił hwíínilneʼgo, haʼátʼíí shį́į́ nínízinígíí naadeeshłééł, dóó nínízingo, shá nidaabaahii naa ádahalyą́ą doo; ákondi shił bééhózin ni éí biláahgo nidziil; ákótʼée ndi, tʼáá haʼátʼííshį́į́ nínízinígíí nichʼįʼ kódeeshłííł.

22 Áádóó Ammon hóyą́ągo, ákondi doo atidoolííłgóó, Lamoni ííłní: Shizaadísh bikʼedidíítį́į́ł, haʼátʼíí adziilii bee áshłaaʼígíí bee nił hwííshneʼgo? Áádóó díí éí nitsʼą́ą́dóó nisin.

23 Áádóó aláahdi naatʼáanii bił hoolneʼ, kóníigo: Aooʼ, nizaad tʼáá átʼé yideeshdląął. Áádóó ákótʼáo łídishcháázh íyiilaago habidiʼdoolʼį́į́ʼ.

24 Áádóó Ammon doo tʼą́ą́ʼ nináhinilyésí yichʼįʼ haadzííʼ, dóó íidííniid: Diyin God hólǫ́ǫgoósh yinídlą́?

25 Áádóó haadzííʼ, dóó ábiłní: éígaʼ doo bikʼiʼdiishtįįh da.

26 Áádóó Ammon ání: daʼ Iiʼ Sizį́ Ayóó Átʼéii hólǫ́ǫgo yinídlą́?

27 Ńtʼę́ę́ʼ ání, Aooʼ.

28 Áádóó Ammon ání: Díí éí Diyin God átʼį. Dóó Ammon ánáánéíłní: Díísh Iiʼ Sizį́ Ayóó Átʼéii átʼį́įgo yinídlą́, éí Diyin God átʼį́, yáʼąąsh dóó nahasdzáán tʼáá átʼé biyiʼ dóó bikáaʼgi hólónígíí áyiilaa?

29 Áádóó ání: Aooʼ, tʼáá ałtso nahasdzáán biyiʼ dóó bikáaʼgi siláhígíí áyiilaa; ákondi yáʼąąsh éí dóó shił bééhózin da.

30 Áádóó Ammon ííłní: yáʼąąshdi éí Diyin God dóó tʼáá ałtso Diyin yá nidaalʼaʼí dadiyinii kéédahatʼį́.

31 Áádóó aláahdi naatʼáanii Lamoni ání: Daʼ éí nahasdzáán biláahdi hazʼą́.

32 Áádóó Ammon ání: Aooʼ, dóó nihokááʼ dineʼé baʼáłchíní tʼáá ałtso yikʼi déezʼį́į́ʼ áádóó tʼáá ałtso nitsídahakees dóó ajéí yinízinígíí bił bééhózin; háálá bílaʼ yee hodeeyáadą́ą́ʼ tʼáá ałtsoní áyiilaa.

33 Áádóó aláahdi naatʼáanii Lamoni ání: Tʼáá ałtso baa hwíínílneʼígíí éí yinishdlą́. Daʼ Diyin Godísh anííłʼaʼ?

34 Áádóó Ammon ííłní: Nihokááʼ dineʼé éí nishłį́; dóó nihokááʼ dineʼé éí Diyin God yeełtʼéego ábiʼdiilyaa, dóó biʼIiʼ Sizį́ Diyinii yee shikʼidiilniiʼiiʼ díí diné bee nidiníítįįł shidííniid, áko tʼáá ákogi átʼéii dóó tʼáá aaníinii bił béédahodoozįįłjįʼ nidahodootʼish.

35 Áádóó éí Iiʼ Sizį́ Diyinii łahdóó shiiʼ hólǫ́, éí ééhózinii shaayiilé, dóó adziilii ałdóʼ sheʼoodląʼ bikʼehgo dóó Diyin God yinízinígíí.

36 Áko Ammon díí saad yee haadzíiʼgo, nahasdzáán ályaadę́ę́ʼ, dóó Adam ályaadę́ę́ʼ ałdóʼ, dóó nihokááʼ diné asih yę́ę tʼáá átʼé bídeetʼiʼígíí yee yił hoolneʼ, haneʼ ndaháasdzohyę́ę dóó Diyin bizaad dílzingo bee akʼedaʼashchínígíí diné ndeijaahígíí yił chʼííníʼą́ dóó yidááh neiyiiznil, éí Diyin yá yádaałtiʼii yaa hadahaasdzį́į́ʼ, azhą́ tʼáá níléídę́ę́ʼ bizází, Lehi, Jerusalemdę́ę́ʼ dah diinánígíí ndi.

37 Áádóó (aláahdi naatʼáanii dóó bá nidaalʼaʼí bichʼįʼ) diné doo kééhatʼínídi tʼáá ałtsogóó tʼádadíínánééʼ bizází yił chʼííníʼą́, dichin dóó dibááʼ yikʼee tiʼdahoozniiʼ yę́ę, dóó bichʼįʼ nahwiisnááʼ yę́ę, dóó ákótʼáo bił hoolzhiizh yę́ę.

38 Áádóó Laman dóó Lemuel, dóó Ishmael biyeʼké akʼíhjįʼ nilíinééʼ ałdóʼ yił chʼínííníʼą́, aooʼ, tʼáá ałtso akʼíhjįʼ danilíinééʼ yił chʼínííníʼą́; dóó haneʼ ndaháasdzohyę́ę dóó Diyin bizaad bee akʼedaʼashchínígíí tʼáá ńléí Lehi Jerusalemdę́ę́ʼ dah diinándóó kʼad hoolzhishjįʼ yił chʼíyiizʼą́.

39 Ákondi doo díí tʼéiyá da; háálá nináʼílyáago hootʼááł yee yił nahaasneʼ, éí nahasdzáán hadilnéhéédą́ą́ʼ hashtʼeelyaa; áádóó Christ doogáłígíí ałdóʼ yił ííshją́ą́ áyiilaa, dóó Bóhólníihii binaanish tʼáá átʼé yił ííjshją́ą́ áyiilaa.

40 Áádóó baa hoolzhiizh díí ałtso yaahaadzíiʼgo, dóó aláahdi naatʼáanii yił chʼíyiizʼą́ągo, aláahdi naatʼáanii bizaad tʼáá átʼé yoosdląąd.

41 Áádóó Bóhólníihii yéego yichʼįʼ sodiʼniilzin kóníigo: O Bóhólníihii, shaajiiníbaah; Nephi bidineʼé ląʼígo baa jiisinibaʼígíí bikʼehgo, shí, dóó shidineʼé nihichʼįʼ kónílééh.

42 Áádóó áko, díí yee haadzíiʼgo, niʼjįʼ naaʼíítłizh, bizééʼ hazlį́į́ʼ nahalingo.

43 Áádóó baa hoolzhiizh bá nidaalʼaʼí nídabidiiłtį́ dóó bichʼooní yił yah adeistį́, dóó tsáskʼeh yikááʼ ndeistį́; dóó bizééʼ hazlį́į́ʼ nahalingo naaki jį́ dóó naaki tłʼééʼ tʼóó sitį́, dóó bichʼooní, dóó biyeʼké, dóó bitsiʼké bikʼi daacha, Laman dineʼé ádáʼáłʼínígíí bikʼehgo, bąąh ádaʼasdįįdígíí biniinaa ayóó átʼéego yínííł daazlį́į́ʼ.